|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Lajmet e ditës

06 shkurt 2006 / TN /QIK

• Mustafaj: Pavarësia e Kosovës është formula e vetme
• Vizitorët thonë se gjithmonë do ta vizitojnë vendin ku pushon udhërrëfyesi i Kosovës, Presidenti Rugova
• Zvicra ka qëndrim të avancuar për të ardhmen e Kosovës
• Presidenti Moisiu në një takim me shefin e diplomacisë spanjolle, ritheksoi qëndrimin për pavarësinë e Kosovës
• Deputetët e Listës Serbe paralajmërojnë se mund të kthehen në institucionet e Kosovës
• Nga shpërthimi i një bombe në pjesën veriore të Mitrovicës është vrarë (vetë)vrarë një serb
• Analistët e radios "Evropa e lirë" komentojnë deklarimet e Presidentit rus rreth Kosovës
• Kolegjiumi i Degëve të LDK së në Diasporë: Presidenti i ri duhet zgjedhur sa më shpejt
• "Vullnetin e shumicës së popullit të Kosovës unë e kam plotësisht të qartë", tha Kauder
• Diplomati britanik Xhon Sauers sot takon Grupin Negociator të Kosovës
• Bërns diskuton për Kosovën me ministrat e Ballkanit Perëndimor më 13 shkurt në Uashignton
• Menzis: Presidenti Rugova do të mbetet në kujtesë si njeriu që e solli Kosovën në prag të pavarësisë
• Austria kundër zvogëlimit të trupave paqëruajtëse në Kosovë
• Berisha: Pavarësia e Kosovës do të shërbejë për forcimin e stabilitetit edhe në Serbi
• Kryesia e LDK-së dënon sulmin ndaj zyrës së saj në Deçan
  
   

    

Mustafaj: Pavarësia e Kosovës është formula e vetme

 

Tiranë, 6 shkurt 2006 - Ministri i Punëve të Jashtme të Shqipërisë, Besnik Mustafaj, bisedoi me Ministrin e Jashtëm të Mbretërisë së Spanjës, Migel Anhel Moratinos.

Mes tjerash Mustafaj u ndal rreth zhvillimeve në Kosovë dhe theksoi se vdekja e Presidentit Rugova ishte një humbje e madhe për Kosovën. Por ai shtoi se Kosova tashmë i ka institucionet e veta, Kuvendin, qeverinë, grupin negociator, të cilat garantojnë për një zhvillim paqësor të situatës atje.

Në një konferencë të përbashkët për shtyp Mustafaj siguroi se ndër të gjitha shtetet e rajonit, më e interesuara për stabilitet në Kosovë është Shqipëria dhe se pavarësia është formula e vetme.

"Ne jemi të bindur se e vetmja formulë për statusin final të Kosovës, që prodhon stabilitet, do të jetë pavarësia. Dhe kjo pavarësi duhet shoqëruar me disa kushte apo garanci të domosdoshme", u shpreh Mustafaj për të shtuar: "Nuk do të ketë ndryshim të kufijve, pra mosbashkimi i Kosovës me ndonjë shtet fqinj, mosndarja e Kosovës si dhe një prezence ndërkombëtare civile dhe ushtarake, mandati i të cilës duhet të negociohet nga negociatorët".

 

 

Vizitorët thonë se gjithmonë do ta vizitojnë vendin ku pushon udhërrëfyesi i Kosovës, Presidenti Rugova

Prishtinë, 6 shkurt 2006 / Idriz MORINA - Në ditën e nëntë të homazheve në Varrezat Përkujtimore në Velani, që kur iu dha lamtumira e fundit Presidentit Ibrahim Rugova, qytetarët e Kosovës po vazhdojnë t’i bëjnë në shenjë nderimi për krijuesin e shtetit modern të Kosovës.

Njëra nga pikat më të larta të Prishtinës, është shndërruar në vendin më të vizituar që nga krijimi i këtij qyteti, që ka një listë të vogël vendvizitash.

