|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Lajmet e ditës

27 shkurt 2006 /TN /QIK

Përmbajtja:

• Të parandalohet shfaqja e gripit vdekjeprurës, thotë presidenti Sejdiu

• Problemi i Mitrovicës do të zgjidhet në kuadër të reformës së pushtetit lokal, thotë Haziri

• "Beogradi nuk guxon të lejojë që brenda kufijve të Serbisë të krijohet një shtet tjetër", thotë Koshtunica

• Arrestohet vrasësi i vepimtarit Enver Hadri dhe dëshmitar kyç në gjykimin kundër Mollosheviqit

• LDK-ja drejton Ministrinë e Rendit, AAK atë të Drejtësisë

• Policia spanjolle e ka arrestuar vrasësin e dyshuar të Enver Hadrit

• Mbrëmë në Deçan - një i vrarë e pesë të plagosur

• Ahtisari shkon në një vizitë konsultative në Beograd

• Petersen takohet sot në Vjenë me përfaqësuesit e organizatave të ndryshme për zhvillimet në Kosovë

• Grupi politk ka shqyrtuar vërejtjet në letrën e Ahtisarit

• Në Malme të Suedisë me një akademi përkujtimore u përkujtua Presidenti Ibrahim Rugova

• Solana thotë se marrëveshja ndërmjet pushtetit dhe opozitës në Mal të Zi për referendum ka rëndësi thelbësore

• Ministri Haziri tha se institucionet po punojnë në procesin e kthimit të të zhvendosurve

• Standardi i katërt, kthimi i qëndrueshëm dhe të drejtat e pakicave është njëri ndër më të rëndësishmit

• SHPK dhe Qendra për Punë Sociale filluan implementimin e projektit për persona që kërkojnë lëmoshë

• Doris Pak kundërshton qëndrimin e Solanës për referendumin në Mal të Zi

• Berisha akuzon disa zyrtarë të lartë socialistë se po mbrojnë interesat e krimit të organizuar

• Ministrat e jashtëm të BE-së sot diskutojnë për rajonin e Ballkanit

• Dinosha thotë se pjesa më e madhe e shqiptarëve do të votojnë për pavarësinë e Malit të Zi

• Më 2 mars skadon afati për parashtrimin e kërkesave për marrjen e shtetësisë së Maqedonisë

• Në një shpërthim aksidental në një fabrikë armësh në Izrael, janë plagosur 4 persona

• Në Jemen është ekzekutuar një i dënuar për vrasjen e 3 misionarëve të krishterë amerikanë më 2002

• Në një sulm me mortaja në distriktin shiit të Bagdadit janë vrarë 4 persona

• Në Bagdad hiqet ora policore pasi është kthyer deri diku normaliteti

• Në 2 shpërthime në zyrat e guvernatorëve në qytetet iraniane Dezful dhe Abadan janë plagosur 4 vetë

• Të burgosurit talibanë marrin kontrollin në sektorin e femrave në burgun kryesor të Kabulit¨

• Proces gjyqësor për gjenocidin në Ballkan

• Kryengritësit në Irak vrasin të paktën 29 vetë

• Sipas një gazete agjentët gjermanë i kanë dorëzuar SHBA planet e mbrojtjes së Sadam Huseinit

• Ushtarët vrasin të paktën 16 rebelë maoistë në Nepal

• Vritet një telekronist në Moskë

• Në Francë protestohet kundër antisemitizmit

 
Të parandalohet shfaqja e gripit vdekjeprurës, thotë presidenti Sejdiu

 

Prishtinë, 27 shkurt 2002- Duhet parandaluar shfaqjen e gripit të shpezëve tek njerëzit që të mos merremi me pasoja, - vlerësoi Presidenti Fatmir Sejdiu pas takimit me zëvendësministrin e Bujqësisë Tomë Hajdaraj.

Presidenti Sejdiu sot pasdite në takim me delegacionin e Ministrisë së Bujqësisë, ka biseduar për mënyrat e bashkëpunimit në përmbushjen e obligimeve të ministrisë. Ai tha se Kosova duhet ta zërë hapin në zhvillimin e bujqësisë dhe që "të jetë koherente me zhvillimet e përgjithshme të kësaj fushe me standardet evroipiane".

 

Presidenti tha se është me rëndësi ndryshimi cilësor i mentalitetit tonë, dhe që ekonomia agrare të mos lihet anash. Eshtë e gabueshme pikëpamja, tha më tej ai, që mjafton të sigurohet buka sikurse apo edhe si punë e detyrueshme e bujqësisë, por që ajo të punohet me planifikime të mira dhe që të arrihen rezultate kulminante me aplikimin e teknologjisë moderne.

 

"Zhvillimi i bujqësisë do të jetë një mbështetje e fuqishme e zhvillimeve të përgjithshme ekonomike edhe pas definimit të statusit të Kosovës, që ne të sigurojmë kualitetin tonë të prodhimeve dhe të industrisë ushqimore, dhe të gjithë potencialeve të tjera që do të jenë një kusht i integrimit të Kosovës në rrjedhat evropiane", tha Presidenti Sejdiu, i cili.

u shpreh për një mbështetje të fuqishme të Ministrisë së Bujqësisë që jo dhe institucionet tjera përkatëse të bëjnë ç‘është e mundur që ta pengojnë përhapjen e gripit të shpezëve te njerëzit.
"Ne jemi në mbështetje të plotë me të gjitha potencialet tona. Absoltisht është shumë e favorshme që të bëhet preventiva, të mos lejohen mundësi që të merremi me pasoja, pasi ato kushtojnë shumë dhe do ta vënin Kosovën në pozitë të palakmueshme", tha Sejdiu.

