Kryeministri Kosumi takoi drejtorin e ICG së për Evropë, Nikolas Uajt

Kryeministri Kosumi takoi drejtorin e ICG së për Evropë, Nikolas Uajt

Prishtinë, 31 janar 2006 /TN /QIK - Kryeministri Bajram Kosumi dje pas dite u takua me drejtorin e Grupit Ndërkombëtar të Krizave (ICG) për Evropë, Nikolas Uajt (White). Ata biseduan për zhvillimet aktuale politike në Kosovë dhe angazhimet e qeverisë në procesin e zgjidhjes së statusit final të Kosovës.
Zoti Uajt i ka përcjellë Kryeministrit Kosumi ngushëllimet e tij dhe të Grupit Ndërkombëtar të Krizave për vdekjen e Presidentit Rugova dhe ka shprehur keqardhje se kjo vizitë po bëhet në kohën e zisë në Kosovë.
Ai ka thënë se është i interesuar për qëndrimet e Qeverisë për çështjet lidhur me statusin, procesit negociator dhe të zbatimit të standardeve për Kosovën.
Kryeministri Kosumi ka thënë se edhe pas vdekjes së Presidentit Rugova institucionet e Kosovës do të punojnë në proceset e filluara, në mënyrë që statusi i Kosovës të definohet brenda vitit 2006.

Ai me këtë rast ka theksuar planin e veprimit të Qeverisë prej 44 pikave për peridhën dhjetor janar i cili është treguar shumë i suksesshëm. Kryeministri po ashtu ka njoftuar z. Uajt me planin e ardhshëm të këtij viti me 88 veprime, duke shtuar se qeveria do të vazhdoj punën në zbatimin e standardeve.
Më tutje z. Kosumi ka pohuar se delegacioni i Kosovës është i përgatitur për takimin e Vjenës. Ky takim siç dihet është shty për shkak të vdekjes së presidentit por ai pritet të mbahet kah mesi i shkurtit të këtij viti.
Z.Uajt është falënderuar për njoftimet e kryeministrit Bajram Kosumi dhe ka shtuar se organizata që drejton ai do të vazhdojë të përcjellë zhvillimet në Kosovë nga këndvështrimi i Grupit Ndërkombëtar të Krizave.