|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Lajmet e ditës

7 shkurt 2006 /TN /QIK

• Kuvendi do të zgjedhë Presidentin e vendit më 13 shkurt
• V.Serçëk: Duhet respektuar vullnetin e shumicës së qytetarëve të Kosovës për pavarësi
• Reagimet serbe ndaj deklaratës së diplomatit britanik pro pavarësisë së Kosovës
• UNMIK-u përshëndet propozimin e LDK-së për President të Kosovës
• Sipas gazetës "Politika", Uizneri e Uashingtoni angazhohen për pavarësinë e plotë të Kosovës
• SHBA-të vitin e ardhshëm do të ndihmojnë Kosovën me 79 milionë dollarë
• Shefi i diplomacisë franceze dhe i dërguari i posaçëm i KB biseduan në Paris për Kosovën
• Paten: Progresi në Ballkan mund të ndalet nëse së shpejti nuk zgjidhet çështja e Kosovës
• Kryesia e LDK-së ngushëllon familjen Pajaziti
• Fatmir Sejdiu edhe zyrtarisht kandidat i LDK-së për President të Kosovës
• Sauers u ka thënë përfaqësuesve të serbëve se duhet të pranojnë pavarësinë e Kosovës
• Xh.Sauers: Pavarësia e Kosovës mund të prodhojë stabilitet në rajon
• Diplomati Sauers ka theksuar se Presidenti Rugova ka lënë një vakuum të madh
• Familja e Presidentit Rugova do ta ketë mbështetjen e plotë të LDK së
• Nuk ka sinjale nga Amerika për pakësimin e numrit të trupave amerikane në Kosovë, tha gjenerali Ovens
• Lavrov: Një zgjidhje përmes bisedimeve është e vetmja zgjidhje afatëgjatë për Kosovën
• Deklaratë e Kryesisë së BIK me rastin e botimit të disa karikaturave ofenduese ndaj vlerave islame
   

 
Kuvendi do të zgjedhë Presidentin e vendit më 13 shkurt

 

Prishtinë, 7 shkurt 2006 - Kryesia e Kuvendit të Kosovës, vendosi sot që Kuvendi solemnisht të mblidhet të hënën për ta zgjedhur Presidentin e ri të vendit. LDK-ja sot ka nominuar prof.dr.Fatmir Sejdiun për kreun e vendit, ndërkohë që ende nuk dihet nëse do të ketë ndonjë kandidat tjetër.

Naim Maloku, anëtar i Kryesisë së Kuvendit, bëri të ditur se kryesia pas nominimit nga Grupi parlamentar i LDK-së, të Fatmir Sejdiut për president të Kosovës, vendosi që të mbahet seanca solemne të hënën, më 13 shkurt, në orën 10.00, dhe jo të enjten, ashtu siç ishte parashikuar, me kërkesë të Grupi Parlamentar të PDK-së. Kjo është bërë me arsyetimin se mungon një pjesë e deputetëve të kësaj partie, të cilët ndodhen në udhëtim zyrtar në Gjermani, të kryesuar nga Hashim Thaçi.

"Ishte një atmosferë e mirë, dhe besojmë se para faktorit ndërkombëtar, do të tregojmë një unitet të plotë, të hënën më 13 shkurt", tha Maloku, i cili përfaqëson AAK-në në Kryesinë e Kuvendit.

Fatmir Sejdiu, sekretar i përgjithshëm i LDK-së, profesor në Fakultetin Juridik dhe në Degën e Shkencave Politike, sipas të gjitha gjasave, do të vazhdojë mandatin e Presidentit Rugova, i cili vdiq më 21 janar.

"Ishin arsye të domosdoshme, që të shtyhet zgjedhja e kryetarit, për shkak se nuk gjenden në Kosovë për shkak të angazhimeve zyrtare në Gjermani", tha Xhavit Haliti, anëtar i kryesisë nga PDK-ja.

 

Ai tha se Grupi parlamentar i PDK-së, ende është duke e shyrtuar mundësinë, që të dalë apo jo me kundërkandidat për President të vendit, ndonëse mediat kanë cituar burime të kësaj partie se si kundërkandidat të mundshëm të kësaj partie, janë Enver Hoxhaj, Bajram Rexhepi dhe Fatmir Limaj.

