|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Lajmet e ditës

• Zgjedhja e Presidentit të vendit pritet të bëhet të premten
• Petersen është i zhgënjyer me vendimin për shtyrjen e seancës votimin e Presidentit të Kosovës
• Përfaqësuesit e lagjeve veriore të Mitrovicës kërkuan ndihmë nga udhëheqja komunale
• Lene thotë në Beograd se shqiptarët kanë dy solucione për statusin e Kosovës?!
• Në një takim me drejtorin e Bordit të ICG së, Daci shprehet se "Kosova do të jetë një vend normal evropian"
• Vdiq kryetari i Nëndegës së LDK së i fshatit Herticë të Podujevës Sahit Llalloshi
• Udhëheqja komunale e Gjilanit kërkon që sa më parë të zgjidhet Presidenti i Kosovës
• Sali Berisha: Pavarësia e Kosovës është rruga e stabilizimit të rajonit
• Britania bën thirrje që të shtohen përpjekjet për pavarësinë e Kosovës nga Serbia
• Kosumi dhe Petersen po shikojnë mundësinë e ndërrimit të terminit të mbledhjes së Kuvendit
• Kryeministri Kosumi i ofroi mbështetje të plotë Fatmir Sejdiut, kandidat për President të Kosovës
• Beogradi akuzon Britaninë për presion mbi pavarësimin e Kosovës
• NATO e vendosur për të ruajtur kapacitetin operativ të KFOR it edhe sivjet
• Lavrov: Serbët duhet të ndjehen të sigurtë
• Qeveria e Kosovës miratoi Projektligjin për Pengimin e Pastrimit të Parave
• Kosumi priti në takim lamtumirës drejtorin e Zyrës për marrëdhënie politike të UNMIK ut
• ASHAK përkujtoi piktorin Ibrahim Kodra
• Ibrahim Kodra-piktori me famë botërore dje u nda nga jeta
• Dr.Ibrahim Rugova nderohet me Çmimin Kombëtar për vepër jetësore, ndërsa Jusuf Buxhovi për vepër më të mirë
• Në Shqipëri rrëmbehet një autobus udhëtarësh - të paktën dy të vrarë
• Ambasadorët britanikë nga rajoni takohen në Sarajevë me Xhon Sauers
   

Zgjedhja e Presidentit të vendit pritet të bëhet të premten

 

Prishtinë, 8 shkurt 2006 /TN /QIK - Zgjedhjen e Presidentit të Kosovës gjatë kësaj jave e ka kërkuar sërish LDK-ja, sikundër edhe AAK-ja, Grupi 6 plus dhe Ora, çështje e cila do të shqyrtohet nesër nga Kryesia e Kuvendit të Kosovës në orën 1O.OO.

Kolë Berisha nënkryetar i LDK-së dhe deputet i saj, tha se Grupi Parlamentar i kësaj partie i ka kërkuar Kryesisë së Kuvendit që mbledhja solemne për zgjedhjen e Presidentit e caktuar për të hënën të mbahet të enjten. Në rast se ajo nuk do të mund të mbahet të enjten, atëherë të mbahet të paktën të premten, tha Berisha.

"Nuk ka kuptin që të shtyhet prapë mbledhja e Këshillit të Sigurimit, sepse dalim joseriozë në këtë çështje dhe nuk është në dobi tonën. Mendoj se duhet respektuar kërkesa e Grupit tonë Parlamentar, kërkesat e LDK-së dhe patjetër duhet respektuar kërkesa e ndërkombëtarëve, sepse ne duhet të tregojmë se kemi njohuri që në momente të caktuar dimë të menaxhojmë situatën”" u shpreh Berisha.

Edhe Aleanca për Ardhmërinë e Kosovës (AAK-ja), kërkoi sot nga Kryesia e Kuvendit, dhe nga kryekuvendari Nexhat Daci, që seanca parlamentare ku do të votohet për President të Kosovës, të mbahet më 10 shkurt, përkatësisht të premten. "Zgjedhja e Presidentit duhet të përshpejtohet dhe nuk ekziston ndonjë arsye për shtyrje të seancës", ka thënë Gjylnaze Syla.

Poashtu kërkesë me shkrim i është bërë Kryesisë së Kuvendit, për mbledhje nga Grupi 6 plus, ndërkohë që sot edhe partia Ora, publikisht ka kërkuar që nesër Kuvendi të mbajë seancë.

Ndërkohë, PDK njoftoi se qëndrimin e saj do ta publikojë, brenda ditës, sekretari i Përgjithshëm Jakup Krasniqi, pas një takimi që do të ketë me shefin e UNMIK-ut Soren Jesen Petersen.

