Urime dhe përgëzime nga Rumania dhe Sllovenia drejtuar Presidentit Sejdiu

Urime dhe përgëzime nga Rumania dhe Sllovenia drejtuar Presidentit Sejdiu

15 shkurt 2006 /TN

Urime Presidentit të Kosovës nga Shqiptarët e Rumanisë

Presidentit të Kosovës,
Dr. Fatmir Sejdiu

I respektuari z. President,

Në emër të komunitetit shqiptar të Rumanisë, në emër të bijve dhe bijave të rilindësve tanë, si dhe në emër të redaksisë së revistës Shqiptari, përshëndesim ngrohtësisht zgjedhjen tuaj për President të Kosovës, duke Ju uruar suksese të reja për përjetësimin e aspiratave kombëtare të ish-presidentit të ndjerë e të dashur, dr. Ibrahim Rugova.

Sipas shtypit bukureshtar, Fati i botës varet nga Kosova. Shqiptarët e Rumanisë, autoritetet dhe
opinioni rumun, e kanë pritur me dashamirësi emërimin Tuaj për President të Kosovës.

Po këto urime të përzemërta Jua transmetojnë edhe anëtarët e Bashkësisë Kulturore të Shqiptarëve të Rumanisë, e vetmja organizatë legjitime, tradicionale, që ndjek shembullin e shoqatave të shquara shqiptare që funksiononin në Bukuresht, Brailë e Konstancë, përgjatë viteve të Mbretërisë, në kohën kur botohej në Konstancë, revista "Kosova" e Gjergj Bubanit (1932/33), tribuna e parë e diasporës shqiptare.

Shëndet dhe përshëndetje,
Baki Ymeri
(kryeredaktor i revistës Albanezul / Shqiptari) 14 shkurt 2006


Përgëzim për zgjedhjen e kryetarit

I nderuari kryetar i Kosovës, z. dr. Fatmir Sejdiu,

më lejoni që në emër të SHKSH "Migjeni", si dhe në emër të Lidhjes së shoqatave shqiptare në Slloveni të ju urojë zgjedhjen e JUAJ si kryetar i Kosovës.

Me kënaqësi e kemi pritur këtë akt madhor të deputetëve të Kuvendit të Kosovës. Sepse, shumë të ashtuquajtur analist civil e ushtarak dhe "profet" të ndryshëm kanë qenë "tepër të preokupuar" për fatin e Kosovës, pas vdekjes së kryetarit dr Ibrahim Rugova.

Por, JU, treguat pjekuri dhe mençuri të plotë dhe dëshmuat një demokraci të vërtetë evropiane. Me këtë i dëshmuat botës demokratike, se edhe ne, si një shtet në formim, kemi vendin në gjirinë e atyre familjeve demokratike që e përkrahin procesin e pavarësisë së Kosovës.

Zoti kryetar, ne si votues dhe qytetar të Kosovës, JU lusim, t'a udhëhiqni këtë proces pa lëkundje deri në realizimin e pavarësisë.

Keni në dispozicion një potencial shumë të gjerë (sidomos atë universitar dhe akademinë e shkencave). Ju, si prijës i një familje demokratike, me siguri do t'a integroni shtresën intelektuale në procesin që tani kërkon zgjedhje dhe unitet të plotë (moral, politik, kombëtar dhe ekonomik).

Me respekt!
Në emër të SHKSH "Migjeni" si dhe në emër të Lidhjes së shoqatave shqiptare në Slloveni:
Xhavit Shaqiri, sekretar
14 shkurt 2006