Qeveria ruse përkrah deklaratën e fundit të Grupit të Kontaktit

Qeveria ruse përkrah deklaratën e fundit të Grupit të Kontaktit

Prishtinë, 3 shkurt 2006 /TN /QIK - Shefi i Zyrës ruse në Prishtinë, Sergej Bazdnikin, ka thënë se Qeveria e tij qëndron pas deklaratës së fundit të Grupit të Kontaktit të aprovuar në Londër me të cilën kërkohet që statusi i Kosovës të definohet gjatë këtij viti.

Bazdnikin tha se i ka inkurajuar serbët që të përfshihen në institucionet e Kosovës, ngase kështu mund të ndikojnë në përmirësimin e kushteve të jetesës për komunitetin e tyre vetëm nërpërmjet pjesëmarrjes në institucionet e zgjedhura.
"Natyrisht i kemi qëndrimet tona rreth disa çështjeve, por kur Grupi i Kontaktit miraton ndonjë dokument, ne veprojmë bashkarisht dhe qëndrojmë dhe do të qëndrojmë pas deklaratës së fundit të Grupit të Kontakit", ka thënë Sergej Bazdnikin pas takimit me Oliver Ivanoviqin, i cili kryeson Listën serbe, subjekti më i madh politik i këtij komuniteti në Kosovë, që refuzon pjesëmarrjen në institucionet qendrore, siç janë Qeveria dhe Kuvendi i Kosovës.


Uizner ka udhëtuar mbrëmë në Beograd ku do të ketë takime me zyrtarë më të lartë të Serbisë

Prishtinë, 3 shkurt 2006 /TN /QIK - I dërguari i Shteteve të Bashkuara të Amerikës për statusin e Kosovës Frenk Uizner ka udhëtuar mbrëmë në Beograd ku do të ketë takime me zyrtarë më të lartë të Serbisë.

Ai do të kthehet të shtunën në Kosovë për të folur lidhur me rezultatet e këtyre takineve si dhe për tu takuar edhe njëherë me Ekipin Negociator të Kosovës. Pas Prishtinës, Uizner do të udhëtojë në Vjenë, ku është i vendosur ekipi i ndërmjetësve ndërkombëtarë për statusin e Kosovës në krye me Marti Ahtisarin.