|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Lajmet e ditës

14 shkurt 2006 /TN /QIK

Përmbajtja:

• SHBA-të mbështesin Kosovën dhe shqiptarët në procesin e statusit

• Presidenti i Kosovës ka bërë emërimet e para politike

• Këshilli i Sigurimit do të diskutojë sot pasdite për zhvillimet në Kosovë

• Sot do të dihet përbërja e delegacionit të Kosovës që do të udhëtojë për në Vjenë

• Uashingtoni do t'i ndihmojë vendet e Kartës së Adriatikut për integrimin në strukturat euro atlantike

• Rehn dhe Baroso më 17 shkurt vizitojnë Kosovën

• Leka I përgëzon Fatmir Sjediun në postin e ri

• Autoritetet e Kosovës po bëjnë negociata për marrëveshjen e tregtisë së lirë me Kroacinë, me Bullgarinë dhe me Turqinë

• Në Prishtinë u bë gradimi i 87 pjesëtarëve të Shërbimit Policor të Kosovës

• Drashkoviq thotë se janë absurde kërkesat për shpalljen e Kosovës territor i okupuar

• Anderson thotë se qëndrimi i shprehur nga radikali serb Nikoliq është artikuluar nga Kisha serbe

• Gjenerali francez i BSHV së ka thënë se ata që kërcënohen me armë duhet të mendojnë për përgjegjësinë historike

• Një bombë ka shpërthyer pranë kompanisë shtetërore të energjisë në Shkup

• Autoritetet shëndetësore të Shqipërisë kanë ndërmarrë masa urgjente parandaluese për gripin e shpezëve

• Të burgosurit në Guantanamo 'janë torturuar', thotë OKB

• TV Al Arabija shfaq një video me gjermanët e marrë peng në Irak

• Ministri i jashtëm gjerman takohet me krerët e palestinezëve

• Anani kërkon dëmshpërblim për ambasadat e dëmtuara në Siri dhe Iran

• Në Britaninë e Madhe do të futen në përdorim letërnjoftimet

  
SHBA-të mbështesin Kosovën dhe shqiptarët në procesin e statusit

 

Nju Jork, 14 shkurt 2006 - SHBA të, që kryesojnë me Këshillin e Sigurimit për këtë muaj, i kushtojmë vëmendje të madhe dhe janë shumë të përfshira në procesin e statusit.

 

Ato mbështesin Kosovën dhe shqiptarët e Kosovës në këtë proces, tha Benxhamin Çang, zëdhënës i misionit amerikan pranë OKB.

Çang për radion Evropa e lirë vuri në dukje çështjen e zbatimit të standardeve duke kërkuar të bëhet më shumë në mënyrë që të ruhet ritmi i bisedimeve për statusin e Kosovës.

Zëdhënësi Çang tha se mirëpret pjesëmarrjen e Kryeministrit të Kosovës në mbledhjen e Këshillit të Sigurimit, i cili, siç tha, është pjesë e delegacionit të shefit të UNMIK ut.

 

 

Presidenti i Kosovës ka bërë emërimet e para politike

 

Prishtinë, 14 shkurt 2006 - Presidenti i Kosovës, Fatmir Sejdiu, ka bërë emërimet e para politike pas zgjedhjes së tij në postin e Presidentit të vendit të premten e kaluar.

Presidenti Sejdiu ka emëruar Skender Hysenin këshilltar kryesor politik, Muhamet Hamitin këshilltar të lartë politik, Dr. Isa Mustafën këshilltar të lartë për çështje ekonomike, dhe Ramë Manajn këshilltar politik.

Skender Hyseni dhe Muhamet Hamiti kanë qenë për një kohë të gjatë bashkëpunëtorë të ngushtë dhe këshilltarë të Presidentit Ibrahim Rugova në të dyja mandatet e tij në këtë post.

 

Dr. Isa Mustafa, ekspert i njohur i ekonomisë dhe profesor universiteti, ka qenë Ministër i Financave në Qeverinë e Kosovës. Ramë Manaj është aktualisht kryetar i Kuvendit Komunal të Klinës.

