Vazhdojnë homazhet për simbolin e pavarësisë

Vazhdojnë homazhet për simbolin e pavarësisë - Ibrahim Rugova

Prishtinë, 30 janar 2006 /TN /QIK - Nderimet për Presidentin Ibrahim Rugova, po vazhdojnë me homazhe pranë varrit të tij në Velani.
Sot për homazhe ishin një delegacion i Grupit parlamentar të LDK-së në ora 12.00, të cilët kanë vendosë kurora lulesh. Ndërsa, më vonë ishte ministerja e Shërbimeve Publike, Melihate Tërmkolli me gjithë kabinetin e saj dhe të strukturave të tjera udhëheqëse të ministrisë, pastaj këshilltari i Presidentit të Kosovës, Skender Hyseni,
Edhe sot po vazhdojnë homazhet pranë varrit të Presidentit të ndjerë të Kosovës, Dr. Ibrahim Rugova. Qytetarë të shumtë nga vendi dhe diaspora po vazhdojnë të bëjnë nderime te varri i tij në lagjen Velania në Prishtinë.

Përveç qytetarëve, homazhe sot kanë bërë edhe Grupi parlametar i Lidhjes Demokratike të Kosovës, të cilët shprehen dhembjen e thellë për humbjen e Presidentit Rugova, ndërsa apeluan për unitet dhe forcë, të cilat thanë se duhet të jenë në prag të bisedimeve për statusin e Kosovës. Fatmir Sejdiu, i propozuar nga LDK-ja për trashëgimtar të postit të Presidentit Rugova, tha: "Vdekja e Presidentit Rugova është humbja më e madhe që e kemi përjetuar dhe ai mbetet një personalitet i pazëvendësueshëm".
Kurora lulesh mbi varrin e Presidentit Rugova vunë edhe tre këshilltarët e Presidentit Rugova, Skender Hyseni, Muhamet Hamiti e Berim Ramosaj si dhe Elmi Berisha, përfaqësues i ndërlidhjes në zyrën e senatorit Bob Doll në Uashington.
Ndërsa, ministrja e Shërbimeve Publike, Melihate Tërmkolli që ishte për homazhe me kabinetin e saj, dhe gjithë strukturat udhëheqëse të ministrisë, tha se kjo është një dhembje për të gjithë e sidomos për ata të cilët punuan një kohë të gjatë me dr.Rugovën. "Përfaqësuesit e mekanizmave të kësaj ministrie erdhëm për t'i bërë nderime Presidentit tonë të dashur. Është humbje e madhe për Kosovën ndërrimi jetë i Presidentit, i këtij kolosi të pavarësisë së Kosovës”, tha Tërmkolli duke shtuar se mbetet detyrë e madhe dhe supreme që ta çojmë deri në fund vizionin, idealin dhe amanetin e tij.
Kryetari i Kuvendit Komunal të Prishtinës, Ismet Beqiri, që poashtu ishte për homazhe, tha se po punohet vazhdimisht në përmirësimin dhe rregullimin e infrastrukturës së varrit të Presidentit më qëllim që së shpejti ky varr të marrë pamjen e duhur, çfarë i ka hije një personaliteti siç ishte doktor Rugova.

Më vonë për vizitë ishte edhe kryesia e Forumit Rinor të Lidhjes Demokratike të Kosovës. Në mesin e shumë delegacioneve të tjera nga vendi ishin edhe ai i Kuvendit Komunal të Prizrenit të kryesuar nga Eqrem Kryeziu, kryetar. Poashtu homazhe kanë bërë edhe anëtarët e Ansamblit Kombëtar "Shota".
Qytetarë të shumtë nga vendi dhe diaspora, kanë vazhduar si për uikend ashtu edhe sot të bëjnë nderime te varri i Presidentit Rugova.
Deri më sot në varrin e Presidentit Rugova kanë bërë homazhe me dhjetëra mijëra qytetarë dhe delegacione, ndërsa pritet që aty të ndërtohet mauzoleu kushtuar Presidentit.

Qytetarët vazhdojnë t'i bëjnë homazhe Presidentit Ibrahim Rugova

Prishtinë, 29 janar 2006 /TN /QIK - Mbi 1O mijë qytetarë, dje në ditën e shtatë të zisë së përgjithshme, kanë bërë homazhe te varri në Velani për të nderuar figurën e Presidentit Ibrahim Rugova, qytetarë të shumtë kanë vazhduar të bëjnë homazhe te varri në Prishtinë.

Homazhe kanë bërë disa degë të LDK-së dhe organizata joqeveritare "Shpëtimi" nga Medvegja, sportistë tanë nga Gjermania, si dhe qytetarë të shumtë nga diaspora shqiptare.

Ata thonë se duan ta nderojnë kujtimin për të dhe ta falenderojnë për punën që ka bërë. Qytetarët shprehin bindjen se vdekja e Presidentit Rugova është humbje e madhe jo vetëm për Kosovën, por edhe për gjithë botën shqiptare dhe rajonin.

Nga qytetarët tanë që jetojnë në Zvicër kishte edhe kurora që ishin vënë mbi varrin e Presidentit Rugova. Nderime kanë bërë edhe disa delegacione nga komuna të ndryshme të Kosovës.

Bashkatdhetarët tanë kishin ardhur nga Zvicra me tre aeroplanë t'i bërë nderimet e fundit Presidentit.