|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Lajmet e ditës (1)

15 shkurt 2006 /TN /QIK

Përmbajtja:

• Petersen tha se ndryshimi i statusit është zgjidhja më e mirë për stabilitetin në Kosovë dhe në rajon

• Petersen falënderoi përfaqësuesit e vendeve të OKB së që shprehën ngushëllime të sinqerta për Presidentit Rugova

• Kosumi tha se pjesëmarrja e tij në KS ishte një hap i vogël, por shumë i rëndësishëm për Kosovën

• Mustafaj bisedoi për Kosovën me Këshilltarin e Presidentit amerikan për Çështjet e Sigurisë Kombëtare

• Besnik Mustafaj kërkon që Kosova të njihet si shtet i pavarur

• Bërns: Status kuoja nuk mund të vazhdojë në Kosovë, kur 90 për qind e popullsisë janë shqiptarë

• Londra dhe Uashingtoni thonë se pavarësia e Kosovës është një opsion real

• Negociatat për statusin e Kosovës dhe referendumi mbi pavarësinë e Malit të Zi, janë dy procese të ndara

• Ekipi Negociues për Kosovën caktoi delegacionin shtatë anëtarësh për takimin e Vjenës

• Deputetët kërkojnë që të mos privatizohet objekti i hotelit "Union"

• Nga një shpërthim bombe në Bagdad, janë vrarë 3 fëmijë

• Të dhënat qeveritare bazë për të dyshimtë dhe shoqata ndërkombëtare terroriste përfshijnë 325 mijë emra

• Kolegu i qëlluar aksidentalisht me pushkë gjahu nga Nënpresidenti Çejni pësoi një sulm zemre

• H5N1 zbulohet në Evropën Perëndimore

• I biri i Sharonit dënohet me 9 muaj burgim

• Komiteti për Mbrojtjen e Gazetarëve publikon raportin vjetor të shtypit

• Shtajnmajer: Nuk ka ndihma të BE-së nëse qeveria e Hamasit nuk pranon Izraelin

• Në demonstratat e dhunshme në Pakistan 2 të vdekur

   

Petersen tha se ndryshimi i statusit është zgjidhja më e mirë për stabilitetin në Kosovë dhe në rajon

 

Nju Jork, 15 shkurt 2006 - Kryeadministratori i Kosovës Soren Jesen Petersen në fjalën e tij në KS të OKB së ku u dabatua për zhvillimet në Kosovë ka falenderuar KS që kishte dhënë pëlqimin që në këtë takim shoqërohej nga Kryeministri Bajram Kosumi.

 

Ndër zhvillimet e fundit në Kosovë midis dy raporteve Petersen përmendi tri: vdekjen tragjike të Presidentit Ibrahim Rugova dhe zgjedhjen dinjitoze të Presidentit Fatmir Sejdiu, fillimin e bisedimeve për statusin përfundimtar dhe vazhdimin e përmbushjes së standardeve.

Duke bërë një homazh me këtë rast për Presidentin Rugova, Petersen ka thënë se ai gjatë gjithë jetës së tij ushqeu një vizion për Kosovën e lirë e demokratike dhe tolerante. Vdekja e tij ishte e rëndë për institucionet dhe popullin e Kosovës. Zija në Kosovë dhe përballja me këtë humbje të madhe ishte dinjitoze, që u vërejt nga të gjithë ata që panë përcjelljen e përmotshme të Presidentit Rugova.,Gjithë këtë e organizuan autoritetet lokale në atë mënyrë që secila shoqëri do të krenohej.

 

Petersen përgëzoi policinë e Kosovës gjatë ceremonialit të varrimit të Presidentit Rugova, duke thënë se 3500 policë kosovarë treguan profesionizëm duke ruajtur qetësinë dhe rendin e qindra mijëra njerëzve pjesëmarrës në varrim. Ai shtoi se reagimi i Kosovës ishte dinjitoz dhe i matur gjatë gjithë periudhës së zisë për Presidentin Rugova. Kjo ndodhi edhe të premtën e shkuar me zgjedhjen e Presidentit Sejdiu. Të nesëmen u mbajt takimi i Ekipi Negociator të cilët miratuan platformën e bisedimeve që do të mbahen në Vjenë më 20 shkurt.