Pak kohë më parë Prishtina filloi të tërheqë vëmendjen e vizitorëve ditorë, me vënien e monumentit të Skënderbeut, kryeheroit shqiptar në qendër të qytetit, pas të cilit Dr.Rugova besohet të jetë figura më madhështore kombëtare shqiptare.

 

Këtij monumenti historik i është bashkuar, që nga vdekja e Presidentit Rugova, varri i tij, që qysh tash ka fituar emrin e një vendi peligrinazhi, që bashkon vendvizitat turistike dhe ato të shenjta, që nuk ndodhet anjë vend tjetër i tillë në Kosovë.

 

Për shqiptarët kjo e dyta është rrënjosur në vetëdijen e tyre, për njeriun më meritorë për krjimin e shtetit modern të Kosovës, nga e cila u nda në përfundim të këtij procesi, që siç thoshte ai të njohjes formale të pavarësisë, njohje që pret të zyrtarizohet më së largu në vjeshtën e këtij viti.

Në shenjë nderimi për këto vlera si dhe për ruajtjen e qenies shqiptare nga tmerret e luftës, dhe për shumë kujtime dhe vlerësime të tjera që ruajnë qyetarët për të, edhe këto ditë acari, vizitat e mijëra qytetarëve të ardhur në mënyrë të organizuara dhe spontane nga të gjitha viset e Kosovës si dhe nga viset tjera shqiptare, kanë vazhduar edhe sot.

 

Në mesin e këtyre delegacioneve që kanë bërë vizita dhe kanë vendosur kurora lulesh ishte edhe ai i kryesuar nga ministri i Pushtetit Lokal, Lutfi Haziri, që shoqërohej nga i gjithë stafi drejtues i kësaj ministrie. Ndërsa, ndër grupet më të mëdha që kanë ardhur sot, ishte vizita e shkollës së mesme ekonomike nga Podujeva, ndërsa nuk ndërpriteshin as për një çast vizitat familjare dhe ato në grupe të vogla.

Poashtu vizitat kanë vazhduar edhe gjatë uikendit, në mënyrë të organizuar ishin qindra qytetarë dhe nxënës nga Gjilani, pastaj nga Dardana, një delegacion i kryesuar nga kryetari i Degës së LDK-së dhe i qytetit, Shaip Surdulli, që kishin udhëtuar me autobusë.

Shumë qytetarë të Kosovës, qoftë edhe rastësisht kur i bie të vijnë në Prishtinë, nuk kthehen nga kryeqyteti pa vizituar vendin ku pushon udhërrëfyesi i tyre, Presidenti Rugova, me të cilin fati i tyre ishte i lidhur pashkëputshëm. Dhe ua shpërbleu, si askush tjetër në histori. Ndërsa, ata sot sikur po përpiqen t’ua kthejnë këtë borxh.

Ndërsa, dita e zisë po mbaron sot, por bashkë me pikëllimin zyrtar dhe velin e zisë, asgjë më tepër. Zbrazëtia e thellë që ka lënë në politikën dhe në kujtesën shqiptare, qytetarët po përpiqen ta gjejnë këtë ngushëlli të paktën duke vazhduar nderimin për presonalitetin e Presidentit Rugova.

Edhe në ditët e tjera dhe në gjithë të ardhmen do të vazhdojnë homazhet dhe nderimet, në "Varrezat Përkujtimore".

Ato nuk marrin fund, sot, sepse sapo kanë filluar. Gjer më sot do të kenë qenë rreth gjysmë milioni për homazhe pas lamtumirës së fundit.

"E vlerësojmë shumë, ka qenë shumë i mirë", thotë Bedrije Mulliqi, nga Prishtina, që është vetëm një nga ata mijëra njerëz që vijnë për herëv të dytë e të tretë për homazhe. "Dhe do të vijë edhe shumë herë të tjera. Gjithëherë do të vijmë", thotë ajo.

