Në Herticë të Podujevës u varros kryetari i Nëndegës së LDK-së Sahit Llalloshi

Në Herticë të Podujevës u varros kryetari i Nëndegës së LDK-së Sahit Llalloshi

9 shkurt 2006 /TN
Ai e përjetoi shumë rëndë vdekjen e Presidentit Rugova, por mbeti i vendosur që të vazhdohet rruga e tij për realizimin e pavarësisë

Sahiti e ka pasur kullën e tij të hapur gjithëmonë, për të gjithë: hallegjinjtë e nevojtarët, por edhe ata që duke bashkëpunuar me të, po i vënin themelet e shtetit të ardhshëm të Kosovës. Shtëpia e tij, por edhe fshati që ai e organizoi aq suksesshëm u bënë strehë për të dëbuarit nga shtëpitë e tyre, por edhe sofër për luftëtarët e lirisë dhe UÇK-në, deklaroi kryetari i Degës së LDK-së Agim Veliu

Në vendlindjen e tij në fshatin Herticë të komunës së Podujevës, dje u varros kryetari i Nëndegës së LDK-së Sahit Llalloshi i cili një ditë më parë ndërroi jetë derisa kishte shkuar të marrë pjesë në përcjelljen e fundit të babait të dëshmorit të kombit Zahir Pajazitit, bacës Qerim.

Në këtë ceremoni mortore përveç familjarëve, bashkëqytetarëve të Llapit, morën pjesë edhe kryetari i Degës së LDK-së i Podujevës dhe Ministër i arsimit, shkencës e teknologjisë Agim Veliu, deputeti i Parlamentit të Kosovës Ilaz Pireva, udhëheqja komunale e Podujevës e prirë nga kryetari Agim Kikaj si dhe shumë bashkëveprimtarë e bashkëpunëtorë të LDK-së nga i gjithë Llapi.

“Është shumë rëndë të thuhet fjala në këso ndjesi dhembjeje e pikëllimi për njerëzit si Sahit Llalloshi” tha në fillim të fjalës së tij kryetari i degës së LDK-së Agim Veliu. Ai tha se Sahiti hyri në jetën publike me LDK-në, partinë e parë antikomuniste dhe nacional demokratike duke pasuar kështu idealet e njerëzve si Mulla Ram Govori dhe NDSH-istët tjerë të Herticës, Llapit e të Kosovës.

Sipas z. Veliu, Sahit Llalloshi me LDK-në u zhvillua në një prijës të vendosur, që e karakterizuan njerëzorja dhe kombëtarizmi prej një njeriu plisbardhë, virtyte këto që e bënë aq të dashur jo vetëm në Herticë e Llap, jo vetëm ndër bashkveprimtarët e Tij, por tek të gjithë, pa dallim moshe. Veliu theksoi se Sahiti, për dy mandate ka qenë zv. kryetar i Nëndegës së LDK-së në Herticë, kurse si veprimtar i përkushtuar për lirinë dhe pavarësinë e Kosovës, në mandatin e fundit u zgjodh kryetar, funksion që e ushtroi deri në fund të jetës.

“Sahiti e ka pasur kullën e tij të hapur gjithëmonë, për të gjithë: hallegjinjtë e nevojtarët, por edhe ata që duke bashkëvepruar e bashkëpunuar me të, po i vënin themelet e shtetit të ardhshëm të Kosovës.

Shtëpia e tij, por edhe fshati që ai e organizoi aq suksesshëm u bënë strehë për të dëbuarit nga shtëpitë e tyre, por edhe sofër për luftëtarët e lirisë dhe UÇK-në”, pohoi Veliu për të shtuar që Sahit Llalloshi, pas luftës, me plot meritë dhe dinjitetshëm u bë anëtar i Kuvendit të komunës, përbërjes së parë të Podujevës së lirë, nën LDK-në-partinë që ai e ndjeu dhe i shërbeu sikur atdheut dhe lirisë.

Duke folur për angazhimin e shumanshëm të z. Llalloshi, kryetari Veliu tha se AI e deshti shumë pavarësinë e Kosovës, vendlindjes i dha aq shumë por e donte edhe më të përparuar, me rini të shëndetshme e shkollë shqipe për të cilën punoi me përkushtim prindor, njerëzor e kombëtar.

“Sahiti apo si e quanim ne miqtë me respekt, Plisi, u angazhua serizoisht dhe me përkushtim për përmirësimin e mirëqenies jo vetëm të kësaj ane, për ndërtimin e institucioneve demokratike, për Kosovën e pavarur dhe ardhmërinë e ndritshme për fëmijët tanë!”, deklaroi Veliu para qindra të pranishmëve. Ai tha se kjo ndarje e pazakonshme me mikun dhe bashkëveprimtarin Sahit Llalloshi, nuk është fjala e lamtumirës për Ju familje e nderuar por kurr as për ne dhe LDK-në e Kosovën!

Një biografi të shkurtër për jetën dhe veprën e Sahit Llalloshit e paraqiti Skender Haxhiu. “Sahiti u lind më 29 korrik 1954 dhe u rrit në një familje të varfër. Falë punës së tij të palodhshme ai i siguroi familjes një jetë solide duke punuar në mërgim, por me shpirtin e tij bujar, në kohët më të vështira për shqiptarët e Kosovës, ai u angazhua me tërë qenien duke sakrifikuar shëndetin, pasurinë dhe jetën për lirinë dhe pavarësinë e Kosovës”, tha ndër të tjera z. Haxhiu.

Sipas tij Sahiti që në fillim të krijimit të LDK-së u bë bartës i veprimeve dhe organizimit të fshatit, por edhe i luftës për liri e pavarësi. Haxhiu, duke folur për figurën atdhetare të Sahit Llalloshit tha se vdekjen e Presidentit Rugova e përjetoi shumë rëndë, por mbahej burrërisht duke porositur që të vazhdohet rruga e trasuar nga Presidenti i parë i Kosovës dhe që amanetin e tij ta realizojmë siç e kishte projektuar Ibrahim Rugova.

Në emër të nxënësve dhe personelit arsimor të shkollës fillore të fshatit, një fjalë rasti e mbajti drejtori i kësaj vatre arsimore Ali Sfishta i cili përkujtoi angazhimet e Sahitit për organizimin e shkollës së pavarur shqipe. “Mbijetesa e shkollës sonë, sfidat dhe sukseset, janë ngushtë të lidhura me emrin dhe veprën e Sahit Llalloshit”, tha ndër të tjera Sfishta.

Kurora lulesh mbi varrin e kryetarit të Nëndegës së LDK-së të Herticës vunë Dega e LDK-së e Podujevës, udhëheqja e Kuvendit komunal, kryetarët e 19 Nëndegëve të LDK-së në Llap si dhe familja, bashkëveprimtarët dhe nxënësit e mësimdhënësit e shkollës.