Gjendja e statusquos në Kosovë nuk mund të vazhdojë tha Petersen dhe nënvizoi se ndryshimi i statusit është zgjidhja më e mirë për stabilitetin në Kosovë dhe në rajon. Petersen vërejti një ngadalësim në përmbushjen e standardeve, sidomos në çështjen e pakicave, siç është vërejtur edhe në raportin e Kofi Ananit. Kritika ka pasur efekt tha ai dhe nga 15 dhejtori është vërejtur përshpejtimi i angazhimit.

"Mospërmbushja e standardeve nuk mund të jetë arsyetim për mosvendosjen e statusit dhe duhet të ketë një angazhim të shtuar dhe veprim konkret e jo vetëm deklarime simbolike", tha Petersen.

 

Ai theksoi se takimi në Vjenë duhet të dëshmojë se delegacioni shqiptar i Kosovës pa marrë parasysh shqetësimet e pakicave sepse statusi i Kosovës për shumë shqiptarë paraqet shpresë, për serbët paraqet frikë, së këndejmi gjatë bisedimeve për statusin do të kemi parasysh edhe shpresat e shqiptarëv, por edhe frikën e serbëve.

Petersen kritikoi Beogradin për mosmbështetjen e serbëve në pjesëmarrjen në institucionet e Kosovës. Ai nënvizoi se UNMIK u është në fazën kritike, duhet të ndërtohet një shoqëri inkluzive, shumetnike të përkushtuar në demokraci dhe në paqe me fqinjët.

Lidhur me statusin, Petersen theksoi se shumica në Kosovë me të drejtë presin që shpresat e tyre do të realizohen dhe ka shtuar se me zgjidhjen e statusit populli i Kosovës më në fund mund ta lë të kaluarën dhe të drejtohet nga e ardhmja, tha ndër të tjera Petersen.

 

 

Petersen falënderoi përfaqësuesit e vendeve të OKB së që shprehën ngushëllime të sinqerta për Presidentit Rugova

 

Nju Jork, 15 shkurt 2006 - Pas përfundimit të seancës së Këshillit të Sigurimit kushtuar çështjes së Kosovës, ku u zhvillua një debat konstrukiv në favor të vendit tonë, Kryeadministratori Soren Jesen Petersen falënderoi përfaqësuesit e vendeve të OKB së të cilët shumë nga ata gjatë debatit shprehën ngushëllime me rastin e vdekjes së Presidentit Rugova si dhe fjalë të merituara për jetën dhe trashëgiminë e tij. Po ashtu i falënderoi edhe për përgëzimet e bëra për Presidentin e sapozgjedhur të Kosovës Fatmir Sejdiu.

Ai shfaqi bindjen se presidenti serb Boris Tadiq do t'i përmbahet këshillave të bëra në Këshillin e Sigurimit. Ai ka shtuar se aktualisht nevojitet angazhimi i drejtëpërdrejt i Beogradit, si dhe i serbëve të Kosovës për të parë suksese të mëtejme në të gjitha çështjet që kanë të bëjnë me pakicat.

Petersen po ashtu ka thënë se i vjen mirë që Kryeministri Bajram Kosumi ishte në delegacionin e tij pjesëmarrës në debatin për Kosovën në KS dhe shfaqi shpresën se ai do të punojë edhe më shumë kur të kthehet në vend, qoftë për decentralizim apo në fusha të tjera. Ai falenderoi KS për përkrahjen që edhe me këtë rast i ka dhënë Kosovës, përkatësisht zgjidhjes së statusit final të saj.

 

 

Kosumi tha se pjesëmarrja e tij në KS ishte një hap i vogël, por shumë i rëndësishëm për Kosovën

 

Nju Jork, 15 shkurt 2006 - Me të përfunduar mbledhja e Këshillit të Sigurimit në Nju Jork, Kryeministri Bajram Kosumi ka dhënë një konferencë për media. Ai u ka deklaruar gazetaërve se pjesëmarrja e tij në debatin e KS për Kosovën ishte një hap i vogël por shumë i rëndësishëm për Kosovën.

"Unë jam i nderuar me pjesëmarrjen në këtë mbledhje, jam i nderuar për atë që është diskutuar për Kosovën në KS. Në Kosovë ka një progres shumë të madh. Gjashtë vjet pasluftës ka një ndryshim hitorik në Kosovë.Ne tash po hyjmë dhe po përgatitemi për një fazë të re.

