|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Lajmet e ditës (2)

24 shkurt 2006 /TN /QIK

Përmbajtja:

  
Diskutimet për Kosovën do të gravitojnë në pavarësi, thotë presidenti Sejdiu

 

Prishtinë, 24 shkurt 2006 /TN /QIK - Diskutimet për statusin e Kosovës do të çojnë drejt pavarësisë, tha sot presidenti Fatmir Sejdiu pas takimit me Ministrin e Punëve të Jashtme të Estonisë, z.Urmas Paet.

Presidenti Sejdiu tha se nga diplomati estonez z. Paet ka marrë mbështetje të rëndësishme për popullin e Kosovës.

 

“Ministri estonez z.Paet më përcolli mesazhe mbështetje në këtë fazë të diskutimeve për definimin e statusit të Kosovës, e cila graviton dhe është e përqëndruar në realizmin e pavarësisë së Kosovës”, tha Sejdiu, ndërsa ka marrë edhe mesazhe përgëzuese nga Estonia për punën që po e bënë Presidenti.

Presidenti Sejdiu tha se ndihet i kënaqur që takon një mik nga një vend që ka pasur një rrugëtim specifik për realizimin e pavarësisë, ditë të cilën e shënojnë sot ata, për të cilën Presidenti i përgëzoi.

Për Kosovën është shumë e rëndësishme që Estonia si një vend anëtare e BE-së dhe me një përvojë siç tha presidenti, “jazhtëzakonisht të mirë”, të jetë në proces të ndihmimit të Kosovës për të cilën ekzistojnë garancione dhe njëherit sipas Presidentit është një mbështetje edhe për proceset tjera demokratike, të ndihmës ekonomike dhe të bashkëpunimit edhe në fushat e tjera.

Ai tha se ia ka përcjellë edhe diplomatit estonez qëndrimin se do të ketë një kujdes esencial për të gjithë qytetarët e Kosovës dhe në veçanti në trajtimin e minoriteteve, duke pasë parasysh se Kosova do të respektojë standardet më të larta ndërkombëtare për minoritete.

“Fundja është shumë e rëndësishme që ne gravitojmë të jemi pjesë integruese në misionet euroatlantike, dhe rrugë tjetër nuk kemi”, tha presidenti Sejdiu.

Diplomati Paet tha se dëshiron që Kosova sa më parë të mos ketë nevojë për trupat estoneze dhe të huaja, ndërkohë që do të vazhdojë të mbështesë zhvillimin e shoqërisë tonë. “Ne shpresojmë se në të ardhmen Kosova nuk do të ketë nevojë për patrullat ushtarake të Estonisë, por sado që të ketë nevojë, ne do t'i mbajmë ushtarët tanë këtu”, tha ai.

 

Diplomati estonez tha se shpreson që rezultatet nga negociatat për statusin do të dihen së shpejti dhe se ai shpreson që bisedat rreth statusit të Kosovës do të përfundojnë me sukses dhe se rezultati do të jetë pozitiv për të gjithë njerëzit që jetojnë këtu.

 

Z.Paet tha se Estonia si anëtare e BE-së, por edhe e NATO-s, shpreson që do të mund ta mbështesë ecurinë për përcaktimin e statusit të Kosovës, ndërsa ka shprehur mbështetjen estone për emisarin special z.Ahtisari.

Diplomati Urmas gjatë ditës do të vizitojë edhe trupat estoneze që janë në përbërje të KFOR-it në qytetin e Mitrovicës, ndërsa është takuar edhe me kryekuvendarin Daci, kryeministrin Kosumi dhe kryeadministratorin Petersen.

 

 

Estonia e gatshme të përkrahë Kosovën në zhvillimin e negociatave për ta zgjidhur statusin

 

Prishtinë, 24 shkurt 2006 /TN /QIK - Ministri i Punëve të Jashtme të Estonisë, Urmas Paet ndodhet sot për një vizitë në vendin tonë. Në një takim me kreun e UNMIK-ut Soren Petersen ministri estonez vlerësoi lart punën e institucioneve të Kosovës dhe njëherit shprehu gatishmërinë e vendit të tij për përkrahje.

"Estonia dhe Bashkimi Euvopian shpresojnë që negociatat për statusin do të jenë pozitive për të gjithë popujt në Kosovë, dhe ajo është e gatshme që ta përkrahë Kosovën në zhvillimin e negociatave për ta zgjidhur statusin", u shpreh diplomati estonez.