Ai tha se realiteti është se LDK-ja ka shumicën në Kuvend, dhe sipas Kornizës Kushtetuese ajo ka emëruar kandidatin, e saj, këtë të drejtë e ka edhe PDK-ja, por sipas tij, kjo nuk nënkupton edhe "zgjedhjen".
Sipas deklarimeve paraprake të partive politike, kandidatura e prof.Sejdiut për president të vendit është mbështetur nga partneri në koalicion, AAK-ja, Ora, një parti turke, koalicioni "Vakat" etj.

Kryesia ka vendosur poashtu që seanca e Kuvendit të Kosovës e ndërprerë në muajin janar për shkak të vdekjes së Presidentit do të vazhdojë të martën, sipas rendit të miratuar të ditës, atëherë. Ndërsa, seanca e rregullt e paraparë për 9 shkurt do të mbahet më 23 shkurt.

Kryesia e Kuvendit poashtu ka vendosur që të shpallë konkurs për sekretarin e Kuvendit të Kosovës, në vend të Jusuf Demajt, të cilit i ka kaluar mandati.

 

 

V.Serçëk: Duhet respektuar vullnetin e shumicës së qytetarëve të Kosovës për pavarësi

 

Pragë, 7 shkurt 2006 - Shumica dërmuese e qytetarëve të Kosovës dëshiron pavarësi dhe këtë duhet ta respektojnë të gjithë. Njëkohësisht, për shkak të rrethanave në 7 vitet e fundit, gjatë të cilave misioni ndërkombëtar kishte bërë veprime të gabuara dhe e njëjta vlen edhe për udhëheqjen shqiptare,

Kosova tani nuk është sa duhet e zhvilluar dhe e organizuar, përkatësisht ende nuk është e organizuar dhe e aftë për të funksionuar si shtet i pavarur, - tha për radion "Evropa e lirë" analisti pranë Institutit Enterprajz në Uashington Vans Serçëk.

Sipas tij, "edhe nëse Kosovës i jepet shkallë e konsiderueshme e pavarësisë, kjo do të jetë formale, sepse ende do të duhet ndihmë dhe mbikqyrje ndërkombëtare, që do të shtohet ose zvogëlohet varësisht nga aftësia e institucioneve kosovare për të funksionuar me efektivitet".

"Niveli i sovranitetit të vërtetë të Kosovës do të varet nga mënyra se si do të zgjidhen çështjet siç janë decentralizimi, multietniciteti dhe siguria", thotë ky analist amerikan.

Serçëk thekson se kosovarët fillimisht mund të kenë pavarësinë e kushtëzuar e pastaj atë të plotë. Por, shton ai, ata "duhet të bëjnë veprime të përgjegjshme dhe nëse dëshmojnë se janë në gjendje të punojnë si shoqëri serioze, atëherë ky proces do të rrjedhë shumë më shpejt".

"Në të kundërtën, nëse do të ketë dhunë, jostabilitet, korrupsion, rruga drejt pavarësisë së plotë do të jetë shumë më e gjatë dhe mbase edhe mund të ndalet", thekson analisti Serçëk.

Ndërkaq lidhur me deklaratën e Presidentit rus Putin për zbatimin universal të parimeve për zgjidhjen e çështjes së Kosovës, Serçëk thotë se "në fakt këtu bazohej dhe shpresa e serbëve që Rusia do të ishte mbrojtësi i tyre i posaçëm në Kosovë".

Por nga kjo deklaratë, thotë ai, mund të lexohet se Putin e di se qeveritë perëndimore e kanë thënë qartë se Kosova është unike.

"Kosova do trajtohet si një skenar unik, ashtu siç edhe është. Edhe Putin e tha se çdo rast duhet trajtuar mbi bazat dhe meritat vetjake. Është e rëndësishme që qeveritë perëndimore t'ia bëjnë të qartë Rusisë që zgjidhja e çështjes së Kosovës nuk krijon precedent për kriza të tjera brenda territorit rus", shprehet analisti amerikan Vans Serçëk.

 

 

Reagimet serbe ndaj deklaratës së diplomatit britanik pro pavarësisë së Kosovës

 

Beograd, 7 shkurt 2006 - Zv/kryeministri serb Mirolub Labus ka vlerësuar se deklarata e drejtorit politik të Forin Ofisit britanik Xhon Suaers pro pavarësië së Kosovës është e "pashumbullt".