 

Populli i Kosovës është përgatitur për fazën pas Rezolutës 1244. Ky proces ka filluar me lejen e KS dhe unë besoj se gjatë vitit 1006 do të zgjidhet statusi final i Kosovës", ka thënë Kosumi. Ai ka shtuar se udhëheqja e Kosovës do të ndërtojë një të ardhme të mirë, një shtet demokratik, multietnik, një shtet evropian.

Kryeministri Kosumi në interesimin e gazetarëve tha se ka shumë gjëra që do të bisedohen ndërmjet Prishtinës dhe Beogradit, ka shumë gjëra që do të bisedohen ndërmjet Prishtinës dhe bashkësisë ndërkombëtare dhe do të bëhet krejt ç'është e mundur për të siguruar një të ardhme të mirë për të gjithë qytetarët e Kosovës.

Sipas tij, tashmë ka ardhur momenti kur do të mbyllet çështja e Kosovës, duke i dhënë kështu shansin popullit të Kosovës të krijojë fatin e vet dhe të bëjë jetën e vetë.

 

Mustafaj bisedoi për Kosovën me Këshilltarin e Presidentit amerikan për Çështjet e Sigurisë Kombëtare

 

Uashington, 15 shkurt 2006 - Ministri i Punëve të Jashtme të Shqipërisë, Besnik Mustafaj u takua me Këshilltarin e Presidentit Bush për Çështjet e Sigurisë Kombëtare, Stiven Hedli.

Në bisedën që zhvilloi ministri Mustafaj me z. Hedli u diskutua për zhvillimet më të fundit në rajon dhe më konkretisht në lidhje me përcaktimin e statusit të Kosovës brenda vitit, qëndrimet dhe mesazhet e Shqipërisë në lidhje me Kosovën si dhe për situatën e referundumit në Mal të Zi.

 

Të dy bashkëbiseduesit kishin mirëkuptim të plotë për faktin se përcaktimi i statusit të Kosovës duhet të jetë i pranueshëm për të dyja palët si dhe transmetuan nevojën për unitet në udhëheqjen e re të Kosovës.

Nga ana e tij, ministri Mustafaj ritheksoi pozicionin e moderuar të Shqipërisë në lidhje me zhvillimet në Kosovë dhe në rajon.

Ministri Mustafaj zhvilloi një takim në Departamentin e Shtetit dhe me Znj. Kondoliza Rais.

 

 

Besnik Mustafaj kërkon që Kosova të njihet si shtet i pavarur

 

Uashington, 15 shkurt 2006 - Ministri i Jashtëm i Shqipërisë, Besnik Mustafaj, kërkoi që Kosova të njihet si shtet i pavarur. Gjatë një konference për media në Uashington, ai tha se "Kosova ndodhet në 'momentet vendimtare' të bisedimeve për statusin final të saj".

 

Ai ka theksuar se Shqipëria nuk është për ndryshimin e kufijve aktualë, dhe nuk angazhohet për Shqipëri të madhe duke e përfshirë edhe Kosovën.

"Në mënyrë që njerëzit të ndjehen të sigurtë për t'u kthyer në rajon, do të jetë përgjegjësi fundamentale për çdo qeveri në Kosovë që t'i ruajë të drejtat e serbëve dhe objektet fetare", ka thënë në Uashington, shefi i diplomacisë shqiptare, Besnik Mustafaj.

 

 

Bërns: Status kuoja nuk mund të vazhdojë në Kosovë, kur 90 për qind e popullsisë janë shqiptarë

 

Uashington, 15 shkurt 2006 - Nënsekretari amerikan i Shtetit Nikolas Bërns, duke folur për Kosovën si çështjen kryesore të pazgjidhur në rajon, deklaroi për "Zërin e Amerikës" se negociatat për statusin e Kosovës janë shumë të vështira, por as status kuoja nuk mund të vazhdojë më kur 90 për qind e popullsisë janë shqiptarë.

"Negociatat ndërkombëtare për statusin e Kosovës kanë filluar. Këto janë negociata shumë të vështira dhe komplekse dhe nuk do të jenë të lehta, por ne mendojmë se status quoja nuk mund të vazhdojë në Kosovë, kur 90 për qind e popullsisë janë shqiptarë.

 

Kështu që ne shpresojmë që udhëheqja shqiptare të jetë e bashkuar dhe që të garantojnë serbët e Kosovës se të drejtat e tyre do të mbrohen dhe që ata të mund të jetojnë atje. Shpresojmë gjithashtu që qeveria serbe t'i shohë seriozisht këto negociata".

