|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Ministrat Veliu dhe Pollozhani nënshkruan protokolin e Programit ekzekutiv për bashkëpunim

16 shkurt 2006 /TN

 

Gjatë vizitës në Republikën e Maqedonisë, Ministri Veliu u takua edhe me Kryetarin e Parlamentit të Maqedonisë,  Lupço Jordanovski dhe me Nënkryetarin e Qeverisë Musa Xhaferi, me të cilët u bisedua për thellimin e bashkëpunimit institucional në mes te dy Parlamenteve, Qeverive dhe dy vendeve në fushat me interes të përbashkët

 

Dje në ambientet e Ministrisë per Arsim dhe Shkencë të Republikës së Maqedonisë, në Shkup, Ministrat Agim Veliu dhe Aziz Pollozhani këmbyen protokollet e Programit ekzekutiv për bashkëpunim  në mes të Ministrisë së  Arsimit dhe Shkencës të Republikës së Maqedonisë dhe Ministrisë së Arsimit, Shkencës dhe Teknologjisë të Kosovës.

 

Në delegacionin e Kosovës të cilin i printe Ministri Veliu, morën pjesë edhe nënkryetari i Komisionit Parlamentar për arsim, shkencë, kulturë i Kuvendit të Kosovës Nimon Alimusaj, Drejtori i Departamenti për arsim të lartë Xhavit Rexhaj, shefi i Zyrës për bashkëpunim ndërkombëtar Nexhmi Rudari dhe përfaqësuesi i UNMIK-ut Shtefan Felbrih.

 

Duke i dëshiruar mirëseardhje ministrit te MASHT Agim Veliut, homologu i tij Aziz Pollozhani ngushëlloi atë për humbjen e Presidentit Rugova, ndërkaq që përgëzoi institucionet e Kosovës për pjekurinë politike që treguan me rastin e zgjedhjes së kryetarit të ri të Kosovës.

 

“Përshëndes aktivitetet e Ministrisë, por edhe të Qeverisë suaj si dhe punën që po bëni ne situatën aktuale”, tha z. Pollozhani për të deklaruar se nënshkrimi i Programit ekzekutiv po konkretizon nje vullnet te dyanshëm për thellimin e bashkëpunimit. Sipas Pollozhanit ky program paraqet hapësirën e nevojshme juridike e cila bën që Marrëveshja e bashkëpunimit të shfrytëzohet qenësisht.

 

Ministri i arsimit të Maqedonisë tha se bashkëpunimi me MASHT dhe Qeverinë ë Kosovës do të vazhdojë me qëllim të avancimit të proceseve arsimore, shkencore dhe akademike.

 

Ai falënderoi me këtë rast UNMIK-un dhe z. Petersen, por edhe përfaqësuesin e misionit ne Maqedoni z. Oleg Levitin për ndihmën dhënë për Programin ekzekutiv, por edhe për realizimin e plotë të Marrëveshjes së Ohrit qe mundësoi rrumbullaksimin e transferimit të studentëve të Universitetit të Tetovës në Fakultetin e Mjekësisë të Universitetit të Prishtinës. “Z. Ministër, ne ju falënderojmë për Marrëveshjen e Ohrit dhe jemi të hapur të ndihmojmë në vështirësitë që mund ti keni”, deklaroi Pollozhani duke përshëndetur ndihmën holandeze.

 

Ministri Agim Veliu shprehu kënaqësinë per takimin me Ministrin Pollozhani te cilin e falënderoi për solidarizimin me dhembjen e madhe për ndarjen fizike me Presidentin Rugova. “Programi qe sot po zyrtarizojmë ka rëndësi të madhe për bashkëpunimin ne vazhdim ne fushat e ndjeshme siç janë shkenca dhe arsimi”, deklaroi Veliu.

 

Ai tha se pret që Programi te detajizohet me cështjet konkrete, qe shkenca dhe arsimi përgjithësisht të fuqizohen me projekte të përbashkëta ne interes të studentëve, shkencëtarëve, ne interes te te dy vendeve fqinje qe kanë lidhje tradicionale kulturore, arsimore, shkencore, etj. Veliu ka falenderuar autoritetet qeveritare maqedonase, por edhe z. Petersen e UNMIK-un për krijimin e kushteve që ky program të hapë rruge bashkëpunimi të vazhdueshëm.

 

Ministri Veliu ka deklaruar se bashkëpunimi në lëmin e shkencës është me prioritet për MASHT, ndërkaq që të dyja palët kanë vendosur që të zhvillojmë marrëdhënie të ndërsjella dhe bashkëpunim të drejtpërdrejt shkencor dhe arsimor midis institucioneve kërkimore, institucioneve të arsimit, institucioneve dhe asociacioneve shkencore nëpërmes lidhjes së kontratave midis partnerëve përkatës.

 

“Në kuadër të programit nacional të proklamuar nga Presidenti Rugova për ngritjen e shkencës në Kosovë, ne po vazhdojmë bashkëpunimin me Ministrinë e Arsimit të Maqedonisë dhe z. Pollozhani, me të cilin po nënshkruajmë protokollin e marrëveshjes për bashkëpunim”, ka deklaruar Veliu.

 

MASHT dhe Ministria e Arsimit dhe e Shkencës e Maqedonisë do të nxisin shkëmbimin e punëtorëve shkencorë dhe specialistëve për qëndrime studimore, kërkime shkencore, njohje me hulumtime shkencore dhe për shkëmbim përvojave, si dhe pjesëmarrjen në konferenca, kongrese dhe forume të tjera shkencore të cilat mbahen në IRJ të Maqedonisë dhe në Kosovë.

 

Programi Ekzekutiv parasheh që palët do të nxisin formimin e komisioneve të përbashkëta të ekspertëve në fusha të ndryshme arsimore me interes të përbashkët.

 

Ministrat Pollozhani e Veliu janë pajtuar që të gjejnë forma dhe mundësi bashkëpunimi në mes te institucioneve të të dy vendeve.

 

Në këtë takim mori pjesë edhe zv. Ministri i arsimit i Maqedonisë z. Tale Geramiqievski, ndërkaq që delegacionet biseduan edhe për tema si: arsimi i lartë, korniza e kualifikimeve kombëtare, etj.

 

Pas takimit Ministrat Veliu e Pollozhani u takuan me gazetarë të shumtë të mediave maqedonase dhe kosovare.

 

Gjatë vizitës në Republikën e Maqedonisë, Ministri Veliu u takua edhe me Kryetarin e Parlamentit të Maqedonisë, Lupço Jordanovski dhe me Nënkryetarin e Qeverisë Musa Xhaferi, me të cilët u bisedua për thellimin e bashkëpunimit institucional në mes te dy Parlamenteve, Qeverive dhe dy vendeve në fushat me interes të përbashkët