|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Lajmet e ditës

9 shkurt 2006 /TN /QIK

• Sejdiu angazhohet për njohjen ndërkombëtare të Kosovës, ashtu siç ka insistuar Presidenti Rugova

• Presidenti i ri i Kosovës zgjidhet nesër në ora 11.00

• Biografia e Fatmir Sejdiut

• Ministri i Jashtëm i Hungarisë, Ferenc Shomogji, viziton Kosovën dhe hap Zyrën e ndërlidhjes

• Sh.Lene: BE në të ardhmen duhet të marrë një pjesë të përgjegjësive të ndërkombëtarëve në Kosovë

• Kryeministri Kosumi takoi ambasadorin e Rusisë në Beograd

• Në Prishtinë po i zhvillon punimet Konferenca dyditore për përfshirjen në arsimin e lartë

• Bullgaria do të mbështesë çdo zgjidhje të statusit të Kosovës që është e pranueshme për të gjithë

• Turqia premton ndihmën e mëtejshme për Kosovën në lëmin e shëndetësisë

• "Noje cyrhrer cajtung": "Të vërtetat e pakëndshme për Serbinë"

• PSDK së dhe IRDK janë pro Fatmir Sejdiut për president të vendit

• Shiten 14 ndërrmarrje shoqërore për 8.7 milionë euro

• Kryesia e Kuvendit sot pritet të caktojë seancën për zgjedhjen e Presidentit të Kosovës

• Petersen serbëve: "Pikëpamja e shumicës është absolutisht e rëndësishme për statusin përfundimtar të Kosovës"

• Kryeministri Kosumi lavdëron udhëheqjen e Lipjanit për rezultatet dhe progresin e madh në këtë komunë

• Autosdrada Prishtinë - Durrës të emërtohet "Ibrahim Rugova", propozojnë bashkatdhetarët tanë në Austri

• Berisha e Pribe: Marrëveshja për stabilizim asociim është dita e madhe europiane e Shqipërisë

• Shqipëria ka firmosur dokumentin që i prin nënshkrimit zyrtar të Marrëveshjes së Stabilizim Asociimit me BE në

• Arrestohet ish-ndihmësi i Mladiqit gjatë kohës së luftës

• Policia shqiptare arreston 2 persona lidhur me incidentin e djeshëm me autobusin e pasagjerëve

Sejdiu angazhohet për njohjen ndërkombëtare të Kosovës, ashtu siç ka insistuar Presidenti Rugova

 

Prishtinë, 9 shkurt 2006 - Anëtari i Kryesisë së Kuvendit të Kosovës, Fatmir Sejdiu, priti sot drejtorin e Bordit të ICG së, Morton Abramovic (Abramowitz), i cili shoqërohej nga Pol Uiliams, drejtor i Programit për trajnime për negociata. Në takim u diskutua rreth zhvillimit të proceseve aktuale për statusin përfundimtar të Kosovës.

Zoti Sejdiu me këtë rast shprehu falënderime për angazhimet e deritanishme të z. Abramovic dhe të z. Uiliams për Kosovën, në aspektin e përshpejtimit të proceseve për njohjen ndërkombëtare të saj, si dhe për përkushtimin e mëtejmë të tyre në drejtim të realizimit të pavarësisë së Kosovës dhe ndërtimit të shoqërisë demokratike.

Fatmir Sejdiu u angazhua për njohjen ndërkombëtare të Kosovës, ashtu siç ka insistuar me këmbëngulje Presidenti Rugova. Në këtë frymë ai çmoi lart edhe angazhimet e bashkësisë ndërkombëtare, që ky proces të përfundojë në pajtim me vullnetin e popullit të Kosovës.

 

 

Presidenti i ri i Kosovës zgjidhet nesër në ora 11.00

 

Prishtinë, 9 shkurt 2006 - Presidenti i ri i Kosovës zgjidhet nesër (e premte) në orën 11.00 në një mbledhje solemne, vendosi sot Kryesia e Kuvendit të Kosovës, bëri të ditur kryekuvendari Nexhat Daci.
Ai tha se është pranuar unanimisht kërkesa e grupeve parlamentare për mbajtjen e mbledhjes solemne nesër, ndërsa takimin e sotëm të kryesisë e ka quajtur normal.

"Unë i luta që të reflektohet ky unitet i treguar në mbledhje të kryesisë në seancën solemne nesër", tha prof.Daci.
Ai tha se politika kosovare gjendet në një sfond të përbashkët me bashkësinë ndërkombëtare, ndërsa mohoi se i është bërë presion nga LDK-ja për caktimin e seancës për ditën e nesërme, pasi dy ditë më parë kryesia kishte vendosur që seanca të mbahet të hënën.

"Besoj e dini se nuk bëjnë punën presionet në mua; nuk kam pasur presion as nga LDK-ja", tha Daci, duke theksuar demokracinë e brendshme të LDK-së. "LDK-ja është shumë në rregull"!.

