Ministri Veliu hapi punëtorinë për Strategjinë e arsimit parauniversitar

Ministri Veliu hapi punëtorinë për Strategjinë e arsimit parauniversitar

Prishtinë, 17 shkurt 2006 /TN

Veliu tha se punëtoria që po mbahet shënon një moment kulmor të Strategjisë sepse do të përcaktohen fushat kryesore të ndërhyrjeve në arsim në dhjetë vitet e ardhshme dhe grupe të specialistëve do të punojnë në secilën fushë për të detajuar aktivitetet e zbatimit, monitorimit dhe të vlerësimit së rezultateve

Ne kudër të procesit për hartimin e Strategjisë per Arsimin Paruniversitar (SAPU) MASHT po mbanë punëtorinë tre ditore ne Ohër. Këtë punëtori, në të cilën po marrin pjesë ekspertë vendorë dhe ndërkombëtar të arsimit, e hapi dje Ministri Agim Veliu i cili ndër të tjera theksoi rëndësinë e këtij procesi si dhe periudhat nëpër të cilat ka kaluar.

“Që nga mbledhja e parë në muajin korrik të vitit të kaluar e deri më sot, kanë kaluar shtatë muaj dhe procesi ka bërë përparim. Është themeluar Grupi i ekspertëve të arsimit parauniversitar i cili tashmë po kryen funksionin e tij udhëheqës me rekomandimet dhe sugjerimet e vlefshme për hartimin e Strategjisë”, dekalroi Veliu.

Ai njoftoi pjesëmarrësit se kanë përfunduar punëtoritë një ditore në të shtatë rajonet e Kosovës, nën udhëheqjen e agjencisë implementuese, Qendrës për Arsim të Kosovë (KEC), dhe janë evidentuar shumë probleme, arritje dhe janë dhënë sugjerime me vlerë për ecjen përpara të arsimit në Kosovë. Sipas Veliut Grupi për komunikim, nën drejtimin e specialistëve të Ministrisë, ka bërë një punë të lavdërueshme e cila ka filluar me botime të artikujve në dy gazeta ditore dhe deri tani janë botuar tre të tillë.

“Po ashtu është në proces hartimi i fletëpalosjeve dhe po përgatiten emisione televizive. Në muajin dhjetor Ministria e Arsimit zhvilloi një takim me të gjithë donatorët, i cili forcoi themelet e bashkëpunimit strategjik institucional”, tha Veliu duke shprehur optimizmin se fryma e bashkëpunimit dhe e besimit reciprok do të vazhdojë dhe do të thellohet edhe më shumë gjatë zbatimit të Strategjisë.

Më tej Veliu tha se punëtoria që po mbahet shënon një moment kulmor të Strategjisë sepse do të përcaktohen fushat kryesore të ndërhyrjeve në arsim në dhjetë vitet e ardhshme dhe grupe të specialistëve do të punojnë në secilën fushë për të detajuar aktivitetet e zbatimit, monitorimit dhe të vlerësimit së rezultateve. Sipas Ministrit Veliu procesi i hartimit të Strategjisë zhvillohet në kohën kur kanë filluar bisedimet për statusin e Kosovës dhe viti 2006 është vendimtar.

Ai deklaroi se në këtë mënyrë, zbatimi i Strategjisë do të bëhet një një situatë të ndryshme nga kjo e sotmja dhe jam i bindur se mobilizimi i tërë punonjësve të arsimit që do të përfshihen në këtë proces do të jetë akoma më i madh. “Ne të gjithë së bashku kemi privilegjin, por edhe përgjegjësinë, për zhvillimin e arsimit, i cili e ka kapërcyer fazën e emergjencës dhe ka hyrë në atë e zhvillimit”, tha në fund të fjalës së tij Ministri Agim Veliu.

Në ditën e parë dhe të dytë te kësaj punëtorie po analizohen të arriturat dhe mangësitë në sistemin e arsimit parauniversitar dhe me këtë rast do të ofrohen informacione për gjendjen dhe perspektivën e sistemit të arsimit e cila do të shërbejë më tej si bazë për hartimin e strategjisë.

Pjesëmarrësit e kësaj punëtorie do të ”vjelin” ide me qëllim të avancimit të këtij procesi të rëndësishëm dhe hartimit të një projekti të avancuar për arsimin kosovarë. “Ndër çështjet të cilat janë objekt analizash dhe shqyrtimesh gjatë këtyre ditëve janë: Mësimdhënia dhe Mësimnxënia; Infrastruktura, Planet dhe Programet mësimore, Cilësia e Arsimit, Politika dhe Legjislacioni e çështje të tjera me interes.

Në fund të kësaj punëtorie do të nxjerrjen rekomandimet për Këshillin e Ekspertëve (KEAP), të cilat do të shërbejnë për punë të mëtejshme”, ka deklaruar kryetari i KEAP, zv. Ministri i arsimit Fevzi Berisha.

Në këtë punëtori po marrin pjesë mbi 40 ekspertë, zyrtarë të lartë të MASHT, Nënkryetari i Grupit Parlamentar për arsim i Kuvendit të Kosovës z. Niman Alimusaj, përfaqësues te OSBE-së, GTZ-se, DKA-ve, etj. Ndërkaq që ajo po udhëhiqet nga dr. Dukagjin Pupovci dhe dr. Bardhyl Musai.
Ministria e Arsimit, Shkencës dhe Teknologjisë kohë më parë ka filluar hartimin e projektit për Strategjinë afatmesme të Arsimit Parauniversitarë 2007-2017.