"Nëse dikush vërtet dëshiron që në bisedimet për statusin e Kosovës të arrijmë zgjidhje atëherë nuk duhet që paraprakisht të përcaktojë rezultatin përfundimtar", thotë Labus, duke reaguar ndaj deklaratës së Suaersit. Ai tha se "qeveria e Serbisë angazhohet hap pas hapi dhe të gjitha mund të vëhen në rend dite, por deklaratat si ajo e Sauersit nuk do të ndihmojë në zhvillimin e shpejtë dhe më të mirë të bisedimeve".

Kreu i Listës serbe për Kosovën Oliver Ivanoviq ka deklaruar se Britania e Madhe angazhohet për pavarësinë e Kosovës, por sipas tij këtë qëndrim nuk e ndajnë të gjithë anëtarët e Grupit të Kontaktit. Ndërkaq deklaratën e Sauersit ai e quajti qëndrim që nuk pasqyron gjendjen reale në Grupin e Kontaktit, pro qëndrimit të Britanisë. "Nga bisedimet për statusin e Kosovës mund të nxirret diçka nëse luhet në mënyrë konstruktive. Nëse dikush në Beograd vendos të dalë nga bisedimet, kjo do të ishte zgjidhja më e keqe", thotë Ivanoviq.

Anëtari i Ekipit të Beogradit për negociata mbi statusin e Kosovës Goran Bogdanoviq ka thënë pas takimit në Prishtinë, se diplomati britanik ua ka përcjellë se "serbët duhet ta pranojnë pavarësinë" duke theksuar se "Kosova është edhe shtet i tyre i cili do të jetë shumetnik, por në fund i pavarur".

"Për ne pavarësia e Kosovës është absolutisht e papranueshme, sepse në lëkurën tonë e kemi ndier çka nënkupton përndjekja dhe tortura gjatë shtatë vitete të fundit në krahinë nën pushtetin e bashkësisë ndërkombëtare dhe vetëm mund të paramendojmë se çka do të na gjente sikur shqiptarët ta merrnin tërë pushtetin me fitimin e pavarësisë", ka thënë Bogdanoviq.

Ndërkaq kryetarja e të ashtuquajturës "Qendër Bashkërenduese për Kosovën" Sanda Rashkoviq Iviq ka deklaruar se nëse qëndrimi i tërë Grupit të Kontaktit është pro pavarësisë së Kosovës, atëherë Beogradi duhet ta rishqyrtojë pjesëmarrjen e vet në negociatat mbi statusin e ardhshem të Kosovës.

"Nëse ky është vërtet qëndrim i Britanisë së Madhe në Grupin e Kontaktit, habitem përse Sauers nuk ofron zgjidhje të ngjashme për Irlandën apo Uellsin. Nëse është qëndrim i gjithë Grupit të Kontaktit, atëherë Beogradi duhet ta rishikojë pjesëmarrjen e vet në negociatat mbi statusin e ardhshem mbi Kosovën", ka thënë Sanda Rashkoviq Iviq.

 

 

UNMIK-u përshëndet propozimin e LDK-së për President të Kosovës

 

Prishtinë, 7 shkurt 2006 - Me të mësuar lajmin se LDK zyrtarisht ka propozuar kandidatin e saj për President të Kosovës, shefi i UNMIK-ut Soren Jesen Petersen tha se "ky do të jetë një sinjal jashtëzakonisht i rëndësishëm për bashkësinë ndërkombëtare".

"Tani kemi nevojë për të njëjtën pjekuri dhe përgjegjësi politike, që u tregua pas vdekjes së Presidentit Ibrahim Rugova", tha Petersen, pas një takimi që zhvilloi sot me kryeparlamentarin Nexhat Daci.

Pas vendimit të saj, Kryesia e LDK-së zyrtarisht e njoftoi kreun e UNMIK ut për kandidatin e saj.