Ndërkaq, shefi i UNMIK-ut tha se Kosova ka nevojë për një përkrahje profesionale për negociatat me palën serbe në përcaktimin e statusit përfundimtar. Estonia, tha ai, ka përvojë në këtë drejtim, prandaj vizita e ministrit Paet realiozohet në kohën e duhur për Kosovën.

Estonia ka kaluar një periudhë të rëndësishme të tranzicionit dhe si anëtare e Kombeve të Bashkuara dhe e NATO s gjatë muajve të ardhshme do të ndihmojë me këshilla profesionale dhe përkrahje të fortë.

"Shpresoj që gjatë muajve të ardhshëm Estonia do të ndihmojë me këshilla profesionale dhe me përkrahje të fortë, jo vetëm si anëtare e BE-së, por edhe në bashkëpunim bilateral", tha Petersen, duke shtuar se në kohën kur Kosova po përballet me negociatat për statusin është e rëndësishme vizita e ministrit të Jashtëm të Estonisë në Kosovë.

Ndërkohë ministri i Jashtëm i Estonisë vizitoi edhe trupat e vendit të tij në kuadër të KFOR it në Mitrovicë për të kremtuar ditën e pavarësisë së Estonisë.

 

 

Edhe në Mitrovicë janë përmbytur 76 shtëpi dhe janë evakuar të 471 banorë

 

Mitrovicë, 24 shkurt 2006 /TN /QIK - Si pasojë e shiut që ka rënë pandërprerë gjatë dy ditëve të fundit, edhe në komunën e Mitrovicës, kanë dalë nga shtrati lumenjtë, Ibri, Lushta dhe Sitnica.

Sipas Xhevat Veselit, drejtor i Drejtorisë për Mbrojtje Civile dhe Gatishmëri Emergjente (DMCGE), janë përmbytur 76 shtëpi dhe qindra hektarë tokë.

Kështu, në Lagjen e Boshnjkëve janë vërshuar 9 shtëpi, në fshatin Lisicë 8 shtëpi, në lagjen "2 Korriku", në të dyja anët e lumit Sitnicë janë vërshuar 36 shtëpi, në stacionin e vjetër hekurudhor 7 shtëpi, në tregun e bagëtive 2 shtëpi dhe në lagjen e Vaganicës janë vërshuar 13 shtëpi nga lumi Lushtë. ?shtë vërshuar edhe NTP "Interplast".

Për shkak të gjendjes së rrezikshme të krijuar nga niveli i lartë i ujit, përkatësisht vërshimi, nga shtëpitë e lartëpërmendura janë evakuar të gjithë banorët, përkatësisht 471 banorë. Familjet e evakuara janë vendosur tek të afërmit e tyre dhe në fqinjësi.

 

Ndonëse, komuna u ka ofruar ndihmë, familjet e evakuara kanë thënë se për momentin nuk kanë nevojë as për ndihma në ushqim dhe as në veshëmbathje.

Me qëllim që vërshimet të vëhen nën kontroll dhe të evitohet rreziku nga përmbytjet, udhëheqja e Kuvendit të Komunës, me në krye Mursel Ibrahimi, kryetar dhe kryeshefin e Ekzekutivit, Sadri Ferati, kanë qenë të mobilizuar gjatë natës së mbrëmshme, me ç'rast kanë vizituar të gjitha vendbanimet e rrezikuara, duke propozuar masa konkrete për evitimin e rrezikut.

 

 

Mediu në Shkup: Kosova të bëhet e pavarur, ndërkaq kufiri me Maqedoninë të shënohet pas statusit

 

Shkup, 24 shkurt 2006 /TN /QIK - Ministri i Mbrojtjes i Shqipërisë Fatmir Mediu përsëriti sot qëndrimin zyrtar të Tiranës se angazhohet për një Kosovë të pavarur, ndërsa porositi që demarkacioni i shënimit të kufirit ndërmjet Shkupit e Prishtinës të zgjidhet pas statusit përfundimtar të Kosovës.

"Kuptohet pozicioni i Shqipërisë është Kosova e pavarur me respektimin e të drejtave të minoriteteve dhe respektimin e kufijve ndërkombëtarë. Kjo do të thotë, sa i përket kufirit mendoj se do të ishte më së miri që këto aktivitete të zhvillohen pas zgjidhjes së statusit përfundimtar të Kosovës", është shprehur Mediu sot gjatë një vizite në Shkup, ku me homoloun e tij maqedonas Jovan Manasievski kanë rënë dakord për intesifikimin e bashkëpunimin ndërmjet dy vendeve në prag të samitit të NATO s, që do të mbahet në nëntor në Rigë.

