|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Lajmet e ditës (2)

15 shkurt 2006 /TN /QIK

Përmbajtja:

• Goldberg: SHBA-të mbështesin Presidentin Sejdiu dhe Kosovën

• Presidenti Sejdiu përshëndet vendet e Këshillit të Sigurimit për qëndrimin pro pavarësisë së vendit tonë

• Kapçan: Kina dhe Rusia do të shpenzojnë energji dhe kredi për të bllokuar pavarësinë e Kosovës

• Bashkarisht do të sfidohen pengesat në rrugën e pavarësisë, tha Sejdiu në një takim me kreun e Ipeshkvisë

• Vritet një grua serbe në veriun e Mitrovicës - katër të arrestuar

• Kuvendi miratoi buxhetin e ART-së për këtë vit

• Forcat e sigurimit afgan kanë arrestuar një komandant taliban

• Edhe 3 persona janë vrarë në protestat e sotme në Pakistan

• Jordani ka dënuar me vdekje 9 militantë të Al Kaidës

• Në Kolumbi është zbuluar një varrezë masive me 21 trupa njerëzish

• Ushtarët izraelitë kanë vrarë një palestinez në Bregun Perëndimor

 
Goldberg: SHBA-të mbështesin Presidentin Sejdiu dhe Kosovën

 

Prishtinë, 15 shkurt 2006 - Filip Goldberg, shef i Zyrës amerikane në Prishtinë, i ka dhënë mbështetjen e SHBA-ve Presidentit të ri, Fatmir Sejdiu dhe Kosovës.

Në një takim të zhvilluar sot me diplomatin amerikan, Presidenti Sejdiu e vlerësoi si "mysafir të jashtëzakonshëm" zotin Goldberg.

 

Ai tha se shefi i misionit amerikan solli mesazhet e qeverisë amerikane për mbështetjen e vazhdueshme të Kosovës, të institucioneve të saj dhe të vetë

 

Presidentit. Sejdiu tha se e ka falënderuar z.Goldberg për punën e madhe të SHBA-ve që kanë bërë në Kosovë, si para luftës, gjatë dhe pas saj, ndërsa e ka falënderuar edhe për angazhimet e tashme në nivelet ndërkombëtare, në Grupin e Kontaktit (GK) dhe në Këshillin e Sigurimit (KS).

"E falënderojmë veçanërisht për takimin e fundit të KS, z. Bolton që udhëhoqi debatin në Këshillkin e Sigurimit, në raportimet që bëheshin për Kosovën, prandaj e çmojmë posaçërisht për respektimin e vullnetit të popullit për pavarësi dhe natyrisht në pjesën e ndihmës që do të na jepet edhe në mbarëvajtjen e proceseve të tjera", tha Sejdiu.

Goldberg, i cili kishte ardhur për ta përgëzuar Presidentin e ri, ritheksoi përkushtimin e SHBA-ve për procesin e përcaktimit të statusit final të Kosovës.

Diplomati amerikan tha se takimi i parë i bisedimeve javën e ardhshme në Vjenë për decentralizimin, "është një çështje jashtëzakonisht e rëndësishme".

"Unë mendoj se, në bazë të asaj që më informoi Presidenti, Kosova është shumë mirë e përgatitur për këto bisedime", tha Goldberg, ndonëse, siç tha, ka mbetur edhe shumë punë për për t'u bërë, "në të gjitha çështjet për të ndërtuar një qeveri demokratike, për të ndërtuar një ekonomi që funksionon dhe që u ofron njerëzve vende të punës dhe veçanërtisht në çështjet ndëretnike", u shpreh shefi i Zyrës amerikane Filip Goldberg.

 

 

Presidenti Sejdiu përshëndet vendet e Këshillit të Sigurimit për qëndrimin pro pavarësisë së vendit tonë

 

Prishtinë, 15 shkurt 2006 - Presidendti Fatmir Sejdiu ka mirëpritur angazhimin e anëtarëve të Këshillit të Sigurimit pro pavarësisë së Kosovës. Këtë deklaratë ai e bëri pas takimit me Xhulio Terci, drejtor politik në Ministrinë e Jashtme të Italisë, të cilin e falenderoi për qëndrimin edhe këtij vendi pro zgjidhjes së çështjes së Kosovës si vend i pavarur.

Presidenti tha se në këtë takim përgëzues ka marrë mesazhe të drejtpërdrejtë urimi nga ministri i Jashtëm Xhankarlo Fini dhe qeveria italiane në mbështetje të Presidentit dhe të institucioneve të Kosovës.

