Dita e dytë e bisedimeve në Vjenë

Dita e dytë e bisedimeve në Vjenë

21 shkurt 2006 /TN

21 shkurt 2006 - ora: 09.03 /BBC - Në Vjenë, të martën, me ndërmjetësim të OKB-së, vazhdojnë bisedimet dyditore ndërmjet Prishtinës dhe Beogradit, për çështjen e decentralizimit.

Ditën e dytë dhe të fundit të bisedimeve do të diskutohen përgjegjësitë në fushën e drejtësisë dhe atë të policisë.

Të dyja këto fusha thuhet se do të mund të shkaktojnë fërkimet e para ndërmjet delegacioneve.

Kjo për faktin e përgjegjësive që duhet të kenë komunat në këto fusha.

Delegacionet as në ditën e parë të bisedimeve nuk janë pajtuar. Bisedimet, të hënën, u zgjatën për një orë më shumë nga sa ishte paraparë, dhe gjatë debatit u hapën temat e shëndetësisë, të arsimit dhe të kulturës.

Burime nga takimi thonë se ka patur shumë dallime në qëndrimet e të dyja palëve dhe kanë shtuar se mosmarrëveshjet janë lidhur kryesisht me konceptet e tyre për reformën e pushtetit local.

Zyrtarët ndërkombëtarë thuhet të kenë ndërhyrë për të bërë me dije se reforma e pushtetit lokal duhet të jetë funksionale, stabile dhe e qëndrueshme ekonomikisht.

Pala shqiptare thotë se ka arritur që të hartojë një plan për reformën e pushtetit lokal, që bazohet mbi të drejtat e qytetarëve dhe që u jep më shumë përgjegjësi komunave të reja në një, siç vlerësohet, Kosovë të pavarur.

Ajo e kritikon planin serb duke e cilësuar atë si ndarës mbi baza etnike dhe territoriale.

Përfaqësuesit serbë thonë ndërkaq se plani i palës kosovare nuk ofron më shumë të drejta për pakicën serbe në Kosovë.

Ata kanë thënë se duan më shumë autonomi për serbët e Kosovës dhe një lidhje të posaçme me Beogradin zyrtar.

Por ajo që mund të quhet përparim në bisedimet që filluan në Vjenë, me ndërmjetësimin e OKB-së, do të ishte fakti se të dyja palët janë ulur pa komplekse përballë njëra-tjetrës.

Dita e parë e takimit u cilësua si shumë konstruktive dhe e dobishme por pa ndonjë rezultat.

Megjithëse vlerësohet se takimi në Vjenë nuk ka për qëllim arritjen e ndonjë marrveshjeje përveç shkëmbimit të pikëpamjeve ndërmjet palëve në bisedime.

Takimi i Vjenës shënon fillimin e bisedimeve, që do të çojë në zgjidhjen e statusit përfundimtar të Kosovës.

Bashkësia ndërkombëtare së fundi ka deklaruar se zgjidhja duhet të kërkohet në respektimin e vullnetit politik të qytetarëve të Kosovës.