Nderimet madhështore të qytetarëve për Presidentin Rugova po vazhdojnë

Nderimet madhështore të qytetarëve për Presidentin Rugova po vazhdojnë

Prishtinë, 1 shkurt 2006 /TN /QIK - Nderimet madhështore të qytetarëve për heroin e tyre të përjetshëm, Presidentin Rugova, kanë vazhduar edhe sot në "Varrezat përkujtimore" në Velani.

Kryesisht, homazhet te varri i Presidentit Rugova edhe gjatë ditës së sotme ishin të organizuara dhe vizitorët kanë ardhur me autobusë e vetura, të cilat kanë filluar që nga ora 7.00 e mëngjesit.

E veçanta, për nga organizimi dhe numri i madh me rreth 1.000 veta, ishte vizita e delegacionit të Degës së LDK-së nga Ferizaji.
Delegacioni i këshilltarëve të kryeministrit Kosumi dhe zëvendëskryeministrit Salihaj, bëri homazhe në orët e para të mëngjesit, para varrit të Presidentit të ndjerë Ibrahim Rugova, duke mbajtur një minutë heshtje dhe më pas me vënien e luleve.

Këshilltari i Kryeministrit, Jahja Lluka tha se Kosova do të vazhdojë të punojë me përkushtimin më të madh për përmbushjen e amanetit të Tij, bërjen e shtetit të pavarur dhe sovran të Kosovës.
Nderime bënë edhe një delegacion nga Peja, i kryesuar nga kryetari Ali Lajçi, nënkryetari Smajl Shala dhe kryetari i Degës së LDK-së Ymer Muhaxheri, pastaj dega e Lypjanit, e kryesuar nga deputeti dhe kryetari i degës, Naser Osmani, ajo e Skenderait e kryesuar nga deputeti Fadil Geci, pastaj nga Kuvendi Komunal i Therandës, në krye me kryetarin Sali Asllani.
Kryetari i Therandës, Sali Asllani, tha se vdekja e presidentit Rugova, është një humbje e madhe, sepse Presidenti Rugova ishte personifikim i të gjitha të arriturave dhe avancimit të çështjes së Kosovës në këto 16 vjetët e fundit.

"Humbja e Presidentit Rugova është vështirë të kompensohet, por ne të gjallë duhet të bëjmë përpjekje maksimale që të dyfishojmë kapacitetin tonë, në mënyrë që sado pak ta zbusim këtë humbje", tha Asllani. Edhe kryetari i Pejës, Ali Lajçi, tha se është një dhembje e madhe humbja e Presidentit Rugova.
"Presidentit edhe kështu i ndjerë ka avancuar çështjen tonë kombëtare, respektivisht statusin e pavarësisë si zgjidhja e vetme për Kosovën”, tha ai.
Poashtu homazhet kanë vazhduar nga nxënësit e disa shkollave si ajo fillore "Elena Gjika" nga Prishtinë, shkolla e mesme Ekonomike "Hasan Prishtina" nga Mitrovica, gjimnazi “Aleksandër Xhuvani” i Podujevës, e ajo fillore “Haki Gashi” nga Bradashi i Podujevës, të shoqëruara nga udhëheqësit e shkollave si dhe nga arsimtarët dhe profesorët e tyre.
Nderime për Presidentin Rugova bënë edhe minatorët e “Trepçës”, të ardhur në një grup relativisht të madhë, në mesin e të cilëve invalidë dhe pensionistë, pastaj një delegacion i sindikatës së pavarur të Kuvendit Komunal të Prishtinës. Ndërsa, delegacioni i kompanisë publike të pastrimit nga Istogu, është veçuar për nga rregulli dhe mënyra e tregimit të respektit tradicional ndaj ceremonive.

Në mesin e delegacioneve që ishin pas dite për homazhe ishin edhe delegacioni i kompanisë hoteliere, të kryesuar nga Zekë Çeku, një delegacion i Gjykatës Komunale të Vushtrrisë, i kryesuar nga Rifat Bllata etj.
Të gjitha homazhet te vendi ku po prehet trupi i Presidentit Rugova, të të gjithë pjesëmarrësve, qoftë të ardhur në mënyrë të organizuar apo individualisht, janë kryerë me dinjitet dhe disiplinë të lartë, ndonëse numrin prej dhjetë mijë vetësh e kanë kaluar vetëm gjatë ditës së sotme, ndërsa ato vazhdojnë edhe në orët e mbrëmjes.