Presidenti Fatmir Sejdiu është duke punuar për të strukturuar stafin e vet politik dhe në kohën në vijim do të bëjë emërimet e tjera në Zyrën e Presidentit, thuhet në njoftim për media.

 

 

Këshilli i Sigurimit do të diskutojë sot pasdite për zhvillimet në Kosovë

 

Nju Jork, 14 shkurt 2006 - Këshilli i Sigurimit do të diskutojë sot pasdite për zhvillimet në Kosovë dhe për raportin tremujor të Sekretarit të Përgjithshëm të Kombeve të Bashkuara. Në takimin e Këshillit të Sigurimit do të raportojë dhe shefi i UNMIK ut Soren Jessen Petersen, ndërkaq për herë të parë merr pjesë dhe kryeministri i Kosovës Bajram Kosumi.

Në këtë të KS takim Austria do të flasë në emër të Bashkimit Evropian. Helfrid Krl, nga Misioni austriak në Kombet e Bashkuara në Nju Jork, ka konfirmuar për Radion Evropa e Lirë se në fjalimin e Austrisë në emër të BE së do të çmohet zgjedhja e Presidentit të Kosovës Fatmir Sejdiu, dhe procesi i qetë dhe i shpejtë që e shoqëroi këtë zgjedhje.

 

Karl thotë se do të theksohet rëndësia e përmbushjes së standardeve dhe do të nënvizohet përparimi i bërë nga udhëheqësit kosovarë veçanërisht në standardin për të drejtën e pronës dhe ruajtjen e traditës kulturore e fetare.

Nga ana tjetër në mbledhjen e Këshillit të Sigurimit Austria në emër të Bashkimit Evropian do kërkojë nga Beogradi që në vend të dekurajimit t'i nxisë serbët e Kosovës të marrin pjesë në jetën politike e institucionale.

 

 

Sot do të dihet përbërja e delegacionit të Kosovës që do të udhëtojë për në Vjenë

 

Prishtinë, 14 shkurt 2006 - Sot do të dihet përbërja e delegacionit të Kosovës që do të udhëtojë për në Vjenë në bisedimet ndërmjet Prishtinës dhe Beogradit. Po ashtu do të miratohet edhe dokumenti final: Parimet themelore të reformimit të pushtetit lokal.

 

Delegacioni do të përbëhet prej shtatë anëtarësh. Kështu u bë e ditur pas takimit të Grupit politik strategjik. Në këtë takim janë përfshirë vërejtjet e veçanta të anëtarëve të Delegacionit të Kosovës për materialin bazë dhe për parimet themelore të reformës së pushtetit lokal.

 

Koordinatori i Grupit Negociator të Kosovës Blerim Shala ka theksuar pas këtij takimi se propozimet do t'i dërgohen sot Delegacionit të Kosovës për miratim final.

Dokumenti me parimet bazë të Prishtinës për reformën e pushtetit lokal me të cilin pala kosovare të paraqitet përball palës nga Serbia më 20 shkurt në Vjenë parasheh një decentralizim që përjashton krijimin e korridoreve etnike në Kosovë.

 

 

Uashingtoni do t'i ndihmojë vendet e Kartës së Adriatikut për integrimin në strukturat euro atlantike

 

Uashington, 14 shkurt 2006 - Shtetet e Bashkuara shprehën të hënën angazhimin e tyre ndaj konsolidimit të demokracisë dhe paqes në vendet e Ballkanit perëndimor dhe vlerësuan bashkëpunimin me vendet e Kartës së Adriatikut.

 

Në takimin ministror të zhvilluar në Departamentin e Shtetit, ku morën pjesë ministrat e jashtëm të Shqipërisë, Kroacisë dhe Maqedonisë Nënsekretari amerikan i Shtetit për Çështjet Politike, Nikolas Bërns, theksoi se Uashingtoni do t'i ndihmojë aktivisht këto vende për integrimin në strukturat euro atlantike.