Kandidat për president të vendit aktualishtë është vetëm prof.dr.Fatmit Sejdiu, i propozuar nga Kryesia e LDK-së zyrtarisht të martën, ndërsa kjo kandidaturë është mbështetur nga partneri i koalicionit të saj, AAK-ja, Grupi 6 plus dhe Ora. Ndërsa, që ende PDK-ja nuk ka vendosur nëse do të dalë me kundërkandidat.

Kryesia e Kuvendit në këtë takim ka diskutuar edhe ndarjen e mjeteve financiare për parti politike, për të cilën gjë kryekuvendari Daci tha se është përfillur kërkesa e grupeve politike minore dhe minoritare, duke hequr dorë partitë e mëdha parlamentare nga një "shumë substanciale" e mjeteve që u takonin.

 

Ndërsa, kërkesa e partisë opozitare Ora, për vazhdimin e seancës së mbetur të janarit, është vendosur të përgjigjet komisioni për Çështje Legjislative dhe Kornizë Kushtetuese.

 

 

Biografia e Fatmir Sejdiut

 

Prishtinë, 9 shkurt 2006 - Fatmir Sejdiu u lind më 23 tetor 1951 në Pakashticë, komuna e Podujevës, Kosovë. Shkollimin fillor dhe të mesëm i ka mbaruar në Podujevë.

 

Ka mbaruar Fakultetin e Drejtësisë në Universitetin e Prishtinës më 1974, ku ka kryer edhe studimet pasuniversitare. Po në këtë Universitet ka mbrojtur disertacionin e doktoratës.

Dr. Fatmir Sejdiu është profesor në Fakultetin Juridik dhe atë të Shkencave Politike të Universitetit të Prishtinës.

Për studime të thelluara, Prof. Sejdiu ka qëndruar në Francë (Universiteti Paris 2 ) dhe në SHBA (Arizona State University), ndërsa ka pasur qëndrime më të shkurtra studimore edhe në universitete të tjera. Ka marrë pjesë në shumë simpoziume shkencore vendore dhe ndërkombëtare. Ka publikuar shumë punime shkencore nga fusha juridike - historike dhe juridike kushtetuese. Është autor librash të veçantë nga këto fusha.

Fatmir Sejdiu ka qenë pjesëmarrës i Kuvendit themelues të Lidhjes Demokratike të Kosovës (LDK) më 23 dhjetor 1989. Në Kuvendin e Parë Zgjedhor në vitin 1991 është zgjedhur anëtar i Këshillit të Përgjithshëm dhe më 1992 anëtar i Kryesisë së LDK së, ndërsa më 1994 Sekretar i Përgjithshëm i LDK së, detyrë të cilën e kryen edhe sot.

Ka qenë anëtar i Komisionit Qendror për organizimin e Referendumit për Pavarësinë e Kosovës, mbajtur më 1991. Ka qenë ndër njerëzit kryesorë për përgatitjen dhe organizimin e zgjedhjeve parlamentare dhe presidenciale të Republikës së Kosovës, që janë mbajtur më 1992 dhe 1998.

Fatmir Sejdiu është zgjedhur deputet në Kuvendin e Republikës së Kosovës më 1992 dhe më 1998. Po kështu, më 1998 është zgjedhur Sekretar i Përgjithshëm i Kuvendit dhe kryetar i Komisionit për Çështje Kushtetuese.

Më 2001, në zgjedhjet e para demokratike të pasluftës, është zgjedhur deputet në Kuvendin e Kosovës dhe anëtar i Kryesisë së Kuvendit. Deputet dhe anëtar i Kryesisë së Kuvendit është zgjedhur sërish më 2004. Z. Sejdiu është gjithashtu anëtar i Komisionit për Bashkëpunim Ndërkombëtar dhe Integrime Euroatlantike.

Fatmir Sejdiu komunikon në frëngjishte dhe anglishte.

Eshtë i martuar dhe ka tre fëmijë. Jeton në Prishtinë.

 

 

Ministri i Jashtëm i Hungarisë, Ferenc Shomogji, viziton Kosovën dhe hap Zyrën e ndërlidhjes

 

Budapest, 9 shkurt 2006 – Ministri i jashtëm i Hungarisë, Ferenc Shomogji (Somogyi), do të vizitojë Kosovën javën e ardhshme, ka bërë të ditur një zyrtar i lartë i Ministrisë së jashtme, njofton agjencia hungareze e lajmeve MTI.

 

Kjo vizitë bëhet në kohën kur po zhvillohet mendimi serioz për të ardhmen e Kosovës dhe procesi i vendimmarrjes po lëvizë përpara, thuhet në kumtesën e Ministrisë së Jashtme hungareze.

Hungaria ka marrë pjesë në përpjekjet për zgjidhjen situatës në Kosovë nëpërmjet takimit dhe bisedave në janar me liderin e Misionit të Kombeve të Bashkuara, Soren Jesen Petersen, në Budapest, që do të vazhdohet edhe gjatë turneut në Prishtinë.

Në Kosovë, Shomogji pritet të takohet me kryetarin e Kuvendit të Kosovës, Nexhat Dacin, kryeministrin Bajram Kosumi dhe liderin e serbëve të Kosovës, Oliver Ivanoviq.