Në një takim me gazatarë, Ministri shqiptar theksoi se Maqedonia dhe Shqipëria kanë një bashkëpunim intensiv në kuadër të përpjekjeve për t'u anëtarësuar në NATO.

"Besoj se në samitin e Rigës do të ketë një vlerësim konkret nga gjithë kjo që kemi bërë dhe do të paraqitet një përcaktim i qartë lidhur me zgjerimin e NATO s", tha Mediu.

Edhe Manisievski tha se të dy vendet do të vazhdojnë me komunikimin intensiv gjatë muajve të ardhshëm në prag të samitit të nëntorit të NATO-s.

NMdëkohë ministrat nënshkruan një marrëveshje dypalëshe për bashkëpunim ushtarak në vitin 2006. Bëhet fjalë për një program ambicioz, që ka për synim të rrisë nivelin e bashkëpunimit të forcave ushtarake të Maqedonisë dhe të Shqipërisë në kuadër të përpjekjeve të përgjithshme për integrim në NATO, tha Mansijevski.

Gjithashtu dë dy ministrat vlerësuan si tejet të suksesshëm pjesëmarrjen e tyre të parë në operacionet e udhëhequra nga vendet e NATO s nga Grupi i Adriatikut, përmes Ekipit të përbashkët mjekësor në misionin në Afganistan.

 

 

Vendi po përballet me tri fatkeqësi natyrore, u tha në takimin Kosumi – Petersen

 

Prishtinë, 24 shkurt 2006 /TN /QIK - Kosova po ballafaqohet me fatkeqësi natyrore të njëpasnjëshme për të cilat qeveria ka vështirësi finanaciare në përballimin e tyre, meqë nuk ka një institucion përkatës për menaxhimin e tyre.

 

Kështu është vlerësuar pas takimit të sotëm të kryeministrit Bajram Kosumi me kryeadministratorin Jesen Petersen me të cilin ka biseduar për tri ballafaqimet e vendit me fatkeqësi natyrore: me shembjen e kodrës që ka mbyllur arterien kryesore të furnizimit të vendit dhe njëkohësisht të udhëtimit jashtë, rrugën Prishtinë-Shkup, për vërshimet, që ka përmbytur minierën e qymyrit dhe për gripin e shpezëve që po kërcënon vendin pas shfaqjes në gjithë rajonin.

Kryeministri Kosumi tha se qeveria nuk ka një institucion apo një trup që do të merrej me ballafaqimin e fatkeqësive natyrore, me të cilat për herë të parë në këtë shkallë të lartë po ballafaqohet vendi. "Fondet për dalje nga këto kriza po përdoren nga fondi rezervë", tha Kosumi.

Ndërkohë qarkullimi i mallrave dhe njerëzve do të vazhdojë të kryhet nëpërmjet Tetovës dhe Kumanovës, ndërsa varësisht nga vlerësimet e ekspertëve rruga mund të lëshohet për transport mallërash vetëm gjatë natës, tha kryeministri Kosumi duke lutur qytetarët për mirëkuptim dhe që ata të shfrytëzojnë rrugët anësore.

Ndërkaq, kryeadministratori Soren Jesen Petersen tha se ka mirëpritur hapat e qeverisë për zhbllokimin e rrugës Kaçanik – Shkup. "Deri tani qeveria e Kosovës është përballë me sukses me krizat politike, por tani duhet të jetë e përgatitur edhe për raste të tilla të fatkeqësive natyrore", tha ai.

 

Por, sipas tij ndonëse përgjigja e qeverisë është pak e vonuar ky problem duhet të zgjidhet sa më parë sepse prek drejtpërdrejt qytetarët.

Qeveria ka ngritur nivelin e përgjegjësisë për zhbllokimin e rrugës së mbyllur nga kodra që po shembet në afërsi të Hanit të Elezit te vendi i njohur si "Guri i shpuar", pasi grupi emergjent do të udhëhiqet nga zëvendëskryeministri Adem Salihaj dhe do të jenë anëtarë edhe tre ministra, ai i Transportit dhe Telekomunikacionit Qemajl Ahmeti, i Mjedisit dhe Planifikimit Hapësinor Ardian Gjini dhe ministri Ethem Çeku i Energjisë dhe Minierave, pastaj komandanti i KFOR-it gjenerali Valoto, si dhe ekspertët që kanë punuar që nga fillimi për zhbllokimin e rrugës. Grupi i mëparshëm udhëhiqej nga ministri Ahmeti.