Kryesia e Kuvendit të Kosovës ka njoftuar zyrtarisht se do të takohet nesër në ora 10.00, por bazuar në kërkesën e tashmë të katër grupeve parlamemtare të përmendura, për seancë të jashtëzakonshme, ku do të zgjidhej Presidenti i vendit, kryesia këtë çështje do ta fusë në rendin e ditës së nesërme dhe të vendosë pro saj. Edhe burime të tjera zyrtare pohojnë se është arritur pajtimi që seanca për zgjedhjen e Presidentit të ri të vendit të mbahet të premten.

Kryesia e Kuvendit ka miratuar propozimin e LDK-së që në këtë post të zgjedhet prof.dr.Fatmir Sejdiu, por dje mori vendim që seanca solemne të mbahet të hënën. Ndërkohë që me këtë vendim nuk është pajtuar as kryeadministratori Petersen, i cili dje tha se ishte i zhgënjyer dhe i dëshpëruar me këtë vendim të kryesisë.

Petersen i përkrahur edhe nga përfaqëssuesi i SHBA-ve në Këshillin e Sigurimit, kishte kërkuar shtyrjen e mbledhjes së KS-së, për javën që vjen, dhe që atje në raportimin e tij për Kosovën të përfshihej edhe zgjedhja e Presidentit gjatë kësaj jave, si një shembull pozitiv për institucionet dhe demokracinë në Kosovë.

 

 

Petersen është i zhgënjyer me vendimin për shtyrjen e seancës votimin e Presidentit të Kosovës

 

Prishtinë, 8 shkurt 2006 /TN /QIK - Shefi i UNMIK-ut Soren Jesen Petersen ëshë shprehur thellësisht i zhgënjyer dhe i befasuar me vendimin e Kryesisë së Kuvendit të Kosovës që seanca për zgjedhjen e presidentit të ri të shtyhet për datën 13 shkurt.

"Këshilli i Sigurimit të OKB-së pranoi kërkesën tonë për shtyrje të mbledhjes deri më 14 shkurt e pastaj befasisht dëgjojmë këtu se mbledhja e Kuvendit të Kosovës, ku duhet të votohet për President të Kosovës shtyhet", sqaroi Petersen.

"Nuk besoj se njerëzit do ta kuptojnë një shtyrje të tillë. Unë jam thellësisht i zhgënjyer, pasi nuk shoh ndonjë arsye, që të mos procedohet gjatë javës për këtë çështje", - ka thënë Petersen dje pasdite.
Petersen tha se Presidenti duhet të zgjidhet me një afat sa më të shpejtë në mënyrë që ai të mund t'i raportojë Këshillit të Sigurimit më 14 shkurt për këtë zhvillim të cilin e vlerësoi si shumë pozitiv.

Kryesia e Kuvendit të Kosovës në takimin e djeshëm ka marrë vendim që seanca për zgjedhjen e Presidentit të Kosovës të mbahet të hënën më 13 shkurt, e jo siç ishte paraparë më 9 shkurt. Një vendim i tillë u mor me kërkesë të Grupit parlamentar të Partisë Demokratike për shkak se kryetari i kësaj partie Hashim Thaçi dhe katër deputetë të saj gjenden për një vizitë në Gjermani.

 

 

Britania bën thirrje që të shtohen përpjekjet për pavarësinë e Kosovës nga Serbia

 

Beograd, 8 shkurt 2006 /TN /QIK - Britania i ka bërë thirrje Perëndimit që t'i shtojë përpjekjet për të përgatitur terrenin për pavarësinë e mundshme të Kosovës nga Serbia.

Xhon Sauers (John Sawers), drejtor politik në Ministrinë e Jashtme të Britanisë, i ka deklaruar agjencisë së lajmeve Rojters se e ardhmja e Kosovës duhet t'i reflektojë dëshirat e popullatës shumicës.

"Nuk është sekret se aspiratat e shumicës së kosovarëve janë për pavarësi", ka thënë Sauers. Ai e ka përkujtuar shtypjen serbe në Kosovë në vitet e 90 ta, pasi nacionalisti Sllobodan Millosheviq ia hoqi Kosovës autonominë, gjë që kulminoi me luftën brutale dy vjeçare dhe përfundoi me ndërhyrjen e NATO s.

"E gjithë kjo histori është një trashëgimi që na bën të mos kemi shumë opsione të tjera", ka thënë Sauers.

 

 

Sali Berisha: Pavarësia e Kosovës është rruga e stabilizimit të rajonit

 

Berlin, 8 shkurt 2006 /TN /QIK - Shqipëria është e përkushtuar për intensifikimin e bashkëpunimit miqësor rajonal, por problemi madhor i rajonit mbetet statusi përfundimtar i Kosovës, për të cilën Shqipëria mban një qëndrim realist, tha kryeministri Sali Berisha. Ai theksoi se "pavarësia e Kosovës është rruga e stabilizimit të rajonit".

