|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Presidenti Sejdiu zotohet për realizimin e pavarësisë dhe ruajtjen e integritetit të vendit

Prishtinë, 10 shkurt 2006 /TN /QIK - Presidenti i ri i Kosovës u zgjodh prof.dr.Fatmir Sejdiu, me 80 vota pro në raundin e tretë të votimit të Kuvendit të Kosovës. Nga 110 deputetët e pranishëm në dy raundet e para të votimit kandidatura e LDK-së, prof.dr.Fatmir Sejdiu nuk arriti për 2 dhe 3 vota të zgjidhej President, ashtu siç është e përcaktuar me Kornizë Kushtetuese, që për zgjedhje i duhen dy të tretat e numrit të përgjithshëm të deputetëve nga 120 sa ka Kuvendi i Kosovës. Ai mori dy të tretat e votave në raundin e tretë të votimit 80 për, 12 kundër dhe 17 të pavlefshme, kur i nevojitej shumica e thjeshtë prej 61 votash. Ndërsa, nuk kishte asnjë kundërkandidat në procesin e votimit.

Kryetari i Kuvendit Nexhat Daci, para fillimit të votimit rikujtoi se seanca mbahet me kërkesën e të gjitha grupeve parlamentare, të cilat e kanë vlerësuar të nevojshme përmbushjen e vakuumit të krijuar pas vdekjes së Presidentit Rugova. Ai tha se edhe pas vdekjes së Presidentit Rugova, institucionet e vendit do të punojnë me përkushtim për shtetin e pavarur e sovran të Kosovës.

Presidenti Sejdiu, menjëherë pas zgjedhjes u betua solemnisht para deputetëve dhe qytetarëve të Kosovës, se do të reflektojë unitetin e popullit, tërësinë tokësore të vendit, dhe funksionimin demokratik të institucioneve. "Betohem solemnisht se do të ruajë dhe mbroj unitetin e popullit, tërësinë tokësore të vendit, dhe do të siguroj funksionimin demokratik të institucioneve të Kosovës", tha Sejdiu.

Presidenti Sejdiu që në postin më të lartë të vendit pason Presidentin e ndjerë Ibrahim Rugova, udhëheqësin historik të shqiptarëve në rrugën e pavarësisë, tha se është nderuar dhe i privilegjuar për zgjedhjen, por njëkohësisht barrë dhe përgjegjësi e veçantë. "Unë zgjidhem në këtë detyrë dhe marr postin që ka mbajtur Presidenti ynë i parë dhe tashmë historik., Ibrahim Rugova", tha ai duke shtuar se këtë post të lartë të vendit e bënte më të madh me figurën e veçantë prej njeriu e prijësi të papërsëritshëm.

 

Presidenti Sejdiu, ka përkujtuar edhe njëherë Presidentin Rugova në fjalën e tij duke e vlerësuar lart veprën e tij. "Presidenti Rugova ka lënë një trashëgimi të pasur politike e shtetërore, të ndërtuar me dije, me mund e sakrifica, por edhe me guxim të pashoq, për më shumë se një dekadë e gjysmë", tha ai. Presidenti Sejdiu tha se rruga të cilën e trashëguan institucionet nga Presidenti Rugova është e sigurtë për ta përmbyllur procesin e pavarësimit të vendit tonë. "Pavarësia nuk është vetëm një privilegj për të jetuar të lirë e me dinjitet njerëzor e nacional, por është edhe obligim dhe përgjegjësi, gjithashtu", tha ai.

Presidenti Sejdiu tha se zyra e tij në udhëheqjen e tij do të bashkëpunojë ngushtë me institucionet e tjera të Kosovës, me partitë politike në pushtet dhe në opozitë, me grupet etnike dhe të gjithë qytetarët e Kosovës në dobi të unitetit, funksionimit demokratik, zhvillimin ekonomik, përparimin e përgjithshëm dhe mirëqenien sociale. "Kjo është detyrë e imja kushtetuese, ky është obligim qytetar i imi dhe i secilit institucion e qytetar të vendit, sidomos tani që përmbushja e synimit tonë për Kosovën shtet të pavarur e sovran është afër", tha ai.