"Ne besojmë në një qëndrim të përbashkët të mbështetjes së vullnetit politik të popullit të Kosovës për pavarësi, një Kosovë të cilën ne e duam bashkë e që do të jetë demokratike, të ofrojë shansa të jetës së përbashkët për të gjithë qytetarët e saj pa dallim etnie dhe një Kosovë si e tillë që do të përgatitet të rrugëtojë shumë shpejt në integrimet euro-atlantike", tha Sejdiu.

 

Diplomati italian Xhulio Terci tha se takimi ishte fokusuar në rëndësinë e procesit të bisedimeve për statusin e Kosovës.

"Ne në Romë mendojmë se është plotësisht e rëndësishme që të dyja palët të negociojnë seriozisht, hapur me qëllim të gjetjes së zgjidhjeve reale për çështjet konkrete", tha ai.

Ndërkaq Presidenti mbledhjen e Këshillit të Sigurimit e cilësoi si rrjedhë korrekte që respekton vullnetin e popullit shumicë në Kosovë. "Mirëpres angazhimet e të gjithë atyre që dhanë dje në

 

Këshillin e Sigurimit për të mbështetur opsionin real të pavarësisë së Kosovës, që është opsion konform vullnetit politik të popullit të Kosovës", tha ai.

Në këtë kontekst ai tha se edhe vendi ynë ka obligime që duhet të vazhdojë me realizimin e tyre, dhe "posaçërisht në çështjen e standardeve, për të cilat qeveria e Kosovës është shumë e angazhuar".

Anëtari i Grupit Negociator Veton Surroi, që mori pjesë në këtë takim bashkë me koordinatorin Blerim Shala, tha se në të gjitha instancat, "posaçërisht nga shtetet e rëndësishme të Grupit të Kontaktit në mënyrë të përhershme po na përsëritet përmbushja e standardeve, ngecja posaçërisht në sferën e rendit e të ligjit, zbatimit të atyre që janë funksione demokratike".

 

 

Kapçan: Kina dhe Rusia do të shpenzojnë energji dhe kredi për të bllokuar pavarësinë e Kosovës

 

Pragë, 15 shkurt 2006 - Rusia dhe Kina për shkaqe të politikës së brendshme nuk mbështesin pavarësinë e Kosovës, duke iu frikësuar precedentit, tha për radion "Evropa e lirë", analisti Çarls Kapçan, drejtor në Këshillin për Marrëdhënie me Jashtë.

Sipas tij, Moska ka parasysh Kaukazin dhe Çeçeninë, ndërsa Pekini zyrtar ballafaqohet me sfidën e disa konflikteve etnike dhe me kërkesat për pavarësi të disa pjesëve.

Megjithatë Kapçan nuk beson se Kina dhe Rusia do të shpenzojnë shumë energji dhe kredi të veta për të bllokuar pavarësinë e Kosovës. Ai tha se si për Moskën ashtu dhe për Pekinin më e rëndësishme është të ruajnë marrëdhëniet e mira me Perendimin.

"Nëse Shtetet e Bashkuara dhe Bashkimi Evropian insistojnë për pavarësinë e Kosovës, nuk besoj se Pekini ose Moska do ta bllokojnë një kërkesë të tillë.

 

Ato nuk do të jenë të entuziazmuara me këtë opsion, por do të befasohesha nëse në Këshillin e Sigurimit do ta kundërshtonin, për ta detyruar Perendimin që zgjidhjen ta gjejë duke tejkaluar organizatën botërore", tha Kapçan.

 

 

Bashkarisht do të sfidohen pengesat në rrugën e pavarësisë, tha Sejdiu në një takim me kreun e Ipeshkvisë

 

Prishtinë, 15 shkurt - Bashkarisht do të sfidohen pengesat në rrugën e pavarësimit të vendit, - vlerësoi presidenti i Kosovës Fatmir Sejdiu, pas takimin me ipeshkvin e Kosovës Imzot Zef Gashi, nga i cili ka marrë sot mbështetjen e kishës katolike. Presidenti Sejdiu tha se ishte i kënaqur për mezashet përgëzuese dhe mbëstetëse të shkëlqesisë së tij Imzot Zef Gashit.