 

 

Zvicra ka qëndrim të avancuar për të ardhmen e Kosovës

 

Prishtinë, 6 shkurt 2006 - Kryetari i Kuvendit të Kosovës, Nexhat Daci, ka pritur sot deputeten e Parlamentit të Zvicrës, zonjën Doris Strump, e cila shoqërohej nga shefja e Zyrës Suedeze, Ann ? Sofie Nilsson dhe shefja e Zyrës Zvicerane,Yvana Enzler.

Në takim është biseduar për zhvillimet në Kosovë, për bashkëpunimin ndërmjet dy parlamenteve dhe për pozitën e gruas në vendimmarrje.

Kreu i legjislativit të Kosovës, duke folur për zhvillimet në Kosovë, ka theksuar se Kosova është e përgatitur për bisedimet lidhur me statusin dhe se vendi ynë i plotëson kushtet të jetë shtet i pavarur. Pos me vullnetin e fortë të institucioneve dhe të qytetarëve, këtë e ka ilustruar edhe më faktin që Kosova e krijon vetë buxhetin e saj, por të cilin ende nuk e menaxhon në mënyrë të pavarur.

Sa i përket pjesëmarrjes së gruas në institucionet e Kosovës, Daci është shprehur i kënaqur, madje ka theksuar se në Kuvendin e Kosovës ajo përfaqësohet me mbi 30 për qind në numrin e tërësishëm të deputetëve, por ka shtuar se duhet të rritet roli saj në vendimmarrje.

Deputetja në Parlamentin e Zvicrës, zonja Doris Strump, e cila gjatë qëndrimit në Kosovë do të ketë takime edhe me gratë parlamentare të Kosovës, të cilave do tu ligjërojë për fuqizimin e gruas në vendimmarrje, ka thënë se në Parlamentin Zviceran gratë janë të përfaqësuara me 25 për qind të numrit të deputetëve. Ajo, ndërkaq është shprehur e befasuar me zhvillimet pozitive në Kosovës, sidomos për konsideratat e popullit të Kosovës për popullin e Zvicrës.

Profesor Daci këtë e ka shpjeguar me qëndrimin e avancuar të Zvicrës për të ardhmen e Kosovës dhe me faktin që Zyra Zvicerane e para është kujdesuar që në Prishtinë t?i japë vizat për kosovarët që punojnë ose duan ta vizitojnë Zvicrën.

Bashkëbiseduesit janë pajtuar se ka hapësirë për bashkëpunim edhe më intensiv ndërmjet Zvicrës dhe Kosovës, sidomos ndërmjet parlamenteve.

 

 

Presidenti Moisiu në një takim me shefin e diplomacisë spanjolle, ritheksoi qëndrimin për pavarësinë e Kosovës

 

Tiranë, 6 shkurt 2006 - Presidenti i Shqipërisë Alfred Moisiu priti sot Ministrin e Jashtëm të Spanjës, Migel Anhel Moratinos.

Presidenti Moisiu pasi nënvizoi konsideratën për kontributin që ka dhënë e jep Spanja për paqen dhe stabilitetin e rajonit ballkanik, vuri në dukje misionin paqeruajtës spanjoll në Kosovë.

 

Duke u ndalur në çështjen e zgjidhjes së statusit të Kosovës në këtë takim u theksua domosdoshmëria e një zgjidhjeje të qëndrueshme dhe u ritheksua qëndrimi i Tiranës për pavarësinë. Ndërkaq Ministri i Jashtëm spanjoll u ndal në rëndësinë që ka për sigurinë në rajon përshpejtimi i negociatave për statusin.

Me ministrin e jashtëm spanjoll janë takuar edhe kryeministri Sali Berisha dhe ministri i Jashtëm Besnik Mustafaj.

 

 

Deputetët e Listës Serbe paralajmërojnë se mund të kthehen në institucionet e Kosovës

 

Prishtinë, 6 shkurt 2006 - Deputetët e Listës Serbe për Kosovën paralajmërojnë se mund të kthehen në institucionet e Kosovës, pas bojkotit prej rreth dy vjetësh. Përfaqësuesi i kësaj liste, Oliver Ivanoviq, pas takimit me shefin e UNMIK ut, Soren Jesen Petersen tha se ka pritur fillimin e bisedimeve për statusin e Kosovës për të marrë një vendim për pjesëmarrje në institucione.

