Ministri Veliu priti udhëheqjen komunale të Prishtinës

Ministri Veliu priti udhëheqjen komunale të Prishtinës

9 shkurt 2006 /TN

MASHT dhe udhëheqja komunale e Prishtinës do të vazhdojnë realizimin e projekteve të përbashkëta

Ministri i MASHT Agim Veliu dhe udhëheqja komunale e Prishtinës u dakorduan për vazhdimin dhe thellimin e bashkëpunimit në të ardhmen, jo vetëm për realizimin e projekteve të përbashkëta infrastrukturore, por edhe për çështje tjera me interes

Agim Veliu, Ministër i Arsimit, Shkencës e Teknologjisë, priti sot në takim pune udhëheqjen komunale të komunës së Prishtinës të prirë nga kryetari Ismet Beqiri. Në takim mori pjesë edhe Kryeshefi i Ekzekutivit Sami Hamiti dhe drejtori i Drejtorisë komunale të arsimit Rrustem Buzhala si dhe Drejtoresha e Deparatmentit të Infrastrukturës e MASHT, znj. Fadile Dyla.

Ministri Veliu duke i dëshiruar mirëseardhje udhëheqjes së kryeqytetit theksoi nevojën e bashkëpunimit dhe të bashkërendimit të punëve dhe projekteve të përbashkëta me interes për qytetarët e komunës së Prishtinës. “MASHT dhe unë personalisht jemi të përkushtuar që kryeqytetit të vendit t’i kushtojmë gjithë vëmendjen dhe kujdesin institucional që bashkërisht me udhëheqjen e komunës të vazhdojmë realizimin e prioriteve në fushën e arsimit, ato që përmirësojnë mirëqenien e qytetarëve të Prishtinës”, i deklaroi Ministri Veliu udhëheqjes komunale të Prishtinës.

Kryetari i komunës së Prishtinës Ismet Beqiri paraqiti preokupimet dhe nevojat që ka kryeqyteti në fushën e arsimit si dhe shprehu gatishmërinë për thellimin e bashkëpunimit me MASHT-in dhe Ministrin Veliu me të cilin kanë bashkëpunim të përhershëm. Beqiri në vazhdim të takimit shprehu brengat dhe shqetësimet që ka KK i Prishtinës të cilat kanë të bëjnë me zhvillimin e infrastrukturës së arsimit duke përmendur prioritetet dhe nevojat si: shkolla e re në Mat, ajo në fshatin Llukar, pastaj për nevojën e një shkolle në Lagjen e spitalit, Gjimnazin ”Xhevdet Doda”, etj.

Në bisedime u kyqën edhe Kryeshefi i komunës së Prishtinës Sami Hamiti dhe drejtoresha për infrastrukturë e MASHT Fadile Dyla që këmbyen ide dhe modalitete bashkëpunimi që mundësojnë përballimin e disa sfidave dhe probleme që janë paraqitur.

Znj. Dyla theksoi nevojën për bashkërendimin e punëve me organet komunale të kryeqytetit, sidomos për realizimin e projekteve si ai i objektit të ri të Akademisë së Shkencave dhe Arteve të Kosovës, pastaj të objektit të ri të MASHT-it, etj, ku janë paraqitur disa pengesa që mund të zgjidhen bashkërisht. Dyla tha se MASHT ka për qëllim koordinimin e veprimeve institucionale në mënyrë që të përfiton arsimi dhe institucionet shkencore e akademike në kryeqytet, por nga ana tjetër që gjithçka të jetë në përputhje me planin rregullativ të Prishtinës dhe projektet e komunës.

Sami Hamiti premtoi zgjidhjen e çështjes së pengesave të cilat po pengojnë punët në projektet e lartcekura të MASHT-it si dhe u arrit pajtueshmëri e plotë për ndarjen e trojeve për realizimin e projekteve siç është Fakulteti i ri i Edukimit, një konvikt i ri për studentë, Gjimnazi “Xhevdet Doda”, etj. Drejtori i drejtoratit për arsim Rrustem Buzhala theksoi nevojat dhe prioritetet për vitin vijues si dhe për vështirësitë që mund të lindin për klasën e XIII.

Ministri i MASHT Agim Veliu dhe udhëheqja komunale e Prishtinës u dakorduan për vazhdimin dhe thellimin e bashkëpunimit në të ardhmen, jo vetëm për realizimin e projekteve të përbashkëta infrastrukturore, por edhe për çështje tjera me interes.