Ndërsa, zëvendësministri Hajdaraj tha se ka kërkuar nga Presidenti që të bëhet trysni edhe te faktori ndërkombëtar dhe vendor, që siç tha ai, "agrari i Kosovës të mbështetet edhe në aspektin financiar". Ai kërkoi krijimin e fondeve për përparimin e bujqësisë dhe për përballimin e fatkeqësive elementare.
Në një takim tjetër Presidenti Sejdiu ka kërkuar që Serbia t'i japë fund lojës me fatin e të zhdukurve.

"Nga ana ime do të angazhohem me mundësitë e mia institucionale që kjo çështje të ngritet në nivel edhe më të lartë dhe s'besoj se do të pushojë edhe aktiviteti i institucioneve të tjera në mënyrë që të ndërpritet kjo lojë që ende Serbia po e vazhdon me njerëzit dhe trupat e tyre, të cilët të gjallë apo të vdekur t'u kthehen familjeve të tyre", tha Sejdiu pas takimit me shefen e zyrës për të pagjeturit, znj.Nysrete Kumnova.

Zonja Kumnova i ka kërkuar Presidentit Sejdiu që çështjen e të zhdukurve ta ketë prioritet dhe që sa më parë t’i jipet fund këtij ankthi shtatvjeçarë. "Presidenti premtoi se do të angazhohet maksimalisht për këtë çështje dhe ta shuajmë këtë dhembje tonën njëherë e përgjithmonë, sado që të jetë i hidhur apo i gëzuar të mbyllet kjo plagë jona", tha znj.Kumnova.

Presidenti Sejdiu para dite është takuar edhe me kryetarin e Prishtinës Ismet Beqirin. Presidenti tha se për punë të përbashkëta janë të gatshëm të gjithë, duke e vlerësuar rolin e veçantë që ka Prishtina si kryeqendër politike administrative e Kosovës dhe për shumë ççështje të tjera. Ai tha se Prishtina është e para që do të sfidohet dhe e para që do të ketë zhvillimin e gjithëmbarshëm të Kosovës edhe në aspektin struktural duke dëshiruar një menagjim sa më të mirë të Prishtinës, sikurse edhe të gjitha komunave të tjera.

Ismet Beqiri, kryetar i komunës së Prishtinës, i cili ia ka uruar zgjedhjen në postin më të lartë të shtetit kërkoi që Prishtina të ketë trajtim të veçantë, edhe në aspektin juridik dhe në çështjet tjera.

 

 

Problemi i Mitrovicës do të zgjidhet në kuadër të reformës së pushtetit lokal, thotë Haziri

 

Prishtinë, 27 shkurt 2002 - Ministri i Pushtetit Lokal, Lutfi Haziri, në një takim me përfaqësuesin e UNMIK ut për rajonin e Mitrovicës, Xherard Galuçi, tha se problemi i Mitrovicës do të zgjidhet në kuadër të reformës së pushtetit lokal.

Në këtë takim është diskutuar për bashkërendimin e aktiviteteve mes pushtetit lokal dhe administratës së UNMIK ut që kanë të bëjnë me zgjidhjen e problemeve të komuniteteve pakicë e shumicë të rajonit të Mitrovicës ku ndodhen 6 komuna.

"Po punojmë bashkërisht që t'i bashkërendojmë aktivitetet me të gjitha komunat e rajonit, me problemin e të zhvendosurve, me problemin e romëve dheme aksione të tjera që kanë të bëjnë edhe me pakicën, por edhe shumicën, duke eliminuar tensionet e mundshme gjatë zgjidhjes së statusit", tha Haziri.

Ndërkaq administratori rajonal i UNMIK ut në Mitrovicë, Xherard Galuçi, tha se angazhohet për intensifikimin e aktiviteteve në përmirësimin e jetës së qytetarëve në këtë rajon.

 

 

"Beogradi nuk guxon të lejojë që brenda kufijve të Serbisë të krijohet një shtet tjetër", thotë Koshtunica

 

Beograd, 27 shkurt 2002 - Në mbledhjen e jashtëzakonshme të Kuvendit të Serbisë kushtuar Kosovës, kryeministri serb Vojisllav Koshtunica ka deklaruar se "mbetja e Kosovës në Serbi dhe ekzistenca e popullit serb në Kosovë, janë qëllime themelore për shkak të të cilave Serbia ka hyrë në bisedime politike për statusin e ardhshëm".

Sipas Koshtunicës, e vetmja gjë që Beogradi nuk guxon të lejojë është që brenda kufijve të shtetit të Serbisë të krijohet një shtet tjetër. "Nuk mund të lejojmë këtë sepse ai shtet tjetër do të shkëpuste një pjesë të territorit tonë dhe me të do ta çonte në pafundësi edhe të drejtën ndërkombëtare dhe të drejtat e njeriut, parimet elementare të drejtësisë dhe të moralit e tarshëgimisë kulturore".