"E njoftuam shefin e UNMIK ut se Kryesia qendrore e LDK së sot ka marrë vendim unanim për kandidatin për President të Kosovës. Ishte obligim yni që ta njoftojmë Petersenin", tha nënkryetari i LDK së Kolë Berisha, pas takimit me shefin e UNMIK ut. Berisha vlerësoi se Fatmir Sejdiu është kandidat i cili do të jetë i pranueshëm për të gjithë.

Nga ana e saj administrata e UNMIK ut shprehu kënaqësinë me vendimin e partisë më të madhe për kandidaturën e Fatmir Sejdiut për President të Kosovës.

"Mendoj se ky do të ishte sinjal jashtëzakonisht i rëndësishëm që Kosova mund të dërgojë pas qëndrimit shumë të mirë dhe dinjitoz në ditët pas vdekjes së Presidentit Rugova", u shpreh Petersen, i cili kërkoi nga politikanët pjekuri politike, unitet dhe përgjegjësi.

"Tani kemi nevojë për të njëjtën pjekuri, përgjegjësi dhe dinjitet politik. Kosova nuk mund të bëjë asgjë më mirë se sa të dërgojë sinjalin për ruajtjen e unitetit, për zgjedhjen e Presidentit të ri dhe sinjalin se trashëgimia e Ibrahim Rugovës do të vazhdojë", nënvizoi Petersen.

Gjithashtu Petersen shpreson që zgjedhja e kreut të vendit nga Kuvendi i Kosovës do të bëhet para mbledhjes së Këshillit të Sigurimit që do të mbahet më 14 shkurt, vetëm një ditë pas mbledhjes së radhës së parlamentit të Kosovës.

 

 

Sipas gazetës "Politika", Uizneri e Uashingtoni angazhohen për pavarësinë e plotë të Kosovës

 

Beograd, 7 shkurt 2006 - Shtypi i Beogradit ngadalë po ia bën të qartë opinionit serb se Kosova mund të bëhet e pavarur. Në këtë aspekt, gazeta e njohur serbe "Politika" hedh diçka më shumë dritë, duke cituar të dërguarin e posaçëm amerikan Frenk Uizner për Kosovën nga bisedat që ka pasur me zyrtarët e Beogradit.

 

Siç mëson gazeta, Uizner citohet të ketë thënë se konceptin e pavarësisë së kushtëzuar e konsideron të pakuptimtë. "Vendi ose është i pavarur ose jo", ka sqaruar Uizner.

 

Por Uizner u ka thënë krerëve të Beogradit se liderët politikë opinionit serb duhet t'ia shpjegojnë se si "Kosovën e ka humbur Millosheviqi dhe radikalët" dhe se humbja e Kosovës nuk është ndëshkim për udhëheqjen aktuale të Serbisë. Nga kjo, siç shkruan gazeta, mund të nxirret konkluzioni se Uizner dhe Uashingtoni megjithatë angazhohen për pavarësinë e plotë të Kosovës.

 

Madje, sipas gazetës, deklarata të ngjashme muajve të fundit në bisedat private japin edhe disa diplomatë të huaja perëndimorë.

 

Para Uiznerit, gazeta thotë se një emisar i lartë i bashkësisë ndërkombëtare (i panjëjtësuar) është interesuar sesi mund të evitohet "dëmi politik" i shkaktuar me shkëputjen e Kosovës, por në këtë temë askush me të nuk ka dashur të bisedojë, shkruan "Politika".

 

 

SHBA-të vitin e ardhshëm do të ndihmojnë Kosovën me 79 milionë dollarë

 

Uashington, 7 shkurt 2006 - SHBA-të në kuadër të programit të mbështetjes financiare vendeve të Evropës Lindore (SEED) për vitin 2OO7 do të ndihmojnë Kosovën në vitin e ardhshëm 2OO7 me më shumë fonde - 79 milionë dollarë krahasuar me 74 milionë sa janë për sivjet.

SHBA-të gjithashtu në vitin 2OO7 do të vazhdojnë të ndihmojnë edhe Serbinë e Malin e Zi, Shqipërinë, Bosnjën e Hercegovinën dhe Maqedoninë. Ndërkaq Uashingtoni në anën tjetër mendon se Kroacia ka shënuar progres të mjaftueshëm në reformat e saj dhe se ndihma më nuk i nevojitet. Në propozimin e buxhetit për vitin 2OO7 ndihma më nuk do të marrin as Bullgaria e Rumania, sepse siç vlerësohte, ato kanë shënuar përparim të mjaftueshëm në reformat politike dhe ekonimike.

