Ibrahim Rugova në shtypin e Bukureshtit: Simbol i aspiratave kosovare për pavarësi

Ibrahim Rugova në shtypin e Bukureshtit: Simbol i aspiratave kosovare për pavarësi

31 janar 2006 /TN

Baki Ymeri, Bukuresht (Rumani)

“Shqiptarë të panumërt, të prekur thellë nga kjo ngjarje e dhembshme, theksuan para mikrofonave të reporterëve ndërkombëtarë, se një ceremoni e këtillë e varrimit përbën për ta “një nga momentet e themelimit të shtetit të ri”. Varri i Ibrahim Rugovës, i ngritur prej granitit të zi, është i rrethuar nga 61 pemë të mbjella përgjatë natës, secila duke përfaqësuar nga një vit, i atij që u bë simbol i aspiratave të shqiptarëve kosovarë për pavarësi”.

Si kudo në botë, edhe shqiptarët e Rumanisë e pritën me pikëllim vdekjen e liderit të shqiptarëve të Kosovës, dr. Ibrahim Rugovës. Publicitet të denjë kësaj ngjarjeje të dhembshme i dhanë edhe mediat bukureshtare si Ziua, Realitatea, Cronica Romana, Romania libera etj. Sipas të përditshmes Realitatea romaneasca (23 janar), “Vdekja e “Mahatma Gandit” të Kosovës lë një zbrazëtirë politike madhore në radhët e shqiptarëve”.

Rugova në rrugën e tij të fundit, Vdekja e Rugovës i mënjanon negociatat për Kosovën, Apel i liderëve ndërkombëtarë për qetësi, Funeralët me karakter kombëtar e shtetëror në Kosovë, janë disa nga titujt e mestitujt e shumtë të artikujve të gazetarëve rumunë. Sipas gazetares Lieselotte Millitz-Stoica (Romania libera, 27 janar), Presidenti i krahinës së Kosovës qe përcjellë dje nga përmbi njëqindmijë shqiptarë të regjionit, nga dhjetra oficialitete dhe personalitetet të huaja dhe lokale. Funeralët e presidentit Rugova kishin karakter kombëtar e shtetëror.

Shqiptarë të panumërt, të prekur thellë nga kjo ngjarje e dhembshme, theksuan para mikrofonave të reporterëve ndërkombëtarë, se një ceremoni e këtillë e varrimit përbën për ta “një nga momentet e themelimit të shtetit të ri”. Muhamet Hamiti, zëdhënësi i deridjeshëm i liderit të ndjerë kosovar, pat theksuar në deklaratën e tij se “kryetari i Kosovës do të varroset si një kryetar i vërtetë”.

Duke përshkruar nderimet e fundit që iu bënë presidentit Rugova, qëndresën dinjitoze të anëtarëve të familjes, temperaturat e ulëta, ardhjen e dhjetëramijë shqiptarëve nga fshatrat më të largëta të Kosovës, përcjelljen nëpër qendër të kryeqendrës të trupit të tij nga trupat e elitës së UÇK-së, ceremoninë zyrtare ku patën marrë pjesë rreth 30 delegacione të huaja dhe përgjegjës të panumërt evropianë, ndër të cilët edhe sekretari shtetëror për çështje evropiane pranë Ministrisë së Punëve të Jashtme të Rumanisë (Lucian Leustean); pasi përmend faktin se agjencitë e mëdha të shtypit informuan për refuzimin që ia pat bërë familja Rugova presidentit serb për pjesëmarrje në varrim, autorja rumune e Rumanisë së lirë (Romania libera), konkludon: “Varrimi qe zhvilluar në orët e pasdites, në kompleksin Varrezat e martirëve. Varri i Ibrahim Rugovës, i ngritur prej granitit të zi, është i rrethuar nga 61 pemë të mbjella përgjatë natës, secila duke përfaqësuar nga një vit i atij që u bë simbol i aspiratave të shqiptarëve kosovarë për pavarësi”.