MASHT boton 7 tekste në gjuhën turke kurse të gatshme për botim janë edhe 19

MASHT boton 7 tekste në gjuhën turke kurse të gatshme për botim janë edhe 19

Prishtinë, 21 shkurt 2006 /TN

Aktualisht, në gjuhën turke, në arsimin parafillor i vijojnë mësimet 145 nxënës, në arsimin fillor dhe arsimin e mesëm të ultë 2310, në arsimin e mesëm të lartë 550, në Universitet 180, studimet master i ndjekin 20 studentë, ndërkaq që MASHT për vitin akademik 2005/2006 ka paraparë 28 vende për regjistrim të studentëve në fakultetet të ndryshme të UP-së

Ministria e Arsimit, e Shkencës dhe e Teknologjisë (MASHT), në kuadër të përpjekjeve të përqendruara për ofrimin e arsimit për të gjithë qytetarët e Kosovës, vazhdon përmbushjen e synimit për arsimim cilësor dhe standarde bashkëkohore për nxënësit dhe studentët e Kosovës.

Në arritjen e këtij qëllimi, përkundër sfidave të ndryshme, MASHT rithekson vendosmërinë në përmbushjen e obligimeve ligjore për të ofruar kushte arsimimi për të gjitha etnitetet e Kosovës, përfshirë edhe komunitetin turk.

Do theksuar se procesi mësimor në gjuhën turke organizohet në të gjitha nivelet arsimore, (parauniversitar dhe universitar) dhe mësimi zhvillohet sipas plan programeve të miratuara nga MASHT.

MASHT ka shpallur konkurse publike për hartimin e teksteve shkollore për të tri gjuhët mësimore për klasat që punojnë me plane dhe programe të reja, si: klasa 1, 2, 3, 4, 6, 7, 8, 9, 10,11, 12 dhe 13. Të drejtë pjesëmarrjeje në këto konkurse kanë pasur shtëpitë botuese (me autorë që ato vetë i zgjedhin).

MASHT në bashkëpunim me shtëpinë botuese “Libri Shkollor” për vitin shkollor 2005/2006 ka botuar 7 tekste nga autorët turq dhe këtë: Türkçe 1, Türkçe 2, Tarih 6, Tarih 7, Resim Kültürü 1, Resim Kültürü 6, Resim Sanatý 10

Përveç teksteve të botuara, janë të gatshme edhe 2 tekste të autorëve turq si dhe të gjitha tekstet tjera, të përkthyera, për lëndët e përgjithshme për klasat 1, 2, 6 dhe 7 me sa vijon: Resim Kültürü 2 , Resim Kültürü 9, Biologji 6 dhe 7, Kimi 7, Edukatë Qytetare 6 dhe 7, Matematikë 1, 2, 6, 7, Fizikë 6 dhe 7, Gjeografi 6 dhe 7 dhe Teknologji 1, 2, 6, 7

Meqenëse deri më tani vetëm “Libri Shkollor”, përpos në gjuhën shqipe, ka botuar tekste edhe në gjuhën turke, MASHT inkurajon shtëpitë tjera botuese që në të ardhmen të marrin përsipër botimin e teksteve në gjuhën turke, për shkak të shpenzimeve relativisht të larta e si rezultat i kësaj edhe numri i vogël i ekzemplarëve të librave.

Viteve të fundit janë bërë hapa të dukshëm në ngritjen e cilësisë dhe organizimin e mësimit në gjuhën turke, megjithatë për plotësimin e kërkesave dhe nevojave të arsimit në gjuhën turke nevojitet angazhim edhe më i madh, parasëgjithash gatishmëri e shtëpive botuese në Kosovë që t’u ofrojnë tekstet e nevojshme nxënësve dhe studentëve të këtij etniteti.

Aktualisht, në gjuhën turke, në arsimin parafillor i vijojnë mësimet 145 nxënës, në arsimin fillor dhe arsimin e mesëm të ultë 2310, në arsimin e mesëm të lartë 550, në Universitet 180, studimet master i ndjekin 20 studentë, ndërkaq që MASHT për vitin akademik 2005/2006 ka paraparë 28 vende për regjistrim të studentëve në fakultetet të ndryshme të UP-së.