Bërns theksoi se Shtetet e Bashkuara kanë një politikë aktive për rajonin e Ballkanit që ka si qëllim t'i ndihmojë këto vende, që e ardhmja e rajonit të jetë paqja, stabiliteti dhe demokracia.

 

 

Londra dhe Uashingtoni thonë se pavarësia e Kosovës është një opsion real

 

Nju Jork, 15 shkurt 2006 - Përfaqësuesi i SHBA-ve dhe ai Britanisë së Madhe në Këshillin e Sigurimit thanë se pavarësia e Kosovës është një opsion real dhe se çdo zgjidhje duhet të jetë e pranueshme për popullin e Kosovës.

Ndërkaq në debatin e zhvilluar në seancën e Këshilli të Sigurimit për raportin e rregullt tremujor mbi zhvillimet në Kosovë, thuajse të gjithë folësit vlerësuan lart procesin e qetë dhe të shpejtë të zgjedhjes së Presidentit të Kosovës, pas vdekjes së ish-presidentit Rugova.

Ambasadori amerikan Xhon Bolton tha se pavarësia është opsion real. "Duhet të jemi realistë për rezultatin. Pavarësia është një rezultat i mundshëm. Çdo zgjidhje për statusin duhet të jetë e pranueshme për popullin e Kosovës", tha Bolton, i cili edhe e drejtoi këtë seancë.

Edhe ambasadori i Britanisë së Madhe Emir Xhons Peri theksoi se çdo zgjidhje për statusin e Kosovës duhet të marrë parasysh qëndrimin e 90% të popullsisë shqiptare të Kosovës.
"Çdo zgjidhje për statusin e ardhshëm të Kosovës duhet të përfundojë brenda vitit 2006 dhe nuk mund të mos marrë parasysh aspiratat e 90% të popullsisë së Kosovës", tha ambasadori britanik në Kombet e Bashkuara.

Ambasadori francez theksoi nevojën që negociatat të përfundojnë brenda vitit 2006, derisa situatën në Kosovë e cilësoi specifike, të cilës i kanë paraprirë ngjarjet dramatike të shpërbërjes së Jugosllavisë.
Shefi i UNMIK ut theksoi mbështetjen nga deputetë të të gjitha grupeve parlamentare gjatë zgjedhjes së Presidentit dhe rolin e Shërbimit Policor të Kosovës, si institucion shumëetnik, gjatë periudhës së zisë në Kosovë.

Problemi i pakicave, liria e lëvizjes dhe përfshirja e pakicës serbe në institucionet e Kosovës ishin në qendër të fjalimeve të shumë folësve. Shefi i UNMIK ut theksoi rëndësinë e kësaj çështje në kuadër të procesit të bisedimeve.

"Të drejtat e pakicave janë një fushë që në kohën e bisedimeve për statusin, udhëheqësit e Kosovës nuk mund të dëshmojnë asgjë më pak se angazhim të plotë, sinqeritet dhe veprim", tha Jessen Petersen.

Presidenti i Serbisë Boris Tadiq, që drejtonte delegacionin serb, në fjalën e tij tha se Beogradi për zgjidhjen e çështjes së Kosovës ofron kompromis politik, pa ndryshim të njëanshëm të kufijve. Kjo qasje e Beogradit, tha Tadiq, shqiptarëve të Kosovës do t'u mundësonte autonomi shumë të gjerë, me kusht që këtë lloj autonomie ta miratojnë edhe për entitetin serb në Kosovë.

"Marrëveshja që do të realizohej në këtë formë do të ishte me garanca ndërkombëtare dhe pas një periudhe 20 vjeçare ajo sërish do të vihej në tryezën e bisedimeve", tha Tadiq.

 

 

Negociatat për statusin e Kosovës dhe referendumi mbi pavarësinë e Malit të Zi, janë dy procese të ndara

 

Bruksel, 15 shkurt 2006 - Serbia duhet të zgjedhë midis të ardhmes evropiane dhe të kaluarës nacionaliste, ka thënë komesioneri i BE së për zgjerimin, Oli Ren.

 

Ndërkaq Miroslav Lajçak, përfaqësues i posaçëm i shefit për Politikë të Jashtme dhe Siguri, Havier Solana ka deklaruar se negociatat për statusin e Kosovës dhe përgatitjet për referendumin mbi pavarësinë e mundshme të Malit të Zi janë dy procese krejtësisht të ndara megjithëse Mali i Zi dhe Kosova ndodhen në të njëjtin rajon.