Nënsekretari Bërns foli për rëndësinë që kanë për Shtetet e Bashkuara marrëdhëniet me vendet e Kartës së Adriatikut dhe rajonit në përgjithësi:

"Këto vende janë shumë të rëndësishme për Shtetet e Bashkuara. Shtetet e Bashkuara kanë një politikë aktive për rajonin e Ballkanit që ka si qëllim t'i ndihmojë këto vende, në mënyrë që e ardhmja e rajonit të jetë paqja, stabiliteti dhe demokracia".

Duke ritheksuar angazhimin për integriminin euro atlantik të vendeve të Kartës së Adriatikut, zoti Bërns vlerësoi kontributin e tyre në Kosovë, Afganistan dhe Irak:

"Dua të falenderoj ministrat për kontributin e madh të tyre për aleancën, për suksesin tonë në Kosovë dhe në Afganistan dhe në përpjekjet aktuale të NATO s për sukses në Irak".

Pas konferencës zoti Bërns tha se sfidat kryesore për Shqiprërinë dhe për integrim në NATO, janë ato me të cilat janë përballur të gjitha vendet që janë anëtarësuar në aleancë 10 vitet e fundit:

?Suksesi i lirisë politike dhe demokracisë, zgjedhje të lira dhe të ndershme, lufta kundër korrupsionit dhe aftësimi i ushtrisë për t?u përshtatur me standardet e NATO s. Këto janë sfida të vështira që nuk mund të kapërcehen në një javë, po ne mendojmë se qeveria është serioze në punën e saj dhe po bën të gjitha përpjekjet. Vendet tona kanë një miqësi të ngushtë dhe shpresojmë që këto marrëdhënie të përmirësohen edhe më tej.

Ministri i Jashtëm i Shqipërisë Besnik Mustafaj tha se integrimi i Shqipërisë në Bashkimin Evropian dhe NATO, plotësojnë njëra tjetrën.

"Procesi i intergrimit në NATO është komplementar me procesin e integrimit në Bashkimin Evropian dhe duke qenë komplementarë këto dy procese integrimi, kanë mobilizuar gjithë energjitë e shoqërisë për të luftuar krimin e organizuar, korrupsionin dhe për të reformuar shoqërinë", tha Mustafaj.

 

 

Rehn dhe Baroso më 17 shkurt vizitojnë Kosovën

 

Bruksel, 14 shkurt 2006 - Vetëm me qasje konstruktive mund të kemi rezultatin e qëndrueshëm dhe të balancuar të bisedave për statusin e Kosovës dhe mund të sigurojmë mbarëvajtjen e procesit, - ka thënë Komesioneri evropian për zgjerim Oli Rehn, para gazetarëve në prag të vizitës rajonit, ku do të shkojë së bashku me kryetarin e Komisionit Evropian Zhoze Manuel Baroso.

 

Këtë porosi dy zyrtarët evropianë do të sjellin në kryeqytetin e Kosovës dhe atë të Serbisë. Ai e tha këtë duke komentuar prononcimet e fundit të zyrtarëve serbë se do të shpallin Kosovën territor të okupuar në rast të pavarësisë së vendit.

Në kuadër të turneut ballkanik Baroso dhe Rehn do të vizitojnë Prishtinën më 17 shkurt ku krerëve të institucioneve të Kosovës do t'ua përcjellin gjithashtu se roli i Bashkimit Evropian është që pavarësisht se cila do të jetë zgjidhja përfundimtare për Kosovën, Brukseli duhet të sigurojë që kjo zgjidhje të jetë në linjë me perspektivën evrooiane si për Kosovën ashtu edhe për tërë Ballkanin Perëndimor.

Oli Rehn konsideron se viti 2006 është vit i sfidave sepse do të qartësohet statusi i Kosovës, por edhe ai i Malit të Zi. Pavarësisht se cili do të jetë statusi i këtyre dy vendeve, është me rëndësi që popujt e vendeve të rajonit të dijnë se e kanë siguruar perspektivën evropian, tha Oli Rehn, duke porositur Serbinë se tani ajo duhet të vendosë në mes të ardhmes evropiane dhe të kaluarës nacionaliste.

