Kryeministri Kosumi takoi shefin e Zyrës hungareze në PrishtinëKryeministri Kosumi takoi shefin e Zyrës hungareze në Prishtinë

Kryeministri Kosumi takoi shefin e Zyrës hungareze në PrishtinëKryeministri Kosumi takoi shefin e Zyrës hungareze në Prishtinë

Prishtinë, 1 shkurt 2006 /TN /QIK - Kryeministri i Kosovës, Bajram Kosumi priti sot në një takim shefin e Zyrës hungareze në Prishtinë, z. Zoltan Imecs.
Shefi i Zyrës hungareze, e cila është hapur ditë më parë në Prishtinë, fillimisht ka njoftuar kryeministrin me politikat e jashtme të Hungarisë dhe ka theksuar se diplomacia e vendit të tij jep rëndësi edhe zgjidhjes së çështjes së Kosovës duke u nisur nga principet e ruajtjes së stabilitetit në rajon.

Ai gjithashtu tha se regjioni i Ballkanit është ndër prioritetet e qeverisë hungareze. Siç theksohet në një komunikatë, diplomati hungarez shprehu gatishmërinë e Hungarisë për të ndihmuar në proceset e integrimeve të vendeve të Ballkanit në strukturat e EU së. Në këtë kontekst ai ceku se Budapesti zyrtar përkrah angazhimet e Grupit të Kontaktit lidhur me çështjet që kanë të bëjnë me definimin e statusit final të Kosovës.
Diplomati i porsaemëruar, Zoltan Imecs foli edhe për mundësitë e zgjerimit të bashkëpunimit në mes të Hungarisë dhe Kosovës në të gjitha fushat ku ekziston interesi i përbashkët. Ai përsëriti nevojën e përkrahjes së Kosovës në shumë fusha, dhe potencoi se Unioni Evropian edhe deri më tani ka dhënë një kontribut të madh në këtë drejtim dhe se do të vazhdojnë edhe në të ardhmen.
Kryeministri Kosumi pasi i uroi detyrën e re shefit të Zyrës hungareze në Prishtinë, ka theksuar kontributin e deritashëm të Hungarisë dhe konkretisht përmendi prezencën e njësisë ushtarake të Hungarisë në kuadër të KFOR it si dhe pjesëtarëve të shërbimit policor hungarez pranë forcave policore të UNMIK ut që kanë dhënë kontribut të rëndësishëm në fushën e sigurisë.
Kosumi ka thënë se për Kosovën është e rëndësishme përvoja e Hungarisë në procesin e transformimit dhe rruga e anëtarësimit në BE.
Kryeministri Kosumi tha se viti 2006 është shumë i rëndësishëm sepse pritet që gjatë këtij viti të përcaktohet statusi definitiv i Kosovës. "Është interesi jetësor i Kosovës që gjatë vitit 2006 ta rrumbullakojmë procesin e bisedimeve për statusin final, për të bërë Kosovën shtet demokratik, të pavarur dhe sovrane. Definimi i statusit final të Kosovës do të stabilizonte tërë rajonin", u shpreh kryeministri Kosumi.