Lajçak dje u takua me ambasadorët e BE së, kurse sot në Podgoricë pritet t[ua paraqes Qeverisë dhe opozitës së atjeshme vlerësimin e BE së për mënyrën e organizimit të referendumit në Mal të Zi.

 

 

Ekipi Negociues për Kosovën caktoi delegacionin shtatë anëtarësh për takimin e Vjenës

 

Prishtinë, 15 shkurt 2006 - Ekipi Negociues për Kosovën caktoi delegacionin shtatë anëtarësh për takimin e Vjenës që do të mbahet më 20 shkurt, ku Prishtina dhe Beogradi do të diskutojnë decentralizimin. Ky delegacion do të bashkryesohet nga Ministri i Pushtetit Lokal Lutfi Haziri dhe Sekretari i Përgjithshëm i PDK së Jakup Krasniqi.

Si rezultat i kompromisit ndërmjet përfaqësuesve të pozitës dhe atyre të opozitës në Grupin Negociues është marrë vendim që delegacioni kosovar të mos ketë vetëm një kryesues, por të bashkëkryesohet nga Ministri aktual Lutfi Haziri dhe Jakup Krasniqi.

Pas takimit të Ekipit Negociues këshilltari i Presidentit të Kosovës Muhamet Hamiti tha se Grupi Negociues është marrë vesh për përmbajtjen e delegacionit të Vjenës, si dhe ka miratuar dokumentin me parimet bazë për reformën në pushtetin lokal.

Hamiti konfirmoi se anëtarë të këtij delegacioni do të jenë Lutfi Haziri, Jakup Krasniqi, Skender Hyseni, Enver Hoxhaj, Ylber Hysa, Sadik Idriz.

Pas disa konsultimeve shtesë Ekipi Negociues ka vendosur që anëtari i shtatë i delegacionit të caktohet koordinatori i ekipit të ekspertëve Blerim Shala. Në interesimin e gazetarëve se përse ishin caktuar dy bashkëkryesues dhe jo një kryesues siç ishte paralajmëruar më heret, Hamiti tha se angazhimet e Ministrit aktual të Pushtetit Lokal Lutfi Haziri dhe të ish Ministrit Jakup Krasniqi kanë një domethënie të caktuar për procesin e decentralizimit.

Në takimin e djeshëm, Delegacioni i Kosovës, i cili kryesohet nga Presidenti Fatmir Sejdiu është miratuar përfundimisht dokumenti me parimet bazë për reformën e pushtetit lokal në Kosovë.

Me këtë dokument pala kosovare do të paraqitet me 20 shkurt përball palës nga Serbia. Aty parashihet një decentralizim që e përjashton krijimin e dy etniteteve dhe koridoreve etnike në Kosovë.

 

Ky dokument kërkon zhbërjen e strukturave paralele dhe integrimin e tyre në kuadër të institucioneve të zgjedhura, por njëkohësisht parasheh edhe një bartje përgjegjësish nga niveli qendror në atë lokal dhe formimin e më shumë komunave, prej të cilave disa edhe me shumicën serbe.

 

 

Deputetët kërkojnë që të mos privatizohet objekti i hotelit "Union"

 

Prishtinë, 15 shkurt 2006 - Kuvendi i Kosovës ka kundërshtuar privatizmin e objektit të hotelit "Union", që parashihet për Galerinë e Arteve të bukura me kërkesë të Grupit Parlamentar të LDK-së.

Alush Gashi, në emër të Grupit Parlamentar të LDK-së kërkoi që qeveria dhe autoritetet më të larta të endit të bëjnë trysni ndaj AKM-së, që të heqë dorë nga privatizimi i këtij objekti, që konsiderohet si njëri nga objektet me arkitekturë të veçantë, e që parashihet të jetë shtëpia e Galerisë së Arteve të Bukura.

 

Ai propozimin e tij e mbështeti në reagimet e qytetarëve dhe të artistëve, të cilët kanë protestuar kundër vendimit të AKM-së për privatizimin e këtij objekti të veçantë, duke vepruar ngjashëm me pushtetin e dikurshëm komunist që kishte fshirë një pjesë të historisë së qytetit, në vendin ku dikur ishin afër njëra tjetrës, siç tha Gashi një sinagogë, një xhami dhe një kishë.

