Daci e Kosumi pritën një delegacion të fraksionit CDU/CSU nga Gjermania

Daci e Kosumi pritën një delegacion të fraksionit CDU/CSU nga Gjermania

Prishtinë, 2 shkurt 2006 /TN /QIK - Kryetari i Kuvendit të Kosovës, Nexhat Daci, dhe Kryeministri Bajram Kosumi pritën në takime të veçanta një delegacion të fraksionit CDU/CSU nga Gjermania, të prirë nga Volker Kauder, kryetar i fraksionit.
Volker Kauder i shprehu kryeparlamentarit Daci ngushëllimet më të thella për vdekjen e Presidentit Rugova. Në takim u theksua se Kosova ka një vizion të qartë të së ardhmes, ajo aspiron lirinë dhe pavarësinë, duke siguruar edhe të gjitha të drejtat për pakicat, si dhe mbrojtjen e trashëgimisë kulturore.

Sa i përket përcaktimit të statusit, kryeparlamentari Daci theksoi se asnjë politikan në Kosovë nuk mund të nënshkruajë tjetër pos pavarësisë së Kosovës. Kryeparlamentari Daci e sheh perspektivën e Kosovës dhe të Serbisë në Bashkësinë Evropiane.
Pas takimit Kauder shprehu përshtypjen e tij se Kosova po ec në një shteg të mbarë, ndërsa Gjermania do të përkrahë këtë rrugë shpresëdhënëse.
Në takimin e Kryeministrit Kosumi dhe të deputetit gjerman, Volker Kauder, është biseduar për zhvillimet e fundit në Kosovë dhe për proceset zhvillimore në kuadër të dialogut për zgjidhjen e statusit final të Kosovës. Kryeministri ka vlerësuar lart ndihmën që populli dhe shteti gjerman ka ofruar për Kosovën për periudhën e para, gjatë dhe pas luftës në Kosovë.
"Duke besuar se brenda vitit 2006 do të përfundojnë bisedat për statusin final të Kosovës, dhe ne do të arrijmë të krijojmë shtetin e Kosovës, shpresojmë që të vazhdojmë të kemi ndihmën e Gjermanisë, që popullit të Kosovës t'i jepet shansi, si çdo populli tjetër në rajon, për të krijuar lirin e vet", ka deklaruar Kryeministri i Kosovës.
Deputeti gjerman, Volker Kauder ka vlerësuar rezultatet e arritura deri tash në Kosovë dhe ka kërkuar që institucionet e Kosovës të vazhdojnë me progresin drejt arritjes së zgjidhjes më të mirë për statusin e Kosovës. Ai ka konstatuar gjithashtu se pala kosovare në bisedat për status është në një pozitë të mirë, duke theksuar se me qëndrime të mira do të vijmë deri te zgjidhjet e mira.
"Do të përkrahim dhe do të përcjellim procesin negociues për Kosovën, sepse është dëshirë jona që ky rajon të ketë paqe dhe stabilitet", ka deklaruar kryetari i grupit parlamentar të CDU/CSU, në parlamentin gjerman, Volker Kauder.
Ai ka vlerësuar edhe angazhimin dhe punën e kontingjentit gjerman të KFOR it, si dhe bashkëpunimin e tyre me popullatën lokale.