 

Ishte frika e madhe e serbëve që të hyjnë në institucionet para se të fillojnë negociatat që sipas tij ka mundur të keqpërdoret dhe të jepet vlerësim i gabuar se situata për pakicat është e mirë. "Tash ky proces ka filluar dhe kthimi ynë është afër", u shpreh Ivanoviq.

Ai nuk është i sigurt nëse kthimi i serbëve në institucione mund të bëhet para 20 shkurtit kur pritet mbajtja e një takimi në Vjenë për decentralizimin, ndërmjet Prishtinës dhe Beogradit.

Javën e kaluar Ivanoviq akuzoi Beogradin se ka penguar pjesëmarrjen e subjektit të tij në institucionet e Kosovës, duke e cilsuar këtë vendim si gabim të rëndë. Mirëpo pas takimit të përfaqësusve serbë me të dërguarin amerikan në procesin e statusit, Frenk Uizner, ata lanë të kuptohet se vendimi për kthim në institucione do të merret nga përfaqësuesit e Listës të cilët kanë tetë ulëse në Kuvendin e Kosovës.

Ndërkohë, zyrtarët e Beogradit ende nuk kanë komentuar paralajmërimin e serbëve të Kosovës që të kthehen në institucione.

Në takimin e sotëm Ivanoviq dhe Petersen kanë diskutuar edhe për çështjen e energjisë elektrike dhe telefonave në lokalitetet serbe. Përndryshe Ivanoviq tha se probleme me energjinë kanë të gjithë, por sipas tij, serbët janë më të diskriminuar pasi për shkaqe sigurie nuk mund të dalin dhe të sigurojnë lëndë djegëse për ngrohje.

 

 

Nga shpërthimi i një bombe në pjesën veriore të Mitrovicës është vrarë (vetë)vrarë një serb

 

Mitrovicë, 6 shkurt 2006 - Nga shpërthimi i një bombe sot herët në mëngjes në pjesën veriore të Mitrovicës një person është vrarë. Sipas mediave serbe, nga ky shpërthim është vrarë Mladen Saviq, trupi i pajetë i të cilit është dërgaur në spitalin e Mitrovicës rreth orës 3.45 me gjurmë të copave të bombës nëpër trup.
Policia e UNMIK-ut ka përjashtuar mundësinë që kjo vrasje të ketë motive entike dhe sipas të gjitha gjasave bëhet fjalë për vetëvrasje.

 

 

Analistët e radios "Evropa e lirë" komentojnë deklarimet e Presidentit rus rreth Kosovës

 

Pragë, 6 shkurt  2006 - Analistët e radios "Evropa e lirë", duke komentuar deklarimet e Presidentit rus Vladmir Putin rreth Kosovës, ato quajnë "floskula politike", për shkak se "Rusia tash nuk ka as mundësi dhe as dëshirë që të bëhet lojtar serioz në Ballkan".

 

Ajo që konsiderohet të jetë një zgjidhje e pranueshme për popullin e Kosovës është një zgjidhje që në fakt është pavarësi e vërtetë, thonë analistët Patrik Mur dhe Andrej Shari.

Presidenti rus Vladimir Putin e di shumë mirë që situata e Kosovës pak a shumë është përfundimtare, kurse diplomatët e Rusisë kanë qenë tashmë pjesë e një marrëveshjeje që do të çojë drejt një forme të pavarësisë së kushtëzuar, që do të thotë pavarësi me garancë ndërkombëtare për pakicat, thotë analisti i radios "Evropa e lirë", Patrik Mur.

Megjithatë, sipas tij, Ballkani mund të mbetet një zonë interesi për rusët, por nuk janë prioritet i tyre.
"Prioriteti i parë i Presidentit Putin janë ish-republikat sovjetike që janë në kufi me Rusinë, sidomos ato që kanë treguar mungesë vullneti që të ndjekin urdhërat e Moskës", thotë analisti Mur, duke marrë si shembull Gjeorgjinë.

