Amaneti i Presidentit Rugova do të qohet deri në pavarësinë e plotë të Kosovës

Amaneti i Presidentit Rugova do të qohet deri në pavarësinë e plotë të Kosovës

28 janar 2006 /TN
Mbledhja e kryesisë e Degës së LDK-së në Podujevë, e para pas kumtit të zi për ndarjen nga jeta të Presidentit Rugova, sot më shumë i gjasonte një tubimi përkujtimor lotësh e dhembjeje të madhe.

Gjatë kësaj kohe Kryetari i Degës Agim Veliu dhe deputeti i Parlamentit të Kosovës Ilaz Pireva bashkë me anëtarët e kryesisë Nexhmi Balaj, Shpejtim Bulliqi, Ahmet Ahmeti, Avdi Jusufi pritnin për ngushëllime shumë qytetarë llapjanë në mesin e të cilëve kishte edhe bashkatdhetarë nga Gjermania, Zvicra dhe vendet tjera që kishin ardhur enkas për të marrë pjesë në ceremoninë mortore të Presidentit Rugova.

Zyra e Degës së LDK-së ishte shndërruar tash në shtëpi dhembjeje krenare ku më shumë folte loti dhe heshtja. Kryetari i degës Agim Veliu në heshtje i priste dhe i përcillte qytetarët që vinin për t’u nënshkruar në Librin e pikëllimit...”Nuk mund të shkruaj sot...”, tha Kryetari i Degës Agim Veliu, derisa po nënshkruhej në Librin e pikëllimit të Degës që ai drejton...

“Që nga 21 janari kur u dha lajmi për ndarjen nga kjo jetë të Presidentit, kjo zyrë është vërshuar nga anëtarë e simpatizantë të LDK-së, por edhe qytetarë të shumtë që me lot në sy vinin për t’na ngushëlluar”, tha menagjeri i Zyrës së LDK-së në Podujevë Naser Rama. Sipas tij, deri më tash, qindra qytetarë janë nënshkruar në Librin e pikëllimit duke i bërë nderime Presidentit Rugova, fotografia e të cilit, me shiritin e zi është vendosur afër flamurit të Dardanisë. Rama tha se që nga mëngjesi e deri në orët e vona të mbrëmjes shumë qytetarë vijnë për t’i shprehur ngushëllime Kryesisë së Degës së LDK-së në Podujevë.

Ai tha se jo vetëm zyrën e partisë së parë në Llap, por në gjithë qytetain ndihet atmosfera e zisë dhe e pikëllimit. “Përkundër të ftohtit që po merr këto ditë, kjo zyrë është bërë vend takimi i anëtarëve e veprimtarëve të LDK-së që vijnë vazhdimisht dhe nuk flasin ata, por lotët e dhembja krenare”, deklaroi Naser Rama. “Edhe në Librin e pikëllimit në Kuvendin komunal të Podujevës janë nënshkruar deri tani mija qytetarë”, tha anëtari i kryesisë Ahmet Ahmeti.

Ndërsa lexojmë fjalën e sekretarit të Nëndegës së LDK-së në Llapashticë z. Jakup Qerimit, njerëzit nuk ndalen së ardhuri në Zyrën e LDK-së. “U shkëpute nga ky nënqiell i trazuar i Ballkanit si një meteor. Veprat dhe idelai YT, z. PRESIDENT, do të mbeten udhërrëfim për brezat që le pas. Ike në momentet e rënda për popullin që aq shumë e deshte...Pa TY, pavarësia nuk do ta ketë kuptimin e vet të plotë, por ne përherë do të jemi në rrugën që e trasut JU, z. President!”, ka shkruar Qerimi.

Naser Rama njoftoi se gjatë diitëve të javës më të rëndë për llapjanët, Kryesia e Degës ka pritur e përcjellur shumë qytetarë. Derisa po bisedohej për vizitat e Presidentit Rugova bërë Llapit, plaku nga fshati Sfeçël Brahim Muçiqi me të bijt Skënderin e Bedriun, i përlotur dhe plot emocione, i shprehu ngushëllime Kryetarit të degës dhe anëtarëve tjerë të Kryesisë duke hezituar të flasë, sepse flisnin sytë e tij, sepse fliste dhembja...”Emocionues ishte çasti kur erdhën paria e pleqve të Llapit...Ata që qanin si burrat dhe që na bënë të gjithëve të ngashërehemi aq shumë...”, tha ndër të tjera Naser Rama.

Ishte kjo mbledhja më e pazakonshme e Kryesisë së Degës të LDK-së në Podujevë. Anëtarët e Kryesisë të prirë nga Kryetari Agim Veliu bisedonin për ngjeshjen e radhëve, për organizimin sa më të mirë, që bashkërisht të punojnë dhe ta qojnë deri në fund amanetin e Presidentit Rugova për pavarësinë e Kosovës. Kryetari Veliu dha iniciativën që të botohet një Libër momument, një fotoreportazh e dokumentar për vizitat e Presidentit Rugova në Podujevë, që u përkrah nga të gjithë pjesëmarrësit.

Pas kohës për mbledhjen e Kryesisë së Degës, në Zyrën e LDK-së në Podujevë filluan të vijnë kryetarët e Nëndegëve dhe takimi i tyre me kryetarin e Degës Agim Veliu, ishin takime emocionale...

Nushëlloheshin mes vete miqt dhe kolegët, ata që bartën barrën e organizimit të institucioneve të pavarura të shtetit të Kosovës, sipas vizionit të Presidentit Rugova....A mund të ngushëllohet loti, ishte pyetja e vetme e administratorit të Zyrës së LDK-së, z. Naser Rama, ish kryetarit të FR të LDK-së dhe njeriut të përkushtuar për rrugën dhe programin e Presidentit Rugova...?!

Mbledhja e Kryesisë së degës së LDK-së e Podujevës dhe takimi me kryetarët e Nëndegëve, sot kaloi në shenjë të lotëve e heshtjes së madhe, por edhe dhembjes krenare për njeriun, prindin, intelektualin, politikanin, shkrimtarin dhe PRESIDENTIN e parë të Kosovës demokratike që i dha emër dhe jetë Kosovës...

Derisa nderimet për Presidentin vazhdojnë, Llapi vazhdon heshtjen e zisë, por nuk mungon krenari dhe betimi se amaneti i Presidentit do të qohet deri në fund...!

KI i LDK në Podujevë
Bekim Toçani