Mbrëmë Grupi Negociator i Kosovës u takua me përfaqësuesit amerikanë

Mbrëmë Grupi Negociator i Kosovës u takua me përfaqësuesit amerikanë

Prishtinë, 2 shkurt 2006 /TN /QIK - Mbrëmë Grupi Negociator i Kosovës ka zhvilluar një takim pune me përfaqësues special të SHBA ve për bisedimet rreth statusit të Kosovës, ambasadorin Frenk Uizner, znj. Rozmeri Di Karlo, zëvendës ndihmëse e Sekretares së Shtetit Amerikan, si dhe Filip Goldberg, shef i Zyrës amerikanë në Prishtinë.
Përfaqësuesit amerikanë fillimisht shprehën ngushëllimet për vdekjen e Presidentit të Kosovës Ibrahim Rugova dhe njëkohësisht shprehën besimin e tyre se pala kosovare do të vazhdojë të jetë e përkushtuar në procesin negociues për definimin e statusit të Kosovës gjatë vitit 2006, si dhe në përmbushjen e standardeve.

Në këtë kontekst, Uizner tha se është inkurajues fakti që Delegacioni i Kosovës po përgatitet për takimin e Vjenës dhe ka siguruar ata se Grupi i Kontaktit dhe bashkësia ndërkombëtare çmojnë këtë seriozitet të përfaqësuesve të Kosovës.
"Erdha që ta siguroj Kosovën se negociatat për statusin e saj do të kompletohen gjatë këtij viti dhe do të çmoj përqendrimet e Grupit të Kontaktit se zgjidhja do të jetë në atë drejtim që të mos ketë kthim në gjendjen para vitit 1999 dhe që të mbrohen kufijt e këtij vendi", ka thënë i dërguari i posaçëm i SHBA ve për statusin e Kosovës Frenk Uizner.
Ai nënvizoi se qëndrimet e Grupit të Kontaktit janë unike dhe se qëndrimet e Rusisë nuk ndryshojnë nga ato të Grupit të Kontaktit.
Uizner po ashtu ka theksuar se institucionet e Kosovës janë të përgatitura seriozisht për bisedime dhe tashmë kanë përgatitur qëndrimet e tyre për çshtjet kryesore.
Në anën tjetër, anëtarët e Delegacionit të Kosovës kanë rikonfirmuar se takimi i Vjenës mund të mbahet rreth datës 20 shkurt, duke theksuar përkushtimin për të qenë unik gjatë tërë procesit negociues për statusin politik të Kosovës, që pritet të rrumbullakohet gjatë vitit 2006.
Ata precizuan se Grupi Politik ka përfunduar dokumentit bazë për decentralizim dhe në ndërkohë ky grup dhe grupet tjera punuese janë duke punuar me përkushtim në hartimin e dokumenteve tjera, të cilat pritet të miratohen së shpejti edhe nga Ekipi Negociator.

Ata po ashtu kanë vënë në dukje se përmes këtyre dokumenteve, të cilat janë një ofertë për qytetarët e Kosovës, synohet krijimi i një shteti funksional dhe sipas parimeve të avancuara demokratike evropiane.