|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Lajmet e ditës

10 shkurt 2006 /TN /QIK

   
Presidenti i Shqipërisë i ka dërguar një mesazh urimi Presidentit të sapozgjedhur të Kosovës

 

Tiranë, 1O shkurt 2006 - Presidenti i Shqipërisë, Alfred Moisiu, i ka dërguar një mesazh urimi Presidentit të sapozgjedhur të Kosovës, Fatmir Sejdiu, në të cilin thuhet:

"E prita me shumë kënaqësi lajmin për zgjedhjen Tuaj si President i Kosovës. Me këtë rast u shpreh urimet më të ngrohta e vëllazërore si dhe Ju uroj suksese në këtë detyrë të lartë e të rëndësishme veçanërisht në këto momente të sfidave madhore për Kosovën.

Zgjedhja Juaj u bë në një moment të rëndësishëm, atë të hapjes së negociatave për statusin final të Kosovës. Mënyra demokratike me të cilën u zgjodhët, dëshmoi edhe një herë jo vetëm qytetarinë dhe vlerat e shoqërisë kosovare, por shërbeu edhe si një rast tjetër për të treguar në këto momente pjekurinë e klasës politike shqiptare në shërbim të kauzës së pavarësisë.

 

Ajo ishte njëkohësisht vlerësim i kontributit Tuaj të vyer në përpjekjet e shqiptarëve për një Kosovë të lirë, të pavarur, demokratike dhe evropiane.

Duke Ju uruar edhe një herë, dëshiroj t’i shpreh përgëzimet e mia gjithë klasës politike kosovare dhe të gjithë popullit të Kosovës".

 

 

Kryeministri Berisha ka uruar Presidentin e sapozgjedhur të Kosovës, Fatmir Sejdiu

 

Tiranë, 1O shkurt 2006 - Kryeministri i Shqipërisë Sali Berisha ka uruar Presidentin e sapozgjedhur të Kosovës, Fatmir Sejdiu, përmes një bisede telefonike të zhvilluar teksa z.Sejdiu ndodhej ende në sallën plenare të Parlamentit të Kosovës.

"Shpreh besimin e madh se Kosova ka zgjedhur garantin e saj të vërtetë të një Kosove të lirë, të qytetarëve të barabartë para ligjit dhe të pavarur. Ju përshëndes ju, përshëndes me këtë rast të gjithë deputetët e Kosovës dhe ju uroj shumë sukese në detyrën tuaj.

 

Urimet më të përzemërta edhe një herë ju dhe të gjithë lidershipit të Kosovës. Ka qenë me të vërtetë një ngjarje e madhe për Kosovën, një garanci e madhe për Kosovën, por edhe për Shqipërinë dhe për rajonin.

 

Është një zgjedhje e shkëlqyer z.Sejdiu. Z.President Urimet më të mira dhe më të përzemërta!", u shpreh kryeministri Berisha gjatë bisedës telefonike me Presidentin e Kosovës, Fatmir Sejdiu, pak minuta pas votimit në Kuvendin e Kosovës, për zgjedhjen e z.Sejdiu në këtë detyrë.

 

 

Fatmir Sejdiu bëri homazhe para Presidentit Rugova

 

Prishtinë, 1O shkurt 2006 - Presidenti i sapozgjedhur i Kosovës, Fatmir Sejdiu, menjeherë pasi mori votëbesimin e Kuvendit të Kosovës, bëri homazhe para Presidentit Ibrahim Rugova dhe vuri lule të freskta mbi varrin e tij.

 

 

Familja e Presidentit Rugova në një mesazh urimi përshëndet zgjedhjen e Fatmir Sejdiut President të Kosovës

 

Prishtinë, 1O shkurt 2006 - Familja e Presidentit Ibrahim Rugova në një mesazh urimi përshëndet zgjedhjen e sotme të Fatmir Sejdiut, President i ri i Kosovës, me urimet më të mira për njohjen sa më të shpejtë të pavarësisë së vendit tonë, Kosovës.

"Me gjithë dhembjen që ndiejmë në këto momente për humbjen e bashkëshortit e babait tonë të dashur, përshëndesim zgjedhjen e Presidentit të ri të Kosovës, duke shprehur urimet më të sinqerta për zotin Fatmir Sejdiu në krye të vendit dhe për njohjen sa më të shpejtë të pavarësisë së Kosovës.

Shprehim bindjen e plotë se Presidenti i ri, bashkë me të gjitha forcat demokratike, do të vazhdojë të punojë me ngulm për sendërtimin e idealeve të shenjta për një Kosovë të pavarur e demokratike, të integruar në NATO, në BE dhe në miqësi të përhershme me SHBA-të, ideale këto për cilat punoi i dashuri ynë, Ibrahim Rugova, deri në frymën e fundit.