Shomogji zyrtarisht do të hapë zyrën ndërlidhëse hungareze në Prishtinë gjatë vizitës së tij. Në këtë turne, Shomogji do të vizitojë edhe Beogradin, ku pritet të takohet me udhëheqjen më të lartë të së Unionit Serbi-Mali i Zi.

 

 

Sh.Lene: BE në të ardhmen duhet të marrë një pjesë të përgjegjësive të ndërkombëtarëve në Kosovë

 

Beograd, 9 shkurt 2006 - Bashkimi Evropian në të ardhmen duhet të marrë përsipër një pjesë më të madhe të përgjegjësive të bashkësisë ndërkombëtare në Kosovë, para së gjithash duke marrë parasysh zhvillimin ekonomik të saj.

 

Kështu është shprehur në një takim sot në Beograd me kryeministrin serb Vojisllav Koshtunica, përfaqësuesi i BE-së në bisedimet për statusin e Kosovës Shtefan Lene.

Nga ana e tij Koshtunica cotohet të ketë thënë se Beogradi pret i gatshëm fillimin e bisedimeve direkte për statusin e Kosovës, duke i nisur nga dokumentet e Këshillit të Sigurimit të KB, Sekretarit të Përgjithshëm të KB dhe Grupit të Kontaktit.

Koshtunica ka thënë se përgatitjet për bisedimet i vështirësojnë qëndrimet individuale të disa anëtarëve të Grupit të Kontaktit, me të cilat prejudikohet statusi i ardhshëm i Kosovës.

 

 

Kryeministri Kosumi takoi ambasadorin e Rusisë në Beograd

 

Prishtinë, 9 shkurt 2006 - Kryeministri i Kosovës, Bajram Kosumi, sot pati një takim me z. Aleksander Aleksejev, ambasador i Rusisë në Beograd, i shoqëruar nga shefi i Zyrës ruse në Prishtinë, Sergej Bezdnikin dhe Sergej Struk, drejtor i kompanisë Gass Prom. Në takim mori pjesë edhe ministri i Energjetikës dhe Minierave, Ethem Çeku.

Në këtë takim u bisedua për zhvillimet aktuale politike në Kosovë dhe mundësitë e bashkëpunimit ekonomik midis Kosovës dhe Federatës Ruse.

Kryeministri Kosumi ka informuar diplomatët rusë për shumë aspekte të punës së ekzekutivit kosovar, respektivisht me procesin negociues për definimin e statusit final të Kosovës, duke shtuar se pala kosovare angazhohet për krijimin e një shteti demokratik evropian.

Në këtë kontekst, kryeministri Kosumi ka vlerësuar rolin e Rusisë në takimin e fundit të Grupit të Kontaktit në Londër dhe ka shtuar se Deklarata nga takimi i fundit në Londër ka qartësuar edhe më shumë rrugën drejt definimit të statusit të ardhshëm të Kosovës.

Bashkëbiseduesit janë pajtuar se ekzistojnë mundësi të mira që të rritet bashkëpunimi ekonomik dhe tregtarë midis dy vendeve. Kryeministri Kosumi ka thënë se Qeveria e Kosovës ka hartuar një infrastrukturë ligjore për inkurajimin dhe garantimin e investimeve e huaja. Në këtë kontekst, Kosumi mirëpriti interesimin e investitorëve dhe biznesmenëve nga federata ruse.

 

 

Në Prishtinë po i zhvillon punimet Konferenca dyditore për përfshirjen në arsimin e lartë

 

Prishtinë, 9 shkurt 2006 - Në praninë e mbi 100 pjesëmarrësve, sot në hotelin "Grand" në Prishtinë i filloi punimet Konferenca dyditore për gjithëpërfshirjen në arsimin e lartë, e organizuar nga Projekti për Aftësimin e Mësimdhënëve në Kosovë (KEDP), i financuar nga Agjencioni Kanadez për Zhvillim Ndërkombëtar (CIDA) dhe Programin Finlandez për Mbështetjen e Zhvillimit të Sektorit të Arsimit në Kosovë II.

Qëllimi i i Konferencës është të përkrahë bashkëpunimin vendor në Arsimin e Lartë dhe të avancojë njohuritë në fushat e arsimit të lartë, gjithëpërfshirjes dhe barazisë gjinore. Dr. Suzan Hatën nga KEDP dha një historik të shkurtër lidhur me arsimin gjithëpërfshirës në përgjithësi.

Në emër të ministrit Agim Veliu dhe të MASHT, zëvendësministri Fevzi Berisha theksoi se MASHT gjatë vitit 2005 ka shënuar hapa konkret lidhur me temat që sot po trajtohen dhe që janë shndërruar e kuptuar si standarde e vlera, të cilat përveç që përparojnë sistemin e arsimit të lartë, e bëjnë shoqëri më të qëndrueshme demokratike shoqërinë kosovare.

 

Z. Berisha tha se respektimi i të drejtave të fëmijëve, përkatësisht studentëve, krijimi i qendrave burimore më qëllim të integrimit të nxënësve me nevoja të veçanta përkrah kolegëve të tyre edhe në studime, krijimi i hapësirës për studime sidomos për integrim gjinor, kanë shënuar progres ne periudhën e fundit.