 

Koshtunica thotë se për Kosovën ofron zjidhjen e cila ka karakter të "kompromisit historik".
"Midis opsionit të pavarësisë dhe opsionit të autonomisë së zakonshem standarde sipas modelit evropian, qëndron opsioni i autonomisë së zgjeruar thelbësore, të cilën jemi të gatshëm ta përkufizojmë konkretisht në bisedat direkte me përfaqësuesit shqiptarë", është shprehur Koshtunica sot në Kuevendin e Serbisë.

 

Ndërkaq sipas koordinatorit të ekipit negociator serb për Kosovën Leon Kojen, bazën e zgjidhjes së statusit të ardhshëm të Kosovës e përbën kompromisi politik pa ndryshimin e njëanshëm të kufijve të njohur ndërkombëtarisht dhe të destabilizimit politik që ajo merr me vete.

Kojen tha se zgjidhja për statusin e Kosovës ndodhet në platformën e autoritetev shtetërore të Serbisë, por siç tha, është herët të publukohen pjesë të saj. Në këtë mënyrë do të zbuloheshin pa nevojë kartat duke publikuar hollësi të zgjidhjes së propozuar, tha Kojen para deputetëve të Serbisë.

 

 

Arrestohet vrasësi i vepimtarit Enver Hadri dhe dëshmitar kyç në gjykimin kundër Mollosheviqit

 

Madrid, 27 shkurt 2002 - Policia spanjolle e ka arrestuar Veselin Vukotiqin (49), vrasësin e veprimtarit shqiptar nga Kosova, Enver Hadri, i cili qe vrarë në një atentat më 1990, i cili gjithashtu kishte dokumente që inkriminonin Sllobodan Millosheviqin, njofton AP.

Enver Hadri është vrarë nga tre atentatorë më 25 shkurt 1990 në Bruksel para një semafori me armë shurdhuese. Vukotiq e kishte qëlluar Hadrin në kokë me revole.

Sipas mediave spanjolle vrasësit e tjerë të Enver Hadrit janë identifikuar si Andria L., Darko A. dhe Veselin V. Policia spanjolle tha se Vukotiq kërkohej për vrasjen e Enver Hadrit dhe për dy vrasje tjera në diskotekat jugosllave. Që të tre atentatorët ishin në shërbim të Shërbimit sekret jugosllav, bënte të ditur aso kohe Ministria e Informimit e Kosovës.

Vukotiq është arrestuar në aeroportin Barahas të Madridit në bazë të dy fletarrestimeve ndërkombëtare dhe vinte me aeroplan nga Parisi. Ai jetonte me gruan dhe vajzat e tij në Barcelonë.

Vukotiq mund të jetë dëshmitar kyç në gjykimin për gjenocid kundër Mollosheviqit në Tribunalin për krime lufte të Kombeve të Bashkuara në Hagë.

Policia spanjolle thotë se dokumentet që kishte Hadri e lidhnin Milosheviqin me rreth 34 vrasës të nivelit të lartë.

 

 

LDK-ja drejton Ministrinë e Rendit, AAK atë të Drejtësisë

 

Prishtinë, 27 shkurt 2002 - LDK-ja do të udhëheqë me Ministrinë e Rendit, ndërsa AAK-së, partnerit në koalicion i mbetet udhëheqja me Ministrinë e Drejtësisë. Kështu ka vendosur sot Kryesia e LDK-së, bëri të ditur Eqrem Kryeziu, nënkryetar.

Emri i ministrit që do të drejtojë Ministrin e Rendit do të dihet gjatë javës. Sipas Kryeziut LDK-ja brenda javës do të përcaktohet për individin apo për kandidatin fillimisht dhe më pas do të përcaktohet po gjatë javës për emrin e ministrit.

"Unë shpresoj që brenda javës do të përcaktohemi për individin apo grupin e kandidatëve. Dhe po brenda javës do të përcaktohemi edhe për njeriun që do të udhëheqë Ministrinë e Drejtësisë", tha Kryeziu.

Kryesia e LDK-së pas votimit të bërë ka emëruar anëtar të Kryesisë së Kuvendit Sabri Hamitin, që për kundërkandidat ka pasur Lulzim Zenelin. Vendi i anëtarit të kryesisë ishte i zbrazët pas zgjedhjes në postin e Presidentit të Kosovës të Fatmir Sejdiut, i cili ishte anëtar i Kryesisë së Kuvendit..

Vendimin e sapo marrë nga LDK-ja për të drejtuar Ministrinë e Rendit, Eqrem Kryeziu e quajti paksa të vonuar, por të arsyeshëm, pasi Presidenti Ibrahim Rugova, lideri shumëvjeçar i shqiptarëve, u nda nga jeta.

 

 

Policia spanjolle e ka arrestuar vrasësin e dyshuar të Enver Hadrit

 

Madrid, 27 shkurt 2002 - Policia spanjolle e ka arrestuar Veselin Vukotiqin, vrasësin e dyshuar të aktivistit shqiptar nga Kosova Enver Hadri.

Siç njofton agjencia DPA, Vukotiq është arrestuar në aeroportin Barahas të Madridit në bazë të dy fletarrestimeve ndërkombëtare.

Policia spanjolle tha se Vukotiq kërkohej për vrasjen e Enver Hadrit dhe për dy vrasje tjera në diskotekat jugosllave. Enver Hadri është vrarë nga tre atentatorë më 25 shkurt 1990 në Bruksel para një semafori me armë shurdhuese. Sipas mediave spanjolle vrasësit tjerë të Enver Hadrit janë identifikuar si Andria L., Darko A. dhe Veselin V.

