“Terra” dhe Sandro Provvisionato, “Qajnë” për Kosovën e pavarur

“Terra” dhe Sandro Provvisionato, “Qajnë” për Kosovën e pavarur

5 shkurt 2006 /TN

Nga Besi BEKTESHI*

Nuk ka shumë ditë, kur një nga kanalet më prestigjioz të Italisë “Canale 5” i ndjekur shumë edhe në Shqipëri ka transmetuar një emision mbi Kosovën ditët e saj në liri dhe problemet që ajo ka.

Po kështu, në këtë emision të programit njohës “Terra” u trajtua dhe Beogradi i sotëm zhvillimi i tij dhe idetë mbi Kosovën të njerzve aty.

Pa u zgjatur me programin ku gazetari i madh televiziv Toni Capuozzo paraqiti punën e tashmë “njohësit” të Kosovarëve dhe Shqiptarëve Sandro Provvisionato, mund të them se në momentet kur Kosova është në agjendën e perëndimit për të marrë statusin, Provvisionato kryente rolin e tij gjithmonë kundër shqiptarëve për të cilin ka qindra shkrime dhe librin tashmë famëkeq “UÇK-ja , ushtria në hije”.

Në reportazhin e tij provvisionato konsideronte kufirin Shqipëri-Kosovë, parajsë të trafikut dhe trafikantëve. Ai me merakun e një “Kosove të pavarur” e cila thuhej si një term gati gati në keqardhje të plotë, trajtonte problemin e “kishave mijëvjeçare” të cilat ishin në rrezik nga sulmi i shqiptarëve etnikë, duke mos numëruar xhamitë dhe kishat e shqiptarëve të rrënuara, të plaçkitura, të dhunuara nga serbët. Provvisionato “Rrugovën duke vdekur” e zëvëndësonte me Thaçin i cili sipas tij ishte person me preçedentë të frikshëm në lidhje me drogën, duke treguar se nuk njihte (apo nuk donte të njihte) edhe ndarjen me parti të Rugovës dhe Thaçit.

Po kështu për Haradinajn i cili normalisht tashmë është i lirë në Kosovë, Provvisionato kishte mendim si për një vrasës ordiner dhe kriminel lufte në reportazhin e vet. Provvisionato ishte “krenar” se etnia serbe në Mitrovicë nuk blinte me euro, por me dinar dhe se Shqiptarët ju ndalonin energjinë elektrike nga centrali në zonën e tyre, energji që Serbët nuk paguajnë, por që Provvisionato nuk e tha.

Provvsionato gjithshka në Kosovë e nxinte përfshi dhe punën e ndërkombëtareve, për të “zbuluar” një Beograd të lulëzuar me ndërtime të reja dhe me shënja të bombardimeve të NATO-s. Gjithshka në Beograd shkëlqente dhe se luksi ishte një hobi i tyre. Po kështu në emision dilte se një milioner i ri në Beograd deklaronte se “Kosova do të jetë gjithmonë e jona” kurse një intelektuale dhe shkrimtare deklaronte me pesimizëm se “Kosovën tashmë e kemi humbur”.

Provvisionato nuk e fsheh pesimizmin e tij për një status normal të kuptueshëm të pavaruar për Kosovën dhe ky nuk është një mendim i ri për të.

Provvisionato kërkon të sqarojë të gjithë botën se ka mbaruar një spastrim etnik në Kosovë dhe ka filluar një tjetër, ai i shqiptarëve kundër etnisë serbe.

Provvisionato jo vetëm që ka tentuar gjithmonë të denigrojë luftën e UÇK-së dhe të minimizojë krimet e Serbve, por ai është futur në polemika të mëdha edhe me gazetarë të tjerë Italianë, pikërisht për këtë gjë.

Ai që kërkon të theksojë me forcë mashtrimin dhe tendencën antishqiptare të Provvisionatos është italiani tjetër Andrea Ferrario i cili polemizon ashpër me Provvisionaton. Jo vetëm për librin e tij kundër UÇK-së por edhe mbi masakrën e Raçakut ku Provvisionato e konsideron një manipulim të UÇK-së, duke e quajtur edhe Walkerin një person të pabesueshëm dhe të dyshimtë i cili ka problemet e tij në Amerikën Qëndrore. Provvisionato konsiderohet nga Ferrario një gënjeshtar dhe person i cili mashtron edhe me vëndin e masakrës si dhe për të dhënat për të.

Këto zhurma të Provvisionatos janë shkruar edhe në “Il Manifesto” apo “Liberacione” të cilat kanë qënë ashpërsisht kundër interventit ushtarak kundër Milosheviçit dhe Serbisë nga ana e perëndimit dhe që Ferrario i quan në polemikat e tij “zëdhënëse të së majtës antikapitaliste italiane” ( për Il Manifesto).

Provvisionato është lavdëruar, por edhe kritikuar nga italiani tjetër Paolo Mosseti, që Kosovën sot e konsideron një frikë për një “Kolumbi të re” në Ballkan dhe në të gjithë shkrimet apo reportazhet e tij pikërisht ky është edhe lajtmotivi i cili patjetër kërkon që statusi i pavarësisë së Kosovës, pavarësisht se nuk është thënë asnjëherë “nuk duhet të jetë i pavarur” stigmatizohet si diçka e mbrapshtë dhe me pasoja.

Provvisionato është një nga ato gazetarë të cilët Kosovën dhe kosovarët i kanë problem dhe në shumë shkrime edhe shqiptarët në përgjithësi duke parë gati gjithmonë keq në lidhje me to.

Këto probleme në fakt ai i ka me shqiptarët, UÇK-në, Kosovën, por i ka edhe me kolegët e tij italianë që duke qenë se janë në një vënd të lirë, demokratik dhe perëndimor, janë të detyruar ti përgjigjen edhe për “krimin mediatik” që shpesh herë Provvisionato kryen kur manipulon me të vërtetën.

Gjithsesi kur emisione të tillë të rëndësishëm shpesh herë drejtpërdrejtë dhe shpesh herë në mënyrë të nëndheshme kërkojnë të “zbukurojnë dhëmbët e ujkut” dhe të “ashpërsojnë lëkurën e gjingjit”, ju duhet dhënë përgjigje, sepse kanë një qëllim si përfundim të tyre: Lënien e Kosovës nën varësinë e Serbisë, duke sulmuar shpesh herë edhe perëndimin i cili ndryshoi kursin e makinës vrastare të Milosheviçit, kur Provvisionato tregonte se serbët nuk kishin kryer shumë krime, se Hollbruk po imponohej, se bombat mbi Beograd të ndihmuara edhe nga vëndi i tij “a janë të nevojshme” etj etj.

Patjetër që ka tepër forca të ndryshme që ju japin rremave kundër pavarësisë së Kosovës dhe e bëjnë këtë përditë, megjithatë edhe pse janë shumë, kjo pavarësi e shoqëruar me respektin ndaj kombësive dhe etnive do të vijë, sepse është një komb i bashkuar pro perëndimor që nuk mund të ndalohet nga Provvisionatot të cilët të vërtetën e kanë në anën e atij, që kryen krime dhe nuk kërkon asnjë herë të falur.

------------------
Më 26 janar 2006
*Besi Bekteshi