 

 

Leka I përgëzon Fatmir Sjediun në postin e ri

 

Tiranë, 14 shkurt 2006 - N.M.T Leka I - Mbret i Shqipëtarëve, me anë të një mesazhi ka përgëzuar Presidentin e ri të Kosovës Fatmir Sejdiu.

"Ne e vlerësojmë shumë faktin që Ju keni marrë përsipër detyrën e lartë të Presidentit të Kosovës, duke realizuar detyrimin kombëtar, që ju dhanë deputetët e Parlamentit të Kosovës.

Përgjegjesia për të realizuar verdiktin e Popullit është një detyrim kombëtar, dhe ne Ju urojmë që ta kryeni me nder dhe dinjitet, duke realizuar bashkëpunimin ndërmjet institucioneve legjislative të Kosovës.

Me këtë rast Ju urojmë vëllazërisht në kryerjen e detyrës së lartë të Presidentit të Kosovës", thuhet në fund të mesahit të përgëzimit të N.M.T Leka I - Mbret i Shqipëtarëve.

 

 

Autoritetet e Kosovës po bëjnë negociata për marrëveshjen e tregtisë së lirë me Kroacinë, me Bullgarinë dhe me Turqinë

 

Prishtinë, 14 shkurt 2006 - Autoritetet e Kosovës po bëjnë negociata për marrëveshjen e tregtisë së lirë me Kroacinë, me Bullgarinë dhe me Turqinë. Tashmë marrëveshje të tilla janë nënshkruar me Shqipërinë dhe Maqedoninë.

 

Ejup Fejza nga Ministria për Tregti dhe Industri e Kosovës thotë se megjithë këtë marrëveshjet dhe negociatat po pësojnë ndryshime dhe të shndërrohen në një marrëveshje të vetme, që do të vlente për të gjithë Ballkanin Perëndimor.

 

Sipas tij marrëveshjet e tregtisë së lirë me Shqipërinë dhe Maqedoninë kanë mundësuar përfitime të mëdha, qoftë në eksport ashtu edhe në import.

 

 

Në Prishtinë u bë gradimi i 87 pjesëtarëve të Shërbimit Policor të Kosovës

 

Prishtinë, 14 shkurt 2006 - Në Prishtinë u bë gradimi i 87 pjesëtarëve të Shërbimit Policor të Kosovës. U graduan 37 oficerë të sigurisë, 10 rreshterë të policisë, 33 majorë, një kapiten dhe 6 nënkolonel.

 

Komesari i policisë Kai Vitrup e vlerëson lartë profesionalizmin që po dëshmohet ditës brenda radhës të SHPK së. Ai i quajti këto gradime ngazëllyese për SHPK në, e cila çdo ditë e më tepër po tregon aftësi dhe merr përgjegjësi të reja. Gjithashtu Vitrup porositi këta të fundit që të bëhen menaxherë të mirë dhe të shfrytëzojnë të gjitha resurset që i kanë.

"Përfundimi juaj sot nuk e përfundon punën, por e fillon atë. Këto janë kohëra të mira për SHPK në, e cila deri më tash ka shënuar mjaftë rezultate dhe si meritë e kësaj do merren edhe mëtutje përgjegjësi të reja. Me këtë promovim rritet edhe niveli i përgjegjësisë tuaj. Ju duhet të lufton krimin, korrupsionin dhe padrejtësitë kudo, si dhe t[i mbroni të gjithë qytetarët pa dallim", thënë Kai Vitrup.

Në SHPK prej vitit 1999 janë graduar 1.318 pjesëtarë, përveç gradimeve në këtë ceremoni u ndan edhe mirënjohje dhe medalje për kontribut të veçantë pjesëtarëve të SHPK së.