Berisha në një intervistë për "Dojçe velen" theksoi se udhëheqja aktuale e Kosovës është e vendosur të vazhdojë rrugën e Presidentit Rugova. Ai vlerëosi se udhëheqja e Kosovës është unike dhe është shumë e përkushtuar për respektimin e garantimin e lirive dhe të drejtave të serbëve dhe se ajo mbetet e hapur për dialog.

Berisha tha se beson që ish-presidenti Artisahri do ta përfundojë misionin e tij me sukses në zgjidhjen e statusit të Kosovës.

 

 

Përfaqësuesit e lagjeve veriore të Mitrovicës kërkuan ndihmë nga udhëheqja komunale

 

Mitrovicë, 8 shkurt 2006 /TN /QIK - Krerët e komunës së Mitrovicës: Mursel Ibrahimi, kryetar, Fatmire Berisha, zëvendëskryetare dhe Sadri Ferati, kryeshef i Ekzekutivit, kanë patur një takim me përfaqësuesit e banorëve shqiptarë që jetojnë në lagjet veriore të qytetit, në të cilin janë shqyrtuar disa çështje aktuale dhe mundësitë e zgjidhjes së disa problemeve që i preokupojnë ata.

Përfaqësuesit e lagjeve veriore kërkuan nga udhëheqja komunale, ndihmën e institucioneve për tejkalimin e të gjitha problemeve.

Ndër problemet që aktualisht po i shqetëson më së shumti banorët e lagjeve veriore të qytetit, është ndërtimi i tregut në parkun afër urës kryesore të lumit Ibër, që sipas tyre bëhet me prapavijë të caktuar, për të penguar lëvizjen dhe qarkullimin e lirë të njerëzve dhe automjeteve, që kohëve të fundit është duke shkaktuar probleme të mëdha.

Problem tjetër shqetësues për shqiptarët që jetojnë në veri është edhe parkimi i autobusëve në pjesën e rrugës që lidh tre rrokaqiejt me urën kryesore, gjë që sipas përfaqësuesve bëhet me qëllim që të vëzhgohet lëvizja e shqiptarëve nëpër të dhe pengimi i tyre në momente të caktuara.

Udhëheqja komunale premtoi se për të gjitha këto çështje do të bisedojnë me përfaqësuesit e UNMIK ut, që e administrojnë atë pjesë të qytetit, në mënyrë që të sqarohen veprimet e tyre dhe mëpastaj do të mbajnë një takim të përbashkët për të marrë qëndrimet e duhura.

 

 

Lene thotë në Beograd se shqiptarët kanë dy solucione për statusin e Kosovës?!

 

Beograd, 8 shkurt 2006 /TN /QIK - I dërguari i Bashkimit Evropian në negociatat për statusin e Kosovës Shtefan Lene ka biseduar sot në Beograd me presidentin e Unionit Serbi-Mali i Zi, Svetozar Maroviq dhe me kryetaren e të ashtuquajturës "Qendër koordinuese serbe për Kosovën" Sanda Rashkoviq-Iviq.

Në një komunikatë nga takimi në Qendrën koordinuese Lene citohet të ketë thënë se "te shumica e shqiptarëve ekzistojnë dy socucione për zgjidhjen e mundshme të statusit të Kosovës"?! Sipas Lenes, e para është pavarësia, kurse e dyta gatishmëria për koncesione në procesin negociues. "Më vjen keq që duhet të them, por te shqiptarët mbisundon qasja që nënkupton pavarësinë e plotë për Kosovën", ka thënë Lene.

Sipas mediave serbe, Shtefan Lene ka mbetur i paqartë dhe nuk nuk ka pasur përgjigje të saktë në pyetjen se, nga aspekti i BE-së, kush në të ardhmen do të garantonte kufirin e tanishëm midis Shqipërisë dhe Serbisë, përkatësisht Serbisë dhe Maqedonisë.

 

 

Në një takim me drejtorin e Bordit të ICG së, Daci shprehet se "Kosova do të jetë një vend normal evropian"

 

Prishtinë, 8 shkurt 2006 /TN /QIK - Kryetari i Kuvendit të Kosovës, Nexhat Daci, ka pritur sot drejtorin e Bordit të Grupit Ndërkombëtar të Krizave (ICG), Morton Abramovic, i cili shoqërohej nga Pol Uiliams, drejtor i Programit për trajnime për negociatat dhe zonjën Xhenifer Ober, drejtoreshë e këtij programi në Kosovë.

Eshtë biseduar për zhvillimet në Kosovë, për përgatitjet për bisedime dhe për gjendjen në Kosovë pas përcaktimit të statusit të vendit.

Sipas një njoftimi, kryeparlamentari Daci ka vlerësuar interesimet e Grupit Ndërkombëtar të Krizave për zgjidhjen e çështjes së Kosovës. Ai ka lavdëruar, ndërkaq, punën që ka bërë eksperti amerikan, Pol Uiliams, duke theksuar se institucionet e Kosovës do të kenë nevojë të përhershme për ndihmën e ekspertëve amerikanë.