Po ashtu shprehim bindjen tonë se populli i Kosovës në një të ardhme të afërt do t'i bashkohet familjes së madhe të bashkësisë së popujve evropianë", thuhet në një mesazh urimi të familjes së Presidentit Rugova: bashkëshortja Fana, djemtë Mendimi e Uka dhe vajza e Teuta.

 

 

Asociacioni i Komunave dhe LDK-ja urojnë zgjedhjen e Fatmir Sejdiut President të Kosovës

 

Prishtinë, 1O shkurt 2006 - Asociacioni i Komunave të Kosovës uroi zgjedhjen e Fatmir Sejdiut President të Kosovës.

"Komunat e Kosovës përshëndesin zgjedhjen Tuaj për President të Kosovës duke të uruar suksese në punën Tuaj të shenjtë.

Ne si pushtet lokal i Kosovës jemi të thellë të bindur se me sukses do ta ndjekin rrugën historike që e trasoi Presidenti i ndjerë i Kosovës Dr.Ibrahim Rugova për njohjen e Pavarësisë së Kosovës", thuhet në urimin e AKK të nënshkruar nga Ismet Beqiri kryetar, dhe ritheksojnë përkushtimin e tyre për të bashkëpunuar ngushtë me Presidencën e Kosovës.

Ndërkaq në urimin e Degës së LDK së në Gjermani theksohet:

"Anëtarët dhe simpatizantët e LDK së në Gjermani gjatë ditëve të kaluara krahas dhembjes për Presidentin e tyre historik, dr. Ibrahim Rugovën, me vëmendje e përcollën ecurinë për zgjedhjen e presidentit të ri të vendit dhe që nga propozimi që në këtë funksion të zgjedhet prof. dr. Fatmir Sejdiu e përkrahen fuqishëm këtë propozim të bindur se dr. Sejdiu është mjaft i denjë që të kryejë këtë detyrë dhe obligim të madh shtetëror e kombëtar".

"Deputetët e Kuvendit të Kosovës në seancën e sotme konfirmuan vullnetin e LDK së, si partia më e madhe e vendit që kandidati i saj, dr. Fatmir Sejdiu të jetë president i Kosovës.

 

Dega e LDK së në Gjermani e përshëndet këtë akt të të zgjedhurve të popullit, të cilët miratuan një vendim historik që pas strategut tonë dr. Ibrahim Rugovës si president i dytë i Kosovës të jetë njëri prej nismëtarëve të LDK së dhe të procesve demokratike në Kosovë dhe njëherit bartës i titujve të lartë shkencor e universitar.

Kryesia e Degës së LDK së në Gjermani uron deputetët e Kuvendit të Kosovës për kryerjen e obligimit të tyre kushtetues.

 

 

Nga një shpërthim bombe në Bagdad vriten të paktën 11 persona

 

Bagdad, 10 shkurt 2006 – Një bombë ka shpërthyer sot (e premte) në Bagdad dhe për rrjedhojë janë vrarë të paktën 11 persona dhe janë plagosur edhe 38 të tjerë, kanë bërë të ditur mjekët e spitalit Jarmuk, njofton Rojter. Ndërkaq, policia ka thënë se kanë njoftim për tetë të vdekur dhe 28 të plagosur nga një shpërthim në distriktin Doura në jug të Bagdadit.

 

 

Persona të armatosur kanë rrëmbyer imamin e një xhamie sunite në Bagdad

 

Bagdad, 10 shkurt – Persona të armatosur, të maskuar me uniforma të armatës irakiane, kanë rrëmbyer imamin e një xhamie sunite në shtëpinë e tij në Bagdad, ka bërë të ditur sot (e premte) Ministria e brendshme, njofton Rojter.

 

Rrëmbimi ndodhi në rrjedhën e sulmeve kundër klerikëve, të cilat kanë ngritur tensionet sektare. Adel Halil Davudin, imam xhamisë Al-Nuami, e kanë rrëmbyer mbrëmë vonë në shtëpinë e tij në lagjen Karada 16 persona të armatosur, thotë zyrtari i kësaj ministrie.

 

 

Maleizia mban në arrest të paktën 3 anëtarë të një celule vetëvrasësish të Al Kaidës

 

Islamabad, 10 shkurt 2006 – Maleizia po mban në arrest të paktën tre anëtarë të një celule vetëvrasësish të Al Kaidës, që presidenti amerikan Xhorxh Bush thotë se kanë planifikuar të kryejnë një sulm të ngjashëm në Los Angjelos me atë të 11 shtaorit, ka bërë të ditur një zyrtar, që njeh rastin, njofton Rojter.

 

Komploti për rrëmbimin e një aeroplani, fluturimin dhe sulmin e tij në ndërtesën me të lartë në Los Angjelios ishte planifikuar një muaj pas sulmeve të vitit 2001 në Nju Jork dhe Uashingon, por ishte zbuluar dhe ishte penguar në fillim të vitit 2002, ka thënë presidenti Bush.