 

 

Mbrëmë në Deçan - një i vrarë e pesë të plagosur

 

Deçan, 27 skurt 2002 - Mbrëmë në Deçan një person është vrarë dhe pesë të tjerë janë plagosur në qendër të qytetit, pas tyë shtënave me armë zjarri në një lokal.

Zëdhënësi i SHPK-së në Pejë Avni Morina ka thënë se rasti ka ndodhur pas orës 19:00, në rrugën "Dëshmorët e Kombit" në Deçan.

Me atë rast një person ka mbetur i vdekur në vend, ndërsa pesë të tjerë janë plagosur, njëri prej tyre rëndë, dhe janë dërguar në spitalin e Pejës për mjekim. Policia po i vazhdon hetimet.

Siç njoftohet nga burime të tjera, në këtë incidenti një apo më shumë persona të panjohur kanë shtënë me rafalë automatiku në drejtim të një lokali, në kohën kur në të kishte shumë mysafirë.

Sipas mediave, ka mbetur i vdekur në vend Afrim Osaj nga Deçani, ndërsa plagë të rënda ka pësuar Zekë Gjikokaj, pronar i lokalit ku ndodhi ngjarja. Plagë të lehta kanë marrë edhe dy djemtë e Zekës, që po ashtu ishin në lokal, Kastriot e Taulant Gjikokaj, sikur edhe dy të afërm të tyre Asllan e Kreshnik Gjikokaj.

Edhe këta, pas ndihmës së parë të dhënë në Deçan, janë dërguar në spitalin e Pejës.

 

 

Ahtisari shkon në një vizitë konsultative në Beograd

 

Beograd - Prishtinë, 27 shkurt 2002 - I dërguari i posaçëm i Kombeve të Bashkuara për statusin e Kosovës, Marti Ahtisari shkon sot për një vizitë konsultative në Beograd në prag të vazhdimit të rrethit të dytë të bisedimeve për statusin politik të Kosovës, të caktuar për 17 mars. Ndërkaq në Prishtinë Ahtisari do të arrijë më 1 mars.

Para këtyre vizitave, i dërguari i posaçëm i Kombeve të Bashkuara për statusin e Kosovës, Marti Ahtisari ka paralajmëruar delegacionet e Prishtinës dhe Beogradit se ka zgjeruar agjendën e tij dhe se nuk do të flitet vetëm për decentralizimin.

 

 

Petersen takohet sot në Vjenë me përfaqësuesit e organizatave të ndryshme për zhvillimet në Kosovë

 

Vjenë, 27 shkurt 2002 - Shefi i UNMIK ut Soren Jesen Petersen sot në Vjenë do të takohet me përfaqësuesit e organizatave të ndryshme me të cilët do të bisedojë për zhvillimet e fundit në Kosovë. Ndërkaq të marten në Bruksel Soren Jesen Petersen do të takohet me Sekretarin e Përgjithshëm të NATO s Jap De Hop Skefer dhe Përfaqësuesin e Lartë për Politikë të Jashtme dhe Siguri të Bashkimit Evropian, Havier Solana

 

 

Grupi politik ka shqyrtuar vërejtjet në letrën e Ahtisarit

 

Prishtinë, 27 shkurt 2002 - Grupi politik i Kosovës ka shqyrtuar vërejtjet në letrën e Ahtisarit dërguar këtij grupi. Koordinatori i Grupit politik Blerim Shala tha se përgjigjet në pyetësorin e letrës së Marti Ahtisarit do të jepen deri më 1 mars.

Sipas tij, përgjigjet në pyetësorin e të deleguarit të posaçëm të OKB-së për statusin e Kosovës, Marti Ahtisaari, do të jenë të gatshme para se ai të vijë në Kosovë, më 1 mars.

"Kemi pasur takimin e Grupit Politik, në të cilin kemi shqyrtuar çështjen e pyetësorit të cilin z. Ahtissari ia ka drejtuar delegacionit të Kosovës me 10 shkurt të këtij viti", ka thënë Shala, duke shtuar se grupi i cili është mandatuar nga Grupi Politik ka përgatitur propozimin e parë. "Ne e kemi pasur leximin e parë sot (të dielën) dhe nesër (të hënën) do ta miratojmë versionin final, i cili do t'i dërgohet pastaj delegacionit të Kosovës për miratim", tha Shala.

Pyetësori i Ahtisaarit, i cili ka të bëjë me çështje të veçanta, sa i përket të drejtave të njeriut, të drejtave të komuniteteve pakicë, lëvizjes së qarkullimit, interesit vital, etj., ka mundësi të përdoret nga Ahtisari dhe ekipi i tij për përpilimin e dokumenteve të veçanta kur të vijë momenti për arritjen e marrëveshjes politike.

 

Në pyetësorin e Ahtisaarit, i cili sipas Shalës nuk përmban asnjë pyetje diplomatike, është kërkuar përgjigje rreth mbrojtjes ligjore të të drejtave të pakicave. Në këtë kuadër janë kërkuar masa legjislative për të nxjerrë rezultate nga garancitë themelore, përfshirë ato në ushtrimin e të drejtave kulturore dhe politike nga komunitetet etnike.

 

 

Në Malme të Suedisë me një akademi përkujtimore u përkujtua Presidenti Ibrahim Rugova

 

Malme, 27 shkurt 2002 - Në kryeqytetin Suedisë Malme, dega e Lidhjes Demokratike të Kosovës mbajti një akademi përkujtimore kushtuar Presidentit të parë të Kosovës, Ibrahim Rugova, ku morën pjesë shumë anëtarë dhe simpatizantë të LDK së.