Sa i përket vizionit për të ardhmen e vendit, Daci është shprehur se Kosova do të jetë një vend normal evropian.

 

 

Vdiq kryetari i Nëndegës së LDK së i fshatit Herticë të Podujevës Sahit Llalloshi

 

Podujevë, 8 shkurt 2006 /TN /QIK - Dje në moshën 52-vjeçare u nda nga jeta kryetari i Nëndegës së LDK së në fshatin Herticë të Podujevës Sahit Llalloshi.

Sahiti hyri në jetën publike me LDK në, partinë e parë antikomuniste dhe nacional demokratike që në fillet e organizimit të saj në Llap. Ai me LDK në u zhvillua në një prijës të vendosur, ishte mjaft i zellshëm dhe punëtor.

 

"Njerëzorja dhe kombëtarizmi prej një njeriu plisbardhë ishin virtyte që e bënë aq të dashur jo vetëm në Herticë e Llap, jo vetëm ndër bashkveprimtarët e Tij, por tek të gjithë, pa dallim moshe", e përkujton kryetari i Degës Agim Veliu.

Ceremonia mortore e varrimit të të ndjerit Sahit Lalloshi bëhet sot në orën 16.00 në varrezat e fshatit Herticë.

 

 

Udhëheqja komunale e Gjilanit kërkon që sa më parë të zgjidhet Presidenti i Kosovës

 

Gjilan, 8 shkurt 2006 /TN /QIK - Udhëheqja komunale e Gjilanit, Dega e LDK së në Gjilan dhe deputetët e kësaj komune në Kuvendin e Kosovës, përshëndesin zyrtarizimin nga ana e Krysesisë së LDK së të kandidatit për president të Kosovës, Fatmir Sejdiut, duke besuar se ky përcaktim është i drejtë dhe në hap me kohën dhe proceset nëpër të cilat po kalon Kosova drejt pavarësisë së saj.

Figura dhe personaliteti i Fatmir Sejdiut garanton vazhdimësinë e rrugës së Presdientit historik të Kosovës, Ibrahim Rugova si dhe zbatimin e vullnetit të këtij populli që është edhe thelbi i programit politik të LDK së, që prej fillimit, për liri, pavarësi e demokraci.

Urgjenca me të cilën u përcaktua Kryesia e LDK së për kandidatin për president të vendit, dëshmon përgjegjësinë e lartë politike, e cila sfidoi dhembjen e madhe për humbjen e parakohshme të Presdientit Rugova.

Kjo do të duhej shprehur edhe nga Kryesia e Kuvendit të Kosovës, në përfillje të kërkesës së Grupit Parlamentar të LDK së, që zgjedhja e Presidentit të vendit të bëhet në seancën e 9 shkurtit, ashtu edhe siç ishte planifikuar, por edhe kërkuar jo vetëm prej LDK së po edhe prej bashkësisë ndërkombëtare.

 

Andaj, duke e ditur peshën e madhe të ngjarjeve të cilat e presin Kosovën në ditët e ardhshme, kërkohet që Kryesia e Kuvendit të Kosovës ta shqyrtojë edhe njëherë vendimin e saj rreth mbajtjes së kësaj seance, jo vetëm solemne, por edhe vendimtare për Kosovën.

 

 

Kosumi dhe Petersen po shikojnë mundësinë e ndërrimit të terminit të mbledhjes së Kuvendit

 

Prishtinë, 8 shkurt - Qeveria e Kosovës përkrah kandidaturën e Fatmir Sejdiut për President të Kosovës, ka thënë Zëvendëskryeministri Adem Salihaj pas mbledhjes së djeshme të Qeverisë.

 

Ai bëri të ditur se Kryeministri Bajram Kosumi dhe Kryeadministratori Petersen janë në kontakt për mundësinë e ndërrimit të terminit të mbledhjes së Kuvendit të Kosovës kur pritet të votohet për zgjedhjen e presidentit të vendit.

"Kjo çështje po shqyrtohet dhe nuk është një rrethanë e mirë që u krijua, sepse shkuarja e Kryeministrit në Nju-Jork ishte shumë e rëndësishme për procesin që kemi përpara. Megjithatë ende janë duke u shqyrtuar mundësitë që të gjende ndonjë zgjidhje, ndonjë lëvizje e terminit apo diçka të ngjashme", ka thënë mbrëmë z. Salihaj.

 

 

Kryeministri Kosumi i ofroi mbështetje të plotë Fatmir Sejdiut, kandidat për President të Kosovës

 

Prishtinë, 8 shkurt 2006 /TN /QIK - Kryeministri i Kosovës Bajram Kosumi ofroi mbështetje të plotë për Fatmir Sejdiun me të cilin tha se është takuar. "I kam afruar jo vetëm përkrahje, por edhe gatishmëri maksimale për bashkëpunim edhe në postin e Presidentit të Kosovës, por edhe në udhëheqjen e Grupit Negociator për statusin e Kosovës", - ka thënë Kosumi.

