Të ndihmohet Kosova në rrugën drejt Unionit Evropian

Të ndihmohet Kosova në rrugën drejt Unionit Evropian

Prishtinë, 3 shkurt 2006 /TN /QIK - Kryetari i Kuvendit të Kosovës, Nexhat Daci, ka pritur sot shefin e Zyrës Hungareze në Kosovë, z. Zoltan Imecs, me të cilin ka biseduar për bashkëpunimin e ndërsjellët të Kosovës dhe Hungarisë.

Në takim është vlerësuar se ka hapësirë të mirë për bashkëpunim ndërmjet institucioneve të të dy vendeve, sidomos të parlamenteve dhe të mekanizmave parlamentarë, thuhet në njoftimin e zyrës për informim të Kuvendit të Kosovës. Kryekuvendari Daci në takim me diplomatin hungarez ka theksuar se Hungaria mund ta ndihmojë Kosovën në rrugën e saj drejt Unionit Evropian.
Kyekuvendari Daci është takuar edhe me kryetarin e Këshillit drejtues të Universitetit të Prishtinës, dr.Jahi Hoxhën, i cili e ka njoftuar kryekuvendarin me rrjedhat në Universitet. UP-ja është duke u përgatitur për zgjedhjet e Parlamentit të Studentëve, të cilat u shtynë për shkak të rrethanave të krijuara në Kosovë, të cilat zgjedhje po e vonojnë edhe zgjedhjen e rektorit të Universitetit.

Kryekuvendari, Nexhat Daci, duke folur për rëndësinë që ka UP-ja për përgatitjen e kuadrit të lartë profesional dhe përparimin e tërësishëm të vendit, kërkoi që të respektohen procedurat ligjore, ndërkohë që është angazhuar për universitet bashkëkohor dhe efikasitet të studimeve.
Pas zisë kombëtare nuk do të vonohet procedura për zgjedhjen e Presidentit të ri, thotë Daci

Prishtinë, 3 shkurt 2006 /TN /QIK - Kryetari i Kuvendit të Kosovës Nexhat Daci, është shprehur se pasi të kalojnë ditët e zisë kombëtare nuk do të vonohet procedura për zgjedhjen e Presidentit të ri të Kosovës, ndërsa Parlamenti do ta kryejë detyrën e vet kushtetuese.

Pasi kjo nuk është një zgjedhje krejt e re, ku partitë politike do të duhej t'i matnin forcat politike, i mbetet LDK-së të propozojë kandidatin e saj. Këto komente Daci i bëri gjatë takimit me ambasadorin Frenk Uizner dhe zëvendësndihmësen e Sekretares së Shtetit Rozmaari Di Karlo.
Sipas një njoftimi për shtyp të zyrës së tij, Nexhat Daci ka thënë se e përkrah kandidaturën e Fatmir Sejdiut për President, Ndërkaq duke marrë parasysh deklarimet e subjekteve politike, duke përfshirë edhe disa nga opozita, atëherë ai është i bindur se Presidenti i ri i Kosovës, që do të ishte njëherësh edhe udhëheqës i Ekipit Negociator të Kosovës, do të zgjidhet me më shumë se dy të tretat e votave, që do të siguronte një deklarim plebishitar.
Kosova do të jetë një shtet normal evropian, pa eksterritore brenda saj dhe pa kushtëzime të sovranitetit dhe të pavarësisë së saj. Të gjitha normat dhe standardet ndërkombëtare do të respektohen, ndërsa Kosova dhe Serbia do të mund t'i ndihmonin njëra tjetrës në rrugën drejt anëtarësimit në Bashkimin Evropian dhe në integrimet evroatlantike.
Kryetari i Kuvendit të Kosovës ka siguruar delegacionin amerikan se Kosova do të ndjekë rrugën e Presidentit Rugova për miqësi të përhershme me SHBA të, duke kërkuar njëherësh ndihmën amerikane në ekspertë të lëmenjve të ndryshëm dhe në krijimin e kapaciteteve qeverisëse të Kosovës, sidomos në lëmin e sigurisë dhe të mbrojtjes.