Shqyrtohen masa për ambasadorët « azilantë »

Moisiu : « Të ekstradohen të gjithë diplomatët që kanë dezertuar nga detyra »

15 shtator 2002 - TN
 
« Braktisja e detyrës së disa diplomatëve apo qëndrimi i tyre në vendet e huaja pas mbarimit të detyrës i ka shkaktuar shumë dëm Shqipërisë, për këtë arsye ndaj këtyre diplomatëve duhen marrë masa ligjore të cilat duhet të përcaktohen nga qeveria », ka theksuar kryetari shqiptar

 

Tiranë, 30 gusht 2002 / Manjolla Tërshana "Koha ditore" fq. 5

 

Presidenti shqiptar, Alfred Moisiu, gjatë një takimi me diplomatë shqiptarë në botë ka kërkuar hartimin e një ligji për të bërë të mundur ekstradimin e të gjithë ish-diplomatëve shqiptar të cilët kanë qëndruar në vendet e huaja për interesat e tyre personale.

 

Presidenti ka kërkuar që të forcohen masat ligjore ndaj të gjithë atyre diplomatëve të papërgjegjshëm të cilët jo vetëm që i shkaktojnë dëm diplomacisë shqiptare por në të njejtën kohë dëmtojnë me qëndrimin e tyre edhe imazhin e Shqipërisë në botë.

 

Braktisja e detyrës së disa diplomatëve apo qëndrimi i tyre në vendet e huaja pas mbarimit të detyrës i ka shkaktuar shumë dëm Shqipërisë, për këtë arsye ndaj këtyre diplomatëve duhet marrë masa ligjore të cilat duhet për përcaktohen nga qeveria”, ka theksuar ai.

 

Deri më tani asnjë diplomat shqiptar që ka qëndruar ilegalisht në vendin ku ka qenë i caktuar me detyrë nga shteti nuk është dënuar apo nuk ka mbajtur përgjegjësi për veprimin që ka bërë.

 

Ka shumë prej funksionarëve të ambasadave shqiptare në botë të cilët pasi mbarojnë mandatin e tyre diplomatik vendosin të qëndrojnë për të zhvilluar biznes në këto vende.

 

Presidenti Moisiu u bëri të ditur diplomatëve shqiptarë se shumë prej tyre janë të shkëputur nga komunitetet e shqipëtarëve të cilët trajtohen prej selive diplomatike shqiptare si shtetas të huaj. Presidenti kërkoi ndryshimin e menjëhershëm të kësaj situate.

Edhe kryeministri Fatos Nano lëshoi vërejtje të mëdha në drejtim të punës së diplomatëve shqiptarë në botë. Shumë prej diplomatëve tha kryeministri vegjetojnë në pritje, me një mungesë të çuditshme iniciative dhe fantazie.

 

Shumë herë këta diplomatë nuk kanë infornacion as mbi atë se çfarë ndodh në vendet ku ata përfaqësojnë Shqipërinë. Nano deklaroi se edhe mbi diplomatët do të ushtrohet presioni antikorrupsion dhe do të dënohet rreptsisht ai që abuzon me detyrën.

 

Po kështu Nano kritikoi ambasadorët shqiptareë të cilët kanë bërë shumë pak për t’i dhënë një shtysë marrëveshjes së përbashkët të Shengenit ballkanik apo krijimit të  Asamblesë parlamentare të vendeve të Ballkanit Perëndimor.

 

Ndërkaq kryeministri Nano ka gjetur rastin në mbledhjen me diplomatët shqiptarë në botë për të bërë të ditur qëndrimin e tij rreth prezencës dhe funksionimit të organizatave të huaja në Shqipëri.

 

Kryeministri tha se ai është i mendimit se roli i disa misioneve të huaja të ridimensionohet duke bërë që partneriteti midis tyre dhe Shqipërisë të rritet dhe të bëhet më interaktiv.

Copyright©2000-2002 Trepca.net - Të gjitha të  drejtat e rezervuara.