 

 

Beogradi akuzon Britaninë për presion mbi pavarësimin e Kosovës

 

Beograd, 8 shkurt 2006 /TN /QIK - Qeveria e Serbisë e akuzoi Britaninë se po bën presion për pavarësimin e Kosovës para fillimit zyrtar të negociatave mbi statusin.

Pas takimit me Xhon Sauers, drejtor politik në Ministrinë e Jashtme të Britanisë, kryeministri serb tha se qëndrimet e diplomatit britanik janë në kundërshtim me parimet e Grupit të Kontaktit.
Vojisllav Koshtunica e akuzoi diplomatin britanik se "është i njëanshëm në zgjidhjen e çështjes së Kosovës".

"Koshtunica ka theksuar se qëndrimet e drejtorit politik Sauers lidhur me statusin e ardhshëm të Kosovës, të cilat ai i ka thënë dje në Prishtinë në bisedimet me përfaqësuesit e shqiptarëve dhe të serbëve, janë në kundërshtim të plotë me komunikatën zyrtare të lëshuar nga takimi i Grupit të Kontaktit më 31 janar", thuhet në njoftimin e qeverisë serbe në Beograd.

"Vetëm Këshilli i Sigurimit e ka mandatin që t'i ndryshojë parimet për negociatat mbi statusin e Kosovës", ka thënë Koshtunica.

Sipas komunikatës, Xhon Sauers është dakorduar se negociatat mbi statusin e ardhshëm të Kosovës duhet të fillojnë me çështjen e decentralizimit.

 

 

NATO e vendosur për të ruajtur kapacitetin operativ të KFOR it edhe sivjet

 

Bruksel, 8 shkurt 2006 /TN /QIK - Të premten, ministrat e NATO s "do ta konfirmojnë vendosmërinë që të ruhet fuqia vepruese dhe aftësia ushtarake e forcave të KFOR it gjatë këtij viti, i cili sipas të gjitha gjasave, do të jetë shumë i ndjeshëm", ka thënë Xhon Kolston (John Colston), ndihmës për çështje politike dhe të mbrojtjes i sekretarit të përgjithshëm Jap de Hop Skefer.

Kolston i bëri këto komente në pyetjen e gazetarëve nëse përbërja e KFOR it do diskutohet në takimin e ministrave të NATO s në qytetin italian Taormina.

"Ne mbetemi të vendosur që ta ruajmë kapacitetin operativ të KFOR it në këtë vit", ka thënë Kolston.

 

 

Lavrov: Serbët duhet të ndjehen të sigurtë

 

Romë, 8 shkurt 2006 /TN /QIK - Kthimi refugjatëve në Kosovë duhet të ndërlidhet me të drejtën e tyre natyrore për t'u kthyer në shtëpitë e veta, ka deklaruar ministri i Jashtëm i Rusisë, Sergei Lavrov.

"Serbët duhet të lejohen të ndjehen të sigurtë, të ndjejnë se i kanë të gjitha të drejtat, përfshirë dhe lirinë e fjalës", ka thënë Lavrov.

 

 

Qeveria e Kosovës miratoi Projektligjin për Pengimin e Pastrimit të Parave

 

Prishtinë, 8 shkurt 2006 /TN /QIK - Qeveria e Kosovës në mbledhjen e mbrëmshme, të drejtuar nga zëvendëskryeministri Adem Salihaj, ka miratuar dy projektligje: Projektligjin për Pengimin e Pastrimit të Parave dhe Projektligjin për Ndërprerjen e Shtatzënësisë.

Projektligjin për Pengimin e Pastrimit të Parave. Qëllimi i miratimit të këtij ligji para së gjithash është motivuar nga nevoja e krijimit të infrastrukturës ligjore të pengimit të çdo transferi të dyshimtë. E gjithë kjo bëhet në funksion të zbulimit, luftimit dhe parandalimit të spastrimit të parave të fituara nga aktivitete të kontrabandës dhe kriminalitetit.

Sipas këtij ligji, parashikohet ngritja e Njësisë për parandalimin e pastrimit të parave, e cili raporton çdo akt dhe transaksion të dyshimtë të parave dhe do të funksionojë në kuadër të Departamentit të Thesarit në Ministrinë e Ekonomisë dhe Financave.

Ligji për parandalimin e pastrimit të parave u dedikohet para së gjithash subjekteve siç janë: bankat institucionet financiare, avokatët, noterët, auditorët, kontabilistët e certifikuar, agjencitë e patundshmërive, dilerët e sendeve të çmuara, dhe shumë organizata të tjera që merren me biznes.