Osetia jugore dhe Abkhazia që janë pjesë e Gjeorgjisë, thotë më tej Mur, nuk patën asgjë të ngjashme me autonominë që Kosova pati përmes kushtetutave të vitit 1974. "Prandaj paralelizmi midis këtyre rajoneve nuk është i qartë në këtë mes. Ajo që është e qartë është që presidenti Putin do kërkojë të përfitojë përmes situatës në Kosovë dhe të përpiqet ta përdorë këtë për të shantazhuar Gjeorgjinë", thotë analisti i radios Evropa e lirë.

Ndërkaq duke komentuar komunikatën e Grupit të Kontaktit nga takimi i Londrës për Kosovën, analisti Mur thotë se do të ketë "një lloj statusi që do jetë i bazuar në një mënyrë ose në një tjetër në vetëvendosje dhe në sundimin e shumicës, që mendoj se do të jetë kjo pavarësi e kushtëzuar".

Ai është i mendimit se nuk do të përmendet më integriteti territorial i Serbisë sikur në vitin 1999.

"Shpresoj që nuk do kemi as propozimet e Presidentit Tadiq për gjysmë pavarësi, që nuk do përfshinte ushtrinë apo një vend në Kombet e Bashkuara. Kjo mendoj që është ajo që konsiderohet të jetë një zgjidhje e pranueshme për popullin e Kosovës dhe kjo është një zgjidhje që në fakt është pavarësi e vërtetë", tha analisti Mur.

Analisti tjetër i radios "Evropa e lirë", Andrej Shari

deklarimet e Presidentit të Rusisë Putin i quan "floskula politike", duke shtuar se "Rusia tash nuk ka as mundësi dhe as dëshirë që të bëhet lojtar serioz në Ballkan".

Ai këtë konstatim e ilustron me faktin se Rusia "nuk ka ndonjë interesim për hapësirën e ish-Jugosllavisë". Sipas tij, situata esencialisht ka ndryshuar pas viteve të 90 ta dhe se Moska vetëm "në formë simbolike dëshiron të bëjë veprime sipas të cilave ajo gjoja ka diç për të thënë".

Rusia dëshiron të mbetet faktor politik, por konstruktiv i procesit në Kosovë, duke u angazhuar në planin humanitar, "ndërsa synimi për të luajtur ndonjë rol në planin ekonomik gjithashtu nuk është real", thotë analisti Shari.

"Rrjedhimisht, Rusia në asnjë mënyrë nuk do të vërë në dyshim marrëdhëniet me Perëndimin për shkak të Serbisë", konstaton në fund analisti radios "Evropa e lirë", Andrej Shari.

 

 

Kolegjiumi i Degëve të LDK së në Diasporë: Presidenti i ri duhet zgjedhur sa më shpejt

 

Pristinë/Stokholm, 6 shkurt 2006- Kolegjiumi i Degëve të LDK së për Diasporë - Gjermani, Hazir Krasniqi, Zvicër, Hysen Gërvalla, Beneluks, Gani Azemi, Suedi, Hysen Ibrahimi, etj. - konstaton se pasi të kalojnë ditët e zisë kombëtare nuk ka kohë për të humbur për të vendosur për kreun e vendit.

Në një komunikatë të lëshuar nga kolegjiumi degëve të LDK-së kërkohet që procedura për zgjedhjen e Presidentit të ri të Kosovës të mos zgjatet, por duhet zgjedhur sa më shpejt që është e mundur. LDK duhet të dalë me kandidatin e saj, ndërsa Parlamenti do ta kryejë detyrën e vet kushtetuese, që të votojë dhe ta zgjedhë Presidentin e Kosovës.

"Kolegjiumi vlerëson se në këtë kohë tejet të vështirë, të cilën e përballuam me vështërsi të thellë humbjen fizike të njeriut më të madh të të gjitha kohërave, ideologut dhe arkitektit të Pavarësisë së Kosovës, Presidentin e Kosovës Ibrahim Rugova, diaspora shqiptare është duke e ndjerë në shpirtin e saj zbrazëtirë të madhe, prandaj ne duhet ta çojmë amanetin e Presidentit për Pavarësinë e Kosovës.