Kryetari i degës së LDK-së në Suedi, Hysen Ibrahimi në fjalën e tij tha se "përkujtojmë me mall dhe pikëllim njëmujorin e ndarjes nga jeta të ish Presidentit të Kosovës Ibrahim Rugova, të cilën jetë ia kushtoi Kosovës dhe kombit shqiptar".

"Një muaj pa Presidentin, një muaj pa këshillat e tij, një muaj pa intervistat e tij, një muaj pa kërkesën e tij për njohjen e Pavarësisë së Kosovës. Një muaj në heshtje. Të tillë si Presidenti Rugova, vijnë në këtë botë të heshtur, bëjnë një vepër të madhe në heshtje dhe po në heshtje ikin nga kjo botë...?! Mbesin legjenda. Kurse Ju o i madhi President, mbete legjendë e Dardanisë antike", tha Ibrahimi dhe shtoi:

"Ne tani në vend të lotëve për Ty, në vend të mallëngjimit dhe të pikëllimit, për rrugën tuaj që na trasove, për gjurmët e tua që kudo lanë shenja pavarësie, do të vimë në heshtje pas teje, me qetësinë e ngushëllimit duke të kujtuar prore".

Poashtu foli edhe Ali Rexhepi, sekretar i kësaj dege, i cili në fjalën e tij tha se "Presidenti Ibrahim Rugova u nda nga jeta në mënyrë të padrejtë në prag të përmbushjes së idealit të tij jetësor - realizimit të Kosovës së pavarur dhe sovrane me njohje zyrtare ndërkombëtare".

Presidenti Rugova tërë jetën e tij ia kushtoi Kosovës dhe ai nuk u dorëzua as në momentet e fundit të jetës së tij, duke punuar për vendin e vet, Kosovën e tij të dashur, tha Rexhepi.

Në këtë akademi përkujtimore u lexuan disa telegrame, në mesin e tryre edhe ai i ministrit të Pushtetit Lokal dhe anëtar i Kryesisë Qëndrore të LDK-së Lutfi Haziri.

 

 

Solana thotë se marrëveshja ndërmjet pushtetit dhe opozitës në Mal të Zi për referendum ka rëndësi thelbësore

 

Bruksel, 27 shkurt 2002 - Në kumtesën e lëshuar nga kabineti i përfaqësuesit të lartë të Bashkimit Evropian për Politikë të Jashtme dhe Siguri Havier Solana np prag të takimit të Këshillit të Ministrave të BE së, thuhet se marrëveshja ndërmjet pushtetit dhe opozitës në Mal të Zi rreth modaliteteve për referendum është e një rëndësie thelbësore për një proces legjitim të referendumit.

 

Solana ka vlerësuar pozitivisht vendimin e opozitës malazeze rreth rekomandimeve dhe të njëjtën gjë pret edhe nga partitë e koalicionit qeverisës. Ve ndimi i koalicionit qeverisës pritet të publikohet gjatë ditës së sotme, ndërkohë që nga Lëvizja për Pavarësinë e Malit të Zi e afër me koalicionin në pushtet ka rekomanduar që propozimi i Bashkimit Evropian duhet të miratohet.

Referendumi për pavarësimin e Malit të Zi sipas të gjitha gjasave do të mbahet me datën 14 maj, ku në të njejtën kohë janë paralajmëruar edhe zgjedhjet lokale.

 

 

Ministri Haziri tha se institucionet po punojnë në procesin e kthimit të të zhvendosurve

 

Prishtinë, 27 shkurt 2002 - Pavarësisht nga bisedimet për statusin final institucionet e Kosovës po punojnë normalisht në procesin e kthimit të të zhvendosurëve nga Serbia në Kosovë.

 

Kështu deklaroi Ministri i Pushtetit Lokal, Lufti Haziri pas takimit me përfaqësuesion e Unionit të të zhvendosurëve serbë me seli në Beograd Zllatko Mavriq. Ndryshe qindra serbë të zhvendosur në Serbi kanë ardhur në Kosovë për të vizituar varrezat e të afërmëve të tyre.

Ministri Haziri tha se institucionet kosovare e kanë obligim krijimin e kushteve për ata që dëshirojnë të kthehen. Ai njoftoi mysafirin e tij se Qeveria e Kosovës ka ndarë për procesin e kthimit 4.5 milionë euro për këtë vit.

 

 

Standardi i katërt, kthimi i qëndrueshëm dhe të drejtat e pakicave është njëri ndër më të rëndësishmit

 

Prishtinë, 27 shkurt 2002 - Standardi i katërt, kthimi i qëndrueshëm dhe të drejtat e bashkësive dhe pjesëtarëve të tyre është njëri ndër standardet më të rëndësishme që i është përcaktuar Qeverisë së Kosovës për ta përmbushur para përcaktimit përfundimtar të statusit të Kosovës.

Sa është përmbushur ky standard kur Qeveria e Kosovës ka formuar një fond prej më shumë se 11 milionë eurosh për kthimin e të zhvendosurëve, kryesisht të minoritetit serb, Avni Arifi, koordinator i Qeverisë për standarde, u shpreh se kjo çështje mund të shihet në dy aspekte.