 

Ky propozim është mbështetur edhe nga Grupi parlamentar i PDK-së, ndërsa kryekuvendari Daci premtoi edhe angazhimin e tij për realizimin e kësaj kërkese.

Më pas Kuvendi ka vazhduar punimet me themelimin e bordit të Ankesave, bazuar në Ligjin mbi Administratën dhe Procedurat, të propozuar nga qeveria, me 51 vota për dhe 30 kundër. Ky bord do të ketë 7 anëtarë me mandat dyvjeçar dhe 8 me mandat njëvjeçar, ndërsa dy veta do të emërohen nga PSSP-ja në konsultim me qeverinë. Anëtarët e bordit të ankesave nuk do të paguhen përveç për sseanca me nga 25 euro, të cilat nuk mund të mbahen më shpesh se njëherë në javë.

Kuvendi në vazhdim të punës themeloi edhe Bordin për Prokurim Publik, me 53 vota për 28 kundër, duke hequr kandidaturën e Behxhet Rukiqit, me arsyetimin se ai nuk ka diplomë universitare. Për themelimin e të dyjave bordeve deputetët e PDK-së kanë kundërshtuar me arsyetimin se propozimet janë bërë me preferenca politike.

Deputetët me 59 vota për dhe 19 kundër miratuan edhe plotësimin e Bordite të Rregullatorit të Energjisë me dy kandidat, Theranda Beqirin ekonomiste e diplomuar dhe Nysret Avdiun inxh. i diplomua në Fakultetin Elektroteknik, që të në Universitetin e Prishtinës.

 

Kuvendi ka ndërprerë përkohësisht punimet me kërkesë të kryekuvendarit Daci, pasi shefi i Grupit Parlamentar të PDK-së ka kontestuar mënyrën e vendimarrjes për emërimin e anëtarëve të Këshillit Kundërkorrupsion, në mënyrë që të konsultohen para votimit edhe njëherë grupet parlamentare. Grupi i PDK-së, nuk i ka bërë të njohura propozimet e veta për këtë bord, dhe nëse grupet parlamentare nuk vendosin ndryshe pas pauzës do të vazhdohet me votim.

 

 

Nga një shpërthim bombe në Bagdad, janë vrarë 3 fëmijë

 

Bagdad, 15 shkurt 2006 – Nga një shpërthim bombe, që ndodhi sot (e mërkurë) në Bagdad, janë vrarë tre fëmijë derisa po shkonin në shkollë, kanë bërë të ditur burimet e Ministrisë së brendshme, njofton Rojter. Burimi thotë se bomba e vënë skaj rrugës duket të ketë qenë e dedikuar për patrulla policore që rëndom kalojnë andejpari në zonën Fadhil në qendër të Bagdadit.

 

 

Të dhënat qeveritare bazë për të dyshimtë dhe shoqata ndërkombëtare terroriste përfshijnë 325 mijë emra

 

Uashington, 15 shkurt 2006 – Të dhënat qeveritare bazë për të dyshimtë dhe shoqata ndërkombëtare terroriste përfshijnë 325 mijë emra, katër herë më shumë se lista qendrore që u krijua më 2003, bën të ditur sot (e mërkurë) “Uashington Post”, duke cituar zyrtarët e kundërterrorizmit, njofton Rojter. Lista mbahet nga Qendra Nacionale e Kundërterrorizmit ose NCTC, thotë kjo gazetë.

 

 

Kolegu i qëlluar aksidentalisht me pushkë gjahu nga Nënpresidenti Çejni pësoi një sulm zemre

 

Korpus Kristi, Teksas, 15 shkurt 2006 – Kolegu i qëlluar aksidentalisht me pushkë gjahu nga Nënpresidenti amerikan Dik Çejni gjatë gjuetisë në fundjavën e kaluar ka pasur të martën një sulm të vogël zemre dhe disa cifla saçmash gjenden ende afër zemrës në trupin e tij, ka bërë të ditur zëdhënësi i spitalit, njofton Rojter. Hari Uitington (Harry Whittington), 78-vjeçar, është nën kujdesin intensiv në spitalin “Christus Spohn” në Teksas.

 

 

H5N1 zbulohet në Evropën Perëndimore

 

Nju Jork, 15 shkurt 2006 - Agjencia e Kombeve të Bashkuara për Ushqimin, FAO u ka bërë thirrje qeverive në Evropën Perëndimore që të mos pushtohen nga paniku pas konfirmimit të disa rasteve të gripit të shpendëve.