 

 

Shefi i diplomacisë franceze dhe i dërguari i posaçëm i KB biseduan në Paris për Kosovën

 

Paris, 7 shkurt 2006 - Shefi i diplomacisë franceze, Filip Dust Blazi dhe i dërguari i posaçem i Kombeve të Bashkuara për statusin e Kosovës, Marti Ahtisari kanë bërë thirrje dje në Paris për zgjidhjen e aspekteve "konkrete e praktike" të statusit të Kosovës në prag të marrjes së vendimit mbi statusin e ardhshem të saj.

"Paraprakisht duhet punuar në përmbajtjen konkrete të statusit të ardhshëm veçmas duke përfshirë çështjen kruciale të drejtave të pakicave dhe mbrojtjen e thesarit kulturor të bashkësisë serbe në Kosovë", ka deklaruar Dust Blazi pas bisedimeve me Ahtisarin.

 

 

Paten: Progresi në Ballkan mund të ndalet nëse së shpejti nuk zgjidhet çështja e Kosovës

 

Uashington, 7 shkurt 2006 - Kris Paten, ish-komesioner i Komisionit Evropian konsideron se SHBA-të dhe Bashkimi Evropian kanë bashkëpunuar në rajonin e Ballkanit dhe në saje të strategjisë transatlantike vendet e Ballkanit

 

Perëndimor janë nisur në rrugën e reformave që janë të domosdoshme për t'u bërë anëtarë të BE-së. Mirëpo, sipas tij, ky proces i progresit mund të ndalet nëse së shpejti nuk zgjidhet çështja e Kosovës. Evropa po punon në arritjen e një zgjidhjeje të përhershme për Kosovën, tha Paten për "Zërin e Amerikës".

"Synojmë një rezultat i cili nuk do të ishte kthim në gjërat e mëpaarshme; nuk synojmë krijimin e 'Shqipërisë së madhe' - kjo do të ishte e papranueshme. Cilado që të jetë zgjidhja, ajo duhet të ofrojë garancione specifike dhe të verifikuara për pakicën serbe në Kosovë".

Gjithashtu Paten paralajmëron se zgjidhja nuk qëndron në propozimet për ndarjen e Kosovës.

"Mendoj se ndarja e Kosovës do të ishte një zgjidhje humbëse. Ideja që problemet në Ballkan mund të zgjidhen me copëtimin e kufijve do të ishte e paarsyeshme", thotë Paten.

 

 

Kryesia e LDK-së ngushëllon familjen Pajaziti

 

Prishtinë, 7 shkurt 2006 - Kryesia e Lidhjes Demokratike të Kosovës nëpërmjet një telegrami i shpreh ngushëllimet më të thella familjes Pajaziti, me rastin e vdekjes së Qerim Pajazitit, babait të dëshmorit Zahir Pajaziti.
"Pranoni ngushëllimet më të thella në emër të Kryesisë së LDK-së dhe anëtarësisë së gjerë të Lidhjes Demokratike të Kosovës me rastin e humbjes së prindit dhe babait të dëshmorit të kombit, Qerim Pajaziti", thuhet në ngushëllimet e LDK-së të nënshkruar nga Kolë Berisha, nënkryetar.

Qerim Pajaziti, babai i dëshmorit të kombit, Zahir Pajaziti, ndërroi jetë dje pas një sëmundjeje të shkurtër, në moshën 80 vjeçare. Varrimi i të ndjerit bëhet sot në orën 12 në varrezat e fshatit Orllan të Podujevës.

Familjen Pajaziti e kanë ngushëlluar edhe Kryeministri i Kosovës, Bajram Kosumi, kryetari i PDK së, Hashim Thaçi, Aleanca për Ardhmërinë e Kosovës etj.

 

 

Fatmir Sejdiu edhe zyrtarisht kandidat i LDK-së për President të Kosovës

 

Prishtinë, 7 shkurt 2006 - Fatmir Sejdiu edhe zyrtarisht propozohet kandidat i LDK-së për President të Kosovës, vendosi në mënyrë unanime Kryesia e kësaj partie në takimin e sotëm të paradites. Prakitikisht vendimi ishte marrë më 30 janar, por nuk u zyrtarizua për të respektuar zinë kombëtare në nderim të Presidentit Ibrahim Rugova që zgjati deri më 6 shkurt.

