|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

OPINIONE

E keqja është e kundërta e së mirës!

16 shkurt 2006 /TN

 

Shkruan : Shaban PERAJ

 

Diktatura serbe e ushtruar ndaj shqiptarëve të Kosovës gjithmonë ka tentuar t’i edukonte ata me indiferencë ndaj atyre që vuanin pa faj. Sa e sa mijëra vetë ka që u ndodhën nën pranga e u zhduken nga diktatura serbe pa e ndier e shijuar lirinë në thellësinë e vetvetes së tyre. Ata që e kuptuan lirinë me kohë e që e kuptojnë edhe sot si mundësi absolute veprimi e ngatërrojnë lirinë njerëzore me lirinë shtazore. Këtë duhet ta kenë të qartë këta politikanë serbë që vazhdojnë me avazin e vjetër.

 

Fatlumnisht iku ajo kohë dhe këtë ua bëri me dije presidenti i sapozgjedhur i Kosovës, z. Fatmir Sejdiu në përgjigjen e tij ndaj deklaratave të Nikoliqit për riokupim të Kosovës.

 

Sot kjo garniturë e politikanëve serbë kopjon imazhin, idetë e atyre që ndodhen në Hagë gjë që nuk duket se do të jetë fort e mirë për ta, ku gënjeshtra, mashtrimi, shpifja e tyre është përhapur në popullin serbë duke harruar se populli i vendeve të tilla është i varfër, kurse ushtria rebele. Në kohën kur gënjeshtra merr hov dhe sheshet dridhen nën buçitjet e saj, gjuha e së vërtetës quhet e këputur...

 

Fatkeqët që nuk e njohin vetën e s’dinë se ç’janë jetojnë si hamallët që bartin, por nuk e dinë se ç’bartin dhe poashtu si ata, ikin nga kjo botë pa kuptuar gjë. Kjo do të ishte ajo që mund të thuhet për Koshtunicën e Nikoliqin të cilët na qenkan marrë vesh se nëse Kosovës i jepet pavarësia, atëherë “do ta riokupojmë atë”.

 

Tani më është e qartë se ata janë në konflikt me kohën, me planin e ideve të reja e me tendenca për të arritur atë që tashmë ka përfunduar. Nuk ka pse të habitemi që kjo garniturë e politikanëve serbë bën zgjedhje të gabuara, kështu ata kanë vepruar gjatë gjithë historisë së tyre karshi Kosovës, pa menduar fare se një ditë do të vijë fundi.

 

Tashmë të gjitha dihen për ne, por nuk mund ta kuptojmë krahun tjetër me njerëz të pashpirt  që drejtojnë vendin e tyre, për të dalur me fraza bombastike nëpër podiume se nëse Kosovës i jepet pavarësia, atëherë ata “do të mbrojnë sovranitetin e tyre me të gjitha mjetet dhe se atë do ta kuptojnë si të okupuar”.

 

Kështu politikanët serbë akoma nuk e kanë të qartë se n’ferra, brinja e gërxhe u ka ngelur shpirti në rrugën drejt mbrojtjes së Kosovës edhe pse e dinë se Kosova nuk ka qenë kurrë e tyre. Jo vetëm që nuk ndalojnë me kërcënime, por duket se kanë harruar vetëm të bëmat e fundit ndaj shqiptarëve të Kosovës, për të mos iu kthyer historisë së kaluar, nga ku shpirti u ka mbetur në ferra dhe nuk kanë me çka ta mbrojnë më atë.

 

Tek ne është e qartë dhe aspak e çuditshme se ata prej kohësh hedhin e presin në adresë të shqiptarëve e që e kanë bërë si profesion të merren me të, përgjithësisht kanë qenë dhe janë injorantët që nuk e dinë se s’dinë. Sa e hidhur është që këta të mjerë nuk duanë t’ia dinë të vërtetës apo nuk kanë lexuar ndonjë gjë nga të dhënat faktike që kanë bërë ndaj shqiptarëve të Kosovës, mirëpo do të duhet pritur edhe pak kohë që populli i tyre ta kuptojnë të vërtetën.

 

Si duket injorantët kanë filluar të nxehen para fillimit të bisedimeve për statusin final të Kosovës, ndaj bërtasin e thërrasin, kurse neve na mbetët të shikojmë se ç’duhet bërë... Më tepër se nga furia që kanë marrë dhe dhuna e hapur që paralajmërojnë, duhet të kemi frikë edhe nga armiqësia e zemërimi i tyre sepse ata nuk rrinë butë e nuk flejnë për të ngritur kurth ashtu si merimanga. Ata po të kishin mundësi do të shtronin botën duke harruar se së pari duhet të shtrojnë vetën. 

 

Përfaqësuesit tanë të zgjedhur me votën e popullit janë të vetëdijshëm për misionin që kanë marrë për çështjen e Kosovës në të gjitha nivelet dhe ata kanë veti për ta parë dhe parashikuar të ardhmen e saj lidhur me të sotmen. Vetëdija dhe garancia e tyre na bënë të jemi të sigurt për një administrim e drejtim të Kosovës në rrugën e pavarësisë.

 

Rruga që ndjekin ata është rruga më e dobishme në të mirë të atdheut dhe popullit  të Kosovës, nga ku një plan i ngritur mirë e i harmonizuar premton vazhdimësi dhe perspektivë për një pavarësi të plotë të saj. Këtë vullnet ata e kanë shprehur disa herë, dhe sikur të shkrihen dhjetëra herë nëpër kazanë, prapë s’kanë për të humbur gjë nga vetvetja për të mbrojtur vullnetin e popullit të Kosovës.