"Imzot Gashi më përcolli mezashe mbështetëse të Ipeshkvisë së kishës katolike shqiptare, për punën tonë që na pret dhe që është në përputhshmëri me vizionin tonë të përbashkët, për ardhmërinë e Kosovës së pavarur", tha z.Sejdiu.

Ai shprehu falënderimet e tij, për të gjitha angazhimet që kanë pasur deri tash dhe që do të vazhdojnë njësojë edhe në të ardhmen të kishës katolike. Presidenti Sejdiu kujtoi edhe me këtë rast "peshën e madhe të humbjes", së dy njerëzve të mëdhenj në këtë periudhë, të Presidentit Rugova, dhe poashtu të Imzot Mark Sopit, të cilët tha, kanë lënë një boshllëk të madh në këtë fazë kaq të nevojshme për Kosovën.

 

"Por, poashtu është një garancë e madhe se bashkarisht do të sfidojmë edhe të gjitha ato pengesa që mund të kemi, që janë një pjesë e objektivës në jetën tonë të përdisthme për të ndërtuar një Kosovë të lirë, demokratike, ku secili qyetar do të shprehë lirshëm ndjenjat e veta shpirtërore", tha ai, duke shtuar se kisha katolike është një nga bartësit e rëndësishëm të këtij procesi.

Imzot Zef Gashi, që shoqërohej nga Dom Lush Gjergji dhe të Dom Shan Zefi, tha se kishte kënaqësinë që të viztonte për herë të parë dhe njëkohësisht të uronte Presidentin e ri, z.Sejdiu, pas largimit nga jeta të Dr.Ibrahim Rugovës, ndërsa i uroi, punë "të mirë e të mbarë" për popullin e Kosovës.

 

 

Vritet një grua serbe në veriun e Mitrovicës - katër të arrestuar

 

Mitrovicë, 15 shkurt 2006 - Policia ka arrestuar katër persona të dyshuar për vrasjen e një gruaje serbe mbrëmë në pjesën veriore të Mitrovicës.

 

Zëdhënësi i policisë së UNMIK ut Lari Miler thotë se gruaja 61-vjeçare ishte ende gjallë kur policët arritën në shtëpinë e saj, por viktima vdiq gjatë rrugës për në spital.

Bëhet fjalë për Danka Kompiroviqin, e cila jetonte vetëm, ndërkohë përjashtohet mundësia që vrasja të ketë motive etnike. Organet hetimore besojnë se motivi i vrasjes është grabitja.

Sipas policisë personat e arrestuar janë me përkatësi joshqiptare.

 

 

Kuvendi miratoi buxhetin e ART-së për këtë vit

 

Prishtinë, 15 shkurt 2006 - Kuvendi i Kosovës miratoi sot me shumicë votash buxhetin e Autoritetit Rregullativ të Telekomunikacionit (ART-ja), pas një debati dhe një shtyerjeje prej gati dy muajsh.

 

Kërkesa për miratimin e buxhetit të ART-së është paraqitur nga Komisioni Parlamentar për Buxhet, ndërsa opozita ka kundërshtuar miratimin e këtij buxheti me dyshimin se ART-ja, e cila asnjëherë nuk ka raportuar para Kuvendit, qoftë edhe për shpenzimet buxhetore dhe të hyrat e saj.

Sipas deputetit Zef Morina, që u ndërlidh në çështjen se ka apo jo të drejtë ART të heqë antenat e operatorit serb Mobtel, ky operator ka vepruar ilegalisht. Ai tha se gjatë kohës sa ishte ministër kishte siguruar informacione të cilat thonë se ai nuk është licencuar asnjëherë nga UNMIK-u, por nga kryeadministratorët i ishte lejuar të vepronte në Prishtinë dhe Mitrovicë, ndërsa kur kësaj kompanie i ishte kërkuar të raportonte për tatime, kishte refuzuar dhe që atëherë funksionimi i saj kishte filluar të konsiderohej ilegal.

 

Ai tha se Mobtel-i shfrytëzonte frekuencat e interferuara nga baza ruse e KFOR-it në aeroportin e Prishtinës.

Më pas duke kërkuar kthimin në temë, të çështjes së miratimit të buxhetit të ART-së nga kryekuvendari Daci, deputetja Nekibe Kelmendi kërkoi që çështja të procedohej me votim dhe që buxheti i pavarur i ART-së, prej mbi 6 milion euro i siguruar nga licenca për operatorin e dytë mobil do të mbesin në bankë derisa nuk vendoset ndryshe për çështjen e licencës së tij.