Kryeministri tha se është punuar për parandalimin e shembjeve që do të rrezikonin drejtpërdrejtë jetën e qytetarëve duke rregulluar disa kaskada në kodër që pengojnë rënien e gurëve dhe të dheut drejtpërdrejtë në rrugë.

 

Ndërsa, nga dje është duke u hulumtuar nga ekspertët për shkallën e çarjes së kodrës dhe të rrezikut që sjell ajo, me anë të instrumenteve të vendosura atje për t'i regjistruar të dhënat e lëvizjeve brenda tri dhe 6 orëve, gjatë dhjetë ditëve.

Kryeministri Kosumi tha se është krijuar grupi i krizës edhe për çështjen energjetike, për shkak të përmbytjes së minierës së qymyrit nga vërshimi i lumit Sitnica, të cilin do ta udhëheq ministri i Planifikimit Hapësinor Ardian Gjini. Ndërkohë që vetë kryeadministratori Petersen tha se do të mbajë një takim të jashtëzakonshëm për shkak të kësaj gjendjeje.

Kryeministri Kosumi tha se qeveria po e përcjell me vëmendje edhe çështjen e gripit të shpezëve, meqë kjo për mungesë mjetesh më parë ka refuzuar të pranojë kërkesën e Ministrisë së Shëndetësisë dhe të institucioneve shëndetësore që të blejë barëra dhe preparate të nevojshme për luftimin e gripit të shpezëve.

Sa i përket çështjes së emërimit të dy ministrave të rinj, i pyetur nga gazetarët, kryeministri Kosumi tha se nuk është "në atë pozitë' që t'i detyrojë partitë t'i emërojnë kandidatët e tyre për udhëheqjen e Ministrisë së Rendit dhe atë të Drejtësisë, ndërkohë që bëri thirrje që emërimet të bëhen sa më parë dhe të jenë të qëlluara.

Kryeministri Kosumi sqaroi edhe çështjen e privatizimit të hotelit, "Union", e cila tha se është një çështje e përmbyllur dhe se nuk ka pse të protestohet apo të përcillet me "reklama mediatike".

 

Kjo ka ndodhë për faktin se bazuar në legjislacionin e Kosovës, nuk mund të ndërrohet titullari i pronës, që në këtë rast ishte kompania hoteliere "Kosova" dhe pas dështimit që ajo të blihej qoftë edhe nga qeveria.

 

Qeveria nuk ka pasur mjete, tha Kosumi, pasi edhe ajo nuk ka strehë të mjaftueshme për vete, pasi mbi 50 për qind e saj paguan vet qira, e kështu do të ndodhë edhe për të paktën me njërën nga ministritë e reja që sapo janë krijuar.

 

 

Ahtisari propozohet për Çmimin Nobel për Paqe

 

Oslo, 24 shkurt 2006 /TN /QIK - I dërguar i posaçëm i Kombeve të Bashkuara për statusin e Kosovës, Marti Ahtisari është kandiduar për Çmimin Nobel për Paqe, që do të ndahet në 10 dhjetor të këtij viti.

Ndër kandidatët janë dhe këngëtari irlandez Bob Geldof, organizator i aksioneve humanitare "Live Aid", si dhe irlandezi tjetër Bono nga grupi "U 2", i cili angazhohet për luftimin e varfërisë në botë.

Siç dihet propozimet për Çmimin prestigjioz Nobel janë pranuar deri më 1 shkurt.

 

 

Autoritetet malazeze të kufirit kanë penguar trafikimin e 35O kg marihuane afër Tuzit

 

Podgoricë, 24 shkurt 2006 /TN /QIK - Autoritetet malazeze të kufirit shtetëror dje kanë penguar trafikimin e 35O kg marihuane afër Tuzit, njoftojnë mediat malazeze.

Në vendin e quajtur Pothum afër Tuzit policia malazeze ka penguar trafikimin e 2OO kg marihuane si dhe në rajonin Daçiqi ka ndërprerë kanalin e trafikimkit të drogës nga Shqipëria në Mal të Zi, dhe ka konfiskuar 15O kg marihuanë. me atë rast ka arrestuar një shtetas të Shqipërisë emri të cilit nuk bëhet i ditur.

