Takim i kryeministrit Kosumi me udhëheqësit e Grupit ndërministror për strategjinë dhe planin zhvillimor 2007 20013

Takim i kryeministrit Kosumi me udhëheqësit e Grupit ndërministror për strategjinë dhe planin zhvillimor 2007 20013

Prishtinë, 2 shkurt 2006 /TN /QIK - Kryeministri i Kosovës, Bajram Kosumi, ka zhvilluar sot një takim të veçantë pune me Grupin ndërministror për hartimin e Strategjisë dhe Planit Zhvillimor të Kosovës 2007 20013.

Në takim ishin të pranishëm edhe ministri i Ekonomisë dhe Financave, Haki Shatri, menaxheri i Sekretariatit, Muhamet Sadiku, këshilltarët politikë të kryeministrit, Driton Qehaja dhe Gazmend Qorrraj si dhe këshilltari për strategji Xhon Pell. Në takim është diskutuar rreth punës së deritashme në hartimin e Strategjisë dhe Planit Zhvillimor të Kosovës.
Në këtë takim, siç thuhet në një komunikatë, bartësit e projektit për hartimin e Strategjisë dhe Planit Zhvillimor të Kosovë e kanë informuar kryeministrin Kosumi me përgatitjet që janë bërë në rrafshin logjistik, procedural dhe metodologjik për hartimin e këtij dokumenti, si dhe kanë prezantuar kornizën kohore të përfundimit të kësaj strategjie, që është me rëndësi strategjike për zhvillimin ekonomik të Kosovës.
Strategjia dhe Plani Zhvillimor i Kosovës 2007 20013 ka rëndësi jetike për periudhën passtatusore në trasimin e rrugës për zhvillimin ekonomik të Kosovës.
Me këtë rast, kryeministri Bajram Kosumi ka falënderuar udhëheqësit e Grupit ndërministror për hartimin e Strategjisë dhe Planit Zhvillimor të Kosovës 2007 20013 për punën e deritashme dhe njëkohësisht ka kërkuar që sa më parë të fillohet puna konkrete në hartimin e këtij dokumenti, duke rekomanduar që në këtë dokument të inkorporohen të gjitha strategjitë e hartuara dhe ato që janë në hartim e sipër nga Qeveria e Kosovës.
Kryeministri Bajram Kosumi ka siguruar udhëheqësit e Grupit ndërministror për hartimin e Strategjisë dhe Planit Zhvillimor të Kosovës 2007 20013 se për finalizimin e këtij dokumente nuk guxon të ketë pengesa financiare, meqë kjo strategji është prioritet i Qeverisë së Kosovës për vitin 2006.
U theksua se do të kërkohet konsulenca dhe mbështetja e donatorëve të jashtëm për hartimin e këtij dokumenti dhe se Qeveria e Kosovës do të ndërmarrë të gjitha veprimet me qëllimit të evitimit të prolongimeve kohore.
Gjithashtu në këtë takim, kryeministri Kosumi ka kërkuar nga bartësit e projektit për hartimin e Strategjisë dhe Planit Zhvillimor të Kosovës që dokumenti bazik final i Stratregjisë t? i dorëzohet Qeverisë së Kosovës deri në fillim të muajit dhjetor 2006.
Në anën tjetër, Grupi ndërministror dhe Sekretariati për hartimin e Strategjisë dhe Planit Zhvillimor të Kosovës e siguruan kryeministrin Bajram Kosumi se do e angazhohen në hartimin me kohë të këtij dokumenti zhvillimor, i cili do të përgatis rrugën dhe vizionin për zhvillimin më të shpejtë ekonomik të Kosovës.