Konferenca e tretë Ndërkombëtare për Përkthimin

Kairo (Egjipt) 11 - 14 shkurt 2006:

Konferenca e tretë Ndërkombëtare për Përkthimin

19 shkurt 2006 /TN

Kairo (Egjipt) - Më 14 shkurt mbylli punimet në Kairo, Konferenca e tretë Ndërkombëtare për Përkthimin, që zhvilloi punimet e saj prej 11 deri më 14 shkurt, i organizuar nga Ministria e Kulturës e Egjiptit. Ceremoninë e fillimit të punimeve të konferencës e nderoi me pjesëmarrjen e saj, zonja e parë e Egjiptit, Suzan Mubarak.

Ajo shprehu kënaqësinë e saj që përurimi i botimit të një mijë librave të përkthyera nga 30 gjuhë të ndryshme botërore në gjuhën arabe, përkon me Konferencën e tretë Ndërkombëtare për përkthimin që u mbahet në Kairo.

Ky projekt theksoi ajo, nuk është ngritur nga një boshllëk, por është vazhdimësi e traditës së kombit të saj, ku zanafilla është me formimin e një qendre të posaçme për përkthimin, të themeluar nga Halifja Memun në Bagdat në vitet 825 te erës sonë, për tu pasuar më pas me projektin e përkthimeve të zbatuar nga Muhamed Ali Pasha, themeluesi i Egjiptit modern.

Në ceremoni, zonja e parë e Egjiptit bëri dhe nderimin e 10 prej përkthyesve më të mirë të botës nga gjuha arabe në gjuhë të tjera dhe anasjelltas, si në gjuhët Kineze, Japoneze, Anglisht, Gjermanisht, Spanjisht, etj.

Në emër të përkthyesve të nderuar nga zonja e parë e Egjiptit, përshëndeti përkthyesi i nga Gjermania: Prof. Hartmut Fahndrich. Po ashtu konferencën e përshëndetën dhe Ministri i Kulturës së Egjiptit: Faruk Hosni si dhe Sekretari i Përgjithshëm i “Këshillit të Lartë për Kulturën”, Prof. Dr. Xhabir Asfur.

Konferenca e Tretë Ndërkombëtare për përkthimin, pati si synim të sajin trajtimin e problematikave të përkthimit, rolin e përkthimit dhe të përkthyesit në përçimin e qytetërimeve të ndryshme, si dhe ndikimin e gjuhëve të ndryshme në kulturat dhe qytetërimet e derimëtanishme.

Në Konferencë, morën pjesë mbi 200 letrarë, poetë, përkthyes dhe studiues, nga vende të ndryshme të botës, ndër të cilët morën pjesë dhe studiues nga Kosova dhe Shqipëria. Nga Kosova ishin të ftuar Prof. Dr. Beqir Ismaili, që referoi temën mbi: “ Ndikimi i Prof. Dr. Fetih Mediut”, në fushën e përkthimit nga gjuha arabe në gjuhën shqipe”.

Po ashtu në konferencë paraqitën kumtesat e tyre dhe studiuesit: Dr.Isa Memishi me temën: “ Roli i Degës së Orientalistikës (në Kosovë), në përkthimin e letërsisë arabe në gjuhën shqipe”, si dhe Dr. Adnan Ahmedi me temën: “Trashigimia Arabe në peshoren e përkthimit shqip”.

Ndërsa nga Shqipëria ishte i ftuar studiuesi Mr: Bledar Myftari, i cili referoi temën: “ Botimet Arabe të përkthyera në gjuhën shqipe”. Tema e mbajtur prej tij gjeti menjëherë vend në mjaft mediat arabe, duke u botuar dhe në Xhezira.net.

Studiuesit dhe drejtuesit e konferencës i vlerësuan shumë punimet e studiuesve të Kosovës dhe Shqipërisë, madje duke pasur parasysh kontributin e Prof. Dr. Fetih Mehdiu u shprehën se atë që e realizon një indivit me vullnet dhe i përkushtuar shumë herë nuk i realizon as një institucion i tërë.