|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Lajmet e ditës

18 shkurt 2006 /TN /Evropa e lirë

Përmbajtja:

• Drnovshek e ka përsëritur propozimin e tij për pavarësimin e Kosovës brenda 5 viteve
• Ekipi negociator i Beogradit: “Propozimi ynë është të formohen 16 komuna të reja »
• Ahtisaari: Kompromisi Prishtinë-Beograd nuk është baza e vetme për zgjidhjen e statusit.
• Shqipëria dhe BE parafuan Marrëveshjen e Stabilizim-Asociimit.
   

Drnovshek e ka përsëritur propozimin e tij për pavarësimin e Kosovës brenda 5 viteve

 

LUBJANË : 18 shkurt 2006 - "Kur do të bëhet përcaktimi i statusit politik të Kosovës në pajtim me vullnetin e shumicës së popullatës, jam i bindur se edhe pala shqiptare me tjetër sy do ta shohë pakicën serbe, dhe në këtë mënyrë do të mund të vendosej një jetë normale", ka deklaruar presidenti i Sllovenisë Janez Drnovshek.

Në një intervistë për televizionin italian RAI, Drnovshek e ka përsëritur propozimin e tij për pavarësimin e Kosovës brenda 5 viteve, nëse, siç ka thënë ai, shqiptarët do t'i respektonin të drejtat e pakicës serbe.

Presidenti slloven gjithashtu është angazhuar që "bashkësia ndërkombëtare të jetë e pranishme në Kosovë edhe për disa kohë".

 

 

Ekipi negociator i Beogradit :  “Propozimi ynë është të formohen 16 komuna të reja »

 

BEOGRAD, 18 shkurt 2006 - Ekipi negociator i Beogradit në takimin e Vjenës do të kërkojë formimin e komunave të reja në Kosovë, ka deklaruar anëtari i ekipit të Serbisë, Milorad Todoroviç.

"Propozimi ynë është të formohen 16 komuna të reja, për dallim nga koncepti i centralizuar që e propozon pala shqiptare e Kosovës, të cilin kam mundur ta shoh", ka thënë Todoroviç.

Bisedimet për decentralizimin fillojnë të hënën në Vjenë.

 

 

Ahtisaari: Kompromisi Prishtinë-Beograd nuk është baza e vetme për zgjidhjen e statusit

 

VJENË, 18 shkurt 2006 - Kompromisi midis Prishtinës dhe Beogradit nuk është baza e vetme për zgjidhjen e konfliktit, ka thënë i dërguari i posaçëm i Kombeve të Bashkuara për statusin e Kosovës, Marti Ahtisaari.

"Nuk është fjala se çka dëshirojnë në Prishtinë dhe në Beograd. Duhet pasur parasysh se e ardhmja e Kosovës është në duart e Këshillit të Sigurimit. Katër anëtarët e përhershëm të Këshillit të Sigurimit të Kombeve të Bashkuara janë unikë mbi bazën për gjetjen e zgjidhjes", ka thënë Ahtisaari në intervistën për gazetën finlandeze Hufvustadtbladet.

"Bisedimet kanë për qëllim arritje të marrëveshjeve të shpejta për çështje praktike, e jo formim të kufinjve. Duhet krijuar kushte sa më të mira që të gjitha pakicat të ndjehen të sigurta dhe të mbeten në vendin e tyre nëse këtë e dëshirojnë", ka nënvizuar Ahtisaari.

Sipas tij, pas zgjidhjes së statusit, nuk do të ketë ndarje pushteti mes autoriteteve ndërkombëtare dhe vendore.
"Është e qartë se nuk do të ketë kurrfarë UNMIK-u me ndonjë emër tjetër", ka thënë Ahtisaari, duke shtuar se mund të flitet për një prani ushtarake ndërkombëtare në Kosovë, por në një afat të kufizuar kohor.

 

 

Shqipëria dhe BE parafuan Marrëveshjen e Stabilizim-Asociimit

 

TIRANË, 18 shkurt 2006 - Kryetari i Komisionit Evropian Jose Manuel Barroso e përcjellur sot në Tiranë mesazhin e shpresës dhe të besimit për të ardhmen evropiane të Shqipërisë.

Në prani të të gjitha forcave politike, ministri i Jashtëm i Shqipërisë Besnik Mustafaj dhe eurokomisioneri për Zgjërimin, Oli Rehn bënë parafimin e Marrëveshjen së Stabilizim-Asociimit.

Pas nënshkrimit, Barroso tha se marrëveshja paraqet "gurthemel për rrugën e Shqipërisë drejt anëtarësimit në BE", dhe u bëri thirrje të gjitha forcave politike të punojnë së bashku për të zbatuar pikat e marrëveshjes.

 

Ai tha se vitet e fundit në Shqipëri është bërë progres i dukshëm, por shtoi se të gjitha planet e qeverisë kundër korrupcionit duhet të vihen në jetë. Barroso gjithashtu theksoi se Shqipëria duhet të vazhdojë të luajë rolin konstruktiv në rajon.

Marrëveshja duhet të miratohet nga të gjitha 25 vendet anëtare të BE-së, përpara se të bëhet nënshkrimi formal i saj.