|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Zoti Kosumi kërkoi mbështetje për procesin e zgjidhjes së statusit

Kosumi flet për mbledhjen e Këshillit të Sigurimit

16 shkurt 2006 /TN

E mërkurë, 15 shkurt 2006 / BBC - Kryeministri i Kosovës, Bajram Kosumi, i ka thënë BBC-së se me pjesëmarrjen e një udhëheqësi kosovar në takimin e Këshillit të Sigurimit të OKB-së po hapet dera për vendin e Kosovës në OKB.

Zoti Kosumi, që është edhe kryeministri i parë i Kosovës që merr pjesë në takimet e KS-së ka thënë se ka kërkuar nga Sekretari i Përgjithshëm i OKB-së dhe ambasadorët e vendeve anëtare të KS-së që ta përkrahin Kosovën në procesin e zgjidhjes së statusit politik të saj.

Ai është shprehur i gatshëm që të takojë udhëheqësit më të lartë shtetërorë të Serbisë për të zgjidhur problemet ndërmjet Kosovës dhe Serbisë.

Arbër Vllahiu zhvilloi një bisedë me kryeministrin Kosumi pas takimi ttë KS të OKB-së dhe fillimisht i kërkoi të jap një vleërsim për takimin…

Kosumi: Nuk ka asnjë dyshim që është një hap i vogël përpara për Kosovën, por një hap me rëndësi shumë të madhe.

Për herë të parë Kosova merr pjesë në mbledhjen e Këshillit të Sigurimit ku diskutohet për Kosovën.

Ky është hapi i parë por vendimtar për faktin se tani e tutje sa herë që të flitet për Kosovën ajo do të jetë e pranishme aty vetë.

Unë besoj se kjo është dera e vogël për vendin e Kosovës në të ardhmen në OKB.

Po ashtu ato që janë diskutuar në KS janë shumë inkurajuese. KS i ka dhënë një përkrahje të fuqishme procesit të vendosjes për statusin përfundimtar dhe unë do ta kisha theksuar faktin se për herë të parë në KS është folur hapur se pavarësia e Kosovës është një prej opsioneve të mundshme, se është opsion real dhe duhet të llogaritet në të.

BBC: Zoti kryeministër ju keni patur takime të shumta gjatë qëndrimit në neë York dhe veç tjerash keni biseduar edhe me sekretarin e përgjithshëm të OKB-së, Kofi Annan. Çfarë thatë dhe çfarë ju thanë?

Kosumi: Jam takuar me pothuaj të gjithë ambasadorët e KS të OKB-së.

Dhe veç takimeve me shumicën e ambasadorëve të vendeve anëtare të përhershme të KS-së, kam patur edhe një drekë pune me ambasadorët të shtruar nga ambasadori i Danimarkës, për nder të zotit Jessen-Petersen dhe timin.

Në të gjitha këto takime është diskutuar për procesin në Kosovë, kurse në veçanti unë kam hapur tema që kanë qenë objekte shqetësimi edhe për sekretarin e përgjithshëm edhe për KS-në në përgjithësi.

Unë e kam siguruar sekretarin e përgjithshëm dhe ambasadorët e KS-së se në ato pika shqetësimi, në ato fusha ku nuk ka një përparim të duhur ne do të punojmë më shumë dhe të arrijmë përparime si dhe do të krijojmë të gjitha kushtet për të gjithë qytetarët e Kosovës.

Poashtu kam kërkuar, sidomos nga sekretari i përgjithshëm i OKB-së, Kofi Annan, që të përkrah fuqimisht, ashtu siç ka bërë edhe deri më tash, procesin si dhe ta përkrahë Kosovën në këtë fazë për të përfunduar procesin, për ta përmbyllur një kaptinë të historisë dhe të hapim një kaptinë të re atë të përparimeve dhe të integrimeve evropiane të Kosovës.

BBC: Kryeministër Kosumi, në KS të OKB-së ka patur shumë fjalë rreth të drejtave të njeriut e në veçanti të pakicave.

Me gjasë ju keni takuar edhe presidentin serb Boris Tadiq, i cili ka paraqitur pikëpamjen serbe për Kosovën. Çfarë biseduat ju së bashku dhe cili është komenti juaj për qëndrimin e KS-së për të drejtat e pakicave në Kosovë?

Kosumi: Në të gjitha takimet që kam patur dhe edhe gjatë debatit në KS është hapur një prej çësthjeve kryesore ajo e pozitës së pakicave e në veçanti të serbëve të Kosovës.

Unë i kam siguruar bashkëbiseduesit e mi se bashkësia serbe në Kosovë ka disa vështirësi, se qeveria dhe shumica në Kosovë ka mirëkuptim për vështirësitë me të cilat përballet bashkësia serbe.

Qeveria është e angazhuar që të debatojë me bashkësinë serbe dhe të krijojë besimin e saj në proces.

Por poashtu ne do të punojmë me shumicën shqiptare që të ketë një mirëkuptim shumë më të madh për bashkësinë serbe dhe të jetë shumë më zemërgjërë për këtë bashkësi dhe të japim garanci të plota se edhe bashkësia serbe do të jetë e barabartë, se qytetarët serbë të Kosovës do të jenë të barabartë me qytetarët e tjerë të Kosovës dhe në këtë mënyrë do të realizojnë dhe do të arrijnë të krijojnë vizionin e tyre në shtetin e ardhshëm të Kosovës.

BBC: Do të thotë se ju jeni të hapur për biseda të drejtpërdrejta me përfaqëuesit serbë për të zgjidhur çështjet që janë cilësuar si të interesit të përbashkët?

Kosumi: Unë e kam pohuar se jam i gatshëm të takohem me udhëheqësit më të lartë të Serbisë për të diskutuar çështjet mes Kosovës dhe Serbisë.

Unë edhe njëherë e them shprehimisht se kam qenë i kënaqur që e kam takuar presidentin e Serbisë, zotin Tadiq këtu në Këshillin e Sigurimit të OKB-së. Kjo është shumë e rëndësishme për Kosovën dhe procesin dhe është shumë sinjifikative edhe për procesin e ardhshëm.