Petersen: Presidenti i Kosovës zgjidhet javën e ardhshme

Petersen: Presidenti i Kosovës zgjidhet javën e ardhshme

Prishtinë, 3 shkurt 2006 /TN /QIK - Presidenti i ri i Kosovës do të zgjidhet javën e ardhshme, tha kryeadministratori Soren Jesen Petersen pas takimit me kryeministrin Bajram Kosumi, në selinë e qeverisë.

Që të dy bashkëbiseduesit kanë shprehur besimin se nuk do të ketë reduktime të forcave të NATO-s në Kosovë, ndërsa Kryeministri bëri të ditur gatishmërinë e tij për të marrë pjesë në mbledhjen e Këshillit të Sigurimit pas dy javësh.
Kryeministri Kosumi tha se në takim me z.Petersen ka diskutuar procesin e zgjidhjes së statusit, pas avancimit të procesit me qëndrimet e reja të Grupit të Kontaktit që shkojnë në dobi të pavarësisë së vendit. Kosumi tha se me këto qëndrime të reja Grupi i Kontaktit ka qartësuar rrugën nga do të ecë procesi i statusit të Kosovës.

Njëkoshësisht ai tha se kjo eliminon iluzionet e paqëndrueshme për procesin, ndërsa për deklaratën e GK falënderoi vetë grupin dhe z.Petersen që ishte pjesëmarrës aktiv në takim si hde z.Ahtisari, kryenegociatorin për bisedime.
Petersen tha se gjatë javës së ardhshme do të zgjedhet Presidenti i Kosovës, pas vdekjes së Presidentit Rugova. "Ky do të jetë zhvillim shumë pozitiv, për t'u raportuar në sesionin e hapur të Këshillit të Sigurimit, të paraparë për 14 shkurt", tha Petersen. Ai shtoi se anëtarët e Këshillit të Sigurimit ishin pajtuar që në mbledhjen e radhës të saj të marrë pjesë edhe kryeministri Kosumi.

Ndërsa, që gjatë takimit i kishte bërë ftesën zyrtare, që ta shoqërojë në atë sesion, që ishte paraparë për 7 shkurt, por që është shtyrë për datën 14 shkurt, me kërkesë të z.Petersen. Kryeadministratori dëshiron që të jetë në Kosovë gjatë javës së ardhshme, kur pritet zgjidhet Presidenti i Kosovës, i propozuar nga LDK-ja.
"Është e rëndësishme që unë të jem këtu gjatë javës së ardhshme. Gjithashtu është e rëndësishme që të mund të shkoj në Nju Jork dhe të informojë Këshillin e Sigurimit që pas humbjes tragjike të Presidentit Rugova, institucionet demokratike kanë punuar shumë mirë dhe në një periudhë të shkurtër kanë zgjedhur kryetarin e ri", tha Petersen.
Kryeministri Kosumi pohoi se do të marrë pjesë në këtë sesion të KS-së, në rolin e mysafirit, por që do të mund të takohet me anëtarë të Këshillit të Sigurimit. "Konsideroj që tani është shumë e rëndësishme që të jem prezent në KS të OKB-së që edhe formalisht të jem aty", tha Kosumi.
Kjo është hera e parë që një kryeministër i Kosovës të marrë pjesë në mbledhjet e KS të OKB-së për Kosovën.


Petersen e Kosumi: Të mos ketë reduktim të forcave të NATO-s në Kosovë

Prishtinë, 3 shkurt 2006 /TN /QIK - Petersen dhe Kosumi vlerësuan lart edhe deklaratën e fundit të Grupit të Kontaktit për Kosovën, derisa bënë thirrje që gjatë muajve të ardhshëm, të mos ketë reduktim të forcave të NATO-s në Kosovë.
"Në këto muaj vendimtar nuk do të ishte mirë që të ndodh një zvogëlim i asnjë kontingjenti të KFOR-it në Kosovë, në veçanti nuk do të ishte mirë që të ndodhte reduktim eventual i kontingjentit amerikan të KFOR-it.

Apeloj që kjo të shtyhet deri pas statusit final të Kosovës, pasi KFOR-i amerikan gëzon një besim shumë të madh tek qytetarët e Kosovës", tha ai duke komentuar paralajmërimet e bëra nga Sekretari i Mbrojtjes së SHBA-ve për mundësinë e reduktimit të trupave në rajon. Një mundësi të këtillë e ka përjashtuar shefi i UNMIK-ut.
"Në takimin e Londrës unë kam pasur rastin të flas me Sekretarin e Përgjithshëm të NATO-s i cili më ka thënë mua, privatisht dhe Grupit të Kontaktit se NATO është plotësisht e përkushtuar që të mbajë kapacitetet aktuale këtu, ashtu si edhe për praninë në të ardhmen edhe pas statusit, nëse një gjë e tillë kërkohet.

Mund të ketë rikompozime të trupave, por ata janë të vendosur që të ruajnë praninë e tyre këtu", tha Petersen.


Petersen e Kosumi do të marrin pjesë në mbledhjen e KS të Kombeve Bashkuara

Nju Jork, 3 shkurt 2006 /TN /QIK - Mbledhja e Këshillit të Sigurimit të Kombeve të Bashkuara kushtuar Kosovës në vend të 7 shkurtit do të mbahet më 14 shkurt. Në këtë mbledhje për gjendjen në Kosovë pritet të raportojë shefi i UNMIK-ut Soren Jesen Petersen.
Po ashtu në këtë mbledhje do të marrë pjesë edhe kryeministri Bajram Kosumi, por në cilsinë e mysafirit. Kosumi bëri të ditur se pas mbledhjes do të ketë takime me përfaqësuesit e ndryshëm të vendeve anëtare të KS.