 

 

Drashkoviq thotë se janë absurde kërkesat për shpalljen e Kosovës territor i okupuar

 

Beograd, 14 shkurt 2006 - Minisri i Jashtëm serbo malazez, Vuk Drashkoviq ka deklaruar se çdo zgjidhje të imponuar për Kosovën, Serbia do ta konsideronte jolegjitime, por janë të pakuptimta dhe absurde kërkesat për shpalljen e Kosovës territor i okupuar.

"Eshtë e pakuptimtë të komentohet kërkesa për shpalljen e Kosovës territor i okupuar, sepse në këtë rast Serbia do të duhej të hynte në luftë me okupuesin për ta çliruar atë territor", ka thënë Drashkoviq.

 

Ai ka theksuar se ky okupator do të mund të ishte vetëm Këshilli i Sigurimit të OKB së, sepse vetëm ai mund të marrë vendimin për pavarësi. Drashkoviq ka shtuar se duhet shmangur kjo terminologji nga e kaluara që Serbinë e çonë në izolim dhe disfata.

 

 

Anderson thotë se qëndrimi i shprehur nga radikali serb Nikoliq është artikuluar nga Kisha serbe

 

Prishtinë, 14 shkurt 2006 - Përfaqësuesi i Grupit Ndërkombëtar të Krizave, Aleks Anderson, ka thënë se qëndrimi i shprehur së fundi nga radikali Tomislav Nikoliq, në të vërtetë, është artikuluar në shtator nga Kisha ortodokse serbe në Kuvendin e saj të shenjtë dhe si i tillë nuk është qëndrim i papritur për bashkësinë ndërkombëtare.

"Nuk mendoj se Grupi i Kontaktit ka ndonjë shpresë të madhe se Serbia në çfarëdo rasti apo secili politikan i Serbisë do të nënshkruajë pavarësinë e Kosovës", ka thënë z. Anderson.

 

Sipas tij ekziston një bindje se në fazat e mëvonshme nëse negociatat shkojnë kah pavarësia Serbia thjesht mund të braktisë tavolinën e bisedimeve dhe kështu situata do të ishte më problematike në rast se Serbia vendosë në faza të mëhershme që të braktisë diskutimet.

 

 

Gjenerali francez i BSHV së ka thënë se ata që kërcënohen me armë duhet të mendojnë për përgjegjësinë historike

 

Mitrovicë, 14 shkurt 2006 - Ata që kërcënohen me armë duhet të mendojnë për përgjegjësinë historike. Kështu u shpreh në një konferencë me gazetarë komandandti i sapozgjedhur i Njësisë vepruese Shumëkombëshe të Veriut, gjenerali francez Zhan Filip Margeron.

 

Ai i bëri këto komente duke iu kundërvënë deklaratave të disa liderëve serbë, se në rast të pavarësisë së Kosovës, serbët do ta mbrojnë Kosovën me armë. Marguero situatën në Mitrovicë e vlerësoi si të qetë dhe ka theksuar se shtarët e tij janë të angazhuar në kthimin e mirëbesimit ndërmjet qytetarëve.

 

 

Një bombë ka shpërthyer pranë kompanisë shtetërore të energjisë në Shkup

 

Shkup, 14 shkurt 2006 - Një bombë ka shpërthyer pranë kompanisë shtetërore të energjisë në Shkup, duke shkaktuar dëme materiale, por jo edhe në njerëz. Vendi ku ndodhi incidenti gjendet para Ambasadës greke. Deri më tash askush nuk ka marrë përsipër sulmin dhe nuk është arrestuar asnjë person.

 

 

Autoritetet shëndetësore të Shqipërisë kanë ndërmarrë masa urgjente parandaluese për gripin e shpezëve

 

Tiranë, 14 shkurt 2006 - Autoritetet shëndetësore të Shqipërisë kanë ndërmarrë masa urgjente parandaluese për gripin e shpendëve pas rasteve të infektimit me virusin H5 1 në Italinë dhe Greqinë fqinje.

