|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

A.Rohan: Rezervat e thëngjillit në Kosovë mbulojnë 50 përqind të buxhetit për 70 vjetët e ardhshme

Vjenë, 23 shkurt 2006 /TN /QIK - Udhëheqësi i bisedimeve mes Prishtinës dhe Beogradit në Vjenë, diplomati austriak Albert Rohan thotë se plani i negociatave për Kosovën parashikon trajtimin e temave të posaçme, siç janë: decentralizimi, ruajtja e objekteve fetare serbe në Kosovë, të drejtat e minoriteteve, çështja e pronave, e cila, siç thotë, do të jetë shumë e vështirë.

 

Por sipas tij, më vonë do të debatohet edhe për prezencën e ardhshme ndërkombëtare në Kosovë, "sepse ajo është e domosdoshme, për sigurinë dhe disa lëmi tjera", thekson Rohan.

Duke folur për rezultatet konkrete të takimit të Vjenës, Rohan thotë se "janë arritur edhe disa marrëveshje parimore".

"Arsimi fillor dhe i mesëm duhet të mbetet në duart e komunave. Përbërja e policisë duhet t'i përgjigjet përqindjes së popullatës së një komune. Jo të gjitha komunat mund të kenë spitale. Megjithatë, të gjitha këto janë vetëm marrëveshje parimore", thekson diplomati austriak për "Dojçe velen".

Ndërkaq në lidhje me marrëveshjen përfundimtare, Rohan tha se palët kanë prezantuar dy koncepte diametralisht të kundërta. "Njëri koncept çon drejt pavarësisë së Kosovës, ndërsa tjetri synon ndarjen e saj në vija etnike, e ndoshta edhe ndarjen e Kosovës. Prandaj, sa i arsyeshëm është vazhdimi i bisedimeve me 17 mars", tha ai.

Duke folur për qëndrimin përfundimtar të bashkësisë ndërkombëtare për statusin e Kosovës, Rohan thotë se synohet arritja e një marrëveshjeje të pranueshme nga ndërkombëtarët dhe mes palëve në negociata. Në të kundërtën bashkësia ndërkombëtare duhet të marrë një vendim për ardhmërinë e Kosovës, nënvizon Rohan.

Sipas tij, në Këshillin e Sigurimit nuk janë qëndrimet e njëjta sa i përket ardhmërisë së Kosovës, ndërkohë që Grupi i Kontaktit është shumë homogjen, thotë Rohan.

Ndërkaq për ardhmërinë e Kosovës Rohan shpreson të jetë "shumë, shumë e mirë dhe e këndshme".

"Shpresoj se edhe gjendja ekonomike do të jetë stabile. Ne ishim në Bankën Botërore dhe kemi parë se vetëm rezervat e thëngjillit në Kosovë janë aq të mëdha sa që mbulojnë 50 përqind të buxhetit të vendit për 70 vjetët e ardhëshme. Pra unë jam i bindurpër të ardhmen e mirë të Kosovës", tha diplomati austrika Albert Rohan, zëvendës i kryenegociatorit Marti Ahtisari.