 

Me 53 vota për dhe 31 kundër, deputetët miratuan buxhetin e ART-së për këtë vit. Ndërsa, çështja e interpelancës me ministren Melihate Tërmkolli, që ishte ftuar nga deputetët e PDK-së, është shtyrë për seancën e fundit të këtij muaji.

 

Sipas vendimit të kryesisë të gjithë ministrat dhe Kryeministri mund të ftohen të paktën njëherë në muaj për interpelancë, në këtë rast në orën e parë të sesionit të punimeve seancës së fundit mujore të Kuvendit.

 

 

Forcat e sigurimit afgan kanë arrestuar një komandant taliban

 

Kabul, 15 shkurt 2006 – Forcat e sigurimit afgan kanë arrestuar komandantin taliban të një distrikti në provincën Gazni, në lindje të vendit, Mulla Nazer Shah, së bashku me dy shoqëruesit e tij të dyshimtë për ndezjen e një shkolle, ka bërë të ditur sot (e mërkurë) policia, njofton Rojter. Po në këtë njoftim bëhet e ditur se po sot 150 trupat e para ushtarake britanike të luftës kanë arritur në jug të Afganistanit, ku pritet se do të vendosën në këtë rajon rreth 3.300 trupa britanike.

 

 

Edhe 3 persona janë vrarë në protestat e sotme në Pakistan

 

Peshevar, Pakistan, 15 shkurt 2006 – Edhe tre persona, nga të cilët një i djalë i ri, janë vrarë në protestat e sotme (e mërkurë) të dhunshme në Pakistan kundër karikaturave të profetit Muhamed, të botuara në gazetat perëndimore, bëjnë të ditur zyrtarët e sigurimit, njofton Ropjter.

 

Djaloshi është vrarë nga një plumb, që e goditi atë në kokë në protestat e qytetit veriperëndimor Peshevar, por nuk është e qartë nëse kanë shtënë policia apo protestuesit. Një burrë ka humbur jetën kur një shtyllë elektrike ka rënë mbi të gjatë protestave në Peshevar.

 

Personi i tretë është vrarë gjatë shkëmbimit të zjarrit ndërmjet policisë dhe studentëve protestues në kompleksin universitar të Penxhabit në qytetin Lahore. Këto protesta u zhvilluan një ditë pas protestave të djeshme të dhunshme në Lahore, ku u vranë dy persona.

 

 

Jordani ka dënuar me vdekje 9 militantë të Al Kaidës

 

Aman, 15 shkurt 2006 – Jordani ka dënuar sot (e mërkurë) me vdekje nëntë militantë të Al Kaidës, nga të cilët katër syresh në mungesë, ndër të cilët Abu Musab al-Zarqavi, për organizimin e sulmeve me lëndë kimike kundër caqeve qeveritare dhe amerikane, njofton Rojter. Ata janë shpallur fajtorë për planifikimin e sulmeve të penguara në prill 2004.

 

 

Në Kolumbi është zbuluar një varrezë masive me 21 trupa njerëzish

 

Bogota, Kolumbi, 15 shkurt 2006 – Në Kolumbi është zbuluar një varrezë masive, në të cilën gjendeshin 21 trupa njerëzish që mendohet të jenë vrarë nga njësitet paramilitare, kanë bërë të ditur autoritetet, njofton BBCWorld.

 

Varreza është zbuluar në rajonin Cienaga, që kultivon banane dhe gjendet në bregdetin karibean. Zyrtarët besojnë se vrasjet kanë ndodhur ndërmjet viteve 2002 dhe 2003.

 

 

Ushtarët izraelitë kanë vrarë një palestinez në Bregun Perëndimor

 

Xhenin, 15 shkurt 2006 – Ushtarët izraelitë kanë vrarë sot (e mërkurë) një palestinez, i cili po u afrohej atyre me një revole lodër, duke u bërtitur se duhet të shkojnë nga fshati, kanë bërë të ditur banorët vendës, të cilët kanë thënë gjithashtu se palestinezi ishte mentalisht i sëmurë, njofton Rojter.

 

Burimet ushtarake izraelite kanë thënë se incidenti ka ndodhur pasi një turmë e palestinezëve ishte tubuar rreth një ndërtese në fshatin Kabatija afër qytetit Xhenin, ku kishin filluar të hedhin gurë. Ushtarët kanë vërejtur një person të armatosur dhe kanë shtënë në të.