Përparime të prekshme që provojnë përkushtimin e MASHT për të shënuar hapa të vendosur në drejtim të drejtave të fëmijëve, gjithë përfshirjes dhe perspektivës gjinore janë edhe: Java e Arsimit për të gjithë, përpilimi i Strategjisë për përfshirjen e perspektivës gjinore, Festivali: Edukos, e sidomos nisja e procesit të hartimit të Strategjisë për arsimin parauniversitar.

Dr. Halim Hyseni nga Qendra për Arsim e Kosovës (KEC), foli lidhur me të drejtat e fëmijës, me ç'rast përmendi disa prej të arriturave në Kosovë nga viti 1999 e këtej. Nuk ka konflikte të bazuar në identitete etnike, tha ai, është rritur ndikimi i shoqërisë civile, është miratuar një numër i konsideruar i ligjeve me të cilat mbrohen të drejtat e njeriut, është formuar Forumi për të drejtat e fëmijës.

Gjatë punimeve të Konferencës të pranishmit u ndanë në tri seanca paralele mbi arsimin gjithëpërfshirës si dhe mbi të drejtat e fëmijës të cilat u udhëhoqën nga ekspertët: dr. Demë Hoti, mr. Linda Salihu, mr. Naser Zabeli, Tom Gougeon, Merita Shala, Lulavere Kadriu.

Një fjalë rasti e mbajti edhe Mr. Marja Matero nga FSDEK. Konferenca do të vazhdojë punimet edhe ditën e nesërme ku do jepen vlerësimet dhe vërejtjet për ditën e parë, ndërsa në seancat paralele do të shqyrtohet çështja e barazisë gjinore.

 

 

Bullgaria do të mbështesë çdo zgjidhje të statusit të Kosovës që është e pranueshme për të gjithë

 

Prishtinë, 9 shkurt  2006 - Ministri i Punëve të Brendshme të Bullgaria Rumen Petkov tha se vendi i tij do të mbështesë atë zgjidhje të statusit të Kosovës, e cila do të ishte e pranueshme për të gjithë dhe se kjo zgjidhje duhet të jetë afatgjate.

Pas takimit sot në Prishtinë me kryeadministratorin Soren Jesen Petersen, Petkov tha se në Kosovë kishte ardhur për të rishqyrtuar pozitën e kontingjentit të policisë bullgare, e cila vepron në kuadër të policisë së UNMIK ut. Sipas tij, varësisht nga ndryshimet që pritet të bëhen në statusin e policisë së UNMIK ut, qeveria bullgare do të marrë vendime me kohë rreth pjesëmarrjes së pjesëtarëve të saj në këtë proces.

Megjithatë, ministri bullgar tha se vendi i tij do t'i përgjigjet pozitivisht kërkesës së misionit të Kombeve të Bashkuara për plotësimin e kontingjentit të policisë bullgare në Kosovë, i cili aktualisht ka 52 pjesëtarë. Megjithëse, siç tha, kjo do të varet edhe nga mundësitë financiare.

Duke folur për qëndrimin e shtetit bullgar ndaj statusit të Kosovës, ministri Petkov tha se qeveria e tij mbështet atë zgjidhje që do të kënaqte të gjithë.

"Bullgaria është shumë e interesuar që të arrihet stabiliteti në rajon duke përfshirë edhe stabilitetin e Kosovës. Është e qartë që një zgjidhje, e cila do të acaronte grupet e ndryshme nuk është e arsyeshme. Pra zgjidhja e statusit duhet të garantojë paqe etnike dhe stabilitet, duhet të garantojë vlerat kulturore dhe historike të rajonit në tërësi, duhet të garantojë kthimin e të zhvendosurve nëse dëshirojnë të kthehen dhe kjo zgjidhje do t'i mundësojë Kosovës të marrë pjesë në procesin e përgjithshëm evropian".

Ministri i punëve të brendshme të Bullgarisë është takuar edhe me zëvendëskryeministrin e Kosovës, Adem Salihaj, me të cilin ka diskutuar edhe çështjen e vizave që Bullgaria mund të japë për kosovarët.
 
Zv/kryeministri Salihaj tha se ka kërkuar nga ministri Petkov që qeveria bullgare të krijojë lehtësira për qytetarët e Kosovës rreth marrjes së vizave bullgare.

 

Ai tha se do të ishte një kontribut për zhvillimin e mëtejshëm për zhvillimin e marrëdhënieve mes Kosovës dhe Bullgarisë. Qytetarët e Kosovës, tha Salihaj, nuk do të kishin nevojë të shkojnë në Shkup për të marrë vizë dhe se kjo do të krijonte një mundësi më të madhe të qarkullimit të qytetarëve të Kosovës në Bullgari.

Ministri Pektov tha se qeveria e tij do të shqyrtojë mundësinë e dhënies së vizave për kosovarët në zyrën e saj diplomatike në Prishtinë.

Ministri i Punëve të Brendshme të Bullgarisë ka marrë pjesë edhe në ceremoninë e ndarjes së medaljeve për pjesëtarë të kontingjentit bullgar të policisë, që UNMIK u ua ka ndarë atyre për kontributin e dhënë në ruajtjen e stabilitetit dhe paqes në Kosovë.

