Dega e LDK e Podujevës bëri homazhe dhe vuri kurorë te varri i Presidentit Rugova

31 janar 2006 /TN

- Kryetari Agim Veliu: LDK në Llap përherë do të bëjë jetë me Ty z. President

Kryesia e Degës e LDK-së në Podujevë e prirë nga kryetari Agim Veliu e ku merrnin pjesë edhe kryesitë e 19 Nëndegëve dhe e 77 Aktiveve, shumë anëtarë e veprimtarë të LDK-së nga të gjitha anët e Llapit si dhe qytetarë të gjitha moshave vizituan varrin e Presidentit Rugova ku bënë homazhe vunë kurorë lulesh.
Vargut të shumë autobusëve e dhjeta veturave që kishin ardhë të organizuar nga Dega e LDK-së në Podujevë, iu kishin bashkuar edhe shumë qytetarë që të përlotur shprehin gjithë dhembjen e madhe për ndarjen fizike me Presidentin e tyre të dashur.

Tash e një javë Zyra e Degës së LDK-së në Podujevë është shndërruar në shtëpi dhembjeje krenare ku më shumë folë loti dhe heshtja, ka deklaruar menagjeri i Zyrës Naser Rama. “Që nga 21 janari kur u dha lajmi për ndarjen nga kjo jetë të Presidentit, kjo zyrë është vërshuar nga anëtarë e simpatizantë të LDK-së, por edhe qytetarë të shumtë që me lot në sy vinin për t’na ngushëlluar”, tha menagjeri i Zyrës së LDK-së në Podujevë Naser Rama.

Sipas tij, deri më tash, qindra qytetarë janë nënshkruar në Librin e pikëllimit duke i bërë nderime Presidentit Rugova, fotografia e të cilit, me shiritin e zi është vendosur afër flamurit të Dardanisë. Rama tha se që nga mëngjesi e deri në orët e vona të mbrëmjes shumë qytetarë vijnë për t’i shprehur ngushëllime Kryesisë së Degës së LDK-së në Podujevë.

Ai tha se jo vetëm zyrën e partisë së parë në Llap, por në gjithë qytetin ndihet atmosfera e zisë dhe e pikëllimit. “Përkundër të ftohtit që po merr këto ditë, kjo zyrë është bërë vend takimi i anëtarëve e veprimtarëve të LDK-së që vijnë vazhdimisht dhe nuk flasin ata, por lotët e dhembja krenare”, deklaroi Naser Rama.

Ndarjen fizike nga Presidenti Rugova, kryetari i Degës Agim Veliu e ka cilësuar të pa pranueshme. “Ndarje fizike që nuk e shpreh fjala as loti, ndarje fizike që s’mund të pranohet”, ka shkruar kryetari Veliu duke vazhduar: Ishe dhe përjetësisht mbetesh misionar i paqes, lirisë e pavarësisë, prandaj LDK në Llap përherë do të bëjë jetë me Ty z. President”, ka shkruar në Librin e pikëllimit kryetari Agim Veliu.

Do theksuar se anëtari i Kryesisë së Degës së LDK-së Ahmet Ahmeti ka njoftuar se në Librin e pikëllimin në Kuvendin komunal të Podujevës janë nënshkruar mijëra qytetarë, kurse menagjeri i zyrës së LDK-së Naser Rama ka njoftuar se gjatë këtyre ditëve të zisë e pikëllimit shumë qytetarë nga të gjitha anët e komunës së Podujevës, por edhe bashkëatdhetarë nga vendet e Evropës perëndimore, po vizitojnë zyrën dhe i shprehin ngushëllimet e dhembjen e tyre Kryesisë së Degës.

Nderimi i kujtimit për Presidentin vazhdon, kurse Llapi vazhdon heshtjen e zisë, por mbetet i përhershëm premtimi dhe betimi se amaneti i Presidentit do të qohet deri në fund...!