Lugina e Preshevës kurrë nuk do ta harrojë kontributin e madh të Presidentit Rugova

Lugina e Preshevës kurrë nuk do ta harrojë kontributin e madh të Presidentit Rugova



Prishtinë, 3 shkurt 2006 /TN /QIK - Kryetari i Kuvendit të Kosovës, Nexhat Daci sot bëri homazhe te varrit të Presidentit Rugova, ndërsa pas tij bënë edhe kryetarët e komunave të Kosovës, një delegacion i ardhur nga Lugina e Preshevës, në krye me Riza Halimin etj. pavarësisht nga këto vizita të organizuara kanë vazhduar edhe homazhet individuale.
"Unë e pashë të arsyeshme që përafërsisht në përfundim të përgjegjësive në Parlament të përkulem para varrit të Presidentit dhe të vazhdojmë punën. Mendoj që është një rast i mirë që qytetarët e Kosovës kanë më në fund vendin e tyre ku të vijnë dhe t'i japin nderimin", tha prof.Daci.
Edhe kryetarët e komunave të Kosovës, të mbledhur në Asociacionin e Komunave të Kosovës, shprehën nderime për dhimbjen e tyre për vdekjen e paparitur të Presidentit Rugova.




"Ka qenë njeri, i cili e ka ditë që pushteti lokal është dera e parë e shqetësimeve dhe problemeve që i paraqesin qytetarët.


Prandaj, ne sot ishim me kolegët tanë që edhe një herë t’i bëjmë nderime Presidentit Rugova dhe sigurisht në shenjë falënderimi për gjithë ato që i ka bërë për komunat, Kosovës në përgjithësi, shqiptarët kudo që janë, dhe sigurisht ne zotohemi dhe bëjmë përpjekje që rrugën e trasuar të Presidentit së bashku me të gjitha institucionet ta çojmë deri në fund", tha Ismet Beqiri, Kryetari i Kuvendit Komunal të Prishtinës, njëkohësisht edhe kryetar i Asociacionit të Komunave të Kosovës.





Për t'i bërë nderime personalitetit të Presidentit Rugova, madhështia e të cilit i takon gjithë botës shqiptare, kishin ardhur edhe qytetarë nga Kosova Lindore, të prirë nga delegacioni i Partisë për Veprim Demokratik të Preshevës, Bujanovcit, Medvegjës. Riza Halimi, kryetar i kësaj partie u shpreh se ky është një nderim që i bëhet udhëheqësit të përgjithshëm të shqiptarëve.
"Presidenti Rugova dha një kontribut të jashtëzakonshëm për Kosovën, por ndihma që dha konkretisht për Luginën e Preshevës, lëvizja politike, kreator i të cilës ishte dhe udhëheqës, bëri kthesa të jashtëzakonshme në këto treva etnike shqiptare dhe ata kurrë nuk do ta harrojnë kontributin e madh të Presidentit Rugova", tha Halimi.
Për homazhe ishin edhe një delegacion i gjerë i Forumit të Gruas të LDK-së, bashkë me përfaqësueset e degëve nga terreni, të prira nga kryetarja Melihate Tërmkolli, pastaj delegacione të mëdha nga Dega e LDK-së në Istog e në Rahovec.
Edhe Kryesia e Forumit të Rinisë së LDK së, dega në Podujevë bëri nderime dhe vuri kurora me lule pranë varrit të Presidentit. FR i LDK së në Podujevë ndjen një dhimbje të veçantë për Presidentin, sepse ai vazhdimisht inkurajonte dhe përkrahte të rinjtë. Prandaj
FR i LDK së në Podujevë gjithmonë do të përkulet pranë veprës dhe krijimtarisë që la pas Presidenti i Kosovës Ibrahim Rugova, thanë ata.
Në "Varrezat Përkujtimore", ku tashmë një javë po mbushet nga dita kur qytetarët e Kosovës i dhanë lamtumirën e fundit, Presidentit Rugova, homazhe i kanë bërë qindra e qindra delegacione të ndryshme nga Kosova, si dhe dhjetëra mijëra qytetarë.