 

Rëndësia e miratimit të ligjit qëndron edhe në faktin se do të mbulojë me një kornizë më të plot ligjore këtë fushë shumë e rëndësishme e ekonomisë, sepse Rregullorja në fuqi e UNMIK ut, 2004/2 nuk është e plotë dhe nuk mbulon në tërësi pengimin e spastrimit të parave.

 

Gjatë hartimit të Projektligjit për parandalimin e pastrimit të parave janë marrë për bazë praktikat e shteteve të rajonit dhe Bashkimin Evropian dhe Direktiva e Këshillit të BE së për sistemin e financave dhe parandalimin e pastrimit të parave, si dhe është harmonizuar me legjislacionin e BE së.

Projektligjin për Ndërprerjen e Shtatzënësisë. Ky ligj vendos bazën ligjore për rregullimin e ndërprerjes së shtatzënisë. Ligji për Ndërprerjen e Shtatzënësisë garanton respektimin e jetës dhe dinjitetit të çdo qenie njerëzore që nga momenti i frytnimit dhe ky parim nuk shkelet, përveç rasteve të përcaktuara me këtë ligj.

 

Me këtë ligj ndalohet çdo lloj promovimi dhe reklamimi direkt ose indirekt, me fjalë ose figurë, i institucioneve, metodave, medikamenteve e produkteve që shkaktojnë ndërprerje të shtatzënisë, përveç se në botimet shkencore të destinuara për mjekë dhe farmacistë.

Me qëllim të zbatimit të këtij Ligji, Ministria e Shëndetësisë do të nxjerrë akte nënligjore të përcaktuara me këtë ligj në afatet prej 1 viti.

 

 

Kosumi priti në takim lamtumirës drejtorin e Zyrës për marrëdhënie politike të UNMIK ut

 

Prishtinë, 8 shkurt 2006 /TN /QIK - Kryeministri i Kosovës, Bajram Kosumi priti në takim lamtumirës drejtorin e Zyrës për marrëdhënie politike të UNMIK ut, z. Petër Ivancov.

 

Kryeministri Kosumi ka falënderuar për angazhimin e z. Ivancov, dhe ka shprehur besimin se ai do të japë kontributin e mëtutjeshëm pranë zyrës së Ahtisarit në çështjen e Kosovës. Ai tha gjithashtu se Kosova nuk do të harroi punën dhe kontributin e z. Petër Ivancov dhe se ai ka krijuar shokë dhe miq gjatë punës së tij në Kosovë.

Ivancov e njoftoi kryeministrin Kosumi se do të vazhdojë punën pranë Zyrës së Ahtisarit në Vjenë dhe do të jetë angazhuar për çështje politike në negociatat që kanë të bëjnë për përcaktimin e statusit final të Kosovës.

Detyrën e z. Ivantsovit pranë Zyrës për marrëdhënie politike të UNMIK ut tani e tutje do ta marrë diplomati gjermanë Bernd Finke.

 

 

ASHAK përkujtoi piktorin Ibrahim Kodra

 

Prishtinë, 8 shkurt 2006 /TN /QIK - Në nderim të piktorit tasmë të nderë Ibrahim Kodra, sot në Akademinë e Shkencave dhe Arteve të Kosovës u mbajt një akademi përkujtimore. Për jetën dhe veprën e Kodrës foli akademik Rauf Dhomi, i cil;i tha se ekspozita e pavarur e Kodrës në Prishtinë para dyzet viteve kujtohet edhe tash me shumë respekt.

"Veprën e Kodrës edhe në Kosovë e përjetuan si një art modern shqiptar", tha Dhomi dhe theksoi se Kodra ka shenjën dhe kohën e vet dhe para syve të botës është një profil, një zë.

 

 

Ibrahim Kodra-piktori me famë botërore dje u nda nga jeta

 

Milano/Prishtinë, 8 shkurt 2006 /TN /QIK - Ibrahim Kodra, piktori më i madh shqiptar dhe ndër më të mëdhenjtë e Evropës dhe botës, u nda dje nga jeta në Milano të Italisë në moshën 88-vjeçare.
I larguar nga Shqipëria, që në rini, kur kishte udhëtuar drejt Italisë për t'u arsimuar me përkrahjen e një burse shtetërore të Mbretërisë së Shqipërisë, Kodra, tre muajt e fundit i kaloi duke luftuar me vdekjen në një spital, dhe tri javët e fundit në shtëpinë e tij në Milano, kur dje rreth orës 13.00, u nda nga kjo botë i thyer nga pleqëria.

Kodra, i vlerësuar edhe si ftillues i një qytetërimi të ri, "i fundmi i postkubistëve", kishte pasur fatin që në botën shqiptare, Prishtina e para ta zbulonte famën e tij evropiane. Edhe ekspozitën e parë në tokën arbërore do ta mbajë më 1968 në Prishtinë, ndërsa në Shqipëri ende ishte "i panjohur". Dhe vetëm në vitin 1974 për herë të parë do të ekspozojë pikturat e tij, që kishin mrekulluar botën, që deri në fund të jetës sipas studiuesve kishte krijuar rreth 6 mijë sosh.

