Faruk Tasholli: Akti i injorimit të vdekjes së kritikut të madh

Faruk Tasholli: Akti i injorimit të vdekjes së kritikut të madh, të studiuesit të letërsisë dhe të estetit brilant Ibrahim Rugova, i cili bashkë me forcat e tjera politike Kosovën e çoi drejt lirisë, pavarësisë dhe demokracisë, është një turp për Lidhjen e Shkrimtarëve të Kosovës

Prishtinë, 31 janar 2006 /TN

Faruk TASHOLLI, shkrimtar

Me rastin e vdekjes së presidentit të Kosovës Ibrahim Rugova, ish kryetar i Shoqatës së Shkrimtarëve të Kosovës dhe anëtar i saj, ky asociacion i shndërruar më vonë me emrin Lidhje, nuk denjoi ta nderojë veprimtarinë e njeriut të vet as me më të voglin akt, derisa në anën tjetër një popull i tërë u përkul para tij.

I indinjuar me qëndrimin injorues ndaj një shkrimtari që po nga ky asociacion e ndërkombëtarizoi çështjen e Kosovës, unë si anëtar i po këtij asociacioni që nga viti 1990, jap dorëheqje nga Lidhja e Shkrimtarëve të Kosovës.

Unë konsideroj se jo vetëm Ibrahim Rugova, por të gjithë anëtarët e Lidhjes së Shkrimtarëve, si është bërë edhe më parë, duhet të nderohen në rast vdekjeje.

Akti i injorimit të vdekjes së kritikut të madh, të studiuesit të letërsisë dhe të estetit brilant Ibrahim Rugova, i cili bashkë me forcat e tjera politike Kosovën e çoi drejt lirisë, pavarësisë dhe demokracisë, është një turp për Lidhjen e Shkrimtarëve të Kosovës.

Për mua si shkrimtar, pse për teke të një kryesie që një organizim shoqëror e shndërron në pronë private dhe i përjashton shkrimtarët nga zia e përgjithshme kombëtare për inate dhe bindje personale politike është i papranueshëm, jonjerëzor, jocivilizues dhe jokolegial.