 

Presidenti premtoi vazhdimin e bashkëpunimit të ngushtë me UNMIK-un, KFOR-in, TMK-në dhe SHPK-në në dobi të forcimit të mëtejshëm të institucioneve të Kosovës dhe të sigurisë së vendit. Në fjalën e tij Presidenti i sapozgjedhur Sejdiu, foli edhe për procesin e bisedimeve për Kosovën, i cili tha se shtron detyra esenciale.

 

Ai premtoi se si President, do të ketë angazhim parësor udhëheqjen e punës së Grupit Negociator dhe arritjen e njohjes së pavarësisë. “Ju siguroj se unë, si President, do të kem angazhim parësor udhëheqjen dhe vazhdimin e punës së Ekipit Negociator të Kosovës si ekip i unitetit, ashtu si e kishte strukturuar Presidenti Ibrahim Rugova, për të përshpejtuar këtë proces përballë nevojave të vendit tonë dhe vendosmërisë së bashkësisë ndërkombëtare për ta përmbyllur me sukses këtë proces sa më parë, gjatë këtij viti, në përputhje të plotë me vullnetin e popullit të Kosovës”, tha ai.

 

Në këtë kontekst ai premtoi bashkëpunim të ngushtë me Emisarin e OKB-së për Statusin e Kosovës, z.Maarti Ahtisaari. Ai poashtu u zotua se ai dhe ekipi i tij, do të bashkëpunojnë ngusht me SHBA-të, Unionin Evropian, dhe Grupin e Kontaktit, siç tha ai me qëllimin e vetëm që Kosovën ta bëjnë, "shtet në paqe me veten dhe fqinjtë e vet, një vend që do të garantojë të gjitha liritë qytetare, njerëzore dhe të pakicave, në pajtim me standardet më të larta që ka vendosur bota demokratike".

 

"Dhe në të njëjtën kohë të shprehim denjësinë tonë për të qenë partner i integruar në strukturat euro-atlantike", tha ai. Ai u bëri thirrje të gjithë qytetarëve dhe në veçanti komunitetin serb, që të punojnë së bashku për një Kosovë demokratike, përparimtare dhe tolerante, ku respektohen dhe nderohen veçantitë e secilit.

Kandidaturën e presidentit Sejdiu e bëri nënkryetari i LDK-së z.Kolë Berisha, i cili ndërsa foli për personalitetin e veçantë të Presidentit Sejdiu, e ka kujtuar edhe çastin që ka propozuar edhe kandidaturën e Presidentit Rugova, dhe se në atë moment 'askush nuk mund ta besonte se do të ndaheshim nga ai aq shpejtë'. Ai tha se Prof Dr. Fatmir Sejdiu, që prej themelimit të kësaj partie, ka qenë në forumet më të larta të saj dhe njëri ndër bashkëpunëtorët më të ngushtë të Presidentit të ndjerë, Ibrahim Rugova.

 

"Duke pasur votën e këtij Kuvendi për President të Kosovës me punën e tij prej pedagogu, punëtorit të zellshëm të shkencës dhe intelektualit të mirëfilltë, me një kulturë të gjerë dhe njohës i mirë i rrethanave aktuale në vend dhe jashtë, me përvojën e tij të deritashme organizative dhe politike, me prirjen e njeriut i cili reflekton tolerancë, bashkëpunim dhe mirëkuptim, dhe duke qenë përherë njëri ndër bashkëpunëtorët më të aftër të paraardhësit të tij, të presidentit tashmë të ndjerë Ibrahim Rugovës, do ta arsyetojë besimin tonë", tha ndër të tjera Kolë Berisha.

Pas zgjedhjes së Presidentit Sejdiu në këtë post, atë e kanë përshëndetur kryeadministratori Petersen, Kryetari i Kuvendit Nexhat Daci etj.

"Jam i kënaqur që në kohën e duhur, ishte pak një lapsus i vogël që duheshin votat e raundit të tretë të jenë në raundin e parë që të mos lodheshim, megjithatë i dëshiroj shëndet të mirë dhe sukses. Kryetari i ri do ta ketë përkrahjen e plotë të Parlamentit me respektimin e vullnetit politik të popullit dhe atë që e kemi pasur më herët", tha kryekuvdenari Daci.