Për herë të fundit në Kosovë do të ekspozojë në Galerinë e Arteve të Kosovës, në vitin 2003 ku pat hapur ekspozitë personale, ndërsa që një pjesë e punimeve të tij janë në fondin e Galerisë. Po këtë vit edhe Tiranën do ta vizitojë për herë të fundit dhe poashtu për herë të fundit do të ekspozojë. Në Galerinë Kombëtare të Arteve të Shqipërisë ruhen vetëm 2 tablo origjinale të kodrës të viteve "30 dhe disa litografi, riprodhime të temës “Shqipëria fantastike".

Ndërsa, kishte qenë vetëm edhe një herë më parë në Shqipëri, në vitin 1997 i ftuar nga Presidenti i Shqipërisë Sali Berisha.

Ibrahim Kodra i lindur në Ishëm të Durrësit më 1918, në moshën 20 vjeçare fillon studimet në Akademinë e Arteve të Bukura në Romë, të cilat studime i ndërpret, për të vazhduar në Akademinë e Arteve të Bukura të Brerës, në Milano.

 

I udhëhequr nga Carrà-s, Carpi-i dhe Funi, ky i ri shqiptar, i larguar përgjithmonë nga atdheu, fillon rrugëtimin në botën e pikturës. Ekspozon në Romë, Milano, Venecia, Paris, Nju Jork, ndërsa njihet dhe miqësohet me piktorë të mëdhenj si Pikaso, Shagall, Matis, Fontana, Guttuso, me poetë, shkrimtarë, kritikë e regjisorë nga Montale dhe Sereni, nga Bertoni tek Munari, dhe Marotta.

Kodra, për artistët në Shqipëri dhe në Kosovë ishte shndërruar në legjendë "mbi një postkubist dhe një Uliks shqiptar në Milano".

Ku kuratorët e Galerisë Kombëtare të Arteve të Shqipërisë, kishin arritur në Milano, u gjendën përballë zbrazëtisë. "Në studion e tij nuk kishte mbetur asnjë pikturë. Rikrijimet e vitit 2003 ishin i vetmi koleksion privat. Ato vepra ishin modelet më përfaqësuese të fazës së fundit të krijimtarisë së Kodrës”.

Temat historike e simbolike që gjenden në figurat e tablove "Muzikantët", "Arkeologu", "Shqipëria fantastike", "Qyteti ideal", kanë krijuar sistemin e tij të mëvonshëm, një zbulim “high-tech” në pikturën moderne, një eksplorim në sistemin e tij robotik.

E gjithë pasuria artistike që ka lënë pas në pikturë Ibrahim Kodra janë rreth 6 mijë vepra, të shpërndara nga muze privatë, koleksionistë dhe vetëm 2 mijë prej tyre janë të regjistruara dhe të dokumentuara. “Kodra është zanafilla e një qytetërimi të ri”, ishte vlerësimi i poetit të madhë francez Pol Elyar, i befasuar me bukurinë e veprave të Kodrës.

Krijimi i fondacionit "Kodra", kishte qëllim gjurmimin dhe identifikimin e të gjitha veprave që janë shpërndarë nëpër botë dhe që as ai vetë nuk di se ku ndodhen, të cilat i ka shitur në ditë të vështira. Një projekt që do të sillte përfundimisht koleksionin e fundit të Kodrës në Shqipëri dhe nëpërmjet tij, krijimin e Fondacionit "Kodra", u deklarua se kushtonte 15 miliardë lireta.

 

Ky projekt lindi si ide bashkë me “nuova urbanistica”, në vitin 1982, kur lindi edhe “nuova citta”, ose qyteti ideal. Janë një cikël pikturash mbi arkitekturën urbane që Kodra ka realizuar në atë periudhë. Kushti i vetëm për të pasur në Shqipëri koleksionin e veprës së Kodrës, ishte ky projekt.

Vepra e tij është e shpërndarë në vende të ndryshme të botës.

 
Biografia

Ibrahim Kodra ka lindur më 22 prill të vitin 1918 në Ishëm të Durrësit. Fëmijërinë e tij e kaloi në oborrin e mbretit Zog, nga i cili edukohet dhe shkollohet fillimisht në studime shkencore dhe më pas në shkollën e artit Odhise Paskali. Në moshën 20-vjeçare fiton bursën e studimit dhe niset për në Milano, për të ndjekur fatin e tij, ku regjistrohet në Akademinë e Arteve të Bukura të Breras.