Propozimi i LDK-së sot do t'i përcillet Kryesisë së Kuvendit të Kosovës për ta vënë në rendin e ditës së mbledhjes së Kuvendit të Kosovës që do të mbahet më 9 shkurt.

Kandidaturën e Fatmir Sejdiut tashmë e ka mbështetur edhe partneri kryesor në koalicionin qeveritar AAK, pastaj PSHDK, Partia Demokratike Turke si dhe disa subjekte të tjera.

 

 

Sauers u ka thënë përfaqësuesve të serbëve se duhet të pranojnë pavarësinë e Kosovës

 

Prishtinë, 7 shkurt 2006 - Drejtori politik në Forin Ofisin britanik Xhon Sauers u ka thënë mbrëmë përfaqësuesve të serbëve se Grupi i Kontaktit ka vendosur që Kosova të jetë e pavarur. Këtë e ka konfirmuar për mediat serbe anëtari i Ekipit negociator të Beogradit për statusin e Kosovës Goran Bogdanoviq, i cili ka pohuar se Sauers u ka thënë se duhet të pranojnë pavarësinë e Kosovës.

"Kemi pasur një takim të pakëndshëm sepse Sauers tha se Grupi i Kontaktit ka vendosur që Kosova të jetë e pavarur dhe në njëfarë mënyre na bindi se duhet ta pranojmë vendimin e tillë dhe se kjo është mënyra e vetme dhe është diçka më e mirë për serbët që kanë mbetur në Kosovë dhe për ata që duan të kthehen", tha Bogdanoviq, i cili është shprehur i pakënaqur me qëndrimin e Grupit të Kontaktit.

 

Ai thotë se negociatat për statusin final më nuk janë të nevojshme. "Pse do të luanim ndeshjen nëse rezultati është i njohur që më parë", thotë Bogdanoviq. Por sipas mendimit të tij ky është rast i mirë edhe për Beogradin që të mendojë se ç'të bëjë më tutje dhe si t'ia bëjë, thotë ai.

 

 

Xh.Sauers: Pavarësia e Kosovës mund të prodhojë stabilitet në rajon

 

Prishtinë, 7 shkurt 2006 - Zgjidhja e statusit të Kosovës, pëfrshirë këtu edhe opsionin e pavarësisë së saj mund të prodhojë stabilitet në rajon, nëse Kosova ndërton një të ardhme ku të gjithë qytetarët e saj, pavarësisht përkatësisë së tyre, do të ishin të barabartë.

 

Kështu u shpreh drejtori politik i Forin Ofisit britanik, Xhon Sauers pas takimeve që pati dje pasdite në Prishtinë. Ai ka shtuar se si parametra kryesorë në bisedimet për statusin gjatë këtij viti është Kosova shumetnike dhe zgjidhja që përputhet me vullnetin e popullatës shumicë.

Sauers zhvilloi një takim me Ekipin Negociues për statusin e Kosovës, ku janë prezantuar qëndrimet e Grupit dhe të Qeverisë britanike sa i përket zgjidhjes së statusit të Kosovës. Sauers përsëriti qëndrimin e qartë të Grupit të Kontaktit që statusi i Kosovës duhet të zgjidhet gjatë këtij viti, duke u bazuar në masën më të madhe në vullnetin e popullatës shumicë të Kosovës, por duke respektuar njëkohësisht edhe interesat e pakicave.

Sauers është takuar edhe me shefin e UNMIK ut, Soren Jesen Petersen dhe me përfaqësuesit e serbëve të Kosovës.

Pas takimit me anëtarët e Ekipit Neogociues për statusin, Saures ka kërkuar unitet dhe maturi politike për t[i realizuar siç tha ai aspiratat e tyre dhe të popullatës së Kosovës.

Duke u përgjigjur në pyetjen e gazetarëve nëse pavarësia e Kosovës do të prodhonte stabilitet në rajon, Sauers tha:
"Natyrisht e ardhmja e Kosovës do të përcaktohet gjatë këtij viti në bazë të parimeve të përcaktuara nga Grupi i Kontaktit". Ai kërkoi që vakumi i krijuar në postin e Presidentit të Kosovës të plotësohet sa më shpejt.

