Reuters: Perëndimi kërkon nga kosovarët që të bashkohen për të mbushur boshllëkun pas vdekjes së Rugovës

Reuters: Perëndimi kërkon nga kosovarët që të bashkohen për të mbushur boshllëkun pas vdekjes së Rugovës

Prishtinë, 26 janar 2006 /TN /QIK - Fuqitë perëndimore dëshirojnë që udhëheqja e përçarë e Kosovës të bashkohet për bisedimet për pavarësi, për të mbushur kështu vakuumin e krijuar pas vdekjes së kryetarit të Kosovës, Ibrahim Rugova, kanë deklaruar zyrtarët.
Shefi për politikë të jashtme dhe për siguri i BE-së, Havier Solana, si dhe komisionari për zgjerim, Olli Ren, disa orë para varrimit të Rugovës, dje u takuan me udhëheqësit e Kosovës.
“Ai gjatë këtij takimi ishte paraparë t’iu thotë se duhet të punojnë së bashku, të jenë seriozë në të gjitha fushat”, deklaroi një diplomat i lartë evropian.
SHBA-ja gjithashtu apeloi te shqiptarët e Kosovës që të eliminojnë përçarjet mes tyre, për të paraqitur një pozicion unik në negociatat për statusin e ardhshëm të Kosovës, të cilat janë suspenduar për shkak të varrimit.
“Rugova ishte një njeri, mungesa e të cilit do të ndihet, ngase ai bindshëm ishte figura më e lartë dhe më e respektuar në fushën politike të Kosovës dhe për arsye se ishte edhe figurë unifikuese”, tha Nikollas Bërns, zyrtari numër tre i Departamentit Amerikan, i cili e ka kryesuar politikën amerikane ndaj Ballkanit.
“Tani, pas vdekjes së tij, vdekjes së tij tragjike, ne shpresojmë shumë se udhëheqësit kosovarë do të bëjnë një rivlerësim dhe të angazhojnë veten për unitet”, tha Bërns para gazetarëve në Uashington.
Vdekja e Rugovës të shtunën, nga kanceri në mushkëri, ndodhi në prag të fillimit të negociatave të drejtpërdrejta me Serbinë për statusin e Kosovës. Por, takimi i cili ishte paraparë të mbahet gjatë kësaj jave në Vjenë, është shtyrë për muajin shkurt.
Rugova, i zgjedhur dy herë kryetar, ka dominuar politikën e Kosovës dhe betejën e shumicës shqiptare për pavarësi gjatë 15 vjetëve të kaluara. Ai nuk e ka emëruar trashëgimtarin e tij dhe askush nuk ka dalë në sipërfaqe si udhëheqës i mundshëm nga radhët e partisë së tij tejet të përçarë.
“Nuk e kemi identifikuar një njeri që i prin garës për të trashëguar atë”, theksoi një zyrtar i OKB-së në Prishtinë. Të brengosur nga mundësia e dhunës së re etnike, përkrahësit perëndimorë të Kosovës kërkojnë një zgjidhje të fatit të Kosovës, e që konsiderohet se sipas të gjitha gjasave do të jetë “pavarësia e kushtëzuar”, brenda vitit.
Zyrtari i OKB-së deklaroi se periudha 15 ditore e zisë, e cila filloi të hënën, do të shfrytëzohet për të gjetur një pasardhës të Rugovës, i cili do të kryesojë ekipin negociator.
"Ekziston një apetit në mesin e udhëheqësve politikë që të lëvizet drejt zgjedhjeve të reja, pas periudhës së zisë, në momentin kur kjo duket e favorshme", tha ky zyrtar. Kryetari i Kosovës zgjidhet nga parlamenti. Ai më tutje shtoi se negociatori kryesor i OKB-së, Marti Ahtisari, do të tubojë të dyja palët, posa ato të jenë të gatshme.
"Është një nxitje për të lëvizur me shpejtësi", theksoi ky zyrtar.