 

Nën udhëheqjen e Carra Carpi dhe Funi, piktori i ri shqiptar nis udhëtimin e tij në kërkim të njohjes, e cila më pas do ta kalojë çdo skemë dhe formulë. Në vitin 1944 Kodra hapi workshopin e tij të parë në Milano, për të vazhduar më pastaj me sukseset e njëpasnjëshme, siç ishte ai i vitit 1948 kur në "Art Club" të Romës hapi ekspozitën personale e pastaj edhe atë grupore, me ç'rast u njoftua edhe më mjeshtrin e artit Pablo Picasso.

 

Në vitet 50, Kodra pikturoi freskat në muzetë dhe ndërtesat më të njohura të Milanos. Në këto vite në Mostra dell Disegno të Chiavariit, Kodra do të hapë edhe ekspozitat madhështore bashkë me mjeshtrit më të mëdhenj të kohës, Picasso, Rouault, Dufy, Matisse, Modigliani dhe të tjerët. Ai ka hapur edhe një mori ekspozitash individuale dhe grupore anekënd botes, si:

- Ekspozita kolektive në "Paradise" me mjeshtrit Picasso, Dali, Matta, Ernst, Levi, Panseca, Braque etj.
- Ekspozita kolektive në "Stone Gallery" në Newcastle me mjeshtrit Corneille, Gear, Gleghorn, Michaux, Millares etj.

- Ekspozitë personale në 'Princess Hall" të New Yorkut.

Në mesin e ekspozitave të tjera të Kodrës janë edhe ekspozitat e tij në Milano, Newcastle, Stuttgart, Zurich, Tiranë e Prishtinë.

Veprat e tij dekorojnë muret e Muzeut të Vatikanit, Dhomën e Deputetëve në Romë dhe koleksionet e çmuara private anembanë botës.

Në mesin e pikturave të njohura të, me të cilat është prezantuar edhe në trojet shqiptare, janë "Kompozicioni", “Muzikantët", "Lufta për pushtet", "Lufta për paqe", "Shqipëria fantastike" etj.

 

 

Dr.Ibrahim Rugova nderohet me Çmimin Kombëtar për vepër jetësore, ndërsa Jusuf Buxhovi për vepër më të mirë

 

Prishtinë, 8 shkurt 2006 /TN /QIK - Pas procedurës paraprake të paraparë me Rregulloren për themelimin e çmimit kombëtar për letërsi "Azem Shkreli", Ministria e Kulturës, përkatësisht ministri Astrit Haraçia shpalli fituesit e dy çmimeve kombëtare - për vepër jetësore dhe për veprën më të mirë të botuar brenda vitit.

Në bazë të propozimeve të institucioneve të ndryshme të kulturës e arsimit, dhe pas shqyrtimit të këtyre propozimeve nga juria konsultative e krijuar nga Ministria, ministri Astrit Haraçia mori vendim që për vepër jetësore të nderohet Dr.Ibrahim Rugova, President i Kosovës, i cili ndërroi jetë më 21 janar të këtij viti, ndërkaq për vepër më të mirë të botuar brenda vitit pararaprak u laurua shkrimtari Jusuf Buxhovi për romanin "Kodi i dashurisë".

Këto çmime kanë qenë të paraparë të ndahen më 19 shkurt të këtij viti, por për shkak të zisë kombëtare, punët përgatitore për këtë çmim janë shtyrë për më vonë dhe se ceremonia e ndarjes së këtyre çmimeve do të mbahet në fund të muajit shkurt të këtij viti, thuhet në një komunikatë të Ministrisë së Kulturës.

 

 

Në Shqipëri rrëmbehet një autobus udhëtarësh - të paktën dy të vrarë

 

Tiranë, 8 shkurt 2006 /TN /QIK - Një autobus udhëtarësh i linjës Kukës Tiranë është rrëmbyer sot, (e mërkurë) në mesditë pranë Rrëshenit. Njoftohet se autobusi u rrëmbye nga dy persona të armatosur.
Sipas BBC-së, të paktën dy persona, njëri prej tyre polic, janë vrarë gjatë shkëmbimit të zjarrit.
Ka njoftime edhe për disa të plagosur në mesin e pasagjerëve.

Policia ende nuk ka dhënë nje version zyrtar të ngjarjes

 

 

Ambasadorët britanikë nga rajoni takohen në Sarajevë me Xhon Sauers

 

Sarajevë/Londër, 8 shkurt 2006 /TN /QIK - Drejtori politik i Forin Ofisit britanik Xhon Sauers viziton sot Sarajevën, për të marrë pjesë në konferencën e ambasadorëve britanikë nga rajoni. Ambasadorët britanikë nga Zagrebi, Beogradi, Shkupi dhe Tirana, si dhe shefi i Zyrës britanike në Prishtinë, prej sot do të qëndrojnë në Sarajevë për të diskutuar mbi politikën britanike në Ballkanin Perëndimor, për të shkëmbyer ide për drejtimin e ambasadave si dhe për t'u përgatitur për takimin e të gjitha ambasadave britanike që në mars të këtij viti që do të mbahet në Londër.