|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

OPINIONE

Refleksione

Pas kuintave të nji "mocioni"  

28 shkurt 2006 /TN

 

Nga Kabil Bushati

 

Papritun, javën e kaluar, sezoni dimnor i politikes shqiptare, pësoi nji tallazitje të fortë. Parlamenti, u kthye në arenë gladiatoresh nga socialistet genetikisht sherrxhij. Kërsiti grushti, u rrëmbyen mikrofone, u këputen linjat kompjuterike të votimit e u hoq softi i tyne, burrat e kombit u shanë si gratë llafazane.

 

Sa turp. Mu në mes të Europës, kur Kosova ka nisë bisedimet për statusin e saj dhe pret nga shteti amë shqiptar civilizim, fisnikëri e dinjitet. Shumëkush pyet, perse ngjau gjithë kjo përleshje, gjithë ky nonsens? Te gjithë kane të njejtën përgjigje.

 

Të gjithë qeveritarët, analistët politik e opinionistët kanë të njajtën përgjigje në maje të gjuhës. Deputetët rozë kerkojnë shkarkmin e kryeparlametares Topalli. . . u shkelën procedurat e votës së fshehtë. . . ajo nuk ka të drejtë t'i kerkojë doreheqjen prokurorit të përgjithshëm. . . ajo nuk ka të drejtë t'u ndalojë fjalën e lirë deputetëve të opozites, ajo ka bllokuar dekretin për gjyqtaren Gjinovefa Gaba, ajo. . .  etj etj.

 

Kryeministri Berisha shkon edhe ma larg, ai e lidh këtë mocion me qejfmbetjen e socialisteve për arrestimin e Luiza Hoxhës. . .

 

Pyesim, valle këtu fshihet lepuri?

 

Për mendimin tim lepuri fle tjera kund. Le të analizojmë me gjak të ftohte dhe me argumenta e deduktivitet. Gjithnji me kambë në tokë. A asht e vërtete së kryeparlamentarja Topalli qenka tregue kaq e ashpër me deputetet e opozitës në veçanti dhe me krejt socialistet në përgjithësi?

 

Mendoj së jo. Ajo akoma nuk ka pushuar nga puna Artan Banushin, ish sekretarin e PS-se së Shkodrës,  i cili vitet e fundit u atashue në parlament dhe pas 3 korrikut formalizoi grabitjen e veturave qeveritare nga ana e titullarëve që dorëzuan pushtetin.

 

Aty e gjeti dhe aty e la. Po kështu edhe në Shkodër, ku njiheri asht dhe kryetare e grupit të punës për reformimin e administratës së vjetër, akoma nuk ka pushuar nga puna asnji socialist, përkundrazi ka lanë pa punë tanë demokratët që hoqi nga puna Fatos Nanoja para 8 vjetësh.

 

Vetëm në vitin e mbrapshtë 1997, Fatos Nano hoqi nga administrata publike rreth 27. 000 demokratë dhe i zëvendësoi ata me lumpenin e shoqërisë shqiptare. Pra, në ketë rast kritikat zonjës Topalli, normalisht duhej t'i vinin prej demokrateve të Shkodrës, ashtu si i kane ardhë nga gazeta jonë.

 

Ndërsa opsioni për prokurorin e përgjithshëm asht shume skandaloz. Zonja Topalli asht deputete e popullit dhe ka të drejte me i kërkua dorëheqjen ashtu siç ka të drejte çdo qytetar i këtij vendi me kërkue dorëheqjen e kujtdo, biles dhe kryeministrit e presidentit. Këtu nuk ka asgja anormale.

 

Nuk ka asnji herezi ndaj figurës së prokurorit. Bile mazhoranca parlamentare duhet kritikue për faktin e thjeshte që nuk po e ban Shqipninë me prokuror të pavarun, ashtu si e kanë shumë vende demokratike të botës.

 

At'here a do të kishin gjetun birë miut së ku me u fute ish ministrat hajdute të Nanos të cilet edhe sot e kësaj nate që po shkruej këto rrjeshta i ke tue ba kokrrën e sefasë në lokalet ma luksoze të Tiranës.

 

Le të ndalemi pak tek procedura e votimit. Personalisht jam për votimin e fshehtë me kuti. Por realisht ajo procedurë le vend për diskutim. Nëse ajo nuk ishte plotësisht e fshehtë, at'herë lind pyetja së si qenkan ba votimet gjate 8 vjetëve që qeverisën socialistët!?

 

Pasi me ketë sistem kompjuterik janë votuar në parlament të gjitha institucionet kushtetuese që ka sot ky vend. Dhe janë miratuar jo pak por rrumbullak 108 nëpunës të nivelit të lartë.

 

A thue këto institucione qenkan të gjithë jo legjitime, sepse vota e deputeteve të mëparshëm nuk paska qene e fshehte?! Pra siç shihet edhe nga argumentat e siper shënuar, faktet që paraqitin deputetet socialiste jane teper anemike dhe ma së minore. të gjitha në kete rast flasin në favor të kryeparlamentares. po at'here ku fshihet lepuri, a fshihet gja pas kuintave?