Kryeministri Bajram Kosumi vlerësoi se zgjedhja e Kryetarit është bërë me një procedurë shumë të mirë demokratike, se në kohën e duhur është bërë veprimi i duhur. "Edhe një herë klasa politike ka dëshmuar se në ditë të vështira, atëherë kur pritet që të jetë më së vështiri nuk dorëzohemi, përkundrazi e rishikojmë vetveten, pozicionet dhe qëllimin ku do të arrijmë", tha ai.

 

Ndërsa kryeadministratori Petersen tha se ishte një mbështetje e fuqishme, duke iu referuar rezultatit të votimit. "Dëshiroj ta uroj parlamentin e Kosovës për ecjen kaq të shpejtë përpara, duke u siguruar që edhe procesi i statusit mund të ec përpara në këtë moment të rëndësishëm për Kosovën.

 

Do ta ruajë unitetin, stabilitetin dhe të sigurohemi se mund të ecim përpara drejt një zgjidhej për statusin. E kam shprehur mbështetjen e plotë për Presidentin e ri të Kosovës, dhe jam i gëzuar që do të mund të shkojë në Këshillin e Sigurimit dhe të them që pas humbjes tragjike të presidentit Rugova, dhe se në më pak se tri javë, institucionet demokratikee kanë zgjedhur presidentin e ri të Kosovës, i cili gëzon mbështetje të fuqishme", tha Petersen.

Shefi i zyrës amerikane Filip Goldberg, tha se ishte dëshmitar i një votimi të rëndësishëm dhe që hap rrugën për të shkuar përpara. "Sapo ishim dëshmitarë të një votimi të rëndësishëm, diçka që është shumë e rëndësishme për Kosovën për të ecur përpara me bisedimet rreh statusit të Kosovës. Shtetet e Bashkuara të Amerikës e mirëpresin bashkëpunimin me Presidentin Sejdiu dhe Ekipin Negociator të cilin ai do ta drejtojë në ditët dhe javët e ardhshme për të ndihmuar çuarjen përpara të procesit të statusit final", tha Goldberg.

"Besoj se delegacioni i Kosovës do të rifunksionalizohet", tha lideri i PDK-së Hashim Thaçi, duke shtuar që pas këtij momenti duhet të jenë sa më të përgatitur për takimin e Vjenës që pritet të mbahet më 20 shkurt.

"Sfidat e Kosovës janë shumë më të mëdha", tha Veton Surroi, duke shtuar se duhet të kemi të njëjtin seriozitet, të njëjtin unitet të treguar për të vazhduar procesin e nisur të bisedimeve për statusin.

"Ne kishim një kandidat, i cili përfaqëson vlerat politike dhe maturitetin politik të LDK-së. Fatmir Sejdiu, është një zgjedhje e duhur në momentin e duhur dhe jemi të bindur që do ta ndërtojë një strukturim politik për Kosovën të tillë çfarë i nevojitet Kosovës tash.

 

Zgjedhja ka shkuar në mënyrën më demokratike, Fatmiri ka fituar 80 vota, që janë dy të tretat, është një votim i madh në Kuvend, për Sejdiun Kryetar. Unë jam i bindur që e ka edhe dijen edhe maturinë edhe qëndrimin që të jetë një garant i zhvillimeve politike në Kosovë për ta mbaruar, për ta kurorëzuar të gjithë së bashku pavarësinë e Kosovës në këtë vit. Nuk është koha të flitet për nuanca, është koha të flitet për zgjidhjen. Zgjidhja është një zgjidhje demokratike, dhe një zgjidhje e mirë.

 

Mos bëni krahasime kurrë. Ky është një mendim i ndjeshëm për të gjithë ne që kemi punuar gjatë me Ibrahim Rugovën. Rugova ka qenë një institucion politik vetvetiu, Fatmir Sejdiu, do të jetë një President i mirë,një njeri që e kryen mirë funksionin e Presidentit”, tha akad.Sabri Hamiti, kryetar i komisionit parlamentar për marrëdhënie me jashtë.