Tubim komemorativ në Ronneby të Suedisë

Tubim komemorativ në Ronneby të Suedisë

26 janar 2006 /TN

Shkrimtari Rizah Sheqiri në këtë tubim komemeorativ tha se Rugova u bë “Miku i madh i miqëve, miku më i madh i miqësisë. Projektuesi dhe ideatori më këmbëngulës i Pavarësisë së Kosovës… ”

Shoqata Shqiptare Kulturore ”FLAKA” nga qyteti Ronneby-Suedi në bashkëpunim me bashkatdhetarët dhe me shoqatat tjera shqiptare nga komunat e krahinës BLEKINGE të Suedisë më 25.01.2006 mbajti një tubim komemorativ në shenjë nderimi e përkujtimi të kryetarit të Kosovës Dr. Ibrahim Rugova.

Me një minutë heshtje dhe me përkulje para fotografisë së kryetarit Ibrahim Rugova bashkatdhetarët që jetojnë në këtë Krahinë të Suedis nderuan kryetarin e ndjerë dhe u shënuan në librin e zisë.

Për veprën dhe shëmbëlltyrën e Kryetarit Dr. Ibrahim Rugova foli shkrimtari i njohur Rizah Sheqiri, anëtar i Shoqatës së Shkrimtarëve të Suedisë, i cili për personalitetin e Ibrahim Rugovës mes tjerash tha se ai ishte: ” Njeriu që popullin shqiptar e dhe Kosovën e bëri mike me shumë popuj… Njeriu që me kohë e mësoi mirë atë fjalën e urtë popullore se “miqtë janë krahët e njeriut!” dhe të cilën e bëri bazament dhe filosofi të jetës dhe veprimtarisë së tij. Duke krijuar kështu miqësi të sinqerta gjithandej botës.

Prandaj humbja e Kryetarit të parë e shumëvjeçar të Kosovës, humbja e këtij krijuesi të shquar dhe vdekja shumë e hershme e këtij Njeriu, është një tragjedi e vërtetë për Kosovën e për popullin e saj, është një tragjedi dhe një humbje e madhe për shqiptarët kudo janë, është një humbje për Ballkanin, për Evropën e për Botën…” Dhe shtoi se Rugova u bë “Miku i madh i miqve, miku më i madh i miqësisë. Projektuesi dhe ideatori më këmbëngulës i Pavarësisë së Kosovës… ”

Nga ky tubim iu dërgua telegram ngushëllimi familjes së Presidentit Rugova, institucioneve dhe popullit të Kosovës.

Në telegram thuhet:

Lajmin për vdekjen e Presidentit të Kosovës Dr. Ibrahim Rugova,na ka tronditur dhe na ka prekur thellë edhe ne bashkatdhetarëve që jetojmë në diasporë.

Edhe pse fizikisht jemi larg vendlindjes, ne qëndrojmë pranë jush në këto momente të rënda dhe bashkëndjejmë me ju këtë dhembje të madhe për gjithë qytetarët e Kosovës. Me vdekjen e Presidentit Rugova, Kosova dhe qytetarët e saj kanë humbur një personalitet të shquar dhe një lider të madh. Pranoni ju lutem ngushëllimet më të thella dhe më të sinqerta në emër të shoqatës FLAKA dhe në emër të të gjithë bashkatdhetarëve të komunave të Blekinges në Suedi.

Në e mër të gjithë bashkatdhetarëve të këtushëm. / Sami Dobërlluka - kryetari shoqatës kulturore FLAKA në Ronneby – Suedi.