Vitin e kaluar në komunën e Prishtinës janë kthyer 22 familje të komuniteteve

Vitin e kaluar në komunën e Prishtinës janë kthyer 22 familje të komuniteteve

Prishtinë, 9 shkurt 2006 /TN /QIK - Në Asamblenë komunale të Prishtinës u mbajt takimi i Grupit Punues për Kthim, të cilën e udhëhoqi kryetari i Prishtinës, Ismet Beqiri, ndërsa morën pjesë edhe Ismail Ylmaz, përfaqësues i UNMIK ut në Komunën e Prishtinës, Shefki Gashi, zëvendëskryetar dhe anëtarët e Grupit Punues të të gjitha komuniteteve.
Kreu i Prishtinës, Ismet Beqiri foli gjerësisht për gjendjen aktuale në Komunën e Prishtinës, por edhe për prioritetet, të cilat këtë vit i ka përcaktuar Komuna e Prishtinës për kthimin e njerëzve në pronat e tyre.
Në takimi e sotëm, anëtarëve të Grupit Punues Komunal për Kthim iu dorëzua drafti, i cili pritet të plotësohet nga anëtarët e këtij Grupi, me ç'rast në mbledhjen e radhës së Asamblesë komunale të Prishtinës pritet të miratohet strategjia komunale për kthim të të zhvendosurve në vitin 2006. Po ashtu në takimin e sotëm u mor vendim për themelimin e tri grupeve punuese, të cilat do të merren me punët rreth kthimit të të zhvendosurve në zonat urbane.
Në takimin e sotëm, anëtarët e Grupit Punues për Kthim u informuan edhe rreth përgatitjeve, të cilat po bëhen për ngritjen e një kompleksi banesor në Graçanicë, në të cilin do të vendosen familjet që janë raste sociale, por edhe të kthyerit. U njoftua po ashtu se procedurat janë në përfundim e sipër, ndërsa në mbledhjen e ardhshme të Asamblesë do të merret vendim për ndarjen e lokacionit për ndërtimin e këtij kompleksi banesor.
Mustafë Neziri, zyrtar për kthim në Komunën e Prishtinës, i njoftoi të pranishmit se gjatë të vitit të kaluar në Komunën e Prishtinës janë kthyer 11 familje serbe me 41 anëtarë, 10 familje të komunitetit ashkali me 54 anëtarë dhe 1 familje boshnjake me 4 anëtarë.