 

 

SHPK dhe Qendra për Punë Sociale filluan implementimin e projektit për persona që kërkojnë lëmoshë

 

Prishtinë, 27 shkurt 2002 - Shërbimi Policor i Kosovës në bashkëpunim me Qendren për Punë Sociale, gjykata e subjekte tjera filluan së implementuari projektin për persona që kërkojnë lëmoshë. Dukuria e personave që kërkojnë lëmoshë, sipas të dhënave të SHPK së është mjaft e shprehur në Kosovë.

Eliminimi i dukurisë së kërkimit të lëmoshës nëpër rrugë nuk është vetëm problem social, por edhe i sigurisë. Andaj, sipas fjalëve të zyrtarit për informim në SHPK, Arber Beka, realizimit të këtij projekti i është qasur me seriozitet të plotë. Ai tha se përkatësia kombëtare, moshore e gjinore e personave që kërkojnë lëmoshë nëpër rrugë është e ndryshme.

 

 

Doris Pak kundërshton qëndrimin e Solanës për referendumin në Mal të Zi

 

Bruksel, 27 shkurt 2002 - Eurodeputetja kristiandemokrate gjermane, Doris Pak ka kundërshtuar hapur deklaratën e Havier Solanës se Bashkimi Evropian do të mirëpriste një pjesëmarrje në favor të pavarësisë së Malit të Zi në rast se do të kalohej shifra 55%. Sipas eurodeputetes gjermane në çdo lloj demokracie vendimet merren vetëm me 50 + 1 për qind, njofton DV.

 

 

Berisha akuzon disa zyrtarë të lartë socialistë se po mbrojnë interesat e krimit të organizuar

 

Tiranë, 27 shkurt 2002 - Kryeministri Sali Berisha ka hedhur akuza të ashpra ndaj disa zyrtarëve të lartë të Partisë Socialiste, duke thënë se ata po mbrojnë interesat e krimit të organizuar.

Ndërkaq duke folur për një raport sekret të përgatitur për Gjinovefa Gabën, Sali Berisha ka akuzuar deputetin socialist Petro Koçi, në kohën kur ky i fundit ishte ministër i Rendit.

"Po çfarë vjen nga Parlamenti. Një raport i baronëve të drogës. Petro Koçi e ka lexuar këtë raport e di mirë, sepse vepron në këtë mënyrë, janë lidhjet e tij të krimit. Përfitues apo jo, koha do t'i tregojë gjërat", tha Berisha për të shtuar se "PS-ja mbron dosjet e veta, mbron trafikun e drogës, mbron hotelet pallatet vilat, të ndërtuara mbi drogën kontrabandën, vrasjet krimin dhe dosjet e fshehura".

Kryeministri shqiptar paralajmëroi se beteja kundër krimit të organizuar është në fillimet dhe se "vetëm këto ditë po merr goditjen përfundimtare banda që luajti me kokën e njeriut si top futbolli në Lushnjë".

Berisha foli edhe për sekretarin politik të PS-së, Ben Blushi si dhe për ish-sekretarin e përgjithshëm socialist, Gramoz Ruçi dhe sekretaren e marrëdhënieve me jashtë, Arta Dade.

"Nuk ka ndonjë preokupim Gramoz Ruçi para votës, as edhe Arta Dade. Fëmijët e tyre skuqën rrugët e Tiranës. Dosjet u mbyllën për shkak të pushtetit. Por as pronat e krimit të Ruçit, as krimet e fëmijëve të Arta Dades dhe as njërit të mos mendojnë se do të mbeten pa shkuar para ligjit, ashtu siç do të shkojnë fëmijët e gjithkujt tjetër".

Kryeministri Berisha thotë gjithashtu se argumentet e opozitës për shkarkimin e kryetares se Kuvendit, Jozefina Topalli, janë të pabaza dhe të papranueshme.

"Akuza e parë është sepse ka kërkuar dorëheqjen e prokurorit të përgjithshëm. Në një vend të lirë çdo qytetar, çdo zyrtar, pa cenuar aspak ligjet e vendit, mund të kërkojë dorëheqjen dhe të propozojë secilin qytetar të tij. Akuza e dytë është se ka votuar jashtë afatit kushtetues, dekretin e qeverisë dhe këtu është shkelur Kushtetuta.

 

Cinizëm dhe amoralitet total. Dekreti do të votohej ditën e zisë kombëtare. Kuvendi mori vendim të ndërpriste aktivitetin dhe t'i bënte nderet që i takojnë presidentit Rugova", tha Berisha për të shtuar se "afatet kushtetuese të emërimit të ministrave janë shkelur jo për zi kombëtare, por për luftë klanesh mafioze muaj e muaj të tërë".

 

 

Ministrat e jashtëm të BE-së sot diskutojnë për rajonin e Ballkanit

 

Bruksel, 27 shkurt 2002 - Ministrat e jashtëm të 25 vendeve anëtare të Bashkimit Evropian takohen sot në Brusel për të diskutuar shqetësimet e tyre për rajonin e Ballkanit dhe Lindjes së Mesme.

Ministrat do të shqyrtojnë rrugët se si të vazhdohet të ushtrohet presion mbi autoritetet serbe për të arrestuar të dyshuarit për krime lufte.

Javën e kaluar u fol shumë për t'i dhënë Serbisë një ultimatum që ose të dorëzonte të paditurit si kriminelë lufte, Ratko Mlladiq dhe Radovan Karaxhiq, ose negociatat për marrëdhënie më të ngushta me BE-në, do të pezulloheshin.

