Qeveria: Me mbarëvajtjen e ceremonisë mortore i është bërë një nder i madh dhe dinjitoz Presidentit Rugova

Qeveria: Me mbarëvajtjen e ceremonisë mortore i është bërë një nder i madh dhe dinjitoz Presidentit Rugova

Prishtinë, 31 janar 2006 /TN /QIK - Në mbledhjen e sotme të radhës së Qeverisë së Kosovës, Kryeministri Bajram Kosumi vlerësoi se Qeveria duhet të vazhdojë punën e saj për të përmbyllur me sukses procesin negociues për statusin e Kosovës gjatë vitit 2006.
"Ne do ta kujtojmë me respekt punën e Presidentit të ndjerë Ibrahim Rugova, por për asnjë moment nuk do të ndalemi së punuari për të barë shtetin e Kosovës" u shpreh Kosumi në këtë mbledhje, duke shtuar se me mbarëvajtjen e ceremonisë mortore i është bërë një nder i madh dhe dinjitoz Presidentit Rugova.
Kosumi është ndalur edhe rreth situatës së vështirë energjetike të Kosovës dhe konstatoi se kjo është pasojë e rritjes së kërkesave të shtuara të konsumatorëve dhe të prodhimit të pamjaftueshëm të energjisë elektrike në vend, por edhe si pasojë e mospagimit të energjisë së konsumuar.
Pikë qendrore e qeverisë në takimin e sotëm ka qenë miratimi i Planit Vjetor të Qeverisë për vitin 2006, që përfshin planet e punës së Zyrës së Kryeministrit dhe të ministrive të vendit. Ky plan ambicioz i punës paraqet aktivitetet, objektivat dhe prioritetet për periudhën janar dhjetor 2006, bazuar në Programin e Qeverisë.
Qeveria konstatoi se Plani Vjetor për vitin 2006 është hartuar me profesionalizëm e realizëm dhe është në funksion të realizimit të Programit të Qeverisë. Ai përgëzoi ministrat dhe ekspertët që kanë punuar në hartimin e këtij plani të punës. Edhe në Planin e Qeverisë për vitin 2006, tha ai, prioritet do të jenë çështja e standardeve dhe zhvillimi ekonomik.
Pallatin e Rinisë dhe Sportit ta menaxhojë komuna e Prishtinës
Qeveria më pas shqyrtoi kërkesën e Kuvendit Komunal të Prishtinës për rikthimin e pronës së saj Pallatit të Rinisë, Kulturës dhe Sportit në Prishtinë (ish Qendra e Sporteve "Boro e Ramizi"), në menaxhim të Komunës së Prishtinës. Qeveria shprehu mirëkuptim për kërkesën që kjo qendër të kthehet në menaxhim të komunës së Prishtinës në shërbim të qytetarëve dhe të klubeve publike sportive dhe në këtë funksion është kërkuar nga AKM ja të definohet statusi juridik i Pallatit të Rinisë.
Në mbledhjen e sotme, qeveria shqyrtoi mundësinë e punësimit sezonal jashtë vendit të qytetarëve nga Kosova. Lidhur me këtë MPMS ja prezantoi një raport për shkallën e papunësisë në Kosovë, që sipas statistikave qeveritare është afër 51%, dhe për këtë qëllim Qeveria kërkon forma dhe mundësi për punësimin e qytetarëve kosovarë jashtë vendit. Kjo formë e punësimit do të zbuste gjendjen e rëndë sociale në Kosovë dhe do të ndikonte në kornizimin institucional të migracionit të qytetarëve të vendit.
Qeveria diskutoi edhe për çështjen e punëtorëve shëndetësorë të larguar nga komunat e ndryshme si dhe heqja e tyre nga listat e pagave. Sipas informacioneve të kuvendeve komunale, rezulton se afër 100 punëtorë shëndetësorë, të pranuar gjatë periudhës janar qershor 2005, gjenden jashtë listave të pagave pas shkurtimeve të bëra buxhetore. Qeveria vendosi që këta punëtorë të mbeten në listat e pagave dhe në ndërkohë të shikohet mundësia që të racionalizohen vendet e punës në këtë sektor, respektivisht të gjendet një zgjidhje e përhershme.
Pikë tjetër e takimit të sotëm të qeverisë ka qenë Propozim Vendimi për formimin e Grupit të Punës për evidentimin nëse ka prona të uzurpuara nga zyrtarë qeveritar të Kosovës. Eshtë një pikë e standardeve që flet për obligimin e institucioneve tona që të evidentojnë rastet e uzurpimeve të pronës së personave fizikë nga shërbyesit civilë dhe të emëruarit politikë. Në lidhje me këtë çështje, qeveria mori vendim për themelimin e një Grupi Punues, ku do të bëjnë pjesë përfaqësues të ZKM së, MSHP së, MPL së dhe MMPH së, të cilët brenda një muaji do t'i raportojnë qeverisë.


Formohen katër grupe për dialog teknik me Beogradin
Qeveria vendosi themelimin e katër grupeve për dialog teknik dhe pikat e mundshme për diskutim me Beogradin. Këto katër grupe janë: Grupi Punues për Çështje Sociale; Grupi Punues për Çështje të Dokumentacionit Civil dhe Kadastral; Grupi Punues Për Çështje të Shëndetësisë dhe Grupi Punues për Çështje të Kulturës.
Gjithashtu, Qeveria e Kosovës ka diskutuar kërkesën e MKRS së të dorëzuar në AKM për mosprivatizmin e objektit të "Unionit", si dhe ka përkrahur nismën që ky objekt t?i jepet në shfrytëzim të MKRS së, respektivisht të Galerisë së Arteve të Kosovës.
Qeveria ka diskutuar edhe për çështjen e mbylljes së rrugës magjistrale Prishtinë - Shkup, si pasojë e shembjes së dheut më 14 janar te Guri i Shpuar. Qeveria ka kërkuar të merren të gjitha masat për evitimin e të gjitha masave për zhbllokimin e plotë të rrugës Prishtinë Kaçanik, meqë kjo gjendje vazhdon të shkaktojë humbje të mëdha.