 

 

Turqia premton ndihmën e mëtejshme për Kosovën në lëmin e shëndetësisë

 

Ankara/Prishtinë, 9 shkurt 2006 - Sot në Ministrinë e Shëndetësisë së Turqisë në Ankara, u takuan ministri i Shëndetësisë së Kosovës Sadik Idrizi me bashkëpunëtorë me ministrin turk të Shëndetësisë Rexhep Akdag.

Takimi kaloi në frymën e bashkëpunimit dhe thellimit të marrëdhënieve të ndërsjella. Ministri i Shëndetësisë së Turqisë i premtoi Ministrit të Shëndetësisë së Kosovës se edhe më tej do të marrë përsipër shkollimin e kuadrit shëndetësor, një ndihmë të menjëhershme të një aparature ( një rezonancë magnetike) dhe ndihmat e tjera të mundshme që mungojnë në shëndetësinë e Kosovës.

 

Ministri Idrizi falënderoi homologun turk për ndihmën e vazhdueshme që bëri Turqia për Kosovën dhe mbështetjen që edhe tashmë i jep qytetarëve të Kosovës në lëmin e shëndetësisë.

 

 

"Noje cyrhrer cajtung": "Të vërtetat e pakëndshme për Serbinë"

 

Cyrih, 9 shkurt 2006 - Gazeta "Noje cyrhrer cajtung" (Neue Zürcher Zeitung) në artikullin e saj me titull "Të vërtetat e pakëndshme për Serbinë", shkruan për indinjimin serb ndaj pozicionimit të diplomatit britanik Xhon Sauers për Kosovën, i cili ka thënë se Londra përkrah pavarësinë e kushtëzuar të Kosovës.

Kjo ka ndodhur, shkruan gazeta, pas takimit të Grupit të Kontaktit ku u tha që të bihet dakord në një marrëveshje për Kosovën para fundit të vitit, si dhe që përfundimi i bisedimeve duhet të jetë i pranueshëm nga popullsia e Kosovës. "Megjithëse formulime të tilla janë të paqarta esenca e tyre është e qartë: 90 për qind e popullsisë 2 milionëshe të Kosovës është për ndarjen nga unioni serbomalazez".

Gazeta më tej shkruan se kritika ndaj diplomatit britanik në mediat serbe të lë përshtypjen e mungesës së sigurisë.

Ashtu si reagimet ndaj Ministres së Jashtme zvicerane dhe Presidentit slloven, edhe reagimi i tanishërm serb thotë se me shprehje të tilla kërkohet të vendoset përfundimi i bisedimeve.

Sipas kësaj gazete zvicerane, i dërguari amerikan Frank Uizner, i ka kërkuar Beogradit që t`i thotë të vërtetën popullit dhe ta bëjë të qartë se për shkak të politikës së Millosheviqit dhe të radikaleve serbë të Sheshelit, Serbia e ka humbur Kosovën.

 

 

PSDK së dhe IRDK janë pro Fatmir Sejdiut për president të vendit

 

Prishtinë, 9 shkurt 2006 - PSDK ja përshëndet vendimin e Kryesisë së LDK së për kandidimin e z. Fatmir Sejdiu për President të Kosovës.

 

Pa u ndalë shumë në biografinë e z. Sejdiu, për të cilën ka ç'të flitet, konsiderojmë së është një personalitet i qëlluar dhe që ka aftësi intelektuale dhe të karrierës për të qenë një udhëheqës i pranueshëm për të gjithë, thuhe në një komunikatë të Partisë Soialdemokratike të Koosvës.

"Mendojmë se LDK ja ka marrë një vendim shumë të rëndësishëm, në fazën kur pritet të fillojnë negociatat për përcaktimin e statusit të ardhshëm të Kosovës. Marrja e këtij vendimi në një kohë të shkurtër, pa zvarritje të proceseve, është një fillim i mbarë për të vazhduar pa ndalim rrugën për definimin e vullnetit të popullit të Kosovës".

PSDK ja beson se forcat politike në Kosovë do të bashkohen rreth interesit më sublim dhe do të vlerësojnë drejt momentin historik duke lënë anash interesat e ngushta të çfarëdo lloji. "Me zgjidhjen dhe fuqizimin e institucioneve tona dëshmohet vullneti dhe sigurojmë faktorët ndërkombëtar se është serioz orientimi i kësaj shoqërie për demokraci, pavarësi dhe prosperitet", thekson PSDK.

Edhe Iniciativa e Re Demokratikë e Kosovës (IRDK), në takimin e jashtëzakonshëm të Kryesisë së saj, ka diskutuar për kandidaturën e Fatmir Sejdiut për Presidentin e Kosovës. U vlerësua se Kandidati i LDK së Fatmir Sejdiu është një personalitet i çmuar dhe shumë i respektuar si nga shumica e popullatës ashtu edhe nga subjektet e ndryshme politike në Kosovë.

