Kosumi siguroi ambasadorin Uizner se është duke u punuar me përkushtim që të krijohen realitete të reja politike

Kosumi siguroi ambasadorin Uizner se është duke u punuar me përkushtim që të krijohen realitete të reja politike

Prishtinë, 2 shkurt 2006 /TN /QIK - Kryeministri Bajram Kosumi sot është takuar me ambasadorin amerikan Frenk Uizner, përfaqësues special i SHBA ve për statusin e Kosovës, i cili shoqërohej nga znj. Rozmeri Di Karlo, zëvendës ndihmëse e Sekretares së Shtetit Amerikan, si dhe Filip Goldberg, shef i Zyrës amerikanë në Prishtinë.
Gjatë këtij takimi, që u zhvillua me dyer të mbyllura, Kosumi dhe Uizner kanë vlerësuar pozitivisht deklaratën e Grupit të Kontaktit për Kosovën, duke shtuar se kjo deklaratë është një mbështetje për procesin e definimit të statusit të Kosovës dhe misionin e Marti Ahtisarit, thuhet në një komunikatë nga ky takim.
Kryeministri Kosumi edhe një herë falënderoi ambasadorin Uizner dhe Qeverinë amerikane për ndihmën që është duke dhënë në qartësimin e procesit të përcaktimit të statusit final të Kosovës. Gjatë takimit z. Kosumi ka njoftuar delegacionin e lartë të SHBA ve edhe për disa çështje që kanë të bëjnë me implementimin e standardeve për Kosovën, dhe krijimin e besimit të gjithë qytetarëve, duke shtuar se procesi që është duke ndodhur është në të mirën e tyre.
"Kjo që po bëjmë nuk është vetëm në të mirën e shqiptarëve por për të gjitha komunitet e Kosovës, pra edhe të qytetarëve serbë", pohoi z. Kosumi.
Kryeministri siguroi z. Uizner se Qeveria e Kosovës është duke punuar me përkushtim dhe do të punojë edhe më shumë në këto muaj të ardhshëm, që të krijohen këto realitete të reja politike, që qytetarët e Kosovës me të vërtet jo vetëm të shikojnë, por edhe të ndiejnë se ky proces është në të mirën e tyre.
Z. Uizner falënderoi Kryeministrin për takimin dhe njoftimet për zhvillimet aktuale në Kosovë që siç tha ai janë shume të rëndësishme.
Uizner tha se gjatë qëndrimit në Prishtine ishte takuar edhe me anëtarë tjerë të grupit për bisedime dhe se ky takim është vazhdim i bisedës së filluar mbrëmjen e kaluar.
Më tutje z. Uizner ka informuar Kryeministrin se pas Prishtinës ai do të udhëtojë për në Beograd dhe të shtunën sërish do të jetë në Prishtinë për të vlerësuar rezultatet dhe përfundimet para se të kthehet në SHBA.
Frenk Uizner ka siguruar Kryeministrin dhe qeverinë për përkrahjen e proceseve në Kosovë. "Amerika është e përkushtuar, ne jemi të përcaktuar drejt paqes, të mbrojmë atë dhe të përfundojmë procesin e negociatave për aq sa është e mundur brenda viti 2006", ka thënë z Uizner.