Tani duket se presioni mbi Serbinë do të vazhdojë të ushtrohet.

Në Bruksel flitet për ndërprerje të negociatave nëse të dyshuarit për krime lufte, nuk i dorëzohen Gjykatës së Hagës.

 

 

Dinosha thotë se pjesa më e madhe e shqiptarëve do të votojnë për pavarësinë e Malit të Zi

 

Podgoricë, 27 shkurt 2002 - Kryetari i Unionit Demokratik të Shqiptarëve në Mal të Zi, Ferhat Dinosha tha se pjesa më e madhe e shqiptarëve do të marrin pjesë në referendum dhe do të votojnë për pavarësinë e Malit të Zi.

 

Ai vlerësoi se kjo do të ishte zgjidhja më e mirë jo vetëm për shqiptarët, por për stabilitein në këtë vend dhe në rajon.

Pakicat kombëtare në Mal të Zi përbëjnë rreth 20 për qind të popullsisë së këtij vendi.

 

 

Më 2 mars skadon afati për parashtrimin e kërkesave për marrjen e shtetësisë së Maqedonisë

 

Shkup, 27 shkurt 2002 - Ministria e Punëve të Brendshme të Maqedonisë përkujton se më 2 mars të këtij viti skadon afati për parashtrimin e kërkesave për marrjen e shtetësisë së Maqedonisë për shtetasit nga republikat e tjera të ish Jugosllavisë dhe shtetasit e saj të cilët deri më 8 shtator 1991 kanë paraqitur vendbanim dhe deri në afatin e parashtrimit të kërkesës vazhdimisht jetojnë në territorin e Maqedonisë.

 

 

Në një shpërthim aksidental në një fabrikë armësh në Izrael, janë plagosur 4 persona

 

Jerusalem, 27 shkurt 2002 – Në fabrikën kryesore të kërkimeve të armëve në Izrael ka ndodhur sot (e hënë) një shpërthim aksidental, ku janë plagosur katër persona, kanë bërë të ditur burimet e sigurimit izraelit, njofton Rojter. Shpërthimi ndodhi afër hyrjes së fabrikës Rafael, afër qytetit verior Haifa.

 

Burimet thonë se shpërthimi nuk ishte sulm palestinez, por rezultat i një aksidenti në kompleksin e ndërtesave.

 

 

Në Jemen është ekzekutuar një i dënuar për vrasjen e 3 misionarëve të krishterë amerikanë më 2002

 

Sana, 27 shkurt 2002 – Në Jemen është ekzekutuar sot (e hënë) një burrë i dënuar për vrasjen e tre misionarëve të krishterë amerikanë më 2002, ka bërë të ditur agjencia shtetërore e lajmeve Saba, njofton Rojter.

 

Në njoftim thuhet se Abed Abdel Razak Kamel është ekzekutuar në provincën jugore Ib, ku kishte vrarë me armë zjarri mjeken Marta Myers, 57, nga Alabama, dhe dy kolegët e tij në spitalin e misionit Baptist, Villiem Koen, 60, nga Teksasi dhe Ketlin Garieti, nga Viskonsi, të cilët qenë varrosur në Jemen.

 

 

Në një sulm me mortaja në distriktin shiit të Bagdadit janë vrarë 4 persona

 

Bagdad, 27 shkurt 2002 - Në një sulm me mortaja në distriktin shiit të Bagdadit perëndimor janë vrarë sot (e hënë) katër persona dhe janë plagosur edhe 13 të tjerë, ka bërë të ditur policia, njofton Rojter.

 

Sulmi ndodhi një ditë pasi autoritetet kishin hequr orën policore, të vënë për shkak të dhunë sektore të javës së kaluar, që shpërtheu si rrjedhojë e bombardimit të një xhamie shiite, ku u vranë mbi 200 njerëz. Dhuna paraqiste rrezik për shpërthimin e luftës civile në Irak, kanë tërhequr vërejtjen zyrtarët.

 

 

Në Bagdad hiqet ora policore pasi është kthyer deri diku normaliteti

 

Bagdad, 27 shkurt 2002 – Autoritetet kanë hequr sot (e hënë) orën policore në Bagdad, pasi që kryeqytetit i është kthyer deri diku normaliteti relativ pas një dhune njëjavore sektore, e cila mori jetën e mbi 200 njerëzve, njofton Rojter. Banorët po lëvizin lirisht, automjetet po qarkullojnë nëpër rrugë, por trafiku rregullohet nga policia. Shitoret dhe bizneset janë hapur në qytet.

 

 

Në 2 shpërthime në zyrat e guvernatorëve në qytetet iraniane Dezful dhe Abadan janë plagosur 4 vetë

 

Teheran, 27 shkurt 2002 – Dy bomba kanë shpërthyer sot (e hënë) në qytetet jugore iraniane Dezful dhe Abadan, ku janë plagosur katër persona, kanë bërë të ditur zyrtarët, njofton Rojter. Bombat njoftohet se janë vënë në zyrat e guvernatorëve në të dy qytetet. Dezful dhe Abadan janë prodhues të naftës në provincën e Kazakistanit, ku vjet ka pasur tensione etnike ndërmjet autoriteteve iraniane dhe minoritetit arab.