 

Fatmir Sejdiu me karakteristikat e veta është i aftë që të udhëheqë Kosovën në këtë kohë jashtëzakonisht kritike. Përfaqësuesi legjitim i komunitetit egjiptian të Kosovës IRDK ja vlerëson se, me Z. Sejdiun në Kosovë do të finalizohen ambiciet e pavarësisë dhe do të ecët përpara në procesin e zhvillimit demokratik.

IRDK ja, unanimisht ka vendosur që në seancën e radhës të Kuvendit të Kosovës me dy deputet e tij do të përkrah dhe do të votojë "pro" zgjedhjes së z. Sejdiu për President të Kosovës.

  

 

Shiten 14 ndërrmarrje shoqërore për 8.7 milionë euro

 

Prishtinë, 9 shkurt 2006 - Agjencia Kosovare e Mirëbesimit (AKM) ka shitur 14 ndërmarrje shoqërore të valës së dhjetë të privatizimit për mbi 8.7 milionë euro. Për privatizimin e ndërmarrjeve të rrethit të dhjetë të privatizimit pati gjithsej 93 oferta. Çmimin më të lartë prej 2 milionë euro, nga të gjitha ndërmarrjet e këtij rundi të privatizimit e ka fituar ndërmarrja "Rahoveci" në Rahovec.

Për Industrinë e Duhanit në Gjilan, e cila privatizohet me metodën spin-off special, një ofertues ka ofruar çmimin më të lartë - 1.4 milionë euro dhe investime të garantuara prej 5.6 milionë euro dhe punësimin e 799 punëtorëve.

Interesimi më i madh i investitorëve ishte për barnatoren popullore në Ferizaj, për të cilën ishin paraqitur 26 oferta.

Mexhit Merovci nga Mitrovica ka blerë restorantin "Parajsa" në Mitrovicë për 91 mijë euro. Mexhit Haxhimusa nga Ferizaj ka blerë "Stacionin e Veterinarisë" në Ferizaj për 240 mijë euro. Ndërsa kompania "Toni Komerc" ka blerë depon "IMB" në Vushtrri për 211 mijë euro.

Në këtë rreth të privatizimit për mbi 413 mijë euro, është shitur motel "Dardania" në Pejë, ndërmarrja "Krikos" në Prishtinë është shitur për mbi 485 mijë euro, derisa ndërmarrja "Energomontimi" në Prishtinë, për të cilën kishte shtatë oferta është shitur për 850 mijë euro.

Nga qyteti i Ferizajt, është shitur ndërmarrja "Autoremont" për 861 mijë euro, ndërmarrja Veglat dhe Aparatet për të cilën ishin 9 oferta, është shitur për 1.3 milionë euro, Barnatorja popullore në Ferizaj është shitur për mbi 613 mijë euro.

Gjashtë oferta ishin për ndërmarrjen "Standard" në Istog, fitues i përkohshëm i së cilës ishte investitori nën shifrën P37 i cili ofroi 411 mijë euro, për ndërmarrjen "Kaolini" ishin vetëm tri oferta dhe ajo u shit për 109 mijë euro.

Nga qyteti i Prizrenit ishte ndërmarrja "Liria - Nëna Tereza", e cila u shit për 250 mijë euro.

 

 

Kryesia e Kuvendit sot pritet të caktojë seancën për zgjedhjen e Presidentit të Kosovës

 

Prishtinë, 9 shkurt 2006 - Kryesia e Kuvendit të Kosovës mblidhet sot paradite dhe pritet që të anulojë vendimin e mëparshëm për shtyrjen e seancës për 13 shkurt. Në këtë mbledhje Kryesia pritet të vendosë që të premten të thirret seanca plenare e Kuvendit të Kosovës me pikën e vetme të rendit të ditës - zgjedhjen e Presidentit të Kosovës.

Tashmë janë pajtuar të gjitha grupet parlamentare që seanca për zgjidhjen e Presidentit të ri të Kosovës të thirret brenda javës, konkretisht për të premtën më 10 shkurt.

Pas kërkesave zyrtare të LDK së, AAK së, partisë Ora, si dhe Grupit 6 Plus, që përfaqëson komunitetet joserbe në Kuvend, mbrëmë edhe PDK ja është pajtuar që seanca të mos shtyhet për javën tjetër dhe ajo të mbahet gjatë javës. Vendimi i PDK së i është kumtuar dhe shefit të Misionit të Kombeve të Bashkuara në Kosovë, Soren Jessen Petersen nga një delegacion i kësaj partie i udhëhequr nga Jakup Krasniqi.

 

 

Petersen serbëve: "Pikëpamja e shumicës është absolutisht e rëndësishme për statusin përfundimtar të Kosovës"

 

Mitrovicë, 9 shkurt 2006 - Shefi i UNMIK-ut Soren Jesen Petersen, ka deklaruar dje në veri të Mitrovicës se procesi i përcaktimit të statusit të Kosovës mbështetet në dialog, se Rezoluta 1244 e KS do të jetë kornizë e vetme për negociata, por vendimi mbi statusin do të merret në bazë të rezolutës së re.

 

"Procesi i përcaktimit të statusit të ardhshem të Kosovës është duke rrjedhë, prandaj disa deklarata që po i dëgjojmë këto ditë po shkaktojnë shqetësim veçmas në zonat ku jetojnë bashkësitë minoritare", ka thënë Jesen Petersen në një konferencë për gazetarë, pas takimit me përfaqësuesit e serbëve të Kosovës.