 

Ndërkaq më 22 shkurt në pikën kufitare Bozhaj në kufi me Shqipërinë janë konfiskuar 84 kg duhan të grirë. Policia malazeze ka arrestuar një qytetar malazez të dyshuar se është marrë me trafikimin e duhanit.

 

 

Haga nuk i beson Millosheviqit dhe nuk i lejon të shkojë për mjekim në Rusi

 

Hagë, 24 shkurt 2006 /TN /QIK - Megjithë garancionet e Moskës dhe "premtimeve personale", Kolegji gjyqësor i Tribunalit të Hagës dyshon se i akuzuari Sllobodan Millosheviq do të kthehej për ta përfunduar procesin gjyqësor në Hagë, andaj ka refuzuar kërkesën e tij që të shkojë për mjekim të përkohshëm në Rusi.

Ish-diktatori jugosllav, i cili vuan nga sëmundja e zemrës dhe presioni i lartë i gjakut, megjithatë i kërkoi gjykatës ta rishqyrtojë vendimin.

Millosheviq gjykohet për krime të luftës dhe gjenocid në luftërat në Kroaci, Bosnje dhe Kosovë dhe mund të dënohet me burgim të përjetshëm.

 

 

Personat e armatosur kanë vrarë 3 anëtarë të një familjeje shiite në juglindje të qytetit Latifija

 

Bagdad, 24 shkurt 2006 /TN /QIK – Personat e armatosur kanë vrarë sot (e premte) tre anëtarë të një familjeje shiite dhe kanë plagosur dy fëmijë të tjerë në shtëpinë e tyre në juglindje të qytetit Latifija, që gjendet në juglindje të Bagdadit, në shenjë hakmarrje sektare, ka bërë të ditur policia, njofton Rojter.

 

Personat e armatosur kanë thyer derën e shtëpisë dhe kanë hapur zjarr kundër kësaj familjeje. Nga të vrarët janë dy burra një grua. Fëmijët e plagosur janë të moshës 11 dhe 13 vjeçare.

 

 

Nga një shpërthim zjarri në një fabrikë në Bangladesh kanë vdekur të paktën 51 njerëz

 

Daka, Bangladesh, 24 shkurt 2006 /TN /QIK – Të paktën 51 njerëz kanë vdekur nga një shpërthim zjarri në një fabrikë tekstili në Bangladesh, ka bërë të ditur policia, njofton BBCWorld. Mbi 100 të tjerë janë lënduar nga flaka që shpërtheu në këtë fabrikë në qytetin portal juglindor Çitagong.

 

Të paktën 500 punëtorë ishin brenda fabrikës kur shpërtheu flaka. Zyrtarët vazhdojnë të përpiqen për të konstatuar shkakun e zjarrit.

 

 

Në Indi dënohen me burg të përjetshëm 9 persona lidhur me revoltat më 2002 në Guajart

 

Nju Delhi, 24 shkurt 2006 /TN /QIK - Një gjykatë në Indi u ka shqiptuar dënim me burg të përjetshëm nëntë personave lidhur me revoltat më 2002 në shtetin perëndimor Guajart, njofton BBCWorld.

 

Gjatë këtyre revoltave qenë kallur deri në vdekje 12 myslimanë dhe dy të tjerë kur një furrtar qe sulmuar nga turma hinduse.

 

Revoltat patën shpërthyer pas vdekjes së rreth 60 hindusve pasi turma myslimane pat sulmuar një tren në shkurt 2002. Mbi 1,000 njerëz, kryesisht myslimanë, qenë vrarë në këto revolta.

 

 

Orë policore në Bagdad në përpjekje për të frenuar dhunën sektare

 

Bagdad, 24 shkurt 2006 /TN /QIK - Qeveria e Irakut ka shpallur orë policore në Bagdad, në përpjekje për të frenuar dhunën sektare. Masat u morën dy ditë pas sulmeve kundër pakicës sunite, që ishin pasojë e shpërthimit në tempullin shiit në Samarra, për të cilin dyshohet Al Kaida. Dhuna sektare në Irak, vetëm të enjten la më shumë se 130 të vdekur, kurse dhjetra xhami u dëmtuan.