 

Mirëpo, duke e marrë parasysh realitetin në të cilën ndodhemi dhe tani në kohën kur e tërë bashkësia ndërkombëtare i ka sytë nga ne dhe kërkon që ne në një kohë sa më të shkurtër, ta zgjedhim Presidentitn e Kosovës dhe procesi të vazhdojë drejt njohjes së Pavarësisë së Kosovës", thuhet në kët komunikatë.

"Kolegjiumi i degëve të LDK së për Diasporë, mori vendim që ta përkrahë fuqishëm kanditaturën për President të Kosovës, Prof. Fatmir Sejdiun, njeriun i cili ishte përkrah kërkesave të popullit të Kosovës dhe lojal në vijën politike të Presidentit të Kosovës Ibrahim Rugova, për Pavarësinë e Kosovës".

Gjithashtu Kolegjiumi i Degëve të LDK së për Diasporë vlerëson lart kontributin e Fatmir Sejdiut që me një përkushtim të lartë iu qas procesit për Pavarësinë e Kosovës. "Ne kërkojmë që kjo përkrahje të hasë tek të gjitha Degët e LDK së në Kosovë, që të dalim unikë në zgjedhjen e Presidentit të Kosovës. Kolegjiumi do të jetë përkrahës i denjë për Presidentin dhe punën e tij, drejtë realizimit të Pavarësisë së Kosovës".

Ndërkohë, Kolegjiumi i Degëve të LDK së për Diasporë, kërkon nga nga bashkësia ndërkombëtare dhe SHBA të, njohjen direkte të pavarësisë së Kosovës, si shtet i pavarur dhe sovran, thuhet në komunikatën për opinion të nënshkruar nga Hysen Gërvalla.

Po ashtu edhe disa degë të LDK-së në Kosovë tashmë kanë përkrahur propozimin që Fatmir Sejdiu të jetë kandidat i LDK-së për President të Kosovës.

Kryesia e LDK-së menjeherë pasi të kalojë zia kombëtare pritet të dalë me propozimin e saj zyrtar për kreun e vendit.

 

 

"Vullnetin e shumicës së popullit të Kosovës unë e kam plotësisht të qartë", tha Kauder

 

Berlin, 6 shkurt 2006 - Gjermania është e interesuar të përcjellë proceset në Kosovë në javët dhe muajt që vijnë, por nuk mund të përzihet e t'u thotë politikanëve të Kosovës të bëjnë atë apo këtë veprim, vetëm mund të ndihmojë, deklaroi Volker Kauder, shef i fraksionit CDU/CSU në Bundestagun gjerman, pas vizitës në Kosovë.

Ndërkaq duke folur për procesin negociator ai tha se duhet të ketë "mirëkuptim edhe për palët që mendojnë ndryshe, apo kanë qëndrim tjetër".

"Mendojmë, se në bisedime duhet të tregohet fleksibilitet në mënyrë që ato të përfundojnë me sukses, ndryshe zhgënjimi do të ishte tejet i madh tek njerëzit këtu", është shprehur Kauder për "Dojçe velen".

Duke folur për cilësitë që duhet t'i ketë presidenti i ri i Kosovës, Kauder tha se ai "duhet të jetë një figurë integruese, duhet të jetë konsensual, i pranueshëm për të gjithë, por ai duhet edhe të tregojë mjaft fleksibilitet për tu bërë oferta të serbëve në Kosovë dhe Qeverisë serbe të pranojnë zgjidhjen për statusin e Kosovës".

Po ashtu Kauder vlerësoi si shumë të rëndësishme deklaratën e fundit të Grupit të Kontaktit për Kosovën. "Vullnetin e shumicës së popullit të Kosovës unë e kam plotësisht të qartë", tha ai pas qëndrimit në Prishtinë.