 

« Do të ishte mendjelehtësi e pafalëshme të mendonim se Shqipëria do të kursehej nga gripi i shpendëve. Derisa është në Ballkan gjasat janë të vie edhe këtu », ka thënë Ministri i Shëndetësisë së Shqipërisë, Maksim Cikuli.

Edhe qeveritë e tjera evropiane kanë filluar të marrin masa shtesë, pas raste në Itali, Greqi dhe Bullgari.

 

 

Të burgosurit në Guantanamo 'janë torturuar', thotë OKB

 

Guatanamo, 14 shkurt 2006 - Departamenti Amerikan i Shtetit ka kritikuar si të pabazë një raport të Kombeve të Bashkuara rreth kushteve në burgun në Gjirin Guantanamo që i ka rënë në dorë gazetës amerikane Los Angles Times.

Raporti që do të bëhet publik këtë javë, e akuzon SHBA-në se ka shkelur ligjet ndërkombëtare dhe ka torturuar të burgosurit.

Në të hetuesit e OKB-së po ashtu tërheqin vëmendjen për praktikën e ushqimit me detyrim të të burgosurve në grevë urie.

Por një zëdhënës për Departamentin e Shtetit tha se raporti nuk bazohej në fakte dhe se ekipi i OKB-së kishte refuzuar një ofertë të SHBA-së për ta vizituar kampin.

 

 

TV Al Arabija shfaq një video me gjermanët e marrë peng në Irak

 

Irak, 14 shkurt 2006 - Rreth tri javë pas marrjes peng të dy inxhinierëve gjermanë në Irak TV Al Arabija transmetoi një video të re të gjermanëve të marrë peng, por kësaj radhe edhe me zë. Sipas të dhënave të këtij stacioni kemi të bëjmë me një paralajmërim të fundit të kidnapuesve. Ata kërcënojnë se do t'i vrasin inxhinierët e marrë peng në rast se qeveria federale gjermane nuk do të ndërpresë të gjitha kontaktet politike me Irakun.

 

 

Ministri i jashtëm gjerman takohet me krerët e palestinezëve

 

Ramallah, 14 shkurt 2006 - Në ditën e dytë të turneut të tij në Lindjen e Mesme MPJ Frank-Walter Steinmeier do të takohet me krerët e palestinezëve. Në takim do të diskutohet edhe për gjendjen në territoret autonome palestineze pas fitores në zgjedhjet parlamentare të lëvizjes radikale islamike Hamas. Gjatë bisedimeve me qeveritarët izraelitë Steinmeieri i përjashtoi për momentin bisedimet me Hamasin.

 

 

Anani kërkon dëmshpërblim për ambasadat e dëmtuara në Siri dhe Iran

 

Njujork, 14 shkurt 2006 - Sekretari i përgjithshëm i OKB-së Kofi Anan theksoi se sipas të dhënave të tij nuk ka asnjë dëshmi që Siria dhe Irani i kanë nxitur vetë protestat kundër karikaturave të profetit Muhamet. Protesta të tilla pati në të gjithë botën, tha Anan në lidhje me këto akuza të ngritura sidomos prej SHBA-ve. Nga ana tjetër ai theksoi se çdo shtet e ka për detyrë që të mbrojë përfaqësitë diplomatike në vendin e tij dhe kërkoi që Siria dhe Irani të paguajnë dëmshpërblim për dëmtimin e ambasadave.

 

 

Në Britaninë e Madhe do të futen në përdorim letërnjoftimet

 

Londër, 14 shkurt 2006 - Dhoma e Ulët e parlamentit britanik miratoi me shumicë votash planet e kryeministrit Toni Bler për pajisjen sërish të shtetasve me letërnjoftime duke filluar nga viti 2008.

 

Votimi në fjalë konsiderohej si një test i rëndësishëm për Toni Blerin pasi gjatë javëve të kaluara atij nuk i ishin miratuar prej Dhomës së ulët të parlamentit tri kërkesa të tjera. Pajisja e shtetasve britanikë me letërnjoftime argumentohet me luftën kundër terrorizmit dhe kriminalitetit të organizuar.