Jessen Petersen u ka thënë serbëve se ekipi negociator i Kosovës është shumë serioz në përpjekjet për të përmirësuar pozitën e pakicave në Kosovë, përfshirë edhe pakicën serbe.

"Pikëpamja e shumicës është absolutisht e rëndësishme për statusin përfundimtar të Kosovës", është shprehur Jesen Petersen. duke mos dashur të komentojë se cili do të jetë rezultati përfundimtar i bisedave për statusin e Kosovës.

Tema e pashmangshme në bisedime me përfaqësuesit e serbëve ka qenë edhe furnizimi i mjediseve serbe me energji elektrike, ka thënë Jesen Petersen. Ai ka premtuar se do të inluencojë që situata e furnizimit me energji elektrike të liberalizohet".

Me Petersenin kanë biseduar anëtari i Ekipit negociator të Beogradit mbi statusin e Kosovës, Marko Jakshiq, kryetari i Këshillit Kombëtar Serb (SNV) Milan Ivanoviq dhe kryeshefi i rrethit të Mitrovicës, Miomri Kasalloviq.

 

"Çështja e energjisë elektrike është prioritare kurse kufiri i fundit nën të cilin serbët nuk do të shkojnë është futja e distributerit të dytë. Kemi kërkuar që serbët të kthehen në punë në Eelektroekonominë e Kosovës nga e cila janë dëbuar më 1999", ka thënë Jakshiq pas takimit. Përfaqësuesit e serbëve kanë theksuar se për ta është e papranueshme çfarëdo forme e pavarësisë së Kosovës.

Në Zveçan ku është mbajtur takimi, janë tubuar disa qindra serb, puntëror të elektroekonomisë, në protestën qetë duke kërkuar përgjigje në pyetjen kur do të kthehen në punë.

 

 

Kryeministri Kosumi lavdëron udhëheqjen e Lipjanit për rezultatet dhe progresin e madh në këtë komunë

 

Prishtinë, 9 shkurt 2006 - Kryeministri i Kosovës Bajram Kosumi, i shoqëruar nga bashkëpunëtorët, ka vizituar dje Kuvendin Komunal të Lipjanit, ku ka biseduar me udhëheqjen komunale, si dhe ka pasur një debat me këshilltarët komunalë e qytetarët në temën Kosova, negociatat dhe statusi final.

Kryetari i kuvendit komunal Xhevat Olluri dhe udhëheqja komunale kanë njoftuar Kryeministrin Kosumi për situatën dhe progresin në komunën e Lipjanit.

 

Ai ka potencuar të arriturat në zbatimin e standardeve, kthimin dhe integrimin e minoriteteve dhe lirinë e lëvizjes. Komuna, ka thënë z. Olluri, ka bërë një punë të mirë në fushën e ndërtimit të infrastrukturës, në kthimin e të zhvendosurve, lirinë e lëvizjes dhe integrimit të komuniteteve pakicë.

 

Ata janë përfshirë në të gjitha segmentet e administratës komunale. Mirëpo edhe më tutje ka disa shqetësime lidhur me çështjet e kthimit të banesave dhe të pronave të serbëve.

Kryeministri Kosumi ka lavdëruar udhëheqjen komunale për rezultatet e arritura dhe progresin e madh që është bërë në këtë komunë.

Kryeministri Kosumi me udhëheqjen komunale ka biseduar edhe për proceset aktuale në të cilat ndodhet Kosova. Ai me këtë rast ka thënë se Kosova po hyn në muajt më vendimtarë, në muajt kur do të vendoset për statusin final të Kosovës. Ky proces do të përmbyllet në vitin 2006, ashtu siç besojnë të gjithë, shtet i pavarur dhe sovran i Kosovës.

"Në Lipjan është ruajtur shoqëria me diversitete, është ruajtur fryma e shoqërisë shumetnike dhe kjo është një vlerë që ne e çmojmë shumë", ka pohuar kryeministri Kosumi. Ai ka inkurajuar udhëheqjen komunale që të ndihmojnë kthimin urban në Lipjan, kthimin e pronave, dhe kthimin e serbëve në pronat dhe shtëpitë e tyre.

Kosumi u bëri thirrje serbëve lokalë që të mos i frikësohen të ardhmes së Kosovës. Shteti i ardhshëm i Kosovës do të jetë i mirë si për shqiptarët ashtu edhe për serbët dhe të gjithë të tjerët pa dallim, tha Kosumi.

 

 

Autosdrada Prishtinë - Durrës të emërtohet "Ibrahim Rugova", propozojnë bashkatdhetarët tanë në Austri

 

Vjenë, 9 shkurt 2006 - Me pjesëmarrjen e një numri të madh të bashkatdhetarëve tanë në Vjenë dhe në organizim të Degës së LDK-së për Austri, dje u mbajt një tubim komemorativ në nderim të Presidentit të Kosovës Ibrahim Rugova.

Për jetën dhe veprën e Presidentit Rugova foli Prof. Dr. Skënder Gashi, ku e cilësoi lartë figurën e Tij.

