Këshilli i Evropës i gatshëm ta ndihmojë Kosovën

Këshilli i Evropës i gatshëm ta ndihmojë Kosovën

Prishtinë, 31 janar 2006 /TN /QIK - Këshilli i Evropës kërkoi sot nga kryekuvendari Nexhat Daci, më shumë përpjekje në përmbushjen e standardeve, nëpërmjet një delegacioni të këtij Këshilli.

Kryetari i Kuvendit të Kosovës në takime të veçanta priti drejtorin e Drejtoratit për Çështje Politike të Këshillit të Evropës, Mark Shojer dhe drejtorin e Grupit Ndërkombëtar të Krizave për Evropë, Nikolas Uajt.
Mark Shojer, drejtor për çështje politike të KE-së, kryesues i delegacionit të saj, tha se Kosovën po e presin sfida të vështira në muajt e ardhshëm duke premtuar njëkohësisht ndihmën e Këshillit të Evropës në këtë proces.
"Patëm bisedë konkrete dhe përmbajtësore rreth mënyrës se si KE-ja mund të vazhdojë ta ndihmojë Kosovën, autoritetet e saj dhe popullin e Kosovës me sfidat e vështira që i presin në muajt që vijnë. Në veçanti, ne do të mbështesim të drejtat e njeriut, mbrojtjen e minoriteteve, mbrojtjen e trashëgimisë kulturore, decentralizimin e çështjet e tjera si këto", tha Shojer.
Gjatë takimit me delegacionin e KE-në, është diskutuar lidhur me zhvillimet e fundit në vend, me theks të veçantë rreth nevojës së intensifikimit të zbatimit të standardeve për Kosovën, të cilat janë parakusht për bisedimet për statusin përfundimtar të Kosovës.
Ndërsa në takimin me drejtorin e Grupit Ndërkombëtar të Krizave për Evropë, Nikolas Uajt, është biseduar për format e bashkëpunimit të institucioneve të Kosovës me ato ndërkombëtare, për të cilën çështje tha se është herët të publikohen hollësitë e këtij bashkëpunimi.

Uajt tha se e kishte ngushëlluar kryeparlamentarin Daci për vdekjen e presidentit Ibrahim Rugova, duke e cilësuar presidentin Rugova si njeri të madh dhe bashkëpunëtor të mirë me institucionin që ai përfaqëson, Grupin Ndërkombëtar të Krizave për Evropë.
Z.Uajt mbrëmë është takuar edhe me kryeministrin e Kosovës, Bajram Kosumi.