"Në negociatat për statusin gjatë këtij viti duam të sigurohemi se statusi final i Kosovës forcon stabilitetin në rajon dhe nuk krijon shqetësime apo kërcënime për vende tjera. Për këtë po punojmë dhe për këtë është prania e NATO s këtu. Ne duam që Kosova, Serbia dhe vendet tjera të rajonit të lëvizin përpara drejtë anëtarësimit të plotë në Bashkimin Evropian dhe në NATO, por shumë nga kjo është në duart tuaja, në duart e njerëzve të Kosovës, që duhet të tregojnë se Kosova mund të arrijë vlerat dhe aspiratat e fqinjëve dhe partnerëve tuaj në Evropë", tha diplomati britanik Sauers.

Ai ka theksuar se në Kosovë do të ketë një prani ndërkombëtare edhe në të ardhmen.

Ndërkaq Kryeministri Bajram Kosumi tha se e ka siguruar përfaqësuesin e lartë britanik se Kosova dhe Qeveria e tij janë të përkushtuara, që të ndërtojnë një Kosovë të pavarur, ku të gjithë qytetarët të jenë të barabartë.

Ndërkaq, Kryetari i Kuvendit të Kosovës Nexhat Daci tha se Ekipi Negociues i Kosovës për statusin i ka transmetuar z. Sauers gatishmërinë e vet për të vazhduara bisedimet si për decentralizimin në Vjenë ashtu edhe për çështje tjera që ndërlidhen me zgjidhjen e statusit të Kosovës.

Pas Prishtinës sot diplomati britanik Xhon Sauers viziton Beogradin.

 

 

Diplomati Sauers ka theksuar se Presidenti Rugova ka lënë një vakuum të madh

 

Prishtinë, 7 shkurt 2006 - Drejtori politik në Ministrinë e Jashtme britanike, Xhon Sauers ka kërkuar nga liderët e Kosovës që të tregohen se Kosova është një shoqëri që funksionon si një demokraci e pjekur.

 

Ai ka përkujtuar se gjatë ditëve të pikëllimit për Presidentin e ndjerë të Kosovës Ibrahim Rugova, njerëzit e Kosovës kanë arritur që të marrin simpatinë e bashkësisë ndërkombëtare. Diplomati britanik Xhon Sauers ka theksuar se Presidenti Rugova ka lënë një vakuum të madh, i cili duhet të përmbushet tani nga liderët e rinj.

"Andaj unë ju nxis që të çoni përpara atë frymë, të kujtoni qëllimet dhe dinjitetin e vlerat e Presidentit Rugova dhe të ecni përpara", ka thënë diplomati britanik Xhon Sauers.

 

 

Familja e Presidentit Rugova do ta ketë mbështetjen e plotë të LDK së

 

Prishtinë, 7 shkurt 2006 - Kryesia e LDK së, në përbërje të plotë dje ngushëlloi familjen e Presidentit Rugova për humbjen e kryefamiljarit, zotit të shtëpisë dhe Presidentit të vendit Dr. Ibrahim Rugova.

Kryesia e LDK së me këtë rast shprehu edhe njëherë zotimin për unitet të plotë në radhët e saj dhe vazhdimësinë e punës me përkushtim për finalizimin e vizionit të Presidentit Rugova për Kosovën shtet të pavarur dhe demokratik.

Të gjithë anëtarët e Kryesisë thanë se Familja e Presidentit Rugova do ta ketë mbështetjen e plotë të LDK së dhe ajo do të qëndrojë pranë familjes së Presidentit.

Familja e Presidentit Rugova sot gjithashtu në Rezidencën në Velani shtroi drekë për Kryesinë e LDK së, për bashkëpunëtorët e Presidentit, të cilët për 16 vjet drejtuan LDK në të udhëhequr nga Ibrahim Rugova.