 

Mendoj së po. Zhurma dhe zallamahia kundër Topallit nuk asht asgja ma shume së sa nji furtune në gote. Pas kuintave fshihet realisht qeveria Berisha. Atyre iu duhet nji precedent për të sulmuar qeverinë.

 

Deputetet socialiste kane ra në dilemen hamletjane: "to be or not to be". Ata deri tashti, që të justifikojnë qenien në salle në sytë e elektoratit,  nuk kane qene në gjendje që t'i paraqesin parlamentit asnji akuze për korrupsion kundër qeverise në përgjithësi apo ndonji ministri në vecanti, që të bante shkak për mocion ndaj qeverise së tanishme. Sepse sipas traditës ndërkombëtare parlamentare,  mocionet paraqiten kunder qeverise e kryeministrit.

 

Por deri me sot Berisha dhe kabineti i tij nuk ua ka dhanë ketë kënaqësi  socialisteve. Berisha deri tashti asht kritikue vetem së akoma nuk po godet me dore të hekurt kupolen e korrupsionit, por jo së asht vete i korruptuar apo ministrat e tij. Bile asht i pa falshëm altruizmi i tij ndaj kupolës së socialisteve.

 

Akoma nuk janë përballë me drejtësinë ata që për 8 vjet në opozite Partia Demokratike dhe lideri i saj Berisha i akuzuan si hajdute e të korruptuar si p. sh Cac Angjeli, Bashkim Fino, Fatos Nano, Xhoana Nano, Spartak Braho, Edi Rama, Gramoz Ruci,  Duka i krimit, klani i Zemunit,  Eskobari i droges etj etj.

 

Ditën e diele, kur zonja Topalli kishte zbrite në aeroportin Kenedi e ftuar me të gjitha gratë kryeparlamentare nga Organizata e Kombeve të Bashkuara, Berisha doli në darkë në nji konference shtypi të jashtëzakonshme tepër i egërsuar e mujshar. Kjo konference u emetue nga të gjitha mediat elektronike shqiptare e plote. Kryeministri, pa dashje ra në grackën që i kishin ngrite socialistet.

 

Ai publikisht akuzoi me dokumente zyrtare nominalisht Ben Blushin, për përvetësim fondesh publike nga ana e bashkëshortes në 12 tendera në shumën prej 250 milion lekesh. Akuzoi Gramoz Rucin e Arta Daden për inkriminimin e fëmijëve të tyre.

 

Akuzoi si maniak seksual Blendi Klosin, për të vijue me Gjinovefa Gaben për tregti droge të nji njeriu tepër të afërt të saj. në fakt këto akuza patjetër që nuk janë halucinacione të kryeministrit, por ato duheshin artikuluar nga prokurori i përgjithshëm, por të nesërmen prokuroria nuk mori përsipër së dispononte dosja për personat në fjalë.

 

Pra kemi nji diskordancë mes qeverise së kryesuar nga Berisha dhe kryeprokurorit Sollaku, gje e cila asht pohuar prej muajsh nga kryeministri dhe stafi i tij. Pra kemi nji impas mes qeverise dhe institucionit të akuzës së shtetit, pasi Shqipnia nuk ka prokuror të pa varun. Tashti Berisha asht në dileme. Atij i duhet që të provoje para drejtësisë vërtetësinë e akuzave të tija.

 

Ne të kundërt, do të jene të akuzuarit që do të kthehen në akuzues(si Dimitrovi). Kete, të akuzuarit roze e manifestuan ditën e hane para kamerave televizive. Po ketë, dite në parlament, deputetet socialiste, treguan me force së nuk e kane në plan të tërhiqen nga agresiviteti i tyne. Biles njeri syresh tundte prangat (si Zhrinovski) mu nën hundët e presidiumit të kuvendit. (?!).

 

Sipas të gjitha prognozave, gjate kësaj jave në vijim, nuk do të kemi asnji tërheqje nga ana e socialisteve. Ata tashma kane dalë jashta kuintave e kane marrë skenën e teatrit politik parlamentar, të gatshëm për të provokuar ngjarje ma të hidhuna. Berisha duhet ta zhbllokoje sa ma shpejt ketë situate të pa këndshme e cila shume shpejt mund të precipitojë në shkalle ma të gjanë, gja për të cilën deri tash nuk ka dhanë asnji shej luajaliteti.

 

Për medimin tim ai duhet deri nga fundi i javës apo nga fillimi i javës tjetër të mbledhë strukturat e Partisë Demokratike në qendër, kryesinë dhe po të jete e nevojshme edhe Këshillin Kombëtar të partisë (pasi ka shtatë muaj që kryesia e PD-se nuk asht mbledhë) dhe të vendosë kolegjialisht hapat e matejshëm që duhen ndërmarrë nga ana e qeverisë për zhbllokimin e shpejtë të kësaj situate.