Klerikët më të njohur, përfshirë Ajatollahu i Madh Ali al Sistani, po bëjnë përpjekje për t'i frenuar militantët shiitë. Ndërkaq, kleriku radikal shiit Moktada al Sadër bëri thirrje për formimin e një komiteti sunito shiit, i cili do t'i jepte fund dhunës.

Ngjarjet e fundit bënë që udhëheqësit politikë sunitë të tërhiqen nga negociatat për formimin e qeverisë nga grupet e dala nga zgjedhjet e dhjetorit.

Sekretari i përgjithshëm i Kombeve të Bashkuara Kofi Annan u bëri thirrje udhëheqësve irakianë të qetësojnë situatën.

"Gjendja në Irak është tejet shqetësuese. Isha i shokuar dhe i dëshpëruar nga sulmi në xhaminë, dhe u bëj thirrje liderëve irakianë të bëhen bashkë për të qetësuar gjendjen", tha Annan.
Presidenti i Shteteve të Bashkuara Xhorxh Bush e ka cilësuar shpërthimin në Samara si akt politik, që synon të shkaktojë luftë civile.

 

 

Ushtria izraelite ka vrarë 2 palestinezë përgjatë kufirit të Rripit të Gazës dhe Izraelit

 

Gaza, 24 shkurt 2006 /TN /QIK – Ushtria izraelite ka vrarë sot herët në mëngjes (e premte) dy palestinezë derisa po synonin të vendosnin bomba përgjatë kufirit ndërmjet Rripit të Gazës dhe Izraelit, kanë bërë të ditur burimet palestineze dhe izraelite, njofton Rojter.

 

Njëri nga militntët e vrarë ishte djali i liderit dhe bashkëthemeluesit të grupit militant islamik Hamas, Abdel Fatah Dukan. Dukan është zgjedhur në parlament në zgjedhjet palestineze të 25 janarit.

 

 

Në një minierë thëngjilli në Meksikë besohet të kenë humbur jetën rreth 25 minatorë

 

San Huan de Sabinas, Meksiko, 24 shkurt 2006 /TN /QIK – Rreth 25 minatorë të ngujuar në një minierë thëngjilli në Meksikë pas një shpërthimi të fuqishëm, të para pesë ditëve, besohet të kenë humbur jetën, ndërsa shpresat për gjetjen të gjallë të 65 minatorëve të zhdukur në zgafellet e minierës po zbehen gjithnjë e më shumë, njofton Rojtrer.

 

Deri tash nuk është gjetur asnjë kufomë, kurse testet e ajrit në minierë tregojnë se nuk ka oksigjen të mjaftueshëm për jetë, ka thënë zëdhënësi i minierës. Ministri meksikan i punës ka thënë se mund të jenë rreth 25 minatorë në zonën e fatkeqësisë. Familjet kanë kërkuar emrat e të vdekurve, por ai ka thënë se nuk ende nuk i di.

 

 

Guerilët talibanë kanë vrarë 4 ushtarë afganë në një pritë në provincën Helmand

 

Kandahar, Afganistan, 24 shkurt 2006 /TN /QIK – Guerilët talibanë kanë vrarë katër ushtarë afganë dhe një tjetër e kanë plagosur në një pritë në provincën Helmand, ku trupat britanike kanë filluar të ngrisin bazën si pjesë e një zgjerimi të trupave të NATO-s atje, njofton Rojter.

 

Nga ana e guerilëve, është vrarë një taliban dhe pesë të tjerë janë plagosur. Ushtarët janë vrarë mbrëmë gjatë një patrullimi në distriktin Girishk. Sulmuesit kanë ikur pas një shkëmbim zjarri të shkurtër. Zëdhënësi i talibanëve ka thënë se në këtë pritë janë vrarë 12 ushtarë afganë.

 

 

Autoritetet pakistaneze kanë arrestuar kreun e aleancës islamiste para protestave të paralajmëruara

 

Lahore, Pakistan, 24 shkurt 2006 /TN /QIK – Autoritetet pakistaneze kanë arrestuar sot (e premte) kreun e aleancës kryesore opozitare islamiste të vendit para protestave të paralajmëruara në mbarë vendin kundër karikaturave të profetit Muhamed, njofton Rojter. Lideri i kësaj aleance Qazi Husein Ahmed, është arrestuar në një takim në zyrën e tij në Lahore. "Ai nuk mund të dalë nga zyra e tij e partisë", ka thënë zëdhënësi provincial qeveritar.