Kauder po ashtu shprehu bindjen se prezenca e trupave gjermane në Kosovë do të kërkojë një kohë shumë të gjatë. "Çështja e qëndrimit të Bundesverit në Kosovë do të rishqyrtohet vetëm pas zgjidhjes së statusit", tha Kauder duke shtuar se Gjermania ka interes që rajoni të jetë stabil në Evropë, andaj sipas tij, Bundesveri do të duhet të qëndrojë edhe një kohë të gjatë në Kosovë së bashku me trupat e NATO s.

 

 

Diplomati britanik Xhon Sauers sot takon Grupin Negociator të Kosovës

 

Pristinë, 6 shkurt 2006 - Sot pasdite në Prishtinë për një vizitë njëditore në vendin tonë mbërrin Xhon Sauers, drejtor politik në Forin Ofisin britanik.

Si është njoftuar, Sauers do të takojë Grupin Negociator dhe Grupin Politik të Kosovës, si dhe përfaqësuesit politikë të serbëve të Kosovës.

Qëllimi i kësaj vizite është njohja e liderëve shqiptarë dhe serbë me qëndrimet e ministrave të jashtëm nga takimi i Grupit të Kontaktit në Londër, që është drejtuar nga ministri i Jashtëm britanik Xhek Strou.

Diplomati Sauers njëherësh është përfaqësues britanik në takimet e Grupit të Kontaktit, mekanizëm ndërkombëtar që është i përfshirë ngushtë në përcjelljen e procesit politik në Kosovë dhe në zgjidhjen e statusit final.

Sauers do të vizitojë edhe Beogradin, ku do të takohet me zyrtarët më të lartë serbë.

 

 

Bërns diskuton për Kosovën me ministrat e Ballkanit Perëndimor më 13 shkurt në Uashignton

 

Uashignton, 6 shkurt - Shefat e diplomacive të vendeve të Ballkanit Perëndimor do të diskutojnë në Uashington edhe për Kosovën. Ministrat e punëve të jashtme të vendeve nënshkruese të Kartës së Adriatikut - Maqedonisë, Shqipërisë dhe Kroacisë, Ilinka Mitreva, Besnik Mustafaj dhe Kolinda Grabar-Kitan, janë ftuar që të marrin pjesë në Konferencën ndërkombëtare për partneritet, që më 13 shkurt do të mbahet në Uashington.

 

Organizator i këtij takimi është nënsekretari amerikan i Shtetit, Nikolas Bërns. Përveç diskutimeve kushtuar nxitjeve bashkëkohore globale në politikën e jashtme dhe të sigurisë, në të do të shpalosin edhe qëndrimet e shteteve të Ballkanit Perëndimor lidhur me statusin përfundimtar të Kosovës.

 

 

Menzis: Presidenti Rugova do të mbetet në kujtesë si njeriu që e solli Kosovën në prag të pavarësisë

 

Nju Jork, 6 shkurt 2006 - Ish shefi i zyrës amerikane në Prishtinë, ambasadori Xhon Menzis, ka shprehur ndjenjat më të thella të respektit për figurën dhe veprën e Presidentit Rugova, të cilin e ka vlerësuar si mik të madh të tij.
Në një takim të zyrtarëve të lartë amerikanë me pjesëmarrës shqiptarë në Lutjet e Mëngjesit, të organizuar nga Këshilli Kombëtar Shqiptaro Amerikan, ambasadori Menzis ka thënë se Presidenti Rugova do të mbetet në kujtesë si njeriu që e solli Kosovën në prag të pavarësisë dhe u bëri thirrje liderëve kosovarë që të vazhdojnë rrugës që e kishte nisur ai.

"Presidenti Rugova ishte njeri madhështor dhe vizionar i madh. Ishte forca e së mirës, jo vetëm për Kosovën por për mbarë rajonin, i cili e kuptoi çfarë do të thotë forca e vullnetit në duart e popullit. Presidenti Rugova tani nuk i takon vetëm popullit të Kosovës, por i takon rajonit dhe mbarë botës, i takon pavdekshmërisë.

