|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Rohan e konsideron takimin e Vjenës të suksesshëm

21 shkurt 2006 /TN

Raundi i parë i bisedimeve direkte midis shqiptarëve të Kosovës dhe serbëve mbi të ardhmen e Kosovës ka përfunduar me marrëveshjen që të dyja palët të takohen sërish muajin e ardhshëm.

21 shkurt 2006 - 20:24 /BBC

Diplomati austriak Albert Rohan, i cili kryesoi sesionin dyditor në Vjenë në emër të Kombeve të Bashkuara, tha se qëllimi i këtyre bisedimeve nuk kishte qenë arritja e ndonjë marrëveshjeje specifike në këtë etapë.

Arbër Vllahiu i BBC-së intervistoi zotin Rohan dhe fillimisht e pyeti sa të suksesshëm e shihte këtë takim:

Rohan: Mendoj se mund të konsiderohet si sukses. Mendoj se mund të vlerësohet si sukses sepse takimi u zhvillua në mënyrë profesionale, çfarë është një arritje sepse kemi të bëjmë me dy delegacione tek të cilat emocionet luajnë një rol shumë të madh. Të dyja palët ishin konstruktive dhe ishin më të interesuara që të diskutojnë substancën se sa të polemizojnë. Duke diskutuar këto çështje teknike që kanë të bëjnë me shëndetësi, arsim apo shërbim policor ne konkluduam se ndonëse këndveshtrimet ishin të ndryshme pozicionet e tyre nuk ishin edhe shumë të largëta në aspektin praktik. Prandaj mendoj se mund të arrijmë shumë pika të përbashkëta para se të arrijmë tek diskutimi i statusit përfundimtar.

BBC: Përveç deklarimeve se ishin diskutime të mira. A ishte e vështirë të fillohej me këtë proces?

Rohan: Ka qenë vështirë për dy arsye sepse të dyja palët duhej të përgatisnin pozicionet e veta një gjë që ato e bënë dhe ne ishim gati për të filluar dhe pastaj vdiq presidenti Rugova. Neve na u desh të ishim shumë të kujdesshëm që të mos humbnin dinamizmin e momentit. Më duhet të them se shqiptarët u sollën në mënyrë shumë të arsyeshme gjatë gjithë kësaj kohe kur brenda tre javëve u zgjodh presidenti i ri dhe u miratua ekipi negociator kështu që u humb një kohë minimale.

BBC: Zoti Rohan, a i konsideroni keto dy ditë të bisedimeve si fillim të vërtetë të zgjidhjes së statusit përfundimtar të Kosovës?

Rohan: Po, ky është takimi i parë direkt në kuadër të kornizës së takimeve rreth statusit. Mandati ynë është që të zgjidhim çështjen e statusit dhe ky është vetëm fillimi i bisedimeve.

BBC: Në këtë rrafsh ju thoni se është fillim i bisedimeve. Keni parë çasje të ndryshme të palëve. A mendoni se është e vështrië të arrihet një zgjidhje përfundimtare?

Rohan: Kjo do të jetë shumë më vështirë. Ne po përpiqemi të fillojmë nga kënde më të lehta siç janë aspektet praktike por ne jemi të vetëdijshëm se herët a vonë do të duhet që të përballemi me çështjen themelore por kur të vijë ky moment ne shpresojmë që t'i kemi ofruar qëndrimet dhe të kemi krijuar një atmosferë të mirëkuptimit reciprok. Kjo do të ishte shumë mirë por absolutisht nuk ka garanci se kjo do të ndodhë dhe se domosdoshmërisht do të arrihet një marrëveshje. Në një situatë të tillë ne do të raportojmë tek Këshilli i Sigurimit dhe ata do të vendosin më tutje.

BBC: Pra zoti Rohan kjo do të thotë se KS i OKB-së do të imponoj zgjidhjen përfundimtare për Kosovën?

Rohan: Jo domososhmërisht. Këshilli i Sigurimit të OKB-së do të vendosë se çfarë do të bëhet. Ne e kemi mandatin nga sekretari i Përgjithshëm i cili ka mandatin nga Këshilli i Sigurimit që të na emërojë neve dhe nëqoftëse nuk kemi sukses atëherë ne do të raportojmë dhe ata ose do të kërkojnë që të vazhdojmë ose do të marrin një vendim tjetër.

BBC: Në njërën anë është pavarësia që kërkon njëra palë. Në anën tjetër është qëndrimi i fundit i Grupit të Kontaktit për të respektuar vullnetin e popullit të Kosovës. A po ecën kështu Kosova drejt pavarësisë?

Rohan: Nuk dua të prononcohem rreth rezultatit përfundimtar sepse nuk na takon neve që të vendosim. Nëse e shohim deklaratën e Grupit të Kontaktit atëherë është e vërtetë se zgjidhja duhet të jetë e pranueshme nga populli i Kosovës dhe ajo shkon në një drejtim përkatës. Nuk mund të them asgjë më shumë.

BBC: Dhe zoti Rohan, në një pyetje, të them e fundit, këto bisedime po mbahen për të zgjidhur statusin e serbëve brenda statusit të Kosovës, apo jo?

Rohan: Ky është vetëm një aspekt i tyre dhe çfardo që do të jetë statusi i tyre është evidente se situata aktuale e serbëve të Kosovës është e mjerueshme dhe raporti në Këshillin e Sigurimit javën e kaluar tregonte situatën qartë. Çfardo që të jetë statusi është e qartë se situata e tyre do të duhet të përmirësohet. Ata duhet të kenë lirinë e lëvizjes, duhet të ketë një siguri më të madhe dhe ky është njëri prej prioriteteve tona kryesore.

BBC: Kur mund të presim fundin e këtyre bisedimeve?

Rohan: Shpresoj se do të jetë në vitin 2006.