 

 

Gjendje e jashtëzakonshme në Filipine

 

Manila, 24 shkurt 2006 /TN /QIK - Presidentja e Filipineve, Gloria Arojo ka shpallur gjendje të jashtëzakonshme në vend pas dështimit të një grushti shteti.

Duke folur në radio dhe TV, presidentja Arojo tha se ajo kishte shpallur gjendje të jashtëzakonshme.

 

Ajo shtoi se ajo kishte autorizuar ushtrinë dhe policinë të merrte masa të nevojshme.
Gjendja e jashtëzakonshme u thirr orë pasi ushtria kishte mundur të ndalonte një përpjekje të ushtarëve për të rrëzuar zonjën Arroyo dhe për të formuar një qeveri ushtarake.

Ushtria kishte arrestuar komandantin e elitës së Scout Rangers, gjeneral brigade Danilo Lim.
Thuhet se ai dhe përkahësit e tij do të marshonin së bashku me civilë gjatë protestave kundër presidentes të premten.

Gjendja e jashtëzakonshme mundëson arrestime pa urdhra arresti dhe gjatë periudhës së paraburgimit pa akuzë.

 

 

Evropa diskuton gripin e shpendëve

 

Vjenë, 24 shkurt 2006 /TN /QIK - Ministra të shëndetësisë nga 25 shtete anëtare si dhe Kroacia, Turqia, Maqedonia, Bullgaria dhe Rumania do të takohen me ekspertë të OKB-së në Vienë për të diskutuar problemin e gripit të shpendëve.

Ministrja austriake e shëndetësisë, Maria Rauch Kallat, vendi i të cilës ka presidencën aktuale të BE-së, ka kërkuar të ulë shqetësimet për përhapjen e sëmundjes. Ajo thotë se për momentin nuk ka kërcënim tek shëndeti i njerëzve, por ajo shtoi se kontaktet me zogj të sëmurë duhen shmangur.

 

 

Përshkallëzim i dhunës në Irak - mbi 130 njerëz humbin jetën

 

Bagdat, 24 shkurt 2006 /TN /QIK - Qeveria irakiane po përpiqet të parandalojë një luftë të mundëshme civile që mund të nisë në vend. Mbi 130 irakianë, pjesa më e madhe sunit, mbetën të vrarë gjatë dy ditëve të dhunës që pasoi nga shpërthimi në një prej objekteve më të shenjta të myslimanëve shiitë.

Dhjetëra xhami sunite janë sulmuar, megjithëse udhëheqës politikë dhe fetarë të Irakut kanë bërë thirrje për gjakftohtësi. Aeroporti në kryeqytetin irakian qëndron i mbyllur. Presidenti amerikan, George Bush tha se sulmi ndaj Tempullit të shenjtë shiit në Irak ishte "akt i djallit" që synon krijimin e konfliktit. Ai vlerësoi se ky sulm ishte me motive politike.

 

 

Digjet një fabrikë tekstili, të paktën 51 njerëz humbin jetën

 

Dhaka, 24 shkurt 2006 /TN /QIK - Si pasojë e e djegjes së një fabrike tekstili në Bangladesh kanë humbur jetën të paktën 51 njerëz dhe më shumë se 100 të tjerë janë plagosur.Nën rrënojat e ndërtesës së djegur ka ende njerëz të vdekur të cilët nuk kanë mundur të dalin deri tani, tha një zëdhënës i zjarrfiksave.Policia kritikoi mbylljen e derës kryesore nga roja, e cila bëri që shumë punonjës kryesorë të kenë mbetur brënda duke u përpirë nga flakët.

 

 

Arrestohen dy të dyshuar për vjedhjen spektakulare në Angli

 

Londër, 24 shkurt 2006 /TN /QIK - Pas vjedhjes spektakulare të rreth 70 milion Eurove në Anglinë juglindore, policia britanike ka arrestuar dy të dyshimtë.Sipas policisë në Grafshaft Kent, bëhet fjalë për një burë 29 vjeç dhe një grua 31 vjeçe.

 

 

Indonezia porosit 30 avionë në vlerë 1,8 miliard euro

 

Xhakarta, 24 shkurt 2006 /TN /QIK - Koncerni europian Airbus ka marrë një ofertë të madhe nga Azia. Sipas gazetës"Wall Street Journal", shoqëria ajrore indoneziane "Adam Air" ka porositur 30 avionë Tip 320. Kjo kontratë kap vlerën e rreth 1,8 miliard Eurosh.