FAO paralajmëroi se mund të kishte një rrezik të ri për Evropën këtë pranverë si pasojë e shpendëve shtegtarë. Rastet e para në Evropën Perëndimore u zbuluan në Gjermani dhe Austri.

 

 

I biri i Sharonit dënohet me 9 muaj burgim

 

Jerusalem, 15 shkurt 2006 - Omri Sharon, i biri i kryministrit izraelit, Ariel Sharon, është dënuar me 9 muaj burgim për shkak të përfshirjes në korrupsion të lidhur me fushatën politike të të jatit të tij në vitin 1999.

Sharon u akuzua se ka krijuar kompani të imagjinuara që kanë mbështetur të jatin e tij në përpjekjet për t'u bërë udhëheqës i partisë së krahut të djathtë, Likud.

Kryeministri Sharon më herët patë deklaruar se nuk ka qenë i vetëdijshëm për aktivitetin e të birit të tij.

 

 

Komiteti për Mbrojtjen e Gazetarëve publikon raportin vjetor të shtypit

 

Uashington, 15 shkurt 2006 - Komiteti për Mbrojtjen e Gazetarëve thotë se 125 gazetarë u burgosën në 24 vende vitin e kaluar dhe një e katërta e tyre në Kinë. Kjo organizatë me bazë në Shtetet e Bashkuara nxorri sot raportin e saj vjetor për lirinë e shtypit.

Raporti vë në dukje se disa gazetarë, megjithëse nuk janë burgosur, nuk janë të lirë të bëjnë punën e tyre. Gazetarët në disa rajone të Amerikës Latine janë penguar të shprehen nëpërmjet kërcënimeve, apo kanë vendosur vetëcensurën për shkak të krimeve dhe korrupsionit që është i pafrenuar.

Komiteti për Mbrojtjen e Gazetarëve bën të ditur për persekutimin e gazetarëve nga qeveritë në Afrikë, por vë në dukje se media luajti një rol të madh në zgjedhjet në Burundi.

Komiteti dokumenton gjithashtu disa raste vrasjesh të gazetarëve në Lindjen e Mesme. Ai thotë gjithashtu se 47 gazetarë u vranë gjatë viti 2005, 24 prej të cilëve vetëm në Irak.

Raporti i Komitetit për Mbrojtjen e Gazetarëve vë në dukje se një numër më i madh qytetarësh në Azi, si asnjë herë më parë, ndjekin lajmet në radio, por gazetarët vazhdojnë të kërcënohen.

 

 

Shtajnmajer: Nuk ka ndihma të BE-së nëse qeveria e Hamasit nuk pranon Izraelin

 

Ramallah, 15 shkurt 2006 - Ministri i Punëve të Jashtme të Gjermanisë Frank Valter Shtajnmajer, e ka kushtëzuar vazhdimin e ndihmave financiare evropiane për territoret palestineze me heqjen dorë nga dhuna e qeverisë së ardhshme të drejtuar nga Hamasi.

 

Vazhdim të mbështetjes financiare mund të ketë, vetëm nëse qeveria e re do të shpallë se ka hequr dorë nga dhuna dhe pranon njohjen e ekzistencës së Izraelit.

 

Kështu ka deklaruar Frank Valter Shtajnmajer, pas një takimi me presidentin palestinez, Mahmud Abaz në Ramallah. Në ditën e dytë të turneut të tij në Lindjen e Mesme, Frank-Valter Shtajnmajer u takua me Ministrin e Jashtëm të territoreve autonome palestineze, Naser al Kidva. Një nga stacionet tjera të vizitës në Lindjen e Mesme të kryediplomatit gjerman është edhe Jordania dhe Turqia.

 

 

Në demonstratat e dhunshme në Pakistan 2 të vdekur

 

Islamabad, 15 shkurt 2006 - Për herë të parë janë zhvilluar demonstrata të dhunshme kundër publikimit të karikaturave të profetit Muhamed edhe në Pakistan. Në vendbanimin e quajtur Lahore gjetën vdekjen dy persona. Demonstruesit kanë përdorur edhe metoda të dhunës, si thyerje të makinave, dyqaneve perëndimore.

 

Policia u përpoq t'i ndalojë ata përmes të shtënave në ajër. Në kryeqytetin Islmabad janë ofruar pranë pjesës, ku janë vendosur ambasadat. Mirëpo, ata janë ndaluar pasi policia ka ndërhyrë duke përdorur gaz lotsjellës.