 

 

Të burgosurit talibanë marrin kontrollin në sektorin e femrave në burgun kryesor të Kabulit¨

¨

Kabul, Afganistan 2002 – Polica dhe trupat ushtarake kanë rrethuar sot (e hënë) me automjete të blinduara burgun kryesor në Kabul pasi qindra të burgosur të udhëhequr nga komandantët talibanë dhe lideri i bandës kidnapuese, Timur Shah, kishin marrë më parë kontrollin në sektorin e femrave në burg, kanë bërë të ditur zyrtarët, njofton Rojter.

 

Në revoltë kanë marrë pjesë rreth 1000 të burgosur dhe si duket kanë zënë peng femrat e burgosura. Me të të burgosurit kanë filluar bisedimet për kushtet e dorëzimit të tyre, por nuk është arritur kurrfarë progresi ngase po kërkojnë lirimin e tyre, kanë thënë zyrtarët.

 

 

Proces gjyqësor për gjenocidin në Ballkan

 

Hagë, 27 shkurt 2002 - Të hënën në Hagë nis procesi i parë gjyqësor ndaj një shteti të akuzuar për genocid. Serbia dhe Mali i Zi akuzohen nga Bosnja për kryerjen e më të rëndit nga krimet e luftës në vitet '90 në territorin e saj.

Gjykata Ndërkombëtare e Drejtësisë do të dëgjojë çështjen të cilën Bosnja e ngriti për herë të parë para 13 vjetësh.

Bosnja thotë se Beogradi është përgjegjës për krimet e genocidit të kryera në territorin e saj në fillim të viteve '90 gjatë luftës së Bosnjës.

Beogradi nuk e pranon se synonte të shfaroste myslimanët në lindje të bonsjës dhe thotë se nuk ka prova për ta mbështetur akuzën.

 

 

Kryengritësit në Irak vrasin të paktën 29 vetë

 

Bagdad, 27 shkurt 2002 - Në Irak, kryengritësit vranë dje të paktën 29 vetë në sulme me mortaja, shpërthime dhe zjarr armësh të lehta, me gjithë thirrjet nga udhëheqësit për t’i dhënë fund gjakderdhjes sektare që shpërtheu pesë ditë më parë.

Të paktën 15 vetë mbetën të vrarë kur predhat e mortajës goditën një zonë shiite të Bagdadit. Ushtria amerikane thotë se dy ushtarë amerikanë humbën jetën nga shpërthimi i një bombe në anë të rrugës po në Bagdad dhe një tjetër u godit për vdekje nga zjarri i armëve. Të paktën 11 irakianë të tjerë humben jetën nga shpërthimet dhe zjarri i armëve.

 

 

Sipas një gazete agjentët gjermanë i kanë dorëzuar SHBA planet e mbrojtjes së Sadam Huseinit

 

Berlin, 27 shkurt 2002 - Dy agjentët e shërbimit kombëtar informativ të Gjermanisë, BND, sipas njoftimit të një gazete, i kanë mbështetur forcat e armatosura të ShBA në Irak më shumë nga sa paraqet qeveria.

 

Gazeta "Nju Jork Tajms" njofton, se agjentët kanë paraqitur një kopje të planit të ish-sundimtarit në Irak Sadam Husein për mbrojtjen e kryeqytetit Bagdat. Kjo iu është dorëzuar përfaqëesuesve të shërbimit sekret ushtarak të ShBA një muaj përpara fillimit të luftës së Irakut.

 

Qeveria në Berlin deri tani ka deklaruar, që agjentët e BND-së nuk kanë dhënë informacione ushtarake relevante për SHBA.

 

 

Ushtarët vrasin të paktën 16 rebelë maoistë në Nepal

 

Katmandu, 27 shkurt 2002 - Gjatë luftimeve mes kryengritësve dhe ushtrisë në Perëndim të Nepalit, sipas të dhënave të ushtrisë, janë vrarë së paku 16 rebelë. Luftimet nisën të dielën, pasi kryengritësit sulmuan një patrullë ushtarake. Qëkurse në janar të vitit të kaluar rebelët e anulluan armëpushimin e njëanshëm katër mujor në Perëndim të Nepalit ka pasur herë pas here konfrontime.

 

 

Vritet një telekronist në Moskë

 

Moskë, 27 shkurt 2002 - Një gazetar i televizionit rus NTV sipas të dhënave të policisë është vrarë. Reporteri 33 vjeçar Ilja Simin është gjetur i vdekur në apartamentin e tij në Moskë, vuri në dukje një zëdhënës. Agjencia e lajmeve Interfax njofton më tej, se vitin e kaluar Simin është rrahur nga persona të panjohur në afërsi të shtëpisë së vet.

 

 

Në Francë protetstohet kundër antisemitizmit

 

Paris, 27 shkurt 2002 - Pas vrasjes prej torturave të 23 vjeçarit hebre në Francë dhjetra mijëra vetë demonsstruan kundër antisemitizmit dhe racizmit. Në manifesitmin më të madh që u zhvillua në Paris merrnin pjesë edhe shumë ministra si dhe kryetarë partishë e udhëheqës fetarë.

 

Shitësi hebre Ilan Halimi u rrëmbye nga një bandë në një zonë perfierike përpara tri javësh dhe u keqtrajtua derisa gjeti vdekjen për shkak të plagëve. I dyshuari kryesor për kërtë vrasje u arrestua së fundi në republikën e Bregut të Fildishtë dhe u ekstradua në Francë.