Presidenti Rugova do të mbetet në kujtesë si njeriu që e solli Kosovën në prag të pavarësisë, lirisë dhe sovranitetit. Jam krenar që e njoha dhe e kisha mik. E falënderoj zotin që pata rast ta vizitoj dhe të çmallem me të, pak kohë para ikjes së tij për në amshim", ka thënë Menzis dhe u ka bërë thirrje liderëve dhe popullit të Kosovës që, unikë e të bashkuar, të vazhdojnë rrugën aty ku Ai e la dhe ta çojnë amanetin e tij në vend për Kosovën sovrane e të pavarur të njohur edhe formalisht, siç thoshte Presidenti Rugova.

"Kosova është në një moment shumë të rëndësishëm dhe, mu për këtë arsye, liderët dhe populli i Kosovës duhet të jenë unikë dhe të rreshtohen prapa parimeve që çojnë drejt pavarësisë. Jemi shumë afër cakut dhe qëllimit të kësaj rruge dhe këtij procesi të gjatë me shekuj. Të mos ndalemi asnjëherë, por ta arrijmë qëllimin kombëtar të Kosovës, në kujtim të Presidentit Rugova".

 

 

Austria kundër zvogëlimit të trupave paqëruajtëse në Kosovë

 

Vjenë, 6 shkurt 2006 - Ministri i Mbrojtjes i Austrisë, Gynter Plater ka vlerësuar se nuk është koha për zvogëlimin e trupave paqëruajtëse të KFOR it në Kosovë. Në konferencën ndërkombëtare për sigurinë në Mynih, Plater ka thënë se për shkak të negociatave mbi statusin e ardhshëm të Kosovës, është shumë me rëndësi që të "veprohet me kujdes", ka njoftuar ministria e Mbrojtjes në Vjenë.

"Angazhimi ndërkombëtar në Kosovë ka rëndësi të veçantë në fazën aktuale", ka thënë Plater, duke shtuar se për Austrinë, Ballkani perëndimor paraqet prioritet në fushën e politikës dhe të sigurisë.

 

 

Berisha: Pavarësia e Kosovës do të shërbejë për forcimin e stabilitetit edhe në Serbi

 

Mynih, 6 shkurt 2006 - "Jam plotësisht i bindur së pavarësia e Kosovës do të shërbejë për forcimin e stabilitetit edhe në Serbi, për arsye se do ta shkëpusë atë nga lidhjet e demshme me të shkuarën, do ta çlirojë nga forcat ekstremiste e radikale, do të shpejtojë demilitarizimin e saj, duke lehtësuar kështu rrugën për integrimin e Serbisë në strukturat Euro Atlantike.

 

Kjo është edhe arsyeja pse kjo ide po fiton gjithnjë e më shumë përkrahjen e forcave të moderuara në Serbi". Kështu është shprehur Kryeministri i Shqipërisë Sali Berisha në në Mynih të Gjermanisë për çështjet e sigurisë globale.

Berisha tha se të njëjtën bindje ka edhe përsa i përket të drejtës legjitime të qytetarëve të Malit të Zi të vendosin nëpërmjet një referendumi të lirë për të ardhmen e tyre. "Mendoj se kjo do të forcojë akoma edhe më tej stabilitetin dhe sigurinë në rajon", ka thënë Kryeministri shqiptar.

 

 

Kryesia e LDK-së dënon sulmin ndaj zyrës së saj në Deçan

 

Prishtinë, 6 shkurt 2006 - Lidhja Demokratike e Kosovës dënon ashpër sulmin e mbrëmshëm vandal ndaj zyrës së LDK së në Deçan, me ç?rast janë shkaktuar dëme materiale të konsiderueshme.

Aktet e tilla të papërgjegjëshme dëmtojnë qetësinë strabilitetin dhe rendin demokratik, thuhet në një komunikatë për media.

Kryesia e LDK së kërkon nga organet kompetente të marrin veprimet adekuate për zbardhjen e rastit dhe kryerësit e këtij akti të vihen para organeve të drejtësisë.