Lajmet e ditës

Lajmet e ditës

24 shkurt 2006 /TN /QIK

Përmbajtja:

Petersen thotë Serbia do ta humbasë Kosovën
Qeveria diskutoi për vonesën e pagave dhe përgëzoi delegacionin e Kosovën për takimin e Vjenës
Oli Ren thotë se pas zgjidhjes së statusit rol substancial në Kosovë do të ketë Bashkimi Evropian
Gjykata Evropiane ka refuzuar padinë penale kundër UNMIK ut për të drejtat e romëve
Hapja e rrugës së mbyllur Prishtinë - Shkup nuk është çështje ditësh
Edhe një premtim se linja hekurudhore Shkup - Prishtinë do të vëhet në qarkullim të martën e ardhshme
Vërshimi i lumit Sitnica ka ndërprerë prodhimin e rrymës në TE Kosova B
Holanda do të vazhdojë ta përkrahë Kosovën edhe në të ardhmen
Kryeministri Kosumi mbështet kërkesën për mosprivatizimin e Unionit
Kosta thotë se krimi i organizuar dhe korrupsioni janë problemet kryesore në Ballkan
SHBA-të kanë investuar mbi 450 milionë dollarë në Maqedoni që nga viti 1993
Trashëgimia kulturore mbetet një preokupim permanent i Ministrisë së Kulturës

Petersen thotë Serbia do ta humbasë Kosovën



Vjenë, 24 shkurt 2006 /TN /QIK - Shefi i UNMIK-ut Soren Jesen Petersen ka deklaruar se Serbia përballet me tri lloj presiones: me humbjen e Kosovës, me ndarjen e Malit të Zi, ndërkaq procesi i afrimit me BE-në është bërë "peng i Karaxhiqit dhe Mlladiqit".
"Serbia është nën presion të trefishtë, sepse do ta humbasë Kosovën, Mali i Zi mund të ecë rrugës së vet, por edhe procesi i afrimit me BE-në dhe anëtarësimi në Partneritetin për Paqe është peng i rastit Karaxhiq dhe Mlladiq", ka thënë Petersen për gazetën vjeneze "Standard".
"Unë nuk kam thënë se Kosova do të jetë e pavarur. Unë vetëm po them se Serbia do ta humbasë Kosovën. Ka shumë rëndësi që të gjithë të pranojnë se në Kosovë ekziston një shumicë prej 9O për qind e cila qartë e di çfarë don.

Njëkohësisht ka rëndësi që kjo shumicë ta kuptojë se ekziston një pakicë prej 1O për qind, dhe që shoqëria që injororn synimet dhe shqetësimet e këtyre 1O për qindve nuk mund të funkksionojë", ka paralajmëruar Petersen.


Qeveria diskutoi për vonesën e pagave dhe përgëzoi delegacionin e Kosovën për takimin e Vjenës

Prishtinë, 24 shkurt 2006 /TN /QIK - Nën drejtimin e kryeministrit Bajram Kosumi është zhvilluar vazhdimi i mbledhjes së 188 të të Qeverisë së Kosovës, në të cilën është shqyrtuar çështja e vonesës së pagave për muajin janar të punëtorëve të administratës publike nëpër disa ministri.
Sipas një komunikate, Qeveria pasi ka analizuar lëshimet që janë evidentuar nëpër ministritë përkatëse, ka kërkuar që të merren të gjitha masat për eliminimin e të gjitha gabimeve dhe defekteve që janë shfaqur në sistemin e pagave.

Në këtë kuadër, është kërkuar që struktura e organizimit dhe e pagave nëpër ministri të harmonizohet në nivelin vertikal dhe horizantal, respektivisht të bëhet rishikimi i pagave sipas Udhëzimit Administrativ për gradimin e koeficienteve të nëpunësve civil.
Për këtë qëllim, Qeveria ka vendosur të formohet një grup punues 6 anëtarësh: dy këshilltarë politikë të Kryeministrit, zëvendësministri i ShP së dhe një zyrtar i Divizionit të Pagesave, zëvendësdrejtori i Buxhetit dhe një këshilltar i ministrit të Ekonomisë dhe Financave.

Ky grupi është i ngarkuar të rishikojë kofiencat e punëtorëve dhe listën e pagave nëpër çdo ministri, respektivisht departament dhe divizion, dhe që deri më që deri më 10 mars në qeveri të dorëzohet raporti i punës.
Na vazhdim, ministri Lutfi Haziri ka njoftuar qeverinë për takimin e Vjenës midis delegacionit të Kosovës dhe atij të Serbisë lidhur me çështje që kanë të bëjnë me reformat e pushtetit lokal.