 

 

Nuk ka sinjale nga Amerika për pakësimin e numrit të trupave amerikane në Kosovë, tha gjenerali Ovens

 

Ferizaj, 7 shkurt 2006 - Nuk ka sinjale nga Amerika për pakësimin e numrit të trupave amerikane në Kosovë. Kështu është shprehur komandanti i Brigadës Shumëkombëshe të Lindjes, gjenerali, Darel Ovens. Por, sipas tij, nëse kjo ndodh do të ishte shenjë e mirë. Gjenerali Ovens tha se madhësia e trupës së KFOR it varet nga përmasat e operacioneve dhe se çdo zvogëlim trupash tregon se gjendja është më e mirë se më parë. Gjenerali Ovens i bëri këto komente dje gjatë një vizite në Kuvendin komunal të Ferizajt.

 

 

Lavrov: Një zgjidhje përmes bisedimeve është e vetmja zgjidhje afatëgjatë për Kosovën

 

Athinë, 7 shkurt 2006 - Ministri i jashtëm rus Sergej Lavrov ka filluar një vizitë në Athinë, ku bisedimet për statusin e Kosovës kanë qenë pjesë e takimeve. "Një zgjidhje nëpërmjet bisedimeve dhe jo nëpërmjet presioneve nga jashtë është e vetmja zgjidhje afatgjatë për zgjidhjen e çështjes së Kosovës dhe atë të Qipros. Ky qëndrim është i përbashkët për Greqinë e Rusinë", ka thënë Lavrov. Sipas tij, shkelja e këtij parimi krijon një presedencë të rrezikshme.

 

 

Deklaratë e Kryesisë së BIK me rastin e botimit të disa karikaturave ofenduese ndaj vlerave islame

 

Prishtinë, 7 shkurt 2006 - "Ofendimi dhe përdhosja e të Dërguarit të Allahut të Gjithëmëshirshëm përmes disa karikaturave që në shënjestër profeti i fundit Muhamedi (a.s.), nga aspekti islam ishte i ndaluar. Ky parim islam siç vlen për veprimet ofenduese kundër Muhammedit a.s., ne njejtë e trajtojmë edhe kur bëhet kundër Isait, Musait, Ibrahimit apo akëcilit profet.

 

Prandaj, një veprim i tillë duke qenë në kundërshtim direkt me normat islame, për myslimanët është i papranueshëm, është ofendues dhe si të tillë e gjykojmë", thuhet në një deklaratë të Kryesisë së Bashkësisë Islame të Kosovës.

"Kur një veprim i ngjashëm duke e paraqitur Muhammedin a.s. në formën që ai asnjëherë nuk e ka pasur dhe skajshmërisht të papranueshme, nuk mund e mos të konsiderohet si veprim i paramendueshëm kundër vlerave të mirëfillta islame. Ne plotësisht e kuptojmë të drejtën dhe lirinë e shprehjes. Mirëpo, kjo e drejtë nuk duhet të manifestohet duke i ofenduar vlerat më të shenjta të të tjerëve", thuhet në këtë deklaratë dhe theksohet:

"Kryesia e Bashkësisë Islame të Kosovës e kupton revoltën e myslimanëve gjithandej nëpër botë si reagim kundër ofendimeve ndaj Profetit Muhammed. Mirëpo, kur revolta merr përmasa shkatërruese dhe keqpërdoret për qëllime të tjera, ajo për ne është e papranueshme".

"Me këtë rast do të theksonim se reagimi i disa organizatave dhe asociacioneve të krishtera lidhur me rastin konkret, të cilët e kanë gjykuar edhe botimin e karikaturave e edhe veprimin e disa ekstremistëve, ka qenë me vend dhe i drejtë dhe lë të shpresohet se ekziston dëshirë për mirëkuptim dhe tolerancë në mes qytetërimeve.

Kryesia e Bashkësisë Islame të Kosovës angazhohet që në këtë botë kozmpolitike duhet të përkrahen forcat që i afrojnë qytetërimet, të përkrahen orientimet që njerëzit në botë i konsiderojnë vëllezër të gjinisë njerëzore, e kurrsesi ato forca ekstreme, qëllimi it ë cilave është futja e konfliktit në mes të qytetërimeve, e që fatkeqësisht jo rrallë ato bëhen edhe në emër të fesë. Për më tepër, ne nuk guxojmë të lejojmë që një ekstremizëm të luftohet me një ekstremizëm tjetër", thuhet në fund të deklaratës së Kryesisë së BIK.