Ishte shumë i dhimbshëm lajmi për vdekjen e Presidentit Dr. Ibrahim Rugova, u tha në këtë takim. Dr. Ibrahim Rugova do të kujtohet gjithmonë si Presidenti i parë historik i Kosovës, si vizionar e humanist i madh, ikonë e Pavarësisë së Kosovës, si një njeri i cili i vuri themelet e shtetit të pavarur të Kosovës dhe e miqësoi Kosovën me SHBA të dhe shtetet demokratike të Evropës, dhe i cili deri në fund me përkushtim i shërbeu Kosovës, ideali i të cilit ishte Kosova e pavarur.

Me këtë rast shumë bashkatdhetarë shprehën ngushëllime në Librin e zisë, që për disa ditë qëndroi i hapur.
Nga ky takim përkujtimor u propozohet institucioneve të Kosovës që autostrada Prishtinë - Durrës të emërtohet "Ibrahim Rugova".

Jeta dhe vepra e Presidentit Rugova do të nderohet e kujtohet gjithmonë, u tha në këtë takim.

 

 

Berisha e Pribe: Marrëveshja për stabilizim asociim është dita e madhe europiane e Shqipërisë

 

Tiranë, 9 shkurt 2006 - Kryeministri Sali Berisha në një takim me drejtorin për Europën Juglindore dhe kryenegociatorin e Kemosionit Evropian për Marrëveshjen e Stabilizim Asociimit, Reinhard Pribe, u shpreh se kjo është dita e madhe europiane e Shqipërisë.

 

Shqipëria, tha Berisha, do të punojë me vendosmëri dhe seriozitet të madh për të implementuar me përpikmëri gjithçka që parashikon MSA ja e sapo sigluar.

Edhe Pribe u shpreh se kjo është me të vërtetë dita e madhe europiane e Shqipërisë dhe shënon një kapituill të ri marrëdhëniesh të ngushta dhe tashmë kontraktuale mes BE së dhe Shqipërisë.

Pribe i shpjegoi Berishës hapat e mëtejshëm pas siglimit të të marrëveshjes duke iu referuar edhe vizitës së presidentit të KE së, Barroso dhe Komisionerit për Zgjerimin, Olli Rehn, në Shqipëri javën që vjen.

 

 

Shqipëria ka firmosur dokumentin që i prin nënshkrimit zyrtar të Marrëveshjes së Stabilizim Asociimit me BE në

 

Tiranë, 9 shkurt 2006 - Shqipëria ka firmosur dje dokumentin pararendës që i prin nënshkrimit zyrtar të Marrëveshjes së Stabilizim Asociimit me BE në. Dokumenti është firmosur nga minsitrja e Integrimit, Arenca Trashani, dhe kryenegociatori i delegacionit të Komisionit Evropian, Reinhard Pribe.

 

Pas nënshkrimit të versionit përfundimtar të marrveshjes së Stabilizim Asociimit, minsitrja e Integrimit, Trashani, ka thënë se kjo është arritje e madhe.

Ajo ka vlerësuar gjithashtu se përfundimi i negociatave ishte rezultat i angazhimit serioz të qeverisë në përmbushjen e objektivave të programit të saj, si dhe vullnetit të BE së për të përshpejtuar procesin e integrimit evropian të Shqipërisë.

 

 

Arrestohet ish-ndihmësi i Mladiqit gjatë kohës së luftës

 

Beograd, 9 shkurt 2006 – Policia serbe ka bërë të ditur arrestimin e ish-ndihmësit gjatë kohës së luftës të Ratko Mladiqit, i cili gjendet ende në arrati, njofton BBCWorld. Sasha Badnjar dyshohet për ndihmimin në evitimin e burgosjes së eprorit të tij.

 

Ai ishte pjesë e ekipit të sigurimit të Mladiqit gjatë luftës në Bosnjës në fillim të viteve 90-të. Trupat e NATO-s kanë bastisur gjithashtu edhe shtëpinë e Milisav Klestanit në Bosnjën lindore, në Vlasenica. Ai është tjetër ndihmës i Mladiqit.

 

Badnjar është arrestuar të hënën, kur shefja e tribunalit të Kombeve të Bashkuara për krime lufte, Karla del Ponte shte në Beograd për të nxitur autoritetet për kapjen Mlladiqit.

 

 

Policia shqiptare arreston 2 persona lidhur me incidentin e djeshëm me autobusin e pasagjerëve

 

Tiranë, 9 shkurt 2006 - Autoritetet shqiptare thonë se kanë kapur 2 persona të armatosur, të cilët kishin marrë peng një autobus pasagjerësh, duke lënë të vrarë dy vetë.

Policia identifikoi dy autorët e rrëmbimit si persona të kërkuar nën akuza penale. Ata thonë se dy personat vranë një polic dhe një pasagjer dhe plagosën disa të tjerë. Incidenti ndodhi dje në Rrëshen, kur pasagjerë të pajisur me granata morën peng autobusin, pasi u ndalua nga policia në një postbllok për kontroll. Autobusi udhëtonte në linjën Kukës-Tiranë.