Ministri Haziri ka theksuar se në takimin e Vjenës janë mbrojtur parimet e dokumentit kosovar për decentralizimin dhe të kompetencave të pushtetit lokal, duke shtuar se koncepti kosovar për decentralizimin është shumë i avancuar dhe sipas standardeve evropiane.

Ai gjithashtu, se delegacioni nga Prishtina në takimin e Vjenës ka demonstruar një profesionalizëm dhe unitet të madh dhe ka mbrojtur qëndrimin se të gjitha çështjet do të implementohen pas përcaktimit të statusit të Kosovës.
Kryeministri Kosumi ka përgëzuar punën e delegacionit kosovar, që është drejtuar nga ministri i Pushtetit Lokal, Lutfi Haziri dhe ka vlerësuar se ky proces negociua do të rezultojë me arritjen e tonë, bërjen e shtetit të Kosovë brenda vitit 2006.


Oli Ren thotë se pas zgjidhjes së statusit rol substancial në Kosovë do të ketë Bashkimi Evropian

Bruksel, 24 shkurt 2006 /TN /QIK - Komesioneri për zgjerim i Bashkimit Evropian, Oli Ren ka thënë se pas zgjidhjes së statusit rol substancial në Kosovë do të ketë Bashkimi Evropian. Këto komente Ren i bëri në një fjalim në Parlamentin Evropian.

Ai ka shtuar se Beogradi duhet të ketë një qëndrim më realist në procesin e e negociatave për statusin e Kosovës, ndërsa Prishtina sipas tij duhet të jep propozime proaktive për pozitën e pakicave në Kosovë, sikur edhe të përshpejtojë procesin e përmbushjes së standardeve që janë caktuar para tyre.
Komesioneri Ren u ka raportuar deputetëve në Komisionin për Politikë të Jashtme të Parlamentit Evropian edhe për turneun që ai ka pasur së bashku me Kryetarin e Komisionit Evropian Zhoze Manuel Barozo në rajonin e Ballkanit. Ren ka thënë se në Kosovë edhe pas statusit duhet të ketë garanca kushtetuese për pakicat, ndërsa BE ja është e detyruar që të luajë një rol substancial edhe pas caktimit të statusit.
Shumë deputetë të Parlamentit Evropian e kanë pyetur komesionerin Oli Ren edhe se a do të paraqesë pavarësimi i Kosovës precedent edhe për zgjidhje të mospajtimeve tjera territoriale gjetiu nëpër Evropë.

Ndërkaq Oli Rehn është përgjigjur se në Kosovë në vitin 1989 ishte hequr autonomia në mënyrë jokushtetuese, që ishte hyrje në zhvillimet tragjike të mëvonshme. Ai ka shtuar se ndër bazat e zgjidhjes së statusit është edhe ajo se Kosova nuk mund të kthehet më nën pushtetin e Beogradit.


Gjykata Evropiane ka refuzuar padinë penale kundër UNMIK ut për të drejtat e romëve

Strasburg 24 shkurt 2006 /TN /QIK - Gjykata Evropiane për të Drejtat e Njeriut me seli në Strasburg ka hedhë poshtë padinë penale kundër UNMIK ut që e ka bërë Qendra Evropiane për të drejtat e romëve.

Drejtoresha juridike e kësaj qendre, Diana Post ka thënë se gjyqi e ka refuzuar padinë pasi administrata e Kombeve të Bashkuara në Kosovë nuk është nënshkruese e Konventes evropiane për të drejtat e njeriut.
Romët kanë akuzuar UNMIK un për shkeljen e të drejtave të tyre për jetë dhe për trajtim degradues. Romët po ashtu kanë kërkuar që të zhvendosen nga tri kampet, të cilat sipas tyre janë të kontaminuara me plumb.

Por afro 560 romë kanë refuzuar të vendosen në kampin e ri, që për ta e ka përgatitur OKB në Kosovë, megjithëse ftesë për zhvendosje u ka bërë edhe Organizata Botërore e Shëndetësisë.


Hapja e rrugës së mbyllur Prishtinë - Shkup nuk është çështje ditësh

Kaçanik, 24 shkurt 2006 /TN /QIK - Ekspertët e gjeologjisë dhe gjeofizikës i kanë thënë Kryeministrit Bajram Kosumi se për shkak të shembjes së dheut të paktën edhe dy javë nuk mund të hapet rruga e bllokuar Prishtinë - Shkup afër Kaçanikut.

Kryeministri Kosumi, i cili së bashku me Zëvendëskryeministrin Adem Salihaj dhe një pjesë të kabinetit të tij dhe zëvendëskomandantin e KFOR it vizitoi vendin, ku është mbyllur rruga, tha se hapja e kësaj rruge, nuk është çështje ditësh.
"Ne kemi analizuar dhe duhet të orientohemi te qarkullimi i makinave të mëdha në rrugën kah Glloboçica në mënyrë që të mos bllokohet qarkullimi ekonomik", ka thënë Kosumi.
Shembjen e dheut në rrugën magjistrale Prishtinë - Shkup në afërsi të Kaçanikut ai e quajti katastrofë natyrore, me të cilën Kosova nuk është ballafaquar më herët dhe se mbyllja e rrugës po i kushton shumë shtrenjtë buxhetit të Kosovës dhe banorëve të kësaj ane.
Kryeministri Kosumi paralajmëroi fazën e dytë të punimeve, por nuk saktësoi se kur kjo rrugë do të jetë e qarkullueshme.
Në anën tjetër pjesëtarët e KFOR it kanë filluar meremetimin e një rruge alternative, të cilën mund ta kalojnë vetëm veturat me peshë deri në 2500 kilogram.


Edhe një premtim se linja hekurudhore Shkup - Prishtinë do të vëhet në qarkullim të martën e ardhshme

Shkup, 24 shkurt 2006 /TN /QIK - Ministri i Transportit dhe Lidhjeve Xhemali Mehazi tha se shpreson që linja hekurudhore Shkup - Prishtinë, e cila ka punuar vetë një ditë vitin e kaluar do të vëhet në qarkullim të martën e ardhshme.
Mehazi tha se rivënia në qarkullim e kësaj linje hekurudhore do t'i ndihmojë edhe situatës së krijuar pas mbylljes së qarkullimit rrugor në afërsi të Kaçanikut.
Treni në relacionin Shkup Prishtinë pas 6 vjet ndërprerjeje ishte rivënë në funksion më 20 dhjetor të vitit të kaluar, por pas udhëtimit të parë promovues u ndërpre qarkullimi i tij.


Vërshimi i lumit Sitnica ka ndërprerë prodhimin e rrymës në TE Kosova B

Prishtinë, 24 shkurt 2006 /TN /QIK - Si pasojë e vërshimit të ujit nga shtrati i lumit Sitnica në sipërfaqen e thëngjillit në zonën e termocentralit Kosova B në Kastriot është ndërprerë për kohë të pacaktuar prodhimi në dy blloqet e këtij termocentrali.

Si pasojë furnizimi me energji elektrike do të jetë i vështirësuar dhe do të bazohet kryesisht në import. Kështu kanë thënë zyrtarët e KEK ut në një konferencë me gazetarë.
Këshilltari i menaxhmentit ndërkombëtar të KEK ut Tom Lanigen njoftoi se drejtuesit dhe ekspertët e kësaj koorporate po e vlerësojnë gjendjen në këtë zonë dhe mundësinë për evitimin e dëmit. Sipas tij KEK u tash për tash ka kontraktuar importimin e 90 megavatëve.

Por furnizimi i banorëve me energji elektrike do të bëhet sipas planit të ri. Për kategorinë A furnizimi do të jetë 5:1, përkatësisht 5:2 në favor të rrymës, për kategorin B 4:2 ose 3:3 dhe për kategorinë C furnizimi do të bëhet sipas programit 2:4.


Holanda do të vazhdojë ta përkrahë Kosovën edhe në të ardhmen

Prishtinë, 24 shkurt 2006 /TN /QIK - Holanda do të vazhdojë ta përkrahë Kosovën edhe në të ardhmen, ka thënë Margaret Strajn, shefe e re e Zyrës në Prishtinë pas takimit që pati me Ministrin e Pushtetit Lokal Lutfi Haziri.
Edhe Ministri Haziri është shprehur i gatshëm për të vazhduar bashkëpunimin me Zyrën holandeze dhe Qeverinë e saj përmes kësaj zyre. Ai ka përsëritur fjalët e Ahtisarit nga takimi i Vjenës se nuk ka asnjë marrëveshje derisa nuk ka marrëveshje për statusin përfundimtar të Kosovës.
Ministri Haziri ka bërë të ditur se e ka njoftuar Presidentin e Kosovës Fatmir Sejdiun për rrjedhën e takimit të Vjenës, ndërsa sot zyrtarisht do t'i raportojë Delegacionit të Kosovës bashkë me ekipin e tij.


Kryeministri Kosumi mbështet kërkesën për mosprivatizimin e Unionit

Prishtinë, 24 shkurt 2006 /TN /QIK - Kryeministri i Kosovës, Bajram Kosumi ka mbështetur kërkesën për mosprivatizimin e hotelit "Union". Në deklaratën e tij thuhet se ai ndër të parët ka kërkuar shndërrimin e këtij objekti në një qendër kulturore të Kosovës. Kosumi vazhdon të beson se kjo do të ishte zgjidhja më e mirë për të.


Kosta thotë se krimi i organizuar dhe korrupsioni janë problemet kryesore në Ballkan

Tiranë, 24 shkurt 2006 /TN /QIK - Krimi i organizuar po bëhet gjithnjë e më i fortë në Ballkanin e pasluftës dhe po e kërcënon stabilitetin e rajonit, ka thënë në Tiranë, shefi i Zyrës së Kombeve të Bashkuara për Drogë dhe Krime Antonio Maria Kosta.

Ai tha se zyra e tij me seli në Vjenë po e përatit një program për t'iu ndihmuar vendeve në rajon që të luftojnë tregun ilegal të drogës dhe të armëve, trafikimin e qenieve njerëzore dhe krime të tjera.
Duke folur para zyrtarëve të Shqipërisë dhe diplomatëve perëndimorë, Kosta tha se krimi i organizuar, pastrimi i parave, korrupsioni dhe trafikimi janë problemet kryesore sot në Ballkan.


SHBA-të kanë investuar mbi 450 milionë dollarë në Maqedoni që nga viti 1993

Shkup, 24 shkurt 2006 /TN /QIK - Shtetet e Bashkuara të Amerikës kanë investuar më shumë se 450 milionë dollarë në Maqedoni që nga viti 1993. Drejtori i USAID it në Maqedoni Riçard Goldman ka thënë se populli amerikan kujdeset për popullin e Maqedonisë. Ai ka shtuar se SHBA të mbështesin tranzicionin e Maqedonisë në një vend me ekonomi të tregut dhe shoqëri shumetnike dhe atë me anë të tre programeve: ngritjen ekonomike, zhvillimin e institucioneve demokratike dhe arsimin.


Trashëgimia kulturore mbetet një preokupim permanent i Ministrisë së Kulturës

Prishtinë, 24 shkurt 2006 /TN /QIK - Përmbushja e standardeve mbetet edhe më tutje detyrë dhe prioritet i Qeverisë së Kosovës dhe institucioneve të saja. Në këtë kuadër edhe plotësimi i Standardit të 6 që ka të bëjë me Trashëgiminë kulturore mbetet një preokupim permanent i Ministrisë së Kulturës, Rinisë e Sporteve.
Ministri Astrit Haraqija, si kryesues i Grupit Punues për Standardin - Trashëgimia kulturore mbajti një takim pune me anëtarët vendorë e ndërkombëtarë të këtij grupi. Në këtë takim u raportua për të arriturat të cilat janë shënuar në këtë fushë, që ka të bëjë me trashëgiminë kulturore.

Ndërkaq Projektligji për Trashëgimi kulturore me kërkesën e ministrit Astrit Haraqija është hequr nga procedura e miratimit në Kuvendin e Kosovës për shkak se kjo temë është një prej çështjeve të bisedimeve me palën serbe dhe se një rezultat eventual i këtyre bisedimeve do të duhet të implementohet edhe në Ligjin për Trashëgiminë kulturore të Kosovës.
Duke folur për çështjen e inventarizimit, zv.ministrja Angjelina Krasniqi, vlerësoi se pas një pune të sukseshme të ekipit profesional në terren, janë identifikuar rreth 2500 objekte me vlera të trashëgimisë kulturore prej të cilave janë përzgjedhur 300 sosh e të cilat së shpejti do të botohen si broshurë e veçantë informative.
Në këtë takim u fol edhe për procesin e rindërtimit të objekteve ortodokse serbe të dëmtuara gjatë trazirave të marsit të vitit 2004. Si ministri Haraqija ashtu edhe pjesëmarrësit e tjerë vlerësuan lart suksesin që është arritur në këtë drejtim.

Kështu udhëheqësi i Këshillit të Evropës në frishtinë, Zurab Kaçkashvili shprehu falenderimet dhe përkrahjen për Ministrinë e Kulturës dhe për vetë ministrin Haraqija, për procesin e rindërtimit të monumenteve ortodokse të dëmtuara gjatë trazirave të marsit të vitit 2004.