Bush e Berluskoni bisedojnë edhe për pavarësinë e Kosovës

Sot në Vashington: Bush e Berluskoni bisedojnë edhe për pavarësinë e Kosovës

28 shkurt 2006 /TN

Çështjen e pavarësisë së Kosovës në agjendën e bisedimeve mes Bushit e Berluskonit e kanë konfirmuar burimet qeveritare italiane, në Romë, u tha të hënën në mbrëmje në emisionet informative të dy qendrave më të mëdha radiotelevizive italiane – RAI dhe MEDIASET.

Eengjëll KOLIQI

Romë, 28 shkurt 2006. – Siç kanë informuar në emisionet e mbrëmshme informative, dy qendrat më të mëdha radiotelevizive italiane – RAI dhe MEDIASET, gjatë vizitës në Vashington dhe në Nju Jork, kryeministri italian Silvio Berluskoni, me presidentin e SHBA-ve Xhorxh Bush (George W. Bush), në bisedimet që prekin politikën e jashtme të dy vendeve dhe përgjithësisht të bashkësisë ndërkombëtare, në bisedimet zyrtare do të merren edhe me çështjen e pavarësisë së Kosovës. U tha se kjo është konfirmuar nga burimet qeveritare, të Këshillit të Ministrave të Italisë.

Berluskoni, i cili ka udhëtuar dje për në Shtetet e Bashkuara të Amerikës, do të marrë Çmimin "Intrepid freedom award 2006", që u jepet personaliteteve të larta botërore, për kontribut të jashtëzakonshëm për lirinë e popujve. Në arsyetimin e dhënies së këtij çmimi thuhet se Berluskonit iu dha për lidershipin e guximshëm kundër terrorizmit dhe për miqësinë e tij të qartë me SHBA-të.

Sipas protokollit Bushi e Beluskoni do të bisedojnë në paraditen e së martës, rreth një orë, mbi këto tema: gjendja e vështirë në Irak dhe vendimi i Italisë për tërheqjen e trupave ushtarake nga andej brenda vitit 2006, gjendja në Lindjen e Mesme pas fitores së Hamasit në zgjedhjet palestineze, gjendja politike dhe e sigurisë në Afganistan, problemet e zhvillimeve nukleare në Iran, çështja e pavarësisë së Kosovës dhe zhvillimet e brishta në standardet e demokracisë në Rusi.

Silvio Berluskoni pastaj do të flasë edhe në Kongresin e SHBA-ve. Këtë nder deri më tash e kanë pasë edhe tre kryeminstra italianë: Alcide De Gasperi (më 24 shtator 1951), Betino Kraksi (Bettino Craxi) (më 6 mars 1985) dhe Xhulio Andreoti (Giulio Andreotti) (më 7 mars 1990).

Pasi ta marrë Çmimin e Lirisë Berluskoni, në Nju Jork, do të drekojë në një anije speciale të luftës, të shpallur muze, në të cilën hyrja kushto 1000 dollarë, dreka në një tryezë të mirë kushton 50 mijë dollarë, kurse dreka në tryezën